Popular Bible Verses from Efɛɛzi Siè 4

Share

Mì wóo wé ɓán àá bɔ̀tente, ɛ̀ mì mi ɓán miinɛ. Ɛ̀ mì wóo dé sɛ́wɛ́rí ɛ̀ lɛkɛ ɓán kɛ̀a bòo lɛ ɛ́ Dɔfĩn ɛ́ dàa dɔ́ sɛ́wɛ́rí ɛ́ lɛ́ miɛ ǹ ɔ̀ Kirisa bòo hũn.

Mì wóo síɛní míte ǹ, ɛ̀ mì wé nìnbirìe lɛ ɛ́ wuawi, ɛ̀ mì lò wóo hĩ̀ mì hũn. Mì nɛ hɔ́rɔ wóo hĩ̀ mí hũn àá ɓán ńkɔnù, ɛ̀ mì sĩiníkɛ ɓán lè wanminu hũn.

Mì bí wóo nɛ ben-làahɛ̃ ɛ̀ lé àá mí ɲihĩ́ɛ wɛ̀; kɛ́ hɔ́ biehĩ́ lɛ tũ̀nú wi iè pe ɛ́ mí wóo bie, hɔ̀ biehĩ́ lɛ ɛ́ wóo lɛ́ hɔ́ bénlɔ́ ɛ̀ hɔ̀ hĩ̀iníkɛ ɓɛ nìnbirìe tĩɛ̀, ɛ̀ hɔ̀ wé hɔ́ bɔ̀tente àá ɓɛ́pe lɛ ɛ́ hɔ̀ ɲí.

Ɛ́ mí leń hɔ́ hiɛ̀rɔ́ bòo míkùi ɛ̀ lé mí tĩɛ̀ hũn, ɛ̀ mì bí wóo dàá lé tĩcĩ̀nín mì tĩɛ̀ hũn wɛ̀, ɛ̀ mì bí wóo lɛ́ nɛ mi tĩɛ̀ ɛ̀ hĩ́ní wɛ̀, ɛ̀ hɔ̀ kankán wũamɛkɛà àá hɔ́ tòokɛà ɛ̀ mí fùansí nin ɛ̀ lè mɛkɛ̃nɲiì àá mí ɲúuhɛ̃ míkùi ɛ́ mí lò fùansí nin.

Kɛ́ mí tĩɛ̀ ɛ́ siɛ hĩ́nà, ɛ̀ mì ɓaà mìte ɛ̀ mì bí wé bɔ̀koohɔ́ wɛ̀; ɛ̀ mì bí lɛ́ nɛ wurù ɲún ɛ̀ siɛ vɛ lí ɛ̀ tɛ̀rɛ́ mí tĩcĩ̀nín wɛ̀. Mì bí lɛ́ wṹn Situanɛ ǹ nɛ a be nin ɛ̀ dàá lɛ́ ɛ̀ mì wé bɔ̀koohɔ́ wɛ̀.

Ɛ́ mí fɔ́ɓán ɛ̀ mì fùansí mí mɛkɛ̃nì dɛ̀kĩ́i ǹ àá pelè bɔ̀werà lɛ te miɛ ɛ́ hṹn wóò vɛ́ ɛ̀ dàá vɛ hɔ bɔ̀koohɛ̃ pɔnù hũn, ɛ̀ khɛ̃̀níkɛ miɛ ɛ̀ yáakɛ. Ɛ̀ mì lɛ́ nɛ le Mɛkɛ̃n-Sãanu ɛ̀ zɛ̀ní mí tĩɛ̀ ɛ̀ hɔ̀ wé bɔ̀fĩɛ̀, ɛ̀ mì kań lé mɛkɛ̃nì dɛ̀fĩì hũn kɛ̀a bòo lɛ ɛ́ Dɔfĩn ɛ́ dàa mɛ́ miɛ ɛ́ lɔ́ɓán àá míte hɔ̀ cã̀anírɔ́ àá hɔ́ ceremú hũn, hɔ̀pe lɛ ɛ́ hɔ́ bɔ̀berà ɛ́ te wóò dàá ɓén.

Mì wóo cɛ mi kuò ɛ̀ lɛ́ nɛ mi ɲunù ɛ̀ wé dìcóoní lè Mɛkɛ̃n-Sãanu pànkɛ́ hũn; Lèpe Mɛkɛ̃n-Sãanu ɛ́ te miɛ wóò wé àá dìcóoní ɛ̀ lè hũn-wiɛ̀ ɛ̀ dàá kań mí tĩ́ihṹ.

Àpe ɛ́ te hɔ hɛ̃mù bòo àá mí ɲúuhɛ̃ ɲúuhɛ̃ ɛ́ lɛ́kɛ ɓɛ nìnbirìe n: à lɛ́ ɛ́ ɓɛ́ dɔ̀ ɛ́ wɔ́ mí tɔnkɛriè, ɛ̀ ɓɛ̀ dɔ̀ ɛ́ wɔ́ Dɔfĩn bɔ̀háaníriè, ɛ̀ ɓɛ̀ dɔ̀ ɛ́ wɔ́ Dɔfĩn Bentĩnu buieriè, ɛ̀ ɓɛ̀ dɔ̀ ɛ́ wɔ́ ɓɛ́ pisieriè, ɛ̀ ɓɛ̀ dɔ̀ ɛ́ wɔ́ ɓɛ́ kɛ̀ránliè. Ɛ́ kɛ̀amu, ápe Kirisa iè pe wo lɛ́ ɛ́ ɓɛ́ nìɛ lɛ bòo sɛ̃̀ hɔ̀ Dɔfĩn ɛ́ dàa dɛ̀ hɔ̀pe Dɔfĩn tɔnlɔ́ ɛ́ wóò tɛ́, bòo lɛ ɛ́ wé ɛ̀ ɓɛ̀pe ńdɛsĩ̀rìe lɛ iè ɔ̀ Kirisa tɛkɛ̀a ɛ̀ dàá vɛ vanlɔ́ àá híɛhɔ́ ɓɛ́ ńdɛsĩ̀nlɔ́ hũn, fúu ɛ̀ kèpe kè kùi ɛ̀ wo páaní wé dìcóoní hɔ̀ ńdɛsĩ̀nlɔ́ hũn ɛ̀ kè lò páaní dũń ɔ́ Dɔfĩn Zuú ɛ́ sãàní, ɛ̀ kè wo be hɔ ńdɛsĩ̀nlɔ́ hũn, ɛ̀ wé ɓɛ́ ńdɛsĩ̀riè lɛ ɲunù tú kɛ̀a ie Kirisa.

Ɛ́ kɛ̀amu, ɛ́ ké wo yá bĩní ɛ́ dìń kɛ̀a zĩncã́ahɛ̃ wɛ̀. Ké yá bĩní dìń kɛ̀a ie ɲumu wiè lɛ ɛ́ dìɛkɛ hɔ ɲun-bɛhɔ́ lɔ̀n lè pinpinù núnú hũn wɛ̀. Ɛ́ ɓɛ́ nìnbirìe ɛ́ wo yá bĩní khɛ̃̀níkɛ kie ɛ́ yínin àá ɓɛ́ hɛ́cín biehĩ́ àá ɓɛ́ kɛ̀ránlɔ́ àá mí ɲúuhɛ̃ ɲúuhɛ̃ ɛ̀ dàá fĩiní kie wɛ̀. Ɛ́ ké wo ɛ́ munkɛ hɔ̀ bɔ̀berà lé wanminu hũn, ɛ̀ kè wo ɛ́ tí hɔ́ bòo míkùi hũn ɛ́ yòó dɛ̃ ape Kirisa, àpe lɛ ɛ́ temu iè lèpe ɲún.