2 Timote 2
2
À Kirisa tɔntɛ́ tente bòo
1Ɛ́ kɔ́pe niǹ yɛ̀nù, pĩ̀iní kɔ́te ɛ̀ kɔ̀ yí hɔ́ pankɛ́ lɛ ɛ́ lé àá Yiezu Kirisa hiì hũn. 2Ɛ́ hɔ́pe bòo lɛ ɛ́ kɔ́ ɲɛ́ kɛ́ nin bie ɓɛ nìzã̀amáa yìe hũn, ɛ́ kɔ́ dé ɓɛ́ nìnbirìe lɛ ɛ́ kɔ́ dũmuasɛ̃̀ nin núnú hũn, lɛ iè ɓɛ̀ nìɛ lɛ ɛ́ dɛ̀ hɔ̀ ɛ́ ɓiɛ̀ ɛ́ khíi kɛ̀rán àá nìnbí-ɓuà dɔ̀.
3Ɛ́ kɔ́ tɛ̀ nɛ kɔ lɔ̀n ɛ̀ be àá mi kɛ̀a ie Yiezu Kirisa sɛ̃̀nɛ̀dɔ́sí tente. 4À sɛ̃̀nɛ̀dɔ́sí lɛ ɛ́ wi mí tɔnlɔ́ hũn, kɛ́ á wɛ nɛ mí bòo ɛ̀ tĩìní ɓɛ́ ɲunsɔ ǹ, à yá hìení mí kuò lè mɛkɛ̃nì bòo hũn wɛ̀. 5Àlɛ ɛ́ hɔ̀ ńpenkɛɓán khã̀a ɛ̀ zè ɛ́ yí dɛ̀ sàanín ɛ́ yáà yí kɛ́ á yí zè hɔ̀ khã̀a sɔ àá mí híɛhɔ́ wɛ̀. 6À vɛrɔ lɛ ɛ́ vɛ̀ lɔ̀n bɔn ɛ́ temu sãawi à dí hɔ́ híɛhɔ́ ɛ̀ dí mí vɛ̀nù bòo. 7Ɛ́ kɔ́ vɛ̀ kɔ̀ hũn hɔ̀ bòo lɛ ɛ́ nín bie lɔ̀n, ɛ́ Ɲunsɔ ɛ́ lò yɛ̀rɛ́ mii lɛ́ ɛ̀ kɔ̀ dũń hɔ́pe míkùi ɲún.
8Ɛ́ kɔ́ síɛ liení-ɛ Yiezu Kirisa bòo, àpe lɛ ɛ́ iè ɔ̀ Daviide hũn yɛ̀nù lɛ vìé lɔ́ hɔ́ húmú hũn kɛ̀a bòo lɛ ɛ́ lé Bentĩnu lɛ ɛ́ nín buie ɛ́ dàa ɛ́ bie hɔ̀. 9Ɛ́ lé iè lèpe Bentĩnu sɔ bòo hũn ɛ́ nin lɔ̀n dàa ɛ́ be fúu ɛ́ yɛ̀rɛ́ can àá hɔ́ zɔ̀kɔ̀zɔ́kɔ́ɓɛ̀ kɛ̀a bòo ɛ́ ń iè nìɓé, kɛ́ lé Dɔfĩn bienù ɛ́ pe mí zɔ̀kɔ̀zɔ́kɔ́ɓɛ̀ hũn wɛ̀. 10Ɛ́ sí iè hɔ̀pe ɛ́ ń dàa ɛ́ hɛ̃̀ niǹ hũn hɔ̀ bòo míkùi hũn ɓɛ̀lɛ ɛ́ Dɔfĩn ɛ́ munɛ bòo hũn, bòo lɛ ɛ́ wé ɛ̀ ɓɛ̀pe ɛ̀ ɓiɛ̀ yí lé fuerɛ̀ lɛ ɛ́ wi-e Yiezu Kirisa ǹ, àá hɔ́ ɓàarɔ́ lɛ ɛ́ yá vé. 11Ɛ́ lépe bienù sɔ lɛ ɛ́ iè ben-bíì:
Kɛ́ ké ɓen páaniɛ húrun àá ɔ́,
Ɛ́ ké ɓiɛ̀ ɓén páaní wé lé mɛkɛ̃nì hũn àá ɔ́.
12Kɛ́ ké ɓen hɛ̃̀ kè hũn lè lɔ̀nbiè hũn àá ɔ́,
Ɛ́ ké ɓiɛ̀ ɓén dí lé bɛ́záanú àá ɔ́.
Kɛ́ ké ɓen ɛ́ pɛ̃́ piè bòo,
Ápe ɛ́ ɓiɛ̀ ɓén pĩ́ ké bòo.
13Kɛ́ ké ɓen ɲúuhɛ̃ ɛ́ yá cã̀aní,
Àpe ɲún ɛ́ cã̀aní fúu.
Iè hɔ̀ lɛ á yáà pĩ́ mí bòo lɛ á bie wɛ̀.
14Ɛ́ sí iè pe bòo lɛ ɛ́ kɔ́ wóo liení àá ɓɛ́ ńdɛ̃sìriè. Wóo bie lɛ́ ɓà ǹ hiení Dɔfĩn híɛhɔ́ nɛ ɓɛ bí wóo wũ̀aní hɔ́ biehĩ́ bierɔ́ lɔ̀n wɛ̀. Hɔ̀ ńwũ̀anín ɛ́ ɲún dɔ̀ ɛ́ mí kɛ́ hɔ́ den iè bòo lɛ ɛ́ wóò tìení ɓɛ́lɛ ɛ́ hɔ̀ ɲí ǹ. 15Ɛ́ kɔ́ pĩ̀iní kɔ́te ɛ̀ kɔ̀ wé nìnbírɔ lɛ bòo tĩ Dɔfĩn; wé tɔntɛ́ lɛ ɛ́ yáà lùwi mi tɔnlɔ́ tánlɔ́ hũn kɛ́ á wóò bie hɔ̀ bɔ̀berà biehĩ́ ɛ̀ lɛ́ ɓɛ́ nìnbirìe ǹ àá mí híɛhɔ́. 16Hɔ̀ biehĩ́ lɛ ɲún mí ɛ̀ hɔ̀ lò yí hɔ́ ńdɛsĩ̀nlɔ́ biehĩ́ ɛ́ kɔ́ bí dé kɔ́te hũn wɛ̀; iè hɔ̀ lɛ ɛ́ ɓɛ́pe lɛ ɛ́ wóò bie hɔ ɛ́ wóo wóokɛ niìní ɓɛ́te àá Dɔfĩn. 17Peɓɛ̀ bienù ɛ́ dɛ̃̀ kɛ̀a ie ńcɛ́kɛ́ lɛ ɛ́ kɛ̃́nkɛ̃́nlɔ́. À Himenee àá ɔ́ Filɛɛti ɛ́ iè ɓɛ̀pe nìɛ sɔ dɔ̀. 18Ɓɛ̀pe ɛ́ niìniɛ ɓɛ́te àá hɔ́ bɔ̀berà, ɛ̀ ɓɛ̀ nɛ ɓɛ nìhiè ɛ́ vìé lɔ́ vɔ́. Ɛ́ kɛ̀amu, ɛ́ ɓɛ́ iè pe ɛ́ wo ɛ́ ɓɛ̀ nìɛ ɓɛ̀ yiɛní dɔ̀ ńdɛsĩ̀nlɔ́ ɛ̀ yáakɛ. 19Hɔ́rɔsí kɛ́ Dɔfĩn bòo lɛ ɛ́ hɔ́ ɲɛ̀ fìi ɛ́ pànkɛ́ ɛ́ pɛ́wi wi yán. Ɛ́ lɛ iè hɔ̀ biehĩ́ lɛ ɛ́ wɛ̃́ ɛ́ wi pehɔ̀ lɔ̀n: «Ɲunsɔ ɛ́ dũ ɓɛ nìnbirìe lɛ ɛ́ bòo sɛ̃̀ mí ǹ»; ɛ̀ hɔ̀ bĩniɛ nɛ: «Nìnbírɔ íe nìnbírɔ lɛ ɛ́ wóò bie nɛ mípe ɛ́ bòo ɛ́ sɛ̃̀ Ɲunsɔ ǹ, ɛ́ sãawi à khũ̀á hɔ́ bɔ̀koohɔ́ máahṹ.» 20Hɔ̀ yí sɛ̃́ní díe tĩ̀ɛ àá hɔ́ hɛnlɔ́ díe tĩ̀ɛ mí dòonún ɛ́ temu wóò zɔ kań zũ-bɛhɔ́ hũn wɛ̀. Kɛ́ hɔ́ tĩ̀ɛ dɔ̀ ɛ́ wóò zɔ kań yán kɛ́ hɔ́ iè dãahĩ́ lɛ ɛ́ tantanlɔ́, ɛ̀ hɔ̀ dɔ̀ ɛ́ mɛ́ àá cɔ́rɔ́. Ɛ́ hɔ́ hán tĩ̀ɛ ɛ́ ɓɛ́ wóò ɛ̀ mìí liení hɔ́ sɛ́hĩ́ zɔn, ɛ̀ hɔ̀ lɛkɛ́ ɛ́ ɓɛ́ wóò dàá tɛ́ àá sítĩnlɔ́. 21Ɛ́ nìnbírɔ lɛ kɛ́ á tiɛ míte ɛ́ lɔ́ hɔ́pe sí hũn, ɛ́ ɓàasɔ ɛ́ ɓén dìń kɛ̀a ie le dínlén dìɛ lɛ ɛ́ ɓɛ́ wóò mìí liení lé sɛ́rí zɔn. Hɔ́rɔsí ɛ̀ Ɲunsɔ ɛ́ wo ɛ́ lerɛ à ɛ́ khíi bìsí mí dòonún mí bòo hũn, á wo ɲún ɛ́ wé piè viì, á wo dɛ̀ hɔ̀ tɔnlɔ́ lɛ ɲún wi míkùi ɛ́ wóo tɛ́.
22Ɛ́ kɔ́ zè ɛ̀ kɔ̀ kɛ́ hɔ́ zɛ̀fìɛnú tũmù bòo lɛ yí sãa, ɛ̀ kɔ̀ cɛ̀ hɔ̀ cã̀anírɔ́ àá hɔ́ ńdɛsĩ̀nlɔ́ àá lé wanminu àá lé hũn-wiɛ̀. Cɛ̀ hɔ̀ àá ɓɛ́ nìnbirìe lɛ ɛ́ wóò hán ɓɛ́ hũn ɛ̀ dàá hɛ̃un ɔ̀ Ɲunsɔ ǹ. 23Pĩ́ hɔ́ ńwũ̀anín lɛ ɛ́ ɲún mí bòo, hɔ̀ iè ńtĩmíinún, iè hɔ̀ lɛ ɛ́ ké dũ kɛ́ hɔ́ wóò ɓen àá hɔ́ fuò. 24Hɔ́rɔsí à Ɲunsɔ tɔntɛ́ ɛ́ lò den ɛ́ yí sãawi à wé fufi wɛ̀. Kɛ́ á sãawi à wé nìnbírɔ lɛ ɛ́ wuawi ɓɛ nìnbirìe ɓɛ́kùi viì, nìnbírɔ lɛ ɛ́ dɛ̀ ɓɛ̀ nìnbirìe ɛ́ wóò kɛ̀rán, nìnbírɔ lɛ ɛ́ dɛ̀ mí hũn ɛ́ wóò hè ɓɛ̀ nìnbirìe biehĩ́ míkùi hũn. 25À sãawi à wóo wuawiní míte ɛ̀ dàá bé ɓɛ́pe lɛ ɛ́ piè bòo ɛ̀ wũ̀aní; ɛ́ wɔ́ khɔn ɛ́ Dɔfĩn ɛ́ lɛ́ yìi dɔ̀ ɓà ǹ ɛ́ ɓɛ́ ɛ́ zɛ̀ní ɓɛ́ hũn nùnlé ɛ̀ ɓɛ̀ wo ɛ́ dũń hɔ́ bɔ̀berà. 26Ɛ́ ɓɛ́ wo ɛ́ khũ̀á ɛ́ khíi yí ɓɛ́ hũn nùnlé lɛ ɛ́ sãa ɛ̀ ɓɛ̀ ɛ́ yí ɓɛ́te ɛ́ lí-é Sitũanɛ hurɔ́ lɛ hṹn vɛ̃un ɓɛ̀ hũn, lèpe lɛ ɛ́ hṹn lɛ́ ɛ́ ɓɛ́ dàa ɛ́ wɔ́ piè tĩì bòo ɛ́ ɓɛ́ ɛ́ wé.
Currently Selected:
2 Timote 2: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
