Efɛɛzi Siè 1

Tìɛníkɛrɔ́

1Hɔ̀ iè ǹpe Pooli lɛ ɛ́ Dɔfĩn àá mí tĩì bòo ɛ́ lɛ́ ɛ́ ń wɔ́ Yiezu Kirisa tɔnkɛrɔ ɛ́ te lepe vɛ̃hṹ sɔ lɛ ɛ́ wĩ́, ɛ́ nin lɛ́ mípe Dɔfĩn nìɛ lɛ van wi hɔ Efɛɛzi lóo hũn, mìpe lɛ ɛ́ dũmuasɛ̃̀ à Yiezu Kirisa ǹ, ɛ̀ mì lò can ɓán àá ɔ́. 2Nɛ kìe Yàá Dɔfĩn àá ɔ́pe Ɲunsɔ Yiezu Kirisa ɛ̀ wé hiì àá miɛ ɛ̀ ɓɛ̀ lɛ́ hũn-wiɛ̀ miɛ ǹ.

Lè dúɓìɛ lɛ ɛ́ Dɔfĩn ɛ́ lɛ́ kie ǹ kè ńcɛɓánlɔ́ àá Kirisa bòo hũn

3Mì nɛ ke ɓàaní Dɔfĩn, hɔ̀pe lɛ iè kè Ɲunsɔ Yiezu Kirisa ɓà Yàá. Hɔ̀ ɛ́ dúɓɛa kie ǹ àá lé dúɓìɛ àá mí ɲúuhɛ̃ ɲúuhɛ̃ lɛ ɛ́ lé àá hɔ́pe Dɔfĩn viì, kè ńcɛɓánlɔ́ àá ɔ́ Kirisa bòo hũn. 4Pɛ̃̀hṹ lɛ ɛ́ lé dímíɲɛ́ ɲɛùn mí, ɛ̀ Dɔfĩn ɛ́ munɛ kie ɔ̀ Kirisa bòo hũn, bòo lɛ ɛ́ wé ɛ̀ kè wé nìnbirìe lɛ ɛ́ bòo sɛ̃̀ Hɔ̀ ǹ, lɛ ɛ́ ńwékhemù dɔ̀ ɛ́ mínɛ nin pehɔ̀ híɛhɔ́ wɛ̀. Ɛ́ hɔ́pe Dɔfĩn wanminu hũn, 5ɛ́ hɔ́ sɛ̃̀nɛ́hã̀ bɔ̀ à Yiezu Kirisa ǹ ɛ́ dàa munɛ kie nɛ ke wé mí nìɛ; ɛ́ hɔ́ wo tĩiniɛ hɔ̀pe Dɔfĩn ɛ̀ Hɔ̀ wé hɔ́ kɛ̀amu. 6Ɛ́ Hɔ́ wɔ́ hɔ́ kɛ̀a mù, bòo lɛ ɛ́ wé ɛ̀ kè ɓàaní hɔ̀ ǹ lè hiì dɛ̀bɛhɔ́ lɛ ɛ́ Hɔ́ wɔ́ àá kie bòo hũn, iè hɔ̀ lɛ ɛ́ ké can ɓán àá pehɔ̀ Zuú lɛ ɛ́ hɔ́ wɛ.

7À Kirisa húmú ɛ́ temu lɛ́ ɛ́ ké dàa ɲún ɛ́ yú lɔ́ hɔ́ bɔ̀koohɔ́ hũn ɛ̀ kè bɔ̀koohɛ̃ sɛ́wɛ́rí ɛ́ lò dɔ́ ɛ́ lɛ́ kie ǹ. Ɛ́ Dɔfĩn iè pe wo zɛ̃́niɛ mí hiì dɛ̀bɛhɔ́ àá kie kɛ̀amu, 8lèpe hiì lɛ ɛ́ hɔ́pe Dɔfĩn ɛ́ wɔ́ àá kie wɔ̀sɔ̀kɔ̀ ɛ̀ Hɔ̀ lɛ́ hɔ́ bɔ̀dũmunù àá lé hɛ́cirí àá mí ɲúuhɛ̃ ɲúuhɛ̃ kie ǹ. 9Ɛ́ hɔ́pe bòo lɛ ɛ́ hṹn tànkɔ̀niɛ, hɔ̀pe lɛ ɛ́ Dɔfĩn hàarí wɛ nɛ mí ɓén wé, ɛ́ Hɔ́ zɛ̃́niɛ ɛ́ lɛ́ kiè ǹ. Ɛ́ hɔ́ iè hɔ̀pe bòo lɛ ɛ́ hɔ́pe Dɔfĩn sɛ̃̀nɛ́hã̀ munɛ nɛ mí ɓén bì-è Kirisa ǹ ɛ̀ dàá wé hɔ́. 10Ɛ́ hɔ́pe bòo sɔ ɛ́ iè hɔ̀ lɛ kɛ́ lé pɛ̃̀hṹ ɛ́ ɓen van ɲunù tú, ɛ́ Dɔfĩn ɛ́ lɛ́ ɛ́ hɔ́ bòo lɛ yòó wi hɔ hóohũn àá hɔ́pe lɛ ɛ́ siɛ wi le sṹsùnù lɔ̀n míkùi ɛ́ khíi kóo ɓánlɔ̀n á Kirisa ɛ́ temu wo ɛ́ wé pehɔ̀ Ɲunsɔ.

11Dɔfĩn wóò lɛ́ ɛ̀ hɔ̀ bòo míkùi ɛ̀ wé ɓáaní ɓán àá pehɔ̀ tĩì bòo. Ɛ́ Hɔ́ wo sɛ̃̀nɛ́hã̀ munɛ kie kɛ̀a bòo lɛ ɛ́ Hɔ́ dàa tĩiniɛ hɔ̀ ǹ nɛ ke cɛ ɓán àá Yiezu Kirisa. Ɛ́ ké wo yú hɔ́ bòo lɛ bòo sɛ̃̀ kiè ǹ. 12Ɛ́ mí nɛ ke ɓàaní hɔ́ Dɔfĩn bɛhɔ́ ǹ, kèpe lɛ ɛ́ dú hɔ́ híɛhɔ́ ɛ́ bɔ̀ kè tĩɛ̀ ɔ̀ Kirisa lɔ̀n.

13Ɛ́ mípe ɓiɛ̀, pɛ̃̀hṹ lɛ ɛ́ mí ɲɛ́ lé bɔ̀berà bienù, lɛ iè lè Bentĩnu lɛ ɛ́ ɓɛrɛ ɛ́ lɛ́ lé fuerɛ̀ miɛ ǹ, ɛ́ mí dũmuasɛ̃̀ à Kirisa ǹ; ɛ́ Dɔfĩn ɛ́ wo bɔ̀ mí kùrú bòo zɛ̃́nílán mì lɔ̀n ɛ́ dàa ɛ́ zɛ̃́ní kɛ́ mí bòo ɛ́ sɛ̃̀ Hɔ̀ ǹ. Ɛ́ hɔ́pe bòo zɛ̃́nílán sɔ ɛ́ iè lè Mɛkɛ̃n-Sãanu lɛ ɛ́ Hɔ́ hàarí lɛ́ mí ɲunù nɛ mí ɓén lɛ́ kie ǹ. 14Lè Mɛkɛ̃n-Sãanu ɛ́ temu ɛ́ zɛ̃́ní kɛ́ ké ɓén yí hɔ́ bɔ̀sãanù lɛ ɛ́ hɔ́ Dɔfĩn ɛ́ sɛ́sɛ́a bɔ̀sí mí nìɛ bòo hũn; hɔ̀ ɛ́ zɛ̃́ní àá bɔ̀bín nɛ ké ɓén yí hɔ́ pɛ̃̀hṹ lɛ kɛ́ Dɔfĩn ɛ́ lerɛ kè ɲún ɛ́ vieniɛ. Ɛ́ mí wo nɛ ke ɓàaní hɔ́pe Dɔfĩn pehɔ̀ ɓàarɔ́ bòo hũn.

Pooli ɛ́ Dɔfĩn ɛ̀ hɛ̃nnin ɛ̀ lɛ́ ɓɛ́ Efɛɛzi siè ǹ

15Ɛ́ sí iè hɔ̀pe, ɛ́ hɔ́ lɛ ɛ́ ń ɲɛ́ mí bòo lɛ ɛ́ mí dàa dũmuasɛ̃̀ à Ɲunsɔ Yiezu ǹ àá bòo lɛ ɛ́ mí dàa wɛ ɓɛ ńdɛsĩ̀riè ɓɛ́kùi, 16ɛ́ ń hɛ̀ wóò dé hɔ́ Dɔfĩn bɛrikɛ àá sítĩnlɔ́ fúu mì bòo hũn, ɛ̀ ǹ ɓen ɛ́ Dɔfĩn ɛ̀ hɛ̃nnin, ɛ̀ ǹ wóò liení mí bòo, 17ɛ̀ hɛ̃un hɔ̀pe Dɔfĩn lɛ iè kè Ɲunsɔ Yiezu Kirisa ɓà Yàá, lɛ yèrè ɛ́ ɓàń, nɛ hɔ lɛ́ hɔ́ bɔ̀dũmunù Mɛkɛ̃ni lɛ mii zɛ̃́ní-ɛ́ pe Yàá miɛ ǹ, ɛ̀ mì dàá dũń ɔ́ sãàní. 18Ɛ̀ ǹ lò wóò hɛ̃un hɔ̀pe Dɔfĩn nɛ hɔ hán mí yìe ɛ̀ mì mi hɔ ńpiemu, bòo lɛ ɛ́ wé ɛ̀ mì dàá dũń hɔ́pe bòo lɛ ɛ́ mí ɛ́ hìé àá ńdɛsĩ̀nlɔ́ ɲún, hɔ̀pe lɛ ɛ́ hɔ́ ɛ́ vɔn miɛ nɛ mi ɓen yí, lè yírɛ́ dɛ̀bɛhɔ́ lɛ sãa sãa lɛ ɛ́ hɔ́ sɛ́sɛ́a bɔ̀sí ɓɛ́ nìnbirìe lɛ bòo sɛ̃̀ hɔ̀ ǹ bòo hũn. 19Ɛ̀ ǹ lò ɛ́ hɛ̃un nɛ mi dũń hɔ́pe pànkɛ́ bɛhɔ́ lɛ hɔ́ Dɔfĩn ɛ́ dàa ɛ́ tɛ́ àá képe ńdɛsĩ̀riè bòo; hɔ̀pe pànkɛ́ sɔ ɛ́ iè hɔ̀pe lɛ ɛ́ hɔ́pe Dɔfĩn ɛ́ zɛ̃́niɛ cɛ̃̀un, 20ɛ́ dàa vìeniɛ ɔ̀ Kirisa, ɛ̀ Hɔ̀ fɔ́ á yòó van bɔ̀sí mí ńdóonín hɔ̀ hóohũn. 21Ápe Kirisa ɛ́ wo wi ɓɛ mɛlɛkɛɓɛ àá ɓɛ́ hándíe ɓɛ́kùi ɲún hũn, à lò wi ɓɛ ɲúuhɛ̃ siè àá ɓɛ́ pànkɛ́ ɓàasiè àá ɓɛ́ bɛ́zɛ̀ɓɛ̀ ɓɛ́kùi ɲún hũn, à lò wi hɔpe yèhĩ́ míkùi ɲún hũn; hɔ̀pe zoòni dímíɲɛ́ lɛ yèhĩ́ mí dòonún bòo mí, kɛ́ lépe dímíɲɛ́ lɛ vaá-ɓen yèhĩ́ míkùi. 22Dɔfĩn ɛ́ bɔ̀ hɔ̀ bòo míkùi ɔ̀ Kirisa zehĩ́ fìi hũn, ɛ̀ Hɔ̀ lɛ́ ápe ɛ́ temu iè lèpe Dɔfĩn zũnù míkùi ɲún. 23Ɛ́ lépe Dɔfĩn zũnù nìɛ ɛ́ temu iè ɔ̀pe Kirisa tɛkɛ̀a; à ɛ́ wi ɓɛ hũn fúu, à lò tú ɓɛ́, àpe lɛ ɛ́ wóo tí hɔ́ bòo míkùi.

Currently Selected:

Efɛɛzi Siè 1: bwj

Highlight

Copy

Compare