2 Korɛnte Siè 6
6
1Ɛ́ hɔ́ lɛ ɛ́ ké páaniɛ ɛ́ tɛ́ àá Dɔfĩn, ɛ́ ké mì ɓɔ́nɓɔ́ninin nɛ mi bí fùansí ɛ̀ lè hiì lɛ ɛ́ Dɔfĩn wɔ́ àá miɛ ɛ̀ vɛ ɲumu wɛ̀. 2Iè hɔ̀ lɛ ɛ́ Dɔfĩn ɛ́ den bie nɛ làa:
«Hɔ̀ lɛ ɛ́ niǹ hiì pɛ̃̀hṹ ɛ́ ɓɛrɛ dɛ̃un,
Ɛ́ ń kɔ̃́niɛ kɔ̀ hɛ̃nnɛ.
Ɛ̀ hɔ̀ lɛ ɛ́ lé fuerɛ̀ pɛ̃̀hṹ ɛ́ ɓɛrɛ dɛ̃un,
Ɛ́ ń ɓɛrɛ fueniɛ kɔ ǹ.»
Ɛ́ mí húi, ɛ́ lɛ den wo ie pe Dɔfĩn hiì pɛ̃̀hṹ, ɛ̀ lɛ den iè lepe fuerɛ̀ wurù.
3Ké yá cɛ̀ nɛ ke tɔnlɔ́ yèrè ɛ́ ɓɛ́ yáa wɛ̀. Ɛ́ sí iè hɔ̀pe ɛ́ ké dàa yá cɛ̀ ɛ̀ kè wé bòo dɔ̀ lɛ dɛ̀ ɛ́ lɛ́ ɛ́ nìnbírɔ dɔ̀ ɛ́ khũ̀á ɛ́ lé Dɔfĩn wṹn lɔ̀n wɛ̀. 4Kɛ́ hɔ́ bòo lɛ ɛ́ ké wóò wé míkùi hũn, ɛ́ ké wóò zɛ̃́ní kɛ́ ké iè Dɔfĩn tɔntɛ́riè: ké wóò tɛ̀ ɛ̀ hɔ̀ bòo míkùi ɛ̀ kúu kiè ǹ, ɛ̀ kè wóò hĩ̀ kè hũn lè sɛ̃́ɲíi hũn, lè tĩyaarè hũn, àá hɔ́ hũn-yenkɛà hũn. 5Ɓɛ̀ ɛ́ nàa kie ɛ̀ ɓɛ̀ kóo kie lè kɛ̀sí hũn, ɛ̀ ɓɛ̀ sùkúrɛ ɓɛ̀ nìzã̀amáa ɛ́ ɓɛ́ hĩ́nà tɛ́ dɛ̃̀ kè ɲún hũn, ɛ̀ kè tan hɔ̀ tɔn-bɛ̃hɛ̃ tánlɔ́ hũn, ɛ̀ kè hàarí yáà yí hɔ́ dɛmu dɛ̀, ɛ̀ kè lò hàarí yáà yí hɔ́ díe ɛ̀ dí wɛ̀. 6Ké wóò zɛ̃́ní kɛ́ ké iè Dɔfĩn tɔntɛ́riè àá ké ceremú àá ké bɔ̀dũmunù àá ké hũn hĩ̀nlɔ́ àá ké sãamu àá lé Mɛkɛ̃n-Sãanu pànkɛ́ àá ké wanminu tente, 7àá bòo lɛ ɛ́ ké dàa ɛ́ lè Bentĩnu ɛ̀ buie àá bɔ̀berà àá Dɔfĩn pànkɛ́. Ɛ́ ké cã̀anírɔ́ ɛ́ dɛ̃̀ kɛ̀a ie ke hĩɛ̀ tĩ̀ɛ lɛ ɛ́ ké wóò dàá sĩ́ɓán àá kìe ńbíyanle àá hɔ́lɛ ɛ́ ké wóò dàá pɛ kete. 8Hɔ̀ dɔ̀ ɛ̀ ɓɛ̀ wóò ɓàaní kie ǹ, ɛ̀ hɔ̀ dɔ̀ ɛ̀ ɓɛ̀ cíwiní kie ǹ; ɛ̀ hɔ̀ dɔ̀ ɛ̀ ɓɛ̀ wóò tòokɛ kie, ɛ̀ hɔ̀ dɔ̀ ɛ̀ ɓɛ̀ mɛ̀ndɛ̃ kie. Ɓɛ̀ wóò húi kie kɛ̀a ie ɓɔ́ɓúukɛriè kɛ́ hɔ́ lò den iè bɔ̀berà ɛ́ ké wóò munkɛ, 9ɛ̀ ɓɛ̀ wóo húi kie kɛ̀a nìɛ lɛ ɛ́ ɓɛ́ yí dũ, kɛ́ ɓɛ́ lò den dũ kie cɛ̃̀un, ɛ̀ ɓɛ̀ húi kie kɛ̀a ie nìɛ lɛ ɛ́ hí cɔ́, kɛ́ ké lò den yìe wi cɛ̃̀un. Ɛ̀ ɓɛ̀ wóò vɛ́ ké ɲɛkɛ̃̀a, kɛ́ ɓɛ́ yá ɓé kie wɛ̀. 10Ɓɛ̀ wóò yáakɛ ke tĩɛ̀, kɛ́ ké lò den pɛ́wi wi le tĩwiɛ̀ hũn fúu; ɛ̀ ɓɛ̀ wóò húi kie kɛ̀a ie nìkherà, kɛ́ ké lò den wóò lɛ́ ɛ̀ nìnbí-kuì ɛ̀ wé bòo ɓàasiè. Ké dɛ̃̀ kɛ̀a ie nìɛ lɛ ɛ́ yí dàa bòo dɔ̀, kɛ́ ké lò den dàa bòo míkùi.
11Kìe Korɛnte nìɛ siè, ké bie àá miɛ wìée kɛ́ ké yí tànkɔ̀ní bòo dɔ̀ wɛ̀; ké hɛ́rɛ́ kè hũn míkùi ɛ́ dàa bie àá miɛ. 12Kèpe ɛ́ zɛ̃́niɛ lɛ́ miɛ ǹ kɛ́ ké hɛ̀ wɛ miɛ, kɛ́ mípe ɛ́ temu yí hán mí hũn àá kie wɛ̀. 13Ɛ́ mí den húi, nín khɛ́ àá miɛ kɛ̀a niǹ nìɛ: mì wé kɛ̀a kepe, mì hán mí hũn míkùi àá kie.
Ńpiemu àá síbínú ɛ́ yí dɛ̀ yá kóo ɓánlɔ̀n wɛ̀
14Mì bí wóo vɛ páa ɓán àá ɓɛ́ nìnbirìe lɛ yí ɓɛ́ ńdɛsĩ̀riè ɛ̀ wé kɛ̀a ɓɛ wɛ̀. Iè hɔ̀ lɛ ɛ́ ńkóoɓánlɔ̀n dúsɔ ɛ́ temu dɛ̀ ɛ́ yí hɔ́ bòo lɛ ɛ́ cã̀aní àá hɔ́ bɔ̀koohɔ́ tĩ́ihṹ? Tàá ńɓùo temu dɛ̀ ɛ́ lɛ́ ɛ́ hɔ́ ńpiemu àá hɔ́ síbínú ɛ́ dàa dɛ̀ ɛ́ kóo ɓánlɔ̀n? 15Ńɓùo temu dɛ̀ ɛ́ lɛ́ á Kirisa àá ɔ́ Sitũanɛ ɛ́ dàa dɛ̀ ɛ́ ɲíɓán? Tàá ńɓùo á ńdɛsĩ̀rɔ ɛ́ dɛ̀ ɛ́ lènin àá ɔ́lɛ yí é ńdɛsĩ̀rɔ́? 16Ɛ̀ hɔ̀ iè ńɓùo ɛ́ lé Dɔfĩn zũnù àá hɔ́ wɛ̃̀hɛ̃ ɛ́ dɛ̀ ɛ́ ɲí ɓánlɔ̀n? Iè hɔ̀ lɛ ɛ́ képe iè Dɔfĩn lɛ yìe wi zũnù kɛ̀a bòo lɛ ɛ́ hɔ́pe Dɔfĩn míte ǹ ɛ́ dàa bie hɔ̀ ɛ́ nɛ làa:
«Ń ɓén zɔ àá ɓɛ́ ɛ̀ ǹ ɓén bèɓán àá ɓɛ́.
Ń ɓén wé peɓɛ̀ Dɔfĩn ɛ̀ ɓɛ̀pe ɛ́ ɓiɛ̀ ɛ́ wé niǹ nìɛ.» 17Ɛ́ sí iè hɔ̀pe ápe Ɲunsɔ ɛ́ dàa nɛ làa:
«Ɛ́ mí zɔ lé peɓɛ̀ tĩ́ihṹ, ɛ̀ lɛ́ nɛ mi viì ɛ̀ niìní àá ɓɛ́.
Mì bí wóo hɛ hɔ bòo lɛ lɔ̀n wɛ̀,
Ɛ́ ńpe den ɛ́ fé miɛ ɛ́ sãàní.
18 Ń ɓén wé mì Yàá,
Ɛ̀ mìpe ɛ́ ɓiɛ̀ ɛ́ wé niǹ zɛ̀ɓɛ̀ àá niǹ hĩ́ini.
Ɲunsɔ pànkɛ́ míkùi ɓàasɔ ɛ́ temu bie kɛ̀amu.»
Currently Selected:
2 Korɛnte Siè 6: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
