Efɛɛzi Siè 3
3
Pooli tɔnlɔ́ lɛ á ɛ́ tɛ́ ɓɛ́ lɛ yí ɓɛ́ Zuifuɓɛ tĩ́ihṹ bòo
1Ɛ́ sí iè hɔ̀pe ɛ́ ńpe Pooli ɛ́ dàa ɛ́ Dɔfĩn ɛ̀ hɛ̃nnin. Ǹpe iè ɔ̀ kɛ̀sí nùún lɛ ɛ́ ɔ̀ Yiezu Kirisa tɔnlɔ́ ɛ̀ tɛ́ mípe lɛ ɛ́ yí ɓɛ́ Zuifuɓɛ bòo hũn. 2Mí lò wo ɲɛ́ àá bɔ̀bín kɛ́ Dɔfĩn àá mí hiì ɛ́ dɔ́ tɔnlɔ́ niǹ núnú hũn mìpe mì bòo hũn. 3Dɔfĩn ɛ́ zɛ̃́niɛ bòo lɛ hṹn tànkɔ̀niɛ dũńlɔ́ àá mi, kɛ̀a bòo lɛ ɛ́ ń dàa khɛ̃̀nɛ yòó wɛ̃́ hɔ́ biehĩ́ bìcínbóo pehɔ̀ bòo hũn; 4ɛ́ mí ɓen ɛ́ hɔ̀ kɛ̀rán ɛ́ mí ɛ́ mi bòo lɛ ɛ́ ń dàa dũ hɔ bòo lɛ ɛ́ hṹn tànkɔ̀niɛ ɔ̀ Yiezu Kirisa bòo hũn. 5Lè pɛ̃̀hṹ lɛ khie hũn, ɛ́ Dɔfĩn ɛ́ hàarí yí zɛ̃́ní hɔ́pe mí bòo lɛ hṹn tànkɔ̀niɛ ɛ̀ lɛ́ ɓɛ́ nìnbirìe ǹ wɛ̀; kɛ́ kɛ̀a sáalɛ, ɛ́ Hɔ́ den zɛ̃́niɛ hɔ̀ àá mí Mɛkɛ̃ni ɛ́ lɛ́ á Yiezu tɔnkɛriè àá ɓɛ́ Dɔfĩn bɔ̀háaníriè ǹ. 6Ɛ́ hɔpe bòo lɛ ɛ́ hṹn tànkɔ̀niɛ ɛ́ iè hɔ̀ lɛ: le Bentĩnu pànkɛ́ hũn, ɛ́ ɓɛ́pe lɛ yí ɓɛ́ Zuifuɓɛ àá ɓɛ́pe Zuifuɓɛ ɛ́ ɓɛ ɛ̀ páaní yí hɔ́ bòo lɛ ɛ́ Dɔfĩn sɛ́sɛ́a bɔ̀sí mí nìɛ bòo hũn; ɛ́ ɓɛ́ wo iè tɛkɛ-cóoní, ɛ̀ Yiezu Kirisa yèrè lɔ̀n ɛ́ ɓɛ́ lò páaniɛ lɔ̀ hɔ̀ bòo lɛ ɛ́ Dɔfĩn hàarí lɛ́ mí ɲunù nɛ mí ɓén wé ɛ́ lɛ́ mí nìɛ ǹ.
7Dɔfĩn àá mí sãamu ɛ́ wɔ́ hiì àá mi ɛ̀ Hɔ̀ lɛ́ hɔ́ hɛ̃mù bòo mi ǹ ɛ́ ń dàa wɔ́ lé Bentĩnu tɔntɛ́ pehɔ̀ pànkɛ́ hũn. 8Ɛ́ hɔ́ iè ǹpe lɛ ɛ́ mìniɛ ɛ́ pɔ ɓɛpe ńdɛsĩ̀riè ɓɛ́kùi ɛ́ Dɔfin ɛ́ wɔ́ àá mí hiì ɛ́ nɛ n vɛ bie ɔ Kirisa yírɛ́ lɛ yá vé bòo ɛ̀ lɛ́ ɓɛ́ lɛ yí ɓɛ́ Zuifuɓɛ ǹ, 9ɛ̀ ǹ lò ciení ɓɛ́ nìnbirìe ɓɛ́kùi ǹ ɛ̀ ɓɛ̀ dũń bòo lɛ ɛ́ Dɔfĩn ɛ́ mii dàá wé hɔ́pe mí bòo lɛ hṹn tànkɔ̀niɛ. Hɔ̀pe Dɔfĩn lɛ ɛ́ iè hɔ̀ bòo míkùi mírɔ, kɛ́ Hɔ́ den ɛ́ hṹn tànkɔ̀niɛ mí bòo wénlɔ́ pɛ̃̀hṹ lɛ kɛ́ lé dĩ̀míɲɛ́ dàa ɲɛùn mí fúu ɛ̀ ɓen dɛ̃ zoòni, 10bòo lɛ ɛ́ wé ɛ̀ kɛ̀a sáalɛ, ɛ̀ ɓɛ̀ pànkɛ́ ɓàasiè àá hɔ́pe pànkɛ́a lɛ yòó wi hɔ hóohũn ɛ̀ mi ɓɛ ńdɛsĩ̀riè, ɛ̀ ɓɛ̀ den dũń Dɔfĩn bɔ̀dũmunù àá mí ɲúuhɛ̃ ɲúuhɛ̃. 11Ɛ́ hɔ́pe sí míkùi ɛ́ wɔ́ kɛ̀a bòo lɛ ɛ́ Dɔfĩn dàa hàarí bie hɔ̀ nɛ mí ɓén wé hɔ́. Ɛ́ Hɔ́ wo bɔ̀ kè Ɲunsɔ Yiezu Kirisa ǹ ɛ́ dàa wɔ́ hɔ́ ɛ́ tíiniɛ ɲunù. 12Ɛ́ ké ńcɛɓánlɔ́ àá ɔ́ Kirisa àá hɔ́ lɛ ɛ́ ké dũmuasɛ̃̀ à ǹ bòo hũn, ɛ́ ké yú wṹn ɛ́ dàa dɛ̀ wóo vɛ lúwini hɔ́pe Dɔfĩn kɛ́ ké fɔnù ɛ́ tɛ́rɛ. 13Ɛ́ ń wo ɛ́ mì hɛ̃nnin nɛ mi bí tìení mí bàanì lè lɔ̀nbiè lɛ ɛ́ nìn yí mípe mì bòo hũn wɛ̀. Hɔ̀ iè bòo lɛ ɛ́ yèrè ɛ̀ lɛ́ miɛ ǹ.
À Kirisa wanminu bòo
14Ɛ́ sí iè hɔ̀pe ɛ́ ń dàa siɛ hùerɛ̀sí niǹ nunkɛ́yìe lɔ̀n ɔ̀ Yàá Dɔfĩn híɛhɔ́, 15àpe Yàá lɛ temu lɛ́ ɛ́ ɓɛ́ nìnbirìe ɓɛ́kùi hɔ̀ hóohũn àá lé sṹsùnù ɛ́ dàa wi àá zũ-ɲúnhɛ̃, dúrɔ ńzũɲún àá ɓá yàá kɛ̀a bòo lɛ ɛ́ hɔ́pe Dɔfĩn dàa iè kìe Yàá. 16Ɛ́ nín hɔ̀pe Dɔfĩn ɛ̀ hɛ̃nnin nɛ Hɔ lɛ́ ɛ̀ pehɔ̀ ɓàarɔ́ bɔ̀bɛhɔ́ hũn, ɛ̀ pehɔ̀ Mɛkɛ̃ni pànkɛ́ ɛ̀ hiení mí tĩɛ̀ cɛ̃̀un, 17ɛ̀ mì ńdɛsĩ̀nlɔ́ ɛ̀ lɛ́ à Kirisa kań mí tĩɛ̀ hũn, ɛ̀ mì lò yí hɔ́ nɛhĩ́ ɛ̀ fɛ́sí dĩń sãàní lé wanminu hũn, 18ɛ̀ mì dàá dũń, mìpe àá hɔ́ Dɔfĩn nìɛ lɛ kɛ́ ɓɛ́kùi, bòo lɛ á Kirisa wanminu dàa ɓàń ɛ̀ lè tóo, ɛ̀ lè dɛ̃un, ɛ̀ lè lò ni. 19Ɛ̀ mì lò dũń ɔ́ Kirisa wanminu sɔ, lèpe lɛ pɔ a nìnbírɔ bɔ̀dũmunù míkùi, ɛ̀ mì wo ɛ̀ tí àá hɔ́ bòo lɛ ɛ́ lé àá hɔ́ Dɔfĩn viì míkùi.
20Dɔfĩn àá mí pànkɛ́ ɛ́ mí tɔnlɔ́ ɛ̀ tɛ́ ké hũn, ɛ̀ Hɔ̀ dɛ̀ hɔ̀ bòo ɛ́ wóò wé ɛ̀ pɔní hɔ́ lɛ ɛ́ ké hɛ̃nnɛ tàá hɔ́ lɛ ɛ́ ké yɛ̀rɛ̀ nùnɛ kè tĩɛ̀ hũn. 21Ɛ́ nɛ hɔ ɓàarɔ́ ɛ̀ bòo ɛ̀ sĩ̀ Hɔ̀ ǹ ɓɛ̀ ńdɛsĩ̀rìe ɓɛ́kùi mɛkɛ̃nì hũn fúu pɛ̃̀hṹ lɛ yá vé hũn, à Yiezu Kirisa yèrè lɔ̀n, Amiina.
Currently Selected:
Efɛɛzi Siè 3: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
