Hebereɓɛ 6

1Ɛ́ mí bí nɛ ke wé hɔ́ hán bòo lɛ ɛ́ ɓɛ́ kɛ̀rɛa àá kie ɔ̀ Kirisa bòo hũn ɛ̀ kè dìń kɛ̀rán fúu, kɛ́ mí nɛ ke vɛ àá híɛhɔ́ ɛ̀ kɛ̀rán ɓɛ́ nìnbirìe lɛ ɛ́ dɛ̃un vɔ́ bòo. Ɛ́ ké yí ke bĩní khũ̀á ɛ̀ wé hɔ́pe kɛ̀ránlɔ́ fìi ɓánlén bòo ɛ̀ kè dìń lɔ̀n ɛ̀ kɛ̀rán wɛ̀; lɛ iè hɔ̀ lɛ ɛ́ ɓɛ́ nɛ ɓɛ nìnbirìe ɛ́ fɔ́ɓán ɛ̀ ɓɛ̀ zɛ̀ní ɓɛ́ tĩɛ̀ ɛ̀ ɓɛ̀ fùansí hɔ́ bòo lɛ ɛ́ wóò ɓen àá hɔ́ húmú wénlɔ́ ǹ, ɛ̀ ɓɛ̀ dɛsĩ̀ Dɔfĩn. 2Ɛ̀ kè lò yí ke bĩní dìń kɛ̀rán miɛ àá hɔ́ ńlíiníɲumu bòo, àá hɔ́ níhĩ́ bènlɔ́ ɓɛ̀ nìnbirìe lɔ̀n ɛ̀ dàá hɛ̃un Dɔfĩn lɛ́ ɓà ǹ bòo, àá ɓɛ́ nìhiè vìerɔ́ àá hɔ́ lìe lènlɔ́ lɛ yá vé bòo. 3Ɛ́ mí nɛ ke fùansí hɔ́pe sí ǹ ɛ̀ kè vɛ àá híɛhɔ́. Ɛ́ sí iè hɔ̀pe bòo lɛ ɛ́ ke ɛ̀ wé kɛ́ Dɔfĩn ɛ́ dàa ɓen tɛ̀.

4Ɓɛ̀ nìnbirìe dɔ̀ ɛ́ mɔn Dɔfĩn ńpiemu, ɛ̀ ɓɛ̀ díndíe pehɔ̀ bɛ́záanú hɛ̃mù bòo, ɛ̀ ɓɛ̀ yú lé Mɛkɛ̃n-Sãanu. 5Ɓàasiè ɛ́ mɔn kɛ́ Dɔfĩn bienù ɛ́ sãa, ɛ̀ ɓɛ̀ lò mɔn lè dímíɲɛ́ lɛ vaá-ɓén pànkɛ́, 6kɛ́ ɓɛ́ lò pɛ́wi khũ̀a kùerɛ zɔn ɓɛ́ bòo bɔ̀kĩ́ɛ wénlɔ́ hũn, hɔ́rɔsí ɛ̀ ɓɛ̀ wo yí dɛ̀ yá bĩní khũ̀á zɛ̀ní ɓɛ́ tĩɛ̀ ɛ̀ ɓɛ̀ ɛ́ fùansí ɓɛ́ bɔ̀koohɛ̃ wénlɔ́ ǹ wɛ̀. Ɛ́ kɛ̀amu, ɛ̀ ɓɛ̀ iè pe wo bĩniɛ khũ̀a ɛ́ ɔ̀ nìnbírɔ Zuú ɛ̀ ɓáa lé ɓáalén dã̀anù lɔ̀n, ɛ̀ ɓɛ̀ ɛ́ lè lùwiè ɛ̀ dí-e ǹ ɓɛ̀ nìzã̀amáa yìe hũn. 7Ɛ́ mí húi hɔ́ bòo lɛ ɛ́ wóò wé lé mún hũn lò: lè sṹsùnù ɛ́ wóò vĩ̀ hɔ̀ hóo ɲumu lɛ wóò tè síɛ fúu ɛ̀ dàa lɛ́ ɛ̀ hɔ̀ bɔ̀vɛ̀riè ɛ̀ dàa hɛ hɔ biè ɛ̀ lɛ́ ápe lɛ te le ɛ́ vɛ̀ ǹ. Ɛ́ Dɔfĩn ɛ́ wóò dúɓɛ́ lépe mún sɔ ǹ lò. 8Kɛ́ hɔ́ ɓen wɔ́ ńɲinlɛ̀a àá mí ńɲíi-kùahĩ́ ɛ́ temu wóò sɛ̀ lèpe mún sɔ hũn, ɛ̀ pelè tũ̀nú dɔ̀ mí lò! Ɛ́ fùa fùa ɛ̀ ɓɛ̀ ɛ́ dánkɛ́ní lé, ɛ̀ pehɔ̀ vɛ vénlén, ɛ̀ ɓɛ̀ ɛ́ dé hɔ́ dṹn lè ǹ.

9Hɛ̀rí kɛ́ ké ɛ́ bie kɛ̀amu mìpe kìe nìɛ lɛ ɛ́ ké wɛ, hɔ́rɔsí ɛ̀ kè lò den dũmuasɛ̃̀ nɛ mí wi le wṹn lɛ sãa lɔ̀n, lèpe lɛ ɛ́ mii dàa miɛ ɛ̀ dàa vɛ le fuerɛ̀ hũn. 10Dɔfĩn ɛ́ yí Dɔfĩn lɛ yá cã̀aní wɛ̀. Pehɔ̀ hũn ɛ́ yá ɓé hɔ́ tɔnlɔ́ lɛ ɛ́ mí tɛ́ ǹ àá lé wanminu lɛ ɛ́ mí dàa ǹ wɛ̀. Mí ɛ́ zɛ̃́niɛ kɛ́ mí wɛ hɔpe Dɔfĩn, ɛ́ mí dàa wɔ́ hɔ́ bɔ̀tente àá ɓɛ́ ńdɛsĩ̀rìe, ɛ̀ mì lò pɛ́wi ɛ́ vɛ à híɛhɔ́ ɛ́ hɔ̀ wé. 11Kɛ́ ké den wɛ nɛ mipe àá mí nì-coohɛ̃ ɛ̀ cɛ mi kuò fúu ɛ̀ vɛ víení, bòo lɛ ɛ́ wé ɛ̀ hɔ̀ bòo lɛ ɛ́ mí ɛ́ hìé àá ńdɛsĩ̀nlɔ́ ɛ̀ dàá ɲunù vɛ tí. 12Ɛ́ mí bí dí paahĩ́, kɛ́ ɓɛ́ nìɛ lɛ can ɓɛ́ kuò cɛ̃̀un hɔ̀ ńdɛsĩ̀nlɔ́ hũn bòo lɛ ɛ́ ɓɛ́ wóò wé iè pe ɛ́ mí ɓiɛ̀ wóò wé. Ɓɛ̀pe ɛ́ wóò yí hɔ́ bòo lɛ ɛ́ Dɔfĩn lɛ́ mí ɲunù nɛ mí ɓén lɛ́ ɓà ǹ.

Dɔfĩn ɲunù lɛ ɛ́ Hɔ́ lɛ́ ɛ́ yí dɛ̀ yá khíi wɛ̀

13Pɛ̃̀hṹ lɛ ɛ́ Dɔfĩn dàa hàarí lɛ́ mí ɲunù ɔ̀ Abarahaamu ǹ nɛ ɓén dúɓɛ́ à ǹ, ɛ́ Hɔ́ hàarí wĩ́ɛ mí kùrú yèrè lɔ̀n iè hɔ̀ lɛ ɛ́ nìnbírɔ lɛ ɛ́ pɔ hɔpe Dɔfĩn lɛ ɛ́ Hɔ́ dɛ̀ ɛ́ wĩ́i lɔ̀n ɛ́ mí wɛ̀. 14Ɛ́ hɔ́ wo hàarí nɛ làa: «Nin dúɓɛ́ kɔ ǹ àá bɔ̀bín, nin lɛ́ ɛ̀ kɔ̀ hṹn nìɛ ɛ̀ bùoní cɛ̃̀un.» 15Ɛ́ Abarahaamu ɛ́ hɛ̃̀ mí hũn à hìe á yú hɔ́pe bòo lɛ ɛ́ Dɔfĩn ɛ́ lɛ́ mí ɲunù nɛ ɓén lɛ́ à ǹ. 16Nìnbirìe ɛ́ ɓen ɓɛ ɛ̀ wĩ́ì, ɛ̀ ɓɛ̀ wóò wĩ́i ɔ́ nìnbírɔ lɛ ɛ́ pɔ ɓɛ lɔ̀n, ɛ̀ hɔ̀pe wĩ́irɔ́ sɔ ɛ́ temu wóò zɛ̃́ní kɛ́ hɔ́ bòo lɛ ɛ́ ɓɛ́ nɛ ɓɛ ɛ̀ wé ɛ́ yí dɛ̀ yá khíi, ɛ̀ hɔ̀ lò te le ńwũ̀anín míkùi ɛ́ wóò viení. 17Ɛ́ kɛ̀amu, ɛ́ Dɔfĩn ɛ́ den hàarí wɛ mii zɛ̃́ní wìée ɛ̀ lɛ́ ɓɛ́ nìnbirìe lɛ Hɔ́ lɛ́ mí ɲunù nin kɛ́ hɔ́pe bòo lɛ ɛ́ Hɔ́ hàarí lɛ́ mí ɲunù nɛ ɓén wé ɛ́ lɛ́ ɓà ǹ ɛ́ iè bòo lɛ ɛ́ yí dɛ̀ ɛ́ yá khíi wɛ̀. Ɛ́ sí iè hɔ̀pe ɛ́ Hɔ́ dàa wĩ́ɛ ɛ́ páa lè ɲunù lɛ ɛ́ Hɔ́ lɛ́ ɓà ǹ lɔ̀n. 18Ɛ́ Dɔfĩn lɛ yáà ɓúukɛ ɓúo ɛ́ wo wɔ́ hɔ́pe bòo ɲunhɛ̃̀ ɲu sɔ sí, lɛ iè bòo lɛ ɛ́ yí dɛ̀ yá khíi wɛ̀. Ɛ́ sí iè hɔ̀pe ɛ́ képe lɛ ɛ́ yú ké te tànkɛ̀nílén piè viì, ɛ́ Hɔ́ lɛ́ lé tĩhiè dɛ̀bɛhɔ́ nin, ɛ́ ké wo ɛ́ hìé àá ńdɛsĩ̀nlɔ́ nɛ ké ɓén yí hɔ́pe bòo lɛ ɛ́ Hɔ̀ lɛ́ mí ɲunù nɛ mí ɓén lɛ́ kìe. 19Ɛ́ hɔ́pe bòo lɛ ɛ́ ké ɛ́ hìé àá ńdɛsĩnlɔ́ ɛ́ temu lɛ́ ɛ́ ké dàa fɛ́sí dɛ̃̀ sãa. Ɛ́ sí iè hɔ̀pe ɛ́ ké dàa dɛ̀ lè fúrɛ dɛ̀bɛhɔ́ lɛ zɔn cénkɛa lé Dɔfĩn zũ-bɛhɔ́ tĩ́ihṹ ɛ́ pɛ̃́un ɛ́ vɛ zɔ pelè hũn. 20Ɛ́ sí ɛ́ iè yán ɛ́ Yiezu ɛ́ dú ké híɛhɔ́ ɛ́ van zɔn nin bòo lɛ ɛ́ wé ɛ̀ kè dàá ɓiɛ̀ yí vɛ zɔ. Á wo wɔ́ á khɛ̃́ndàarɔ wì-bɛhɔ́ pɛ̃̀hṹ lɛ́ yá vé hũn kɛ̀a ie Mɛlikisedɛɛke bòo sí.

Currently Selected:

Hebereɓɛ 6: bwj

Highlight

Copy

Compare