2 Korɛnte Siè 5

1Ɛ́ ké wo ɛ́ dũ nɛ kɛ́ ké tɛkɛ̀a ɛ́ ɓen yáa, hɔ̀pe lɛ ɛ́ dɛ̃̀ kɛ̀a ie le kùdà lɛ ɛ́ ké wi hũn lè sṹsùnù lɔ̀n, ɛ̀ hóohũn ɛ́ ké dàa zũnù lɛ ɛ́ Dɔfĩn ɛ́ te tɔn, lɛ iè zɔǹlén lɛ ɓén wé yán pɛ̃̀hṹ lɛ yá vé hũn, lèpe lɛ ɛ́ nìnbirìe níhĩ́ ɛ́ yí teń yí te wɛ̀. 2Ɛ́ ké wo ɛ́ ɲinikɛ ɛ́ hɛ̀ ɛ́ cɛ̀ pɛ̀pɛ̀ ɛ́ ke zɔ lepe kè zɔnlén dɛ̀fĩì lɛ yòó van wi hɔ́ hóohũn. 3Ɛ́ ké wo ɓén yóò van zɔn yán, ɛ́ hɔ́ ɓén wé kɛ̀a ie pɔnkɔ̀-fĩì ɛ́ ké zɔn, ɛ́ ké wo yá dìń àá ké tɛ̀kɛ-kíemáa wɛ̀. 4Ɛ́ hɔ́ lɛ ɛ́ ké wi lepe kùdà sɔ lɛ iè pe kè tɛkɛ̀a hũn, ɛ́ ké ɛ́ ɲinikɛ kɛ̀a ie tìerɔ́ ɛ́ ké ɛ́ tìe. Kɛ́ hɔ́ lò yí bòo ɛ́ ké nɛ ké ɛ̀ duinkɛ hɔ́pe ke sṹsùnù lɔ̀n tɛkɛ̀a ɛ̀ kóosí, kɛ́ ké den ɛ́ cɛ̀ ɛ̀ kè yí ké hóohũn tɛkɛ̀a ɛ́ yòó zɔ ɛ̀ híɛ hɔ́pe tɛkɛ-kĩ́ɛ ǹ, bòo lɛ ɛ́ wé ɛ̀ hɔ̀ bòo lɛ ɛ́ wóò hí ɛ̀ zɔ vĩ́ hɔ́ lɛ ɛ́ yáà hí hũn. 5Ɛ́ Dɔfin míte ǹ ɛ́ te kie ɛ́ sɛ́sɛ́a bɔ̀sí hɔ́pe sí bòo hũn. Hɔ ɛ́ lɛ́ mí Mɛkɛ̃ni kiè ǹ ɛ́ dàa ɛ́ zɛ̃́ní kɛ́ Hɔ́ ɓén lɛ́ hɔ́ bòo lɛ ɛ́ hɔ́ lɛ́ mí ɲunù nɛ mí ɓén lɛ́ kiè ǹ.

6Ɛ́ sí iè pe temu lɛ́ ɛ́ ké dàa tĩɛ̀ ɛ́ hie fúu. Ké den dũ nɛ pɛ̃̀hṹ míkùi lɛ kɛ́ ké wi hɔpe ke tɛkɛ̀a hũn, ɛ̀ ke viì ɛ́ ni àá lé viì lɛ ɛ́ ké ɓén vɛ́ kań hũn àá ɔ́ Ɲunsɔ. 7Ɛ́ ké den ɛ́ vɛ àá ńdɛsĩ̀nlɔ́, kɛ́ hɔ́ yí hɔ́ bòo lɛ ɛ́ loo àá yìe ɛ́ ké bɔ̀nin wɛ̀. 8Ké hɛ̀ dàa tĩhiè cɛ̃̀un, ɛ́ ké wo hṹn cɛ̀ ɛ̀ kè lé hɔ́pe tɛkɛ̀a sɔ lɛ hũn ɛ̀ yòó vɛ kań ɔ́ Ɲunsɔ viì. 9Kɛ́ hɔ́ bòo lɛ ɛ́ ké ɛ́ cɛ̀ hɔ̀ bòo míkùi híɛhɔ́, iè bòo ɛ́ ké nɛ ke bòo ɛ̀ tĩìní-ɛ pe Ɲunsɔ ǹ, lɛ kɛ́ ké wi hɔ́pe kè tɛkɛ̀a sɔ lɛ hũn tàá hɛ̀rí kɛ́ ké lɔ́ pehɔ̀ hũn. 10Iè hɔ̀ lɛ ɛ́ képe kè kùi ɛ́ ɓén zɔn dɔ̀ ɛ́ dìń ɔ́ Kirisa híɛhɔ́ á ɛ́ lè kè lìe. Ɛ́ hɔ́rɔ ɛ́ wo ɓén yí hɔ́ bòo lɛ ɛ́ fɔ́ɓán àá ɔ́, ɛ́ ɓáaníɓán àá hɔ́ bɔ̀tente tàá hɔ̀ bɔ̀koohɔ́ lɛ á wɔ́ pɛ̃̀hṹ lɛ á dàa wi le sṹsùnù lɔ̀n.

Hɔ̀ ńkhũ̀áɲíɓán àá Dɔfĩn bòo

11Ɛ́ ké lò wo dũ hɔ bòo lɛ ɛ́ ɓɛ́ wóò nɛ ɓɛ mɛ̀ndɛ̃ a Ɲunsɔ, ɛ́ sí iè hɔ̀pe ɛ́ ké dàa ɛ́ cɛ̀ ɛ̀ kè bie àá ɓɛ́ nìnbirìe ɛ̀ ɓɛ̀ tɛ̀ hɔ̀. Dɔfĩn ɛ́ dũ kie ɛ́ van víeniɛ, ɛ́ nín lieníkɛ ɛ̀ ǹ nɛ mipe mì tĩɛ̀ hũn ɛ́ mí ɓiɛ̀ dũ mi. 12Hɔ̀ yí kɛ kɛ̀a bòo ɛ́ hɔ́pe biehĩ́ lɛ ɛ́ ké bie ɛ́ iè yèrè ɛ́ ké ɛ́ cɛ̀ mì híɛhɔ́ wɛ̀. Kɛ́ hɔ́ den iè bòo ɛ́ ké nɛ mi wóo dàń míte ɛ̀ ɓàanínin kèpe kè bòo hũn. Ɛ́ kɛ̀amu, ɛ́ mí wo ɛ́ yí hɔ́ bòo lɛ ɛ́ mí wóo mii dàá kɔ̃́ní ɓɛ́pe nìɛ lɛ ɛ́ wóò ɓàaní ɓɛ́te ǹ hɔ̀ bòo lɛ ɛ́ loo àá yiè bòo hũn, kɛ́ hɔ́lɛ lɛ ɛ́ zɔn wi peɓɛ̀ tĩɛ̀ hũn bòo mí wɛ̀. 13Kɛ́ nìnbirìe dɔ̀ viì ɛ́ ké ɓen iè nìnbirìe lɛ ɲúuhɛ̃ mí yán, ɛ̀ hɔ̀ iè Dɔfĩn tɔnlɔ́ bòo hũn ɛ́ ké dàa ɲúuhɛ̃ mí yán wɛ̀. Kɛ́ ké den ɲúuhɛ̃ wi yán, ɛ́ ké dàa wóo ke sĩiní miɛ. 14Iè hɔ̀ lɛ á Kirisa wanminu ɛ́ hɛ̀ mɔ̀ kie ǹ. Ɛ́ ké wo dũ sãàniɛ kɛ́ ápe mí dòonún ɛ́ temu húrun ɓɛ̀ nìnbirìe ɓɛ́kùi yènsénín. Ɛ́ hɔ́ sí iè bòo lɛ ɛ́ zɛ̃́ní kɛ́ ɓɛ́pe ɓɛ́kùi ɛ́ páaniɛ húrun àá ɔ́. 15À ɛ́ húrun ɓɛ̀ nìnbirìe ɓɛ́kùi yènsénín, bòo lɛ ɛ́ wé ɛ̀ ɓɛ̀pe lɛ yìe wi ɛ̀ bí wé ɓɛ́ mɛkɛ̃nì hũn ɓɛ́ kùrú yɛ̀rɛ́ bòo hũn, kɛ́ ɓɛ́ wé ɓɛ́ mɛkɛ̃nì hũn àpe lɛ ɛ́ húrun à vìé lɔ́ peɓɛ̀ yènsénín bòo hũn.

16Ɛ́ sí iè hɔ̀pe, ɛ́ kɛ̀a sáalɛ ɛ́ ké wo yá bĩní líi nìnbírɔ dɔ̀ kɛ̀a bòo lɛ ɛ́ ɓɛ́ nìnbirìe ɛ́ dàa wóò líi ɓán wɛ̀. Hɛ̀rí kɛ́ ké yɛ̀rɛ́ hàarí lie ɔ̀pe Kirisa àá nìnbí-yáamu líirɔ́, ɛ̀ kɛ̀a sáalɛ ɛ́ ké bĩniɛ yá ɔ̀ líi kɛ̀amu wɛ̀. 17Ɛ́ nìnbírɔ ɛ́ ɓen canɓán àá Kirisa, à iè nìnbí-fĩì. Ɛ̀ hɔ̀ bòo bɔ̀kĩ́ɛ ɛ́ khie cɔ́, ɛ́ kɛ̀a sáalɛ, ɛ́ hɔ́ bòo míkùi ɛ́ wo wɔ́ bɔ̀fĩɛ̀. 18Ɛ́ hɔ́pe sí míkùi ɛ́ lé àá Dɔfĩn viì, Hɔ̀pe lɛ ɛ́ tɔrɛ à Kirisa á ɓɛrɛ lɛ́ ɛ́ képe àá hɔ̀pe Dɔfĩn ɛ́ dàa khũ̀a ɛ́ ɲíɓán, ɛ̀ Hɔ̀ ɛ́ dɔ́ hɔ́ tɔnlɔ́ kè bàanì hũn nɛ ke lɛ́ ɛ̀ ɓɛ̀ nìnbirìe dɔ̀ ɛ̀ ɓiɛ̀ khũ̀á ɓen ɲíɓán àá mí. 19Iè hɔ̀ lɛ ɛ́ Dɔfĩn ɛ́ hàarí bɔ̀ à Kirisa ǹ ɛ́ dàa lɛ́ ɛ́ ɓɛ́ nìnbirìe ɓɛ́kùi ɛ́ khũ̀a ɓɛrɛ ɛ́ ɲíɓán àá mí, kɛ́ Hɔ́ yá peɓɛ̀ bɔ̀koohɛ̃ ɛ̀ húi wɛ̀. Ɛ̀ hɔ̀ khie tɔrɛ kie nɛ ke vɛ bie hɔ́ ńkhũ̀áɲíɓán àá mípe Dɔfĩn bòo ɛ̀ lɛ́ ɓɛ́ nìnbirìe ǹ.

20Ɛ́ képe iè ɓɛ̀ tɔntɛ́riè lɛ á Kirisa ɛ́ tɔrɛ. Ɛ́ hɔ́ wo dɛ̃̀ kɛ̀a bòo ɛ́ hɔ́pe Dɔfĩn míte ǹ ɛ́ wo kie ǹ ɛ́ dàa ɛ́ mì ve. Ɛ́ ké wo ɛ́ mì hɛ̃nnin à Kirisa yèrè lɔ̀n nɛ mi fùansí àpe Kirisa ɛ̀ lɛ́ ɛ̀ mì khũ̀á ɲíɓán àá hɔ́pe Dɔfĩn. 21À Kirisa ɛ́ pe yí wé bɔ̀koohɔ́ ɛ́ yí mi wɛ̀. Kɛ́ Dɔfĩn ɛ́ den tìeniɛ ɔ̀ àá ké bɔ̀koohɛ̃, bòo lɛ ɛ́ wé ɛ̀ kèpe lɛ ɛ́ cánɓán àá ɔ́pe Kirisa ɛ̀ wé nìcã̀aníriè hɔ̀pe Dɔfĩn híɛhɔ́.

Currently Selected:

2 Korɛnte Siè 5: bwj

Highlight

Copy

Compare