2 Timote 3
3
Hɔ̀ bòo lɛ ɛ́ ɓén wé hɔ mɛ́n-sí hũn bòo
1Ɛ́ kɔ́ dũń sãàní kɛ́ hɔ́ mɛ́n-sí hũn ɛ̀ hɔ̀ hɛ̀ ɓén hìení. 2Iè hɔ̀ lɛ ɛ́ ɓɛ́ nìnbirìe ɛ́ hɔ́rɔ ɛ́ wóo ɓén wé mí kùrú bòo mí dòonún á húi, ɛ̀ ɓɛ̀ ɛ́ wé hɔ́ màa ɛ́ ɓɛ́ wɛní, ɛ̀ ɓɛ̀ wóo ɓén khòoníkɛ ɓɛ́te, ɛ̀ ɓɛ̀ ɛ́ tí àá lé yèncànlè, ɛ̀ ɓɛ̀ wóo ɓén tòokɛ hɔ Dɔfĩn, ɛ̀ ɓɛ̀ wóo hĩ́ní ɛ́ pĩ́ yá ɲí ɓá tenliè bòo, ɛ̀ ɓɛ̀ yá wóo ɓén dũń hɔ́ yìrí, ɛ̀ ɓɛ̀ lò yá wóo ɓén mɛ̀ndɛ̃ hɔ Dɔfĩn bòo wɛ̀. 3Peɓɛ̀ tĩɛ̀ ɛ́ wóo ɓén dɛ̃ cɛ̃̀un, ɛ̀ ɓɛ̀ yá wóo ɓén mi nìnbírɔ miinɛ̀, ɛ̀ ɓɛ̀ wóo ɓén yáa ɓɛ nìnbirìe yèhĩ́, ɛ̀ ɓɛ̀ yá wóo ɓén dàń ɓɛ́te ɛ́ ɓaà, ɛ̀ ɓɛ̀ wóo ɓén wé ɓɛ́ mɛkɛ̃nɲiì ɓàasiè, ɛ̀ ɓɛ̀ wóo ɓén wé hɔ́ bɔ̀tente ɓà ńbíyanliè. 4Ɓɛ̀ wóo ɓén bɛ́ ɓɛ́ nìnbirìe máahɛ̃, ɛ̀ ɓɛ̀ ɛ́ wé ɓɛ́ nìnbirìe lɛ tĩɛ̀ ɛ́ sɔ, ɛ̀ peɓɛ̀ yèncànlè ɛ́ wóo ɓén muini peɓɛ̀ yìe, ɓɛ̀ wóo ɓén wɛní ɓɛ́ kùrú tũ̀mù bòo ɛ́ pɔní hɔ́ Dɔfĩn. 5Ɓɛ̀ wóo ɓén wé kɛ̀a bòo ɛ́ ɓɛ́ ɛ́ wɛ hɔ́ Dɔfĩn kɛ́ ɓɛ́ lò den ɛ́ pɛ̃́ hɔ́pe Dɔfĩn pànkɛ́ bòo. Ɛ́ kɔ́ lɛ́ nɛ kɔ viì ɛ̀ niìní àá ɓɛ́pe nìɛ sɔ sí. 6Ɓɛ̀ dɔ̀ peɓɛ̀ tĩ́ihṹ ɛ́ wóo vɛ zɔ ɓɛ nìnbirìe zĩhĩ́ɛ hũn ɛ̀ vɛ zɔ yí ɓɛ́ hã́a dɔ̀ lɛ bɔ̀dũmunù mí ɛ̀ khɛ̃̀níkɛ yínin, ɓɛ̀pe hã́a sɔ ɛ́ hɔ́ bɔ̀koohɛ̃ ɛ́ ɲàakɛanin, ɛ́ ɓɛ́ wo ɛ́ wóò wé ɓɛ́ kùrú tĩɛ̀ bòo lɛ ɛ́ yí sãa ɛ̀ ɓɛ̀ wé. 7Ɓɛ̀ wóò ken hɔ̀ bòo ǹ fúu kɛ́ ɓɛ́ den yí dɛ̀ hɔ̀ bɔ̀berà ɛ́ yá dũń ɛ́ yá mi wɛ̀. 8Ɛ́ kɛ̀a bòo lɛ á Zanɛɛsi àá Zanbɛrɛsi ɛ́ dàa hàarí ɛ́ pɛ̃́ á Moyiize bòo, ɛ́ ɓɛ́pe nìɛ sɔ sí ɛ́ ɓiɛ̀ ɛ́ pɛ̃́ hɔ́ bɔ̀berà bòo. Ɓɛ̀ iè ɓɛ̀ nìnbirìe lɛ ɛ́ hɛciri ɛ́ yí sãa, ɛ̀ peɓɛ̀ ńdɛsĩ̀nlɔ́ ɛ́ yí loo yán wɛ̀. 9Kɛ́ ɓɛ́ den ɛ́ yí dɛ̀ ɛ́ yá bĩní ɛ́ vɛ àá híɛhɔ́ wɛ̀; iè hɔ̀ lɛ ɛ́ ɓɛ́ nìnbiriè ɓɛ́kùi ɛ́ ɓén dũń peɓɛ̀ ńtĩmíinú bòo kɛ̀a bòo lɛ ɛ́ hɔ́ dàa hàarí wɔ́ á Zanɛɛsi àá ɔ́ Zanbɛrɛsi ǹ.
Pooli máahṹ lɔ̀n bérɛ́ lɛ á lɛ́ á Timote ǹ
10Kɛ́ hɔ́ ɓen kɛ́ kɔ́pe, ɛ̀ kɔ̀ lò wo hàarí wi niǹ sɛnù ɛ́ kɔ́ mɔn hɔ̀ bòo lɛ ɛ́ ń dàa hàarí wóò kɛ̀rán ɓɛ́ nìnbirìe, ɛ̀ kɔ̀ mɔn niǹ te dàarɔ́ àá niǹ bòo lɛ ɛ́ ń wɛ ɛ́ wóo nín wé, àá niǹ ńdɛsĩ̀nlɔ́ àá niǹ hũn hĩ̀nlɔ́ àá niǹ wanminu àá bòo lɛ ɛ́ ń dàa ɛ́ can niǹ kuò. 11Kɔ́ dũ bòo lɛ ɛ́ ɓɛ́ dàa bieniɛ niǹ lɔ̀n àá lé sɛ̃́ɲíi lɛ ɛ́ ń yú. Kɔ́ lò wo dũ hɔ bòo lɛ ɛ́ wɔ́ mi ǹ hɔ̀ Antiɔsi àá hɔ́ Yikoniɔmu àá hɔ́ Lisitere lóoniɛ̀ hũn! Hɔ ńɓúò kɛ́ ɛ́ ɓɛ́ ɛ́ yí vɛ́ àá niǹ ɲɛkɛ̃̀a kɛ́ ń hɛ̃̀ niǹ hũn? Kɛ́ Ɲunsɔ ɛ́ den fuieniɛ mi ǹ ɛ́ líeniɛ hɔ̀pe sí míkùi hũn. 12Ɛ́ ɓɛ́ nìnbiriè ɓɛ́kùi lɛ ɛ́ wɛ ɛ́ ɓɛ ɛ̀ cã̀aní ɓɛ́ ɲúuhɛ̃ àá Dɔfĩn ɓɛ́ ńcɛɓánlɔ́ àá ɔ́ Yiezu Kirisa bòo hũn ɛ́ ɓɛ́ ɓén biení lɔ̀n. 13Kɛ́ ɓɛ́ mɛkɛ̃nɲiì ɓàasiè àá ɓɛ́ nìkhɛ̃̀níkɛriè ɛ́ pe ɓén wookɛ ɛ́ vɛ àá hiɛhɔ́ ɓɛ́ bɔ̀koohɛ̃ wénlɔ́ hũn, ɛ́ khɛ̃̀níkɛ ɓɛ nìnbiriè dɔ̀ ɛ́ vĩ́iní, kɛ́ ɓɛ̀pe kùusɔ ɛ́ ɓɛ́ ɓiɛ̀ ɛ́ khɛ̃̀níkɛ ɛ̀ vĩ́iní. 14Kɛ́ hɔ́ ɓen kɛ́ kɔ́pe, ɛ̀ kɔ̀ cɛ dìń hɔ́ bòo lɛ ɛ́ kɔ́ kɛ̀rɛa ǹ, hɔ̀pe lɛ ɛ́ kɔ́ dũmuasɛ̃̀ nin cɛ̃̀un. Kɔ́ lò wo dũ a kɛ̀ránlɔ lɛ ɛ́ kɔ́ kɛ̀rɛa hɔ̀ viì. 15Ɛ̀ dàá mìí àá kɔ́ zĩn-cɛ́mu ɛ́ kɔ́ lò wo dũ hɔ Dɔfĩn bienù ńwĩ́ncɛ̃́a; hɔ̀ dɛ̀ hɔ̀ bɔ̀dũmunù ɛ́ lɛ́ kɔ̀ ǹ ɛ́ kɔ́ dàa yí lé fuerɛ̀ hɔ̀ lɛ ɛ́ kɔ́ dũmuasɛ̃̀ à Yiezu Kirisa ǹ bòo hũn. 16Hɔ̀ bòo lɛ ɛ́ wɛ̃́ lé Dɔfĩn bienù vɛ̃hṹ hũn míkùi ɛ́ Dɔfĩn temu lɛ́ ɛ́ hɔ́ dàa wɛ̃́. Ɛ́ hɔ́ iè bòo lɛ ɲún wi cɛ̃̀un iè hɔ̀ lɛ ɛ́ hɔ́ wóò kɛ̀rán ɓɛ́ nìnbirìe àá hɔ́ bɔ̀berà, ɛ̀ hɔ̀ lɛ́ ɛ̀ ɓɛ̀ ɛ̀ dũń ɓɛ́ ńwékhemù, ɛ̀ hɔ̀ lɛ́ ɛ̀ ɓɛ̀ khũ̀á ɓɛ́ ńwékhemù sɔ máahṹ, ɛ̀ hɔ̀ kɛ̀rán ɓɛ́ àá hɔ́ bòo lɛ ɛ́ cã̀aní wénlɔ́, 17bòo lɛ ɛ́ wé à Dɔfĩn nìnbírɔ ɛ̀ dàá wé nìnbírɔ lɛ te wookɛa vɔ́, nìnbírɔ lɛ ɛ́ yú hɔ́ bòo lɛ ɛ́ fɔ́ɓán àá ɔ́ míkùi à dàá wóo wé hɔ́ bɔ̀tente.
Currently Selected:
2 Timote 3: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
