2 Korɛnte Siè 2

1Ɛ́ sí iè hɔ̀pe ń dàa nɛ ń yá khũ̀á ɛ́ ɓen mì viì àá tĩyaarè wɛ̀. 2Iè hɔ̀ lɛ kɛ́ ńpe ɛ́ hṹn ɛ́ te mi tĩɛ̀ ɛ́ yàání, ɛ̀ wíeni ɛ́ te niǹ tiì ɛ́ hṹn mii wiɛní? Hɔ́rɔsí ɛ̀ mìpe lɛ ɛ́ ń yáaniɛ tĩɛ̀ ɛ́ sũǹ hṹn dɛ̀ niǹ tĩì ɛ́ wiɛní? 3Ɛ́ sí iè hɔ̀pe ɛ́ ń dàa wɛ̃́ lépe vɛ̃hṹ sí kɛ̀amu ɛ́ lɛ́ miɛ ǹ, iè hɔ̀ lɛ ɛ́ ń den hṹn yí wɛ nɛ ń ɓen mì viì, ɛ̀ ɓen yí kɛ́ ɓɛ́pe lɛ ɛ́ hṹn sãawi ɛ̀ ɓɛ̀ lɛ́ lé tĩwiɛ̀ mi ǹ, ɛ́ khũ̀á wɔ́ lé tĩyaarè ɛ́ ɓɛ́ ɛ́ lɛ́ mi ǹ wɛ̀. Ɛ́ ń hɛ̀ dũ sãàniɛ nɛ ń ɓen wi tĩwiɛ̀ hũn, ɛ̀ mìpe mìkùi kùusɔ ɛ́ ɓiɛ̀ wi tĩwiɛ̀ hũn. 4Ɛ́ hɔ́ hàarí iè miikɛ hũn-yaarè àá miikɛ tĩyaarè àá hɔ́ miikɛ yìncuò hũn ɛ́ ń dàa wɛ̃́ lépe vɛ̃hṹ sɔ, kɛ́ hɔ́ yí bòo ɛ́ ń hṹn wɛ nín yaaní mí hũn wɛ̀. Kɛ́ hɔ́ den iè bòo ɛ́ ń hṹn nɛ mi dũń bòo lɛ ɛ́ ń dàa hɛ̀ wɛ miɛ.

Mì wóo dé sɛ́wɛ́rí ɛ̀ lɛ́ álɛ ɛ́ wɔ́ khɔn

5Kɛ́ ádɔ̀ mì tĩ́ihṹ ɛ́ wɔ́ tĩyaarè bòo, ɛ̀ hɔ̀ yí ńpe niǹ tĩì á yaa, kɛ́ hɔ́ iè mìpe mìkùi tĩɛ̀ á yaa, tàá ɛ̀ ɓɛ̀ iè ɓɛ̀dɔ̀ tĩɛ̀ á yaa, iè bòo ɛ́ ń nɛ ń yí nin hiení hɔ́ ɛ̀ vɛ khíi mí kiɛ̀ wɛ̀. 6Hɔ́rɔsí ɛ̀ hɔ̀ lɛ ɛ́ mípe mì cɛ̀rìɛɛ ɛ́ fun àá ɓàasɔ ɛ́ wo ɛ́ yí-e. 7Ɛ́ sí iè hɔ̀pe ɛ́ kɛ̀a sáalɛ ɛ́ mí dàa sãawi ɛ̀ mì dé sɛ́wɛ́rí lɛ́ ɓàasɔ ǹ, ɛ̀ mì hĩ̀iníkɛ piè tĩì, bòo lɛ ɛ́ wé ɛ̀ lè tĩyaarè dɛ̀bɛhɔ́ ɛ̀ dàá bí wookɛ yaakɛ a wɛ̀. 8Ɛ́ nín mì hɛ̃nnin nɛ mi zɛ̃́ní lɛ́ ɓàasɔ ǹ kɛ́ mí hɛ̀ wɛ-a àá bɔ̀bín. 9Ɛ́ hɔ́ bòo lɛ ɛ́ ń dàa hàarí wɛ̃́ lépe vɛ̃hṹ ɛ́ lɛ́ miɛ ǹ ɛ́ ie hɔ̀ lɛ: ń den iè wiè hàarí wɛ ɛ́ nín hàaní miɛ húi nɛ bòo ɛ́ mí iè nìɛ lɛ wóò tɛ̀ ɲí niǹ bòo lɛ ɛ́ nín bie àá miɛ bòo míkùi hũn. 10Ɛ́ kɛ́ mí dɔ sɛ́wɛ́rí ɛ́ lɛ́ ninbírɔ dɔ̀ ǹ piè bɔ̀koohɔ́ bòo hũn, ɛ̀ ǹpe ɛ́ lò ɓiɛ̀ dɔ́ sɛ́wɛ́rí ɛ́ lɛ́ ɓàasɔ ǹ. Ɛ̀ kɛ́ ńpe ɛ́ ɓen dɔ́ sɛ́wɛ́rí ɛ́ lɛ́ ádɔ̀ ǹ bòo dɔ̀ bòo hũn, ɛ̀ hɔ̀ iè mìpe yènsénín ɛ́ ń dàa dɔ́ hɔ́ à Kirisa híɛhɔ́, 11bòo lɛ ɛ́ wé ɛ̀ kè dàa bí fùansí Sitũanɛ ǹ nɛ a yí pànkɛ́ kè lɔ̀n, iè hɔ̀ lɛ ɛ́ ké lò wo dũ piè bòo lɛ á ɛ́ cɛ̀.

Pooli tĩyaarè bòo hɔ̀ Toroasi lóo hũn

12Ɛ́ hɔ́ lɛ ɛ́ ń hàarí van dɛ̃un Toroasi ɛ́ nín vɛ bie ɔ Kirisa Bentĩnu yán, ɛ́ ń hɛ̀ hàarí mɔn kɛ́ Dɔfĩn ɛ́ hɛ́rɛ lè wṹn ɛ́ lɛ́ mi ǹ nɛ ń wé hɔ́. 13Kɛ́ niǹ tĩì ɛ́ den hàarí yáa iè hɔ̀ lɛ ɛ́ ń hàarí yí vɛ tɛ̀rɛ́ kìe zuú Tiite yán wɛ̀. Ɛ́ sí iè hɔ̀pe ɛ́ ń dàa hàarí fòoniɛ ɓɛ̀ Toroasi siè ɛ̀ ǹ khie cɔ́ khã́a hɔ̀ Maseduanɛ.

Kè pànkɛ́ yínlɔ́ ɛ́ lé àá Kirisa viì

14Nɛ Dɔfĩn yèrè ɛ̀ ɓàaní, Hɔ̀pe lɛ temu wóò lɛ́ ɛ̀ kè dàá vɛ hɔ pankɛ́ yínlɔ́ hũn fúu kè ńcɛɓánlɔ́ àá ɔ́ Kirisa bòo hũn. Hɔ̀ wóò bè kie ǹ ɛ̀ dàa lɛ́ ɛ̀ ɓɛ̀ nìnbirìe ɛ̀ dũń ɔ́ Kirisa viì míkùi, kɛ̀a bòo lɛ ɛ́ hɔ́ yurɔ́ lɛ tũnù tĩ tũnù ɛ́ dàa wóò saà tí lé viì míkùi bòo sí. 15Ɛ́ ké wo dɛ̃̀ kɛ̀a ie Kirisa yurɔ́ lɛ tũnù tĩ lɛ bòo ɛ́ sɛ̃̀ Dɔfĩn. Ɛ́ ké wo iè hɔ̀pe yurɔ́ sɔ lɛ ɛ́ wi ɓɛpe nìɛ lɛ wi le fuerɛ̀ wṹn lɔ̀n tĩ́ihṹ, ɛ̀ hɔ̀ lò wi ɓɛ́pe lɛ ɛ́ ɓɛ́te ɛ̀ vĩ́iní tĩ́ihṹ. 16Ɛ́ ɓɛ́pe lɛ ɛ́ ɓɛ́te vĩ́iní viì, ɛ̀ hɔ̀pe yúrɔ sɔ tũnù ɛ́ iè húmú tũnù lɛ wóò ɓen àá hɔ́pe húmú, ɛ̀ ɓɛ̀lɛ ɛ́ wi le fuerɛ̀ wṹn lɔ̀n viì, ɛ̀ hɔ̀ iè mɛkɛ̃nì tũnù lɛ wóò ɓen àá lé mɛkɛ̃nì. Á wo iè wieni ɛ́ temu wo dɛ̀ hɔ̀pe tɔnlɔ́ sɔ sí ɛ́ tɛ́? 17Ɛ́ képe ɛ́ den yí dɛ̃̀ kɛ̀a ɓɛ́ nìnbí-kuì dɔ̀ lɛ ɛ́ wóò dan àá lé Dɔfĩn bienù wɛ̀. Kɛ́ hɔ́ den iè hɔ̀ lɛ ɛ́ hɔ́pe Dɔfĩn ɛ́ te kie ɛ́ tɔrɛ, ɛ́ ké dàa wóò bie kɛ́ ké hũn ɛ́ hɛ́rɛ pehɔ̀ híɛhɔ́, kè ńcɛɓánlɔ́ àá ɔ́ Kirisa bòo hũn.

Currently Selected:

2 Korɛnte Siè 2: bwj

Highlight

Copy

Compare