Efɛɛzi Siè 2

Hɔ̀ ńlé hɔ́ húmú hũn ɛ̀ khíi vɛ zɔ le mɛkɛ̃nì hũn

1Hṹn àá híɛhɔ́ ɛ̀ mì ńwékhemù àá mí bɔ̀koohɛ̃ ɛ́ lɛ́ ɛ́ mí dɛ̃̀ kɛ̀a nìɛ lɛ hṹn húrun. 2Mí hṹn wóò dàá míte kɛ̀a ie hɔpe dímíɲɛ́ lɛ nìɛ, ɛ̀ hɔ̀ pànkɛ́-koohɛ̃ ɲún ɓàasɔ lɛ wi le pinpinù hũn bòo iè pe ɛ́ mí hṹn wóò ɲí; ɛ́ hɔ́ iè ɔ̀pe ɛ́ te mí tɔnlɔ́ ɛ́ tɛ́ hɔ́ zoòni ɓɛ̀ nìɛ lɛ ɛ́ pɛ̃́ hɔ́ Dɔfĩn bòo lɔ̀n. 3Ɛ́ képe kè kùi ɛ́ ɓiɛ̀ hṹn dɛ̃̀ kɛ̀a ie ɓɛpe; ké hṹn wɔ́ ké kùrú nìnbí-yáamu pɔ̀nù bòo ɛ́ ké bɔ̀ máahṹ, ɛ̀ hɔ̀ bòo lɛ ɛ́ ké nìnbí-yáamu àá ké nùnlé bɔ̀koohɛ̃ ɛ́ wɛ iè pe ɛ́ ké hṹn wóò wé. Ɛ́ hɔ́pe kè nìnbí-yáamu sɔ hũn, ɛ́ ké ɓiɛ̀ hṹn wi hɔpe Dɔfĩn tĩcĩ̀nín hũn kɛ̀a ie ɓɛlɛ ɛ́ kɛ́.

4Kɛ́ Dɔfĩn ɛ́ den wóò mi ɓɛ nìnbirìe miinɛ̀ cɛ̃̀un, ɛ̀ Hɔ̀ lò wɛniɛ kie àá wanminu dɛ̀bɛhɔ́, 5ɛ́ si iè hɔ̀ pe, ɛ́ hɔ́ lɛ ɛ́ ké bɔ̀koohɛ̃ ɛ́ dàa hṹn lɛ́ ɛ́ ké húrun, ɛ́ hɔ́pe Dɔfĩn ɛ́ khũ̀a lɛ́ lé mɛkɛ̃nì kiè ǹ àá ɔ́ Kirisa. Ɛ́ hɔ́ iè pe Dɔfĩn hiì temu lɛ́ ɛ́ ké dàa fuerɛ. 6Ɛ́ ké ńcɛɓánlɔ́ àá ɔ́ Yiezu Kirisa ɛ́ lɛ́ ɛ́ Dɔfĩn páaniɛ vìeniɛ kie àá ɔ́, ɛ̀ kè páaní yòó vɛ kansí àá ɔ́ hɔ̀ hóohũn. 7Ɛ́ hɔ́pe sãamu lɛ ɛ́ Dɔfĩn ɛ́ wɔ́ àá kie ɔ̀ Yiezu Kirisa hũn ɛ́ iè pehɔ̀ hiì dɛ̀bɛhɔ́ ɛ́ hɔ́ wɛ mii zɛ̃́ní àá kiè pɛ̃̀hṹ lɛ vaá-ɓen míkùi hũn. 8Ɛ́ hɔ́ iè Dɔfĩn hiì temu lɛ́ ɛ́ mí dàa ɛ́ fuerɛ iè hɔ̀ lɛ ɛ́ mí dũmuasɛ̃̀ hɔ̀pe Dɔfĩn. Ɛ́ hɔ́ yí bòo lɛ ɛ́ lɔ́ mípe mì viì, kɛ́ hɔ́ iè Dɔfĩn hɛ̃mù. 9Ɛ̀ hɔ̀ lò yí lé mí bɔ̀werà ǹ wɛ̀; ɛ́ nìnbírɔ dɔ̀ ɛ́ wo yí dɛ̀ míte ɛ́ yá ɓàanínin wɛ̀. 10Ɛ́ ké iè hɔ̀ Dɔfĩn bɔ̀míriè, hɔ̀ ɛ́ mɛ́ kie kè ńcɛɓánlɔ́ hũn àá Yiezu Kirisa, bòo lɛ ɛ́ wé ɛ̀ kè wóo wé bɔ̀tente kè mɛkɛ̃nì hũn, hɔ̀pe bɔ̀tente lɛ ɛ́ Hɔ́ sɛ̃̀nɛ́hã̀ sɛ́sɛ́a bɔ̀sí nɛ ke wóo wé.

Ɓɛ̀ Zuifuɓɛ àá ɓɛ́ lɛ yí ɓɛ́ Zuifuɓɛ ɛ́ wɔ́ dìcóoní ɔ̀ Kirisa hũn

11Mìpe lɛ ɛ́ tɔn vaá-lé ɛ̀ mì yí ɓɛ́ Zuifuɓɛ, mì siɛ liení mí bòo lɛ ɛ́ mí te dàa hṹn dɛ̃̀ ǹ! Ɓɛ̀ Zuifuɓɛ ɛ́ wóò ve miɛ nɛ «ńdáacũ̀náaɓɛ̀» ɛ̀ ɓɛ̀ den ve ɓɛ́te nɛ nìɛ lɛ fũ̀a, hɔ̀pe bòo dɔ̀ lɛ á nìnbírɔ núnú ɛ́ te wɔ́ peɓɛ̀ tɛkɛ̀a hũn bòo hũn. 12Ɛ́ pehɔ̀ yìi hũn ɛ̀ mì hṹn yí dũ a Kirisa wɛ̀; ɛ́ mí hṹn iè nìhãà; ɛ́ mí bòo ɛ́ wo hṹn mí ɓɛ́ Yizarayɛɛle nìɛ hũn wɛ̀. Ɛ́ mí wo hàarí bòo ɛ́ mí hɔ́ Dɔfĩn ɲɛbíe lɛ ɛ́ Hɔ́ hàarí dú àá ɓɛ́pe Yizarayɛɛle nìɛ hũn wɛ̀; hɔ̀pe ɲɛbíe lɛ ɛ́ hɔ́pe Dɔfĩn ɛ́ hàarí dú ɛ́ dàa lɛ́ ɲunù ɓàn. Ɛ́ mí hṹn wi le dímíɲɛ́ hũn kɛ́ mí tĩì bènlén ɛ́ mí, ɛ̀ mì lò yí dũ Dɔfĩn wɛ̀. 13Kɛ́ kɛ̀a sáalɛ, ɛ́ mí ńcɛɓánlɔ́ àá ɔ́ Yiezu Kirisa ɛ́ lɛ́ ɛ́ mípe lɛ ɛ́ hṹn viì van ni cɛ̃̀un ɛ́ ɓɛrɛ luwiniɛ Dɔfĩn à Kirisa cãani lɛ ɛ́ koosí bòo hũn. 14Iè hɔ̀ lɛ ápe Kirisa míte ǹ temu iè pe kè hũn-wiɛ̀. À lɛ́ ɛ́ ɓɛ́ Zuifuɓɛ àá ɓɛ́ lɛ ɛ́ yí ɓɛ́ Zuifuɓɛ ɛ́ wɔ́ dìcóoní, ɛ̀ hɔ̀ lɛ á lɛ́ mí tɛkɛ̀a ɛ́ lɛ́ ɛ́ lépe toohɔ́ lɛ ɛ́ hṹn wi peɓɛ̀ tĩ́ihṹ lɛ temu hṹn lɛ́ ɛ́ ɓɛ́ dàa iè ɓɛ̀ ńbíyanliè ɛ́ ɓúukɛa khie siɛ. 15À ɛ́ ɓɔ́ á Moyiize làndɛ́ àá pehɔ̀ bòo lɛ ɛ́ hɔ́ bie ɲún; ɛ́ kɛ̀amu, á wo lɛ́ ɛ́ ɓɛ́ Zuifuɓɛ àá ɓɛ́ lɛ yí ɓɛ́ Zuifuɓɛ ɛ́ wɔ́ lé dàa dɛ̀fĩì dìcóoní nìɛ lɛ can ɓán àá ɔ́, á wo dɔ́ lé hũn-wiɛ̀ peɓɛ̀ tĩ́ihṹ kɛ̀amu. 16Ápe Kirisa húmú lè ɓáalén dãanù lɔ̀n ɛ́ koo ɓɛ̀pe ɓɛ́ ɲuuná ɓánlɔ̀n ɛ́ wɔ́ àá tɛkɛ-cóoní, à lɛ́ ɛ́ ɓɛ́ khũ̀a khie ɛ́ ɲí ɓán àá Dɔfĩn; piè húmú lè ɓáalén dãanù lɔ̀n ɛ́ víeniɛ peɓɛ̀ ńbíyaanú. 17Ápe Kirisa ɛ́ den ɓɛrɛ khɛ́ lé hũn-wiɛ̀ Bentĩnu ɛ́ lɛ́ mípe lɛ ɛ́ hṹn viì van ni cɛ̃̀un, à lò khɛ́ lé ɛ́ lɛ́ ɓɛ́pe lɛ ɛ́ viì lúwi ǹ. 18Ɛ́ hɔ́ den iè ɔ̀pe Kirisa temu lɛ́ ɛ́ képe kè-kùi, ɓɛ̀ Zuifuɓɛ àá ɓɛ́ lɛ ɛ́ yí ɓɛ́ Zuifuɓɛ ɛ́ dàa dɛ̀ ɛ́ wóò vɛ dĩń kìe Yàá Dɔfĩn híɛhɔ́, lè Mɛkɛ̃n-Sãanu dìcóoní pànkɛ́ hũn.

19Ɛ́ kɛ̀a sáalɛ ɛ́ mípe lɛ yí ɓɛ́ Zuifuɓɛ ɛ́ wo bĩniɛ yí nìhãà, tàá nìɛ lɛ van lɔ́ àá vi-ɓuɛ̀ wɛ̀. Kɛ́ mí wo iè dìcóoní àá Dɔfĩn zũnù nìɛ, mí iè zũ-cóoní nìɛ àá ɓɛ́. 20Mìpe ɛ́ dɛ̃̀ kɛ̀a ie hɔ sɛ̃̀nlɛ̀a lɛ ɛ́ ɓɛ́ dàa tɔn lè zũnù. Lè zũnù sɔ fìi ɲìnlén sɛ̃̀nlɛ̀a ɛ́ iè Yiezu tɔnkɛriè àá ɓɛ́ Dɔfĩn bɔ̀háaníriè, à Yiezu Kirisa míte ǹ ɛ́ temu iè lèpe sɛ̃̀nlè lɛ te lepe zũnù míkùi ɛ́ zɛ̃nkɛanin. 21Àpe temu wóò lɛ́ ɛ̀ hɔ̀pe bòo lɛ ɛ́ te yòó ɛ̀ dàá yí hɔ́ pànkɛ́ ɛ̀ hĩ́ní yòó wé lé zũnù lɛ ɛ́ ce, lɛ bòo ɛ́ sɛ̃̀ à Ɲunsɔ ǹ. 22Ɛ́ hɔ́ lɛ ɛ́ mípe ɛ́ can ɓán àá ɔ́ pe Yiezu Kirisa, ɛ́ mí ɓiɛ̀ koo ɓánlɔ̀n àá ɓɛ́pe ńdɛsĩ̀riè lɛ kɛ́ ɓɛ́kùi ɛ́ wɔ́ lé zũnù lɛ ɛ́ te yòó, lɛ ɛ́ lé Mɛkɛ̃n-Sãanu ɛ́ wi hũn.

Currently Selected:

Efɛɛzi Siè 2: bwj

Highlight

Copy

Compare