2 Korɛnte Siè 1
1
Tìɛníkɛrɔ́ àá Dɔfĩn bɛrikɛ dénlɔ́
1Ǹpe Pooli lɛ ɛ́ Dɔfĩn àá mí tĩi bòo ɛ́ lɛ́ ɛ́ ń wɔ́ á Yiezu Kirisa tɔnkɛrɔ, ɛ̀ khíi páa kìe zuú Timote ɛ́ te lépe vɛ̃hṹ sɔ lɛ ɛ́ wĩ́, ɛ́ ke ɛ̀ lɛ́ lé Dɔfĩn zũnù ńkóoɓánlɔ̀n nìɛ lɛ van wi hɔ Korɛnte lóo hũn, àá ɓɛ́pe nìɛ lɛ bòo sɛ̃̀ Dɔfĩn ɓɛ́kùi lɛ van wi hɔ Akayi pɛ̃̀hɛ̃ míkùi hṹn. 2Nɛ kìe Yàá Dɔfĩn àá ké Ɲunsɔ Yiezu Kirisa ɛ̀ wé hiì àá miɛ, ɛ̀ ɓɛ̀ lɛ́ hũn-wiɛ̀ miɛ ǹ.
3Nɛ Dɔfĩn lɛ iè kè Ɲunsɔ Yiezu Kirisa ɓà Yàá yèrè ɛ̀ ɓàaní, Hɔ̀pe lɛ ɛ́ iè ɔ̀ Yàá lɛ ɛ́ tú àá hɔ́ sãamu, hɔ̀pe Dɔfĩn lɛ ɛ́ wóò hĩ̀iníkɛ le tĩì pɛ̃̀hṹ míkùi hũn. 4Hɔ̀ wóò hĩ̀iníkɛ ke tĩɛ̀ pɛ̃̀hṹ lɛ kɛ́ ké ɓen wi le tĩyaarè míkùi hũn, bòo lɛ ɛ́ wé ɛ̀ kè ɓiɛ̀ dàń ɓɛ́pe nìnbirìe lɛ ɛ́ wi lè tĩyaarè míkùi hũn ɛ̀ ɓiɛ̀ wóo hĩ̀iníkɛ tĩɛ̀ àá hɔ́pe tĩhiè lɛ ɛ́ ké yú pehɔ̀ viì. 5Ɛ́ kɛ̀a bòo lɛ ɛ́ ké dàa ɛ́ lè lɔ̀nbiè lɛ yú ó Kirisa ɓà ńmàa ɛ̀ yí wɔ̀sɔ̀kɔ̀, ɛ́ kɛ̀amu, ɛ́ ké ɓiɛ̀ wóò yí lé tĩhiè dɛ̀bɛhɔ́ àpe Kirisa viì. 6Ɛ́ kɛ́ ké ɓen wi le tĩyaarè hũn, ɛ̀ hɔ̀ iè bòo ɛ́ ké nɛ mí yí lé tĩhiè àá hɔ́ fuerɛ̀. Ɛ̀ kɛ́ ké ɓen yú lé tĩhiè, ɛ̀ hɔ̀ iè bòo ɛ́ ké nɛ mi ɓiɛ̀ yí lépe tĩhiè lɛ mii lɛ́ ɛ̀ mì dàá dàń mí hũn ɛ̀ wóo hĩ̀ lè lɔ̀nbiè hũn, lèpe lɔ̀nbiè lɛ yú kie ɓà ńmàa. 7Ɛ́ ké wo dàa tĩì bènlén mì bòo hũn, iè hɔ̀ lɛ ɛ́ kɛ̀a bòo lɛ ɛ́ mí dàa páaniɛ ɛ́ lè lɔ̀nbiè ɛ̀ yí àá kie, ɛ́ mí ɓiɛ̀ bòo ɛ́ wi lepe tĩhiè lɛ ɛ́ ké yú hũn.
8Kìe zɛ̀ɓɛ̀, ké den wɛ nɛ mi dũń lé lɔ̀nbiè lɛ yú kie hɔ̀ Azii cɛ̃̀mɛ̀nɛ́ hũn bòo, kè lɔ̀n hɛ̀ bɔn fúu ɛ́ pɔniɛ kè pànkɛ́, fúu ɛ́ ké hɛ̀ hàarí ɛ́ yá lieníkɛ kɛ́ ké mɛkɛ̃nì ɛ́ ɓén wé wɛ̀. 9Ɛ́ ké den hɛ̀ hàarí ɛ́ bie ke tĩɛ̀ hũn nɛ ké iè pe ɛ́ wo ɛ́ húrun vɔ́. Kɛ́ hɔ́ den wɔ́ kɛ̀amu, bòo lɛ ɛ́ wé ɛ̀ kè dàá bí wóo bè kè tĩɛ̀ kète lɔ̀n, kɛ́ Dɔfĩn mí dòonún iè pe ɛ́ ké wóo bè kè tĩɛ̀ lɔ̀n, Hɔ̀pe lɛ ɛ́ wóò vìení ɓɛ́ nìhiè. 10Ɛ́ Hɔ̀pe Dɔfĩn ɛ́ te kie ɛ́ fueniɛnin ɛ́ lɔ́ hɔ́pe húmú sí ɓà ńmaà hũn, ɛ́ Hɔ́ lò ɓén bĩní ɛ́ fuení kiè ǹ. Ũun ké dũmuasɛ̃̀ nɛ Hɔ ɓén bĩní ɛ́ fuení kiè ǹ. 11Ɛ̀ mìpe kùusɔ ɛ́ lò ɓiɛ̀ ɛ́ kè sĩiní àá hɔ́ lɛ ɛ́ mí wóò hɛ̃un Dɔfĩn ɛ̀ lɛ́ kiè ǹ. Ɛ́ kɛ̀amu, ɛ́ ɓɛ́ nìnbí-kuì hɛ̃nnɛ̀ lɛ ɛ́ ɓɛ́ wóò wé ké bòo hũn ɛ́ Dɔfĩn ɛ́ ɓén kɔ̃́ní. Hɔ̀ ɓén wé mí hiì àá kiè, ɛ́ nìnbí-kuì ɛ́ wo ɓén dé pehɔ̀ bɛrikɛ kè bòo hũn.
Bòo lɛ ɛ́ Pooli dàa khíiniɛ mí wṹn lɔ̀n viɛ̀nù ǹ
12Ɛ́ ké dɛ̀ kète ɛ́ ɓàanínin kè bòo lɛ ɛ́ ké dàa dàa kète lè dímíɲɛ́ hũn bòo hũn. Ké den hɛ́rɛ kè hũn, ɛ̀ kè lò cã̀niɛ kè ɲún àá ɓɛ́ nìnbirìe ɓɛ́kùi. Ɛ́ ké den wóokɛa dàa kète kɛ̀amu àá mípe ɛ́ pɔ́niɛ cɛ̃̀un. Ɛ́ ké dũ ke hũn nùnlé hũn kɛ́ hɔ́ ɛ́ bɔn. Dɔfĩn àá mí hiì ɛ́ te ke híɛhɔ́ dú ɛ́ ké dàa dɛ̀rɛ kète ɛ́ dàa kɛ̀amu, kɛ́ hɔ́ yí nìnbírɔ bɔ̀dũmunù wɛ̀. 13Hɔ̀ bòo lɛ ɛ́ ké wóò wĩ́ kóo hɔ́ vɛ̃hɛ̃ hũn ɛ̀ lɛ́ miɛ ǹ ɛ́ yí bɔ̀ɓuà dɔ̀, kɛ́ hɔ́pe lɛ ɛ́ mí dɛ̀ ɛ́ kɛ̀rán ɛ́ dũń ɲún ɛ́ ɓen bòo mí. Ɛ́ ń wo ɛ́ dũmuasɛ̃̀ nɛ mí ɓén dàń hɔ́pe lɛ ɛ́ ké ɛ́ bie míkùi ɲún ɛ́ dũń ɛ́ ciiní, 14kɛ̀a bòo lɛ ɛ́ mí dàa zĩ̀níkɛa dũ pehɔ̀ ɲún bìcínbóo hɔ̀pe lɛ lɔ̀n, nɛ ke Ɲunsɔ Yiezu ɓenlɔ́ zɔǹ, ɛ̀ kèpe ɛ́ ɓén wé mípe mì te ɓàanílán, ɛ̀ mìpe ɛ́ ɓiɛ̀ ɓén wé képe kè te ɓàanílán. 15Ɛ́ niǹ tĩì ɛ́ pe hɛ̀ wo bɔ̀ hɔ̀pe sí lɔ̀n cɛ̃̀un. Ɛ́ sí iè pe temu lɛ́ ɛ́ ń dàa hṹn wɛ nɛ nin ɓen mì viì vé, bòo lɛ ɛ́ wé ɛ̀ mì dàá yí lé dúɓìɛ kɛ̀a yìehɛ̃̀ ɲu. 16Ń den hṹn wɛ nɛ kɛ́ ń ɓen ɓɛrɛ lɔ́ mí viì vɔ́, ɛ́ nín khíi vɛ hɔ Maseduanɛ, kɛ́ ń ɓen van lɔ́ hɔ́pe Maseduanɛ, ɛ́ nín bĩní khũ̀á ɛ́ ɓén lé àá mí viì, ɛ́ mí wo ɛ́ sĩiní mi ɛ́ nín dàá vɛ hɔ Zudee. 17Ɛ́ bòo ɛ́ hɔ́pe sí ɛ́ ń nɛ nin wé ɛ́ iè bòo lɛ ɛ́ ń bie kɛ́ ń yí nùún vé? Yée kɛ́ hɔ́pe bòo lɛ ɛ́ ń munɛ nɛ nin wé ɛ́ iè nìnbí-yáamu nùnlé ɛ́ ń dàa nɛ «ũun» àá «ńɓùé» bɔ̀cóoní lɔ̀n? 18Ɛ́ kɛ̀a bòo lɛ ɛ́ hɔ́ dàa bɔn kɛ́ Dɔfĩn ɛ́ wóò dìń mí bienù lɔ̀n, ɛ́ hɔ́pe lɛ ɛ́ ń khɛ́ lɛ́ miɛ ǹ ɛ́ yí bòo lɛ ɛ́ iè «ũun» àá «ńɓùé» bɔ̀cóoní lɔ̀n wɛ̀. 19Iè hɔ̀ lɛ ápe Dɔfĩn Zuú Yiezu Kirisa lɛ ńpe àá Silaasi àá Timote ɛ́ bie bòo mì viì, ɛ́ yí wiè lɛ ɛ́ ɓɛrɛ bie nɛ «ũun» àá «ńɓùé» bɔ̀cóoní lɔ̀n wɛ̀. Kɛ́ lé iè «ũun» mí dòonún ɛ́ temu wi piè viì. 20Ápe ɛ́ temu iè lèpe «ũun» lɛ ɛ́ zɛ̃́ní kɛ́ Dɔfĩn bòo lɛ ɛ́ Hɔ́ lɛ́ mí ɲunù nɛ mí ɓén wé míkùi ɛ́ Hɔ́ ɛ́ wɔ́. Ɛ́ sí iè hɔ̀pe ɛ́ hɔ́ dàa iè ɔ̀pe Yiezu Kirisa yèrè lɔ̀n ɛ́ ké dàa wóò bie ke «Amiina» ɛ̀ dàá ɓàaní Dɔfĩn yèrè. 21Ɛ́ hɔ́pe Dɔfĩn míte ǹ ɛ́ te kepe àá mípe ɛ́ páaniɛ munɛ, ɛ̀ Hɔ̀ ɛ́ fɛ́sí kie ɛ́ dĩ̀niɛ ɔ̀ Kirisa hũn. 22Hɔ̀ ɛ́ bɔ̀ mí kùrù bòo zɛ̃́nílán kè lɔ̀n, lɛ iè pehɔ̀ Mɛkɛ̃ni lɛ ɛ́ Hɔ́ dɔ́ ké tĩɛ̀ hũn, ɛ́ dàa ɛ́ zɛ̃́ní kɛ́ hɔ́ bɔ̀tente lɛ ɛ́ Hɔ́ sɛ́sɛ́a bɔ̀sí ké bòo hũn ɛ́ Hɔ́ ɓén lɛ́ kie ǹ.
23Dɔfĩn ɛ́ dũ kɛ́ hɔ́pe bòo lɛ ɛ́ nín bie ɛ́ bɔn. Ɛ́ nɛ Hɔ ɛ̀ ɓé mi kɛ́ hɔ́ dàa ɓen iè ɓúo ɛ́ nín ɓúukɛ: bòo lɛ ɛ́ ń dàa ɛ́ yí khũ̀á ɓen mì viì mì lóo Korɛnte hũn, iè bòo ɛ́ nɛ niǹ tĩì ɛ̀ bí ɓen hĩ́ni miɛ ǹ, ɛ̀ mì kɛ̀bí wɛ̀. 24Hɔ̀ yí bòo ɛ́ ké ɛ́ cɛ̀ ɛ̀ kè mɛmɛ́kɛ miɛ àá hɔ́ bòo lɛ ɛ́ mí fɔ́ɓán ɛ̀ mí dɛsĩ̀nin wɛ̀. Iè hɔ̀ lɛ ɛ́ mí fɛ́sí dɛ̃̀ sãa hɔ̀ dɛsĩ̀nlɔ́ hũn. Kɛ́ hɔ́ lɛ ɛ́ ké ɛ́ cɛ̀, iè bòo ɛ́ ké nɛ ke páaní tɛ́ àá miɛ ɛ̀ mì dàá yí lé tĩwiɛ̀.
Currently Selected:
2 Korɛnte Siè 1: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
