2 Timote 4
4
1Ɛ́ nín kɔ̀ hɛ̃nnin àá bɔ̀bín Dɔfĩn híɛhɔ́ àá ɔ́ Yiezu Kirisa hiɛhɔ́, àpe lɛ ɛ́ ɓén lè ɓɛ̀ nìnbirìe lɛ yìe wi àá ɓɛ́ lɛ ɛ́ húrunkɛ lìe. Nín kɔ̀ hɛ̃nnin àpe Yiezu Kirisa khũ̀á ɓenlɔ́ àá piè bɛ́záanú bòo hũn, 2nɛ kɔ wóo buie le Dɔfĩn bienù buie fúu, hɛ̀rí ɛ̀ hɔ̀ wé lé yìi lɛ sãa hũn tàá hɛ̀rí ɛ̀ hɔ̀ wé lé yìi lɛ ɛ́ yí sãa hũn. Wóo bie bòo lɛ ɛ́ wé ɛ̀ ɓɛ̀ nìnbirìe ɛ̀ dũń ɓɛ́ ńwékhemù, ɛ̀ ɓɛ̀ ɓen wɔ́ khɔn ɛ̀ kɔ̀ wóo bie hɔ ɛ̀ lɛ́ ɓà ǹ, ɛ̀ kɔ̀ wóo hĩ̀ kɔ̀ hũn hɔ̀ bòo míkùi hũn ɛ̀ dàá bé ɓɛ́, ɛ̀ kɔ̀ lò wóò kɛ̀rán ɓɛ́ fúu. 3Iè hɔ̀ lɛ ɛ́ lé yìi dɔ̀ ɛ́ vaá-ɓen lɛ ɛ́ ɓɛ́ nìnbirìe ɛ́ yá wóò ɓén tɛ̀ ɛ́ ɲí hɔ́ kɛ̀ránlɔ́ tente bòo, kɛ́ peɓɛ̀ kùrú tĩɛ̀ bòo iè pe ɛ́ ɓɛ́ wóo ɓén bè máahṹ, ɛ̀ ɓɛ̀ wóo ɓén lɛ́ ɛ́ ɓɛ́ miikɛ kɛ̀ránliè ɛ́ kíríkɛ ɓà ǹ ɛ́ bie hɔ biehĩ́ lɛ ɛ́ ɓɛ́ wɛ ɲínlɔ́ ɛ́ lɛ́ ɓà ǹ. 4Ɓɛ̀ wóo ɓén híɛ ɓɛ́ ɲɛkɛ̃̀a ɛ́ bie nɛ ɓɛ́ yá ɲí hɔ́ bɔ̀berà biehĩ́, kɛ́ ɓɛ́ den wóo ɓén khíi vɛ tɛ́ ɓɛ́ ɲɛkɛ̃̀a àá hɔ́ ɓáǹyíe bòo bierɔ́ vìi, hɔ̀pe lɛ ɛ́ ɓɛ́ nìnbirìe te hɛ̀. 5Ɛ̀ kɔ̀pe, wóo ɓaà kɔ̀te bòo míkùi hũn, wóo hè kɔ̀ hũn lè lɔ̀nbiè hũn, ɛ̀ kɔ̀ wóo pĩ̀iní kɔ́te ɛ̀ kɔ̀ buie le Bentĩnu, ɛ̀ kɔ̀ wóo tɛ́ kɔ́ Dɔfĩn tɔnlɔ́ nɛ hɔ ɲunù tí.
6Ɛ̀ hɔ̀ ɓen kɛ́ ńpe, ɛ̀ ǹ dɛ̃̀ kɛ̀a ie miyiɛ́ ɲumu lɛ ɛ́ ɓɛ́ pùuniɛ vɔ́, ɛ́ niǹ lanlɔ́ hɔ́pe Dɔfĩn viì ɛ́ wo ɓɛrɛ dɛ̃un. 7Ń san hɔ̀ sɛrɔ́ lɛ sãa, ń zɔ̀ hɔ̀ khã̀a ɛ́ van víeniɛ, ɛ̀ ǹ ɓɛ́ɓɛ́a hɔ̀ ńdɛsĩ̀nlɔ́ ǹ ɛ́ dàa. 8Ɛ́ laà lɛ lɔ̀n ɛ́ hɔ́ cã̀anírɔ́ lɛ ɛ́ yú sàanín ɛ́ bɔ̀sí ɛ́ nìn hìé. Ɲunsɔ lɛ iè ɔ̀ lìe lèrɔ lɛ ɛ́ cã̀aní ɛ́ ɓén lɛ́ hɔ́ mi ǹ hɔ̀ lìe lènlɔ́ zɔǹ. Ɛ́ hɔ́ lò yá ɓén wé ńpe niǹ dòonún á ɓén lɛ́ hɔ́ nin, kɛ́ á lò ɓiɛ̀ ɛ́ ɓén lɛ́ hɔ́ ɓɛ̀ nìnbirìe lɛ wɛ a ɓɛ́kùi ǹ, ɛ̀ ɓɛ̀ ɛ́ piè khũ̀á ɓenlɔ́ ɛ̀ hìé.
Pooli ɛ́ wɛ nɛ a Timote ɛ̀ ɓen mí viì
9Hièní kɔ́te ɛ̀ kɔ̀ ɓen niǹ viì fùa fùa. 10À Demaasi ɛ́ fúɛrɛ̀sí mi ǹ à cɔ́ iè hɔ̀ lɛ á hɛ̀ wɛ lepe dímíɲɛ́ sɔ lɛ bòo cɛ̃̀un, á wo cɔ́ van hɔ̀ Tesaloniike. À Keresanse ɛ́ van hɔ̀ Kalasi, à Tiite ɛ́ ɓiɛ̀ cɔ́ van hɔ̀ Dalemaasi. 11À Liike mí dòonún ɛ́ temu ɛ́ wi yán àá mi. Ɛ́ kɔ́ fí-é Marike ɛ̀ dàá ɓen iè hɔ̀ lɛ á dɛ̀ mi ɛ́ sĩiní niǹ tɔnlɔ́ hũn. 12Ń tɔrɛ à Tisiike á van hɔ̀ Efɛɛzi. 13Kɔ́ ɓen vaá-ɓen ɛ̀ kɔ̀ mìí lé mùakú lɛ ɛ́ ń fúɛrɛ̀sínin à Karapuusi yíe hɔ̀ Toroasi lóo hũn, ɛ̀ kɔ̀ bĩní khui hɔ vɛ̃hɛ̃, sankɛ́ kɛ́ kɔ́ hɛ̀ bí nɛ kɔ hũn ɓé hɔ́pe vɛ̃hɛ lɛ iè hɔ̀ sɛ̃́hɛ̃ lɛ ɛ́ ɓɛ́ wɛ̃́ lɔ̀n ɛ́ bun bunlɔ́ wɛ̀. 14À Likirɔ Alɛkisandere ɛ́ wɔ́ bɔ̀koohɔ́ cɛ̃̀un àá mi. Ɛ́ Ɲunsɔ ɛ́ ɓén lɛ́ piè bòo lɛ á wɔ́ sàanín ɔ̀ ǹ. 15Ɛ́ kɔ́pe lò ɓiɛ̀ pɛ kɔte bòo àá ɔ́, iè hɔ̀ lɛ á pɛ̃́ hɔ́ bòo lɛ ɛ́ ké wóò kɛ̀rán àá ɓɛ́ nìnbirìe cɛ̃̀un.
16Hɔ̀ hán bòo lɛ ɛ́ ń dàa ɛ́ san niǹ ɲunù hɔ̀ lìe lènlén ɛ́ nìnbírɔ dɔ̀ ɛ́ yí sĩiní mi wɛ̀, kɛ́ ɓɛ́pe ɓɛ́kùi ɛ́ zɔ̀kɛ ɛ̀ ɓɛ̀ kɛ́ mi. Nɛ Dɔfĩn ɛ̀ bí líi hɔ́pe sí ɛ̀ bè peɓɛ̀ lɔ̀n wɛ̀. 17Kɛ́ Ɲunsɔ ɛ́ sĩiniɛ mi à dɔ́ pànkɛ́ mi ǹ ɛ́ ń dàa dɛ̀rɛ piè bienù buie sãaniɛ, ɛ̀ ǹ lɛ́ ɛ́ ɓɛ́ nìnbirìe lɛ ɛ́ yí ɓɛ́ Zuifuɓɛ ɓɛ́kùi ɛ́ ɲɛ́ lé. Á wo lerɛ mi ɛ́ lɔ́ á zànkɛ́wòohṹ núnú hũn. 18Ɛ́ Ɲunsɔ ɛ́ ɓén leń mi ɛ́ lé hɔ́ bɔ̀sũmúa míkùi hũn à ɛ́ fuení mi ǹ ɛ́ nín yòó ɛ́ vɛ́ zɔ piè hóohũn bɛ́záanú hũn kɛ́ bòo dɔ̀ ɛ́ yá yí mi wɛ̀. Nɛ hɔ ɓàarɔ́ bòo ɛ̀ sĩ̀-ɛ̀ ǹ hɔ̀ pɛ̃̀hṹ lɛ yá vé hũn! Amiina.
Víeníkɛlán tìɛníkɛrɔ́
19Tìɛníkɛ a Pirisiile àá ɔ́ Akilaasi àá ɔ́ Onezifɔɔre zũnù nìɛ ǹ. 20À Erasite ɛ́ kérɛ hɔ̀ Korɛnte lóo hũn, à Torofiimu ɛ́ ń fùɛrɛ̀sínin hɔ̀ Milee hũn iè hɔ̀ lɛ á hṹn lɔ̀n ɛ́ yí hie wɛ̀. 21Hìení kɔ́te ɛ̀ kɔ̀ ɓen kɛ́ lé mùn-tìɛní ɛ́ ɲɛùn yí híní wɛ̀.
À Ebuluusi àá ɔ́ Pudɛnsi àá ɔ́ Liniise àá ɔ́ Kulodia àá ɓɛ́ kìe zɛ̀ɓɛ̀ lɛ ɛ́ kɛ́ ɓɛ́kùi ɛ́ kɔ̀ tìɛníkɛnin.
22Nɛ Ɲunsɔ ɛ̀ kań àá kɔ!
Nɛ Dɔfĩn hiì ɛ́ kań àá miɛ!
Currently Selected:
2 Timote 4: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
