Efɛɛzi Siè 4

Ɓɛ̀ ńdɛsĩ̀riè iè dìcóoní kɛ̀a ie hɔ tɛkɛ̀a bòo sí

1Lɛ iè hɔ̀ bòo lɛ ɛ́ nín mì hɛ̃nnin nɛ mi wóo wé, ǹpe lɛ ɛ́ iè ɔ̀ kɛ̀sí nùún iè hɔ̀ lɛ ɛ́ nín ɔ̀ Ɲunsɔ tɔnlɔ́ ɛ̀ tɛ́: Mì wóo dàá míte sãàní ɛ̀ ɓáaníɓán àá hɔ́ bòo lɛ ɛ́ hɔ́ Dɔfĩn ɛ́ vɔn miɛ nɛ mi wé. 2Mì wóo síɛní míte ǹ, ɛ̀ mì wé nìnbirìe lɛ ɛ́ wuawi, ɛ̀ mì lò wóo hĩ̀ mì hũn. Mì nɛ hɔ́rɔ wóo hĩ̀ mí hũn àá ɓán ńkɔnù, ɛ̀ mì sĩiníkɛ ɓán lè wanminu hũn. 3Mì wóo cɛ mi kuò ɛ̀ lɛ́ nɛ mi ɲunù ɛ̀ wé dìcóoní lè Mɛkɛ̃n-Sãanu pànkɛ́ hũn; Lèpe Mɛkɛ̃n-Sãanu ɛ́ te miɛ wóò wé àá dìcóoní ɛ̀ lè hũn-wiɛ̀ ɛ̀ dàá kań mí tĩ́ihṹ. 4À Kirisa tɛkɛ̀a ɛ́ iè dìcóoní ɛ̀ lèpe Mɛkɛ̃n-Sãanu ɛ́ lò iè dìcóoní. Ɛ́ kɛ̀amu, ɛ́ lé tĩì bènlén ɛ́ lò ɓiɛ̀ iè dìcóoní, lèpe lɛ ɛ́ Dɔfĩn vɔn miɛ bòo hũn. 5Ɲunsɔ wìcóoní ɛ́ temu wi, ɛ̀ hɔ̀ ńdɛsĩ̀nlɔ́ ɲún-cóoní ɛ́ temu wi, ɛ̀ hɔ̀ ńlíiníɲumu ɲún-cóoní ɛ́ temu wi. 6Ɛ̀ Dɔfĩn wìcóoní ɛ́ temu wi, Hɔ̀ iè kèpe kè kùi ɓà Yàá, ɛ̀ Hɔ̀ wi hɔ bòo míkùi ɲún hũn, Hɔ̀ ɛ́ tɛ́ àá képe kè-kùi, ɛ̀ Hɔ̀ ɛ́ wi kepe kè kùi hũn.

7Kɛ́ képe kè kùi àá ké nì-cóohɛ̃ ɛ́ yú Dɔfĩn hɛ̃mù bòo, hɔ̀pe lɛ á Kirisa ɛ́ te màatɛ̃́kɛa ɛ́ lɛ́kɛ kie ǹ. 8Ɛ́ sí iè hɔ̀pe ɛ́ hɔ́ dàa wɛ̃́ lé Dɔfĩn bienù vɛ̃hṹ hũn ɛ́ nɛ:

«Hɔ̀ lɛ á yòó vaá-vɛ sɔ́n sɔ́n hɔ̀ hóohũn,

Á fɔ́ ɓɛ́ kɛ̀sí nìɛ dɔ̀ ɛ́ dàa yòó cɔ́,

À lò lɛ́ hɔ́ hɛ̃mù bòo ɓɛ̀ nìnbirìe ǹ.»

9Ɛ́ ɓɛ́ ɓen nɛ a yòó cɔ́ iè bòo ɛ́ ɓɛ́ nɛ ńɓuò? Hɔ̀pe sí iè bòo ɛ́ den ɛ́ zɛ̃́ní kɛ́ lɛ à yòó lan, á den siɛ van lè sṹsùnù fìi hũn vɔ́. 10Ápe lɛ siɛ van lè sṹsùnù fìi hũn ɛ́ lò ɓiɛ̀ iè ɔ̀pe lɛ ɛ́ yóò van hɔ̀ hóohũn ɛ́ yòó tú lé sí míkùi. 11Àpe ɛ́ te hɔ hɛ̃mù bòo àá mí ɲúuhɛ̃ ɲúuhɛ̃ ɛ́ lɛ́kɛ ɓɛ nìnbirìe n: à lɛ́ ɛ́ ɓɛ́ dɔ̀ ɛ́ wɔ́ mí tɔnkɛriè, ɛ̀ ɓɛ̀ dɔ̀ ɛ́ wɔ́ Dɔfĩn bɔ̀háaníriè, ɛ̀ ɓɛ̀ dɔ̀ ɛ́ wɔ́ Dɔfĩn Bentĩnu buieriè, ɛ̀ ɓɛ̀ dɔ̀ ɛ́ wɔ́ ɓɛ́ pisieriè, ɛ̀ ɓɛ̀ dɔ̀ ɛ́ wɔ́ ɓɛ́ kɛ̀ránliè. 12Ɛ́ kɛ̀amu, ápe Kirisa iè pe wo lɛ́ ɛ́ ɓɛ́ nìɛ lɛ bòo sɛ̃̀ hɔ̀ Dɔfĩn ɛ́ dàa dɛ̀ hɔ̀pe Dɔfĩn tɔnlɔ́ ɛ́ wóò tɛ́, bòo lɛ ɛ́ wé ɛ̀ ɓɛ̀pe ńdɛsĩ̀rìe lɛ iè ɔ̀ Kirisa tɛkɛ̀a ɛ̀ dàá vɛ vanlɔ́ àá híɛhɔ́ ɓɛ́ ńdɛsĩ̀nlɔ́ hũn, 13fúu ɛ̀ kèpe kè kùi ɛ̀ wo páaní wé dìcóoní hɔ̀ ńdɛsĩ̀nlɔ́ hũn ɛ̀ kè lò páaní dũń ɔ́ Dɔfĩn Zuú ɛ́ sãàní, ɛ̀ kè wo be hɔ ńdɛsĩ̀nlɔ́ hũn, ɛ̀ wé ɓɛ́ ńdɛsĩ̀riè lɛ ɲunù tú kɛ̀a ie Kirisa. 14Ɛ́ kɛ̀amu, ɛ́ ké wo yá bĩní ɛ́ dìń kɛ̀a zĩncã́ahɛ̃ wɛ̀. Ké yá bĩní dìń kɛ̀a ie ɲumu wiè lɛ ɛ́ dìɛkɛ hɔ ɲun-bɛhɔ́ lɔ̀n lè pinpinù núnú hũn wɛ̀. Ɛ́ ɓɛ́ nìnbirìe ɛ́ wo yá bĩní khɛ̃̀níkɛ kie ɛ́ yínin àá ɓɛ́ hɛ́cín biehĩ́ àá ɓɛ́ kɛ̀ránlɔ́ àá mí ɲúuhɛ̃ ɲúuhɛ̃ ɛ̀ dàá fĩiní kie wɛ̀. 15Ɛ́ ké wo ɛ́ munkɛ hɔ̀ bɔ̀berà lé wanminu hũn, ɛ̀ kè wo ɛ́ tí hɔ́ bòo míkùi hũn ɛ́ yòó dɛ̃ ape Kirisa, àpe lɛ ɛ́ temu iè lèpe ɲún. 16Àpe ɛ́ temu ɛ́ lɛ́ ɛ́ hɔ́ tɛkɛ̀a àá mí dáahĩ́ míkùi ɛ́ dàa can ɓán ɛ́ wɔ́ dìcóoní; ɛ̀ hɔ̀ hũà sɛ̃̀mɛ́kɛlénɓɛ̀ míkùi ɛ́ te hɔ́ tɛkɛ̀a ɛ́ ciɛniɛ ɓán. Ɛ́ dúrɔ ńdáanú ɛ́ ɓen ɛ́ mí tɔnlɔ́ ɛ̀ tɛ́ àá mí híɛhɔ́, ɛ̀ hɔ̀pe tɛkɛ̀a míkùi ɛ̀ dàá tí ɛ̀ yòó lan le wanminu hũn.

Lè mɛkɛ̃nì dɛ̀fĩì lɛ ɛ́ yí é Kirisa hũn bòo

17Ɛ́ lɛ iè hɔ̀ bòo lɛ ɛ́ nín hɛ̃nnin mì viì, nín hɔ̀ hɛ̃nnin cɛ̃̀un mí viì kè Ɲunsɔ yèrè lɔ̀n: mì bí bĩní wóo dàá míte kɛ̀a ie ɓɛ nìɛ lɛ ɛ́ yí dũ Dɔfĩn wɛ̀, ɓɛ̀pe lɛ ɛ́ wóò wé ɓɛ́ hũn vànminù lɛ ɛ́ ɲún mí ɛ̀ ɓɛ̀ bè máahṹ. 18Peɓɛ̀ bɔ̀dũmunù ɛ́ wi síbínú hũn, ɛ̀ peɓɛ̀ viì ɛ́ ni àá lé mɛkɛ̃nì lɛ ɛ́ Dɔfĩn ɛ́ wóò lɛ́, iè hɔ̀ lɛ ɛ́ ɓɛ́ yí dũ bòo dɔ̀ ɛ̀ peɓɛ̀ tĩɛ̀ ɛ́ lò dɛ̃un cɛ̃̀un. 19Ɓɛ̀ wo bĩniɛ yí dũ bòo dɔ̀ lùwiè wɛ̀. Ɛ́ ɓɛ́ dàa wo khie khɔ́ zɔn hɔ̀ ńwékɛkũǹ hũn ɛ́ dàa wóò wé hɔ́pe bòo lɛ ɛ́ wóò liení ɓɛ́ kɛ́ ɓɛ́ yɛ̀rɛ̀ yá ɓaà ɓɛ́te wɛ̀.

20Kɛ́ mípe, hɔ̀pe sí ɛ́ den yí hɔ́pe bòo lɛ ɛ́ ɓɛ́ kɛ̀rɛa àá miɛ à Kirisa bòo hũn wɛ̀. 21Ń dũ sãàniɛ kɛ́ mí ɲɛ́ ápe Yiezu Kirisa bòo, ɛ̀ hɔ̀ lɛ ɛ́ mí iè ɓɛ̀ ńdɛsĩ̀rìe ɛ́ ɓɛ́ lò kɛ̀rɛa miɛ àá hɔ́ bɔ̀berà lɛ ɛ́ wi-e ǹ. 22Ɛ́ mí fɔ́ɓán ɛ̀ mì fùansí mí mɛkɛ̃nì dɛ̀kĩ́i ǹ àá pelè bɔ̀werà lɛ te miɛ ɛ́ hṹn wóò vɛ́ ɛ̀ dàá vɛ hɔ bɔ̀koohɛ̃ pɔnù hũn, ɛ̀ khɛ̃̀níkɛ miɛ ɛ̀ yáakɛ. 23Ɛ̀ mì lɛ́ nɛ le Mɛkɛ̃n-Sãanu ɛ̀ zɛ̀ní mí tĩɛ̀ ɛ̀ hɔ̀ wé bɔ̀fĩɛ̀, 24ɛ̀ mì kań lé mɛkɛ̃nì dɛ̀fĩì hũn kɛ̀a bòo lɛ ɛ́ Dɔfĩn ɛ́ dàa mɛ́ miɛ ɛ́ lɔ́ɓán àá míte hɔ̀ cã̀anírɔ́ àá hɔ́ ceremú hũn, hɔ̀pe lɛ ɛ́ hɔ́ bɔ̀berà ɛ́ te wóò dàá ɓén.

25Ɛ́ sí iè hɔ̀pe ɛ́ mí dàá pĩ́ hɔ́ ɓúo ɓúukɛrɔ́, ɛ̀ nɛ hɔ́rɔ ɛ̀ wóo bie hɔ bɔ̀berà ɛ̀ lɛ́ ɓá ńkɔnù ǹ, iè hɔ̀ lɛ ɛ́ képe kè kùi ɛ́ wi tɛkɛ-cóoní ǹ. 26Kɛ́ mí tĩɛ̀ ɛ́ siɛ hĩ́nà, ɛ̀ mì ɓaà mìte ɛ̀ mì bí wé bɔ̀koohɔ́ wɛ̀; ɛ̀ mì bí lɛ́ nɛ wurù ɲún ɛ̀ siɛ vɛ lí ɛ̀ tɛ̀rɛ́ mí tĩcĩ̀nín wɛ̀. 27Mì bí lɛ́ wṹn Situanɛ ǹ nɛ a be nin ɛ̀ dàá lɛ́ ɛ̀ mì wé bɔ̀koohɔ́ wɛ̀. 28Nɛ alɛ ɛ́ hṹn wóò kɛ̃̀mɛ́kɛ ɛ̀ bí bĩní kɛ̃̀mɛ́ bòo, kɛ́ á pĩ̀iní míte à tɛ́ hɔ́ tɔnlɔ́ ɛ̀ dàá hɛ̃ míte, à lò yí hɔ́ dɔ̀ ɛ́ dàá khíi sĩiní ɓɛ́ lɛ ɛ́ hɔ́ bòo ɛ́ pɔ. 29Mì bí wóo nɛ ben-làahɛ̃ ɛ̀ lé àá mí ɲihĩ́ɛ wɛ̀; kɛ́ hɔ́ biehĩ́ lɛ tũ̀nú wi iè pe ɛ́ mí wóo bie, hɔ̀ biehĩ́ lɛ ɛ́ wóo lɛ́ hɔ́ bénlɔ́ ɛ̀ hɔ̀ hĩ̀iníkɛ ɓɛ nìnbirìe tĩɛ̀, ɛ̀ hɔ̀ wé hɔ́ bɔ̀tente àá ɓɛ́pe lɛ ɛ́ hɔ̀ ɲí. 30Mì bí wóo yaaní lé Mɛkɛ̃n-Sãanu tĩì wɛ̀. Dɔfĩn ɛ́ lɛ́ lé miɛ ǹ nɛ le wé mípe mì tĩì bènlén lɛ ɛ́ zɛ̃́ní kɛ́ zɔn dɔ̀ ɛ̀ hɔ̀pe Dɔfĩn ɛ́ ɓén leń miɛ ɛ́ lé hɔ́ bɔ̀koohɔ́ núnú hũn ɛ́ viení. 31Ɛ́ mí leń hɔ́ hiɛ̀rɔ́ bòo míkùi ɛ̀ lé mí tĩɛ̀ hũn, ɛ̀ mì bí wóo dàá lé tĩcĩ̀nín mì tĩɛ̀ hũn wɛ̀, ɛ̀ mì bí wóo lɛ́ nɛ mi tĩɛ̀ ɛ̀ hĩ́ní wɛ̀, ɛ̀ hɔ̀ kankán wũamɛkɛà àá hɔ́ tòokɛà ɛ̀ mí fùansí nin ɛ̀ lè mɛkɛ̃nɲiì àá mí ɲúuhɛ̃ míkùi ɛ́ mí lò fùansí nin. 32Mì wóo wé ɓán àá bɔ̀tente, ɛ̀ mì mi ɓán miinɛ. Ɛ̀ mì wóo dé sɛ́wɛ́rí ɛ̀ lɛkɛ ɓán kɛ̀a bòo lɛ ɛ́ Dɔfĩn ɛ́ dàa dɔ́ sɛ́wɛ́rí ɛ́ lɛ́ miɛ ǹ ɔ̀ Kirisa bòo hũn.

Currently Selected:

Efɛɛzi Siè 4: bwj

Highlight

Copy

Compare