2 Korɛnte Siè 3

Lè ɲɛbíi dɛ̀fĩì bòo

1Ɛ́ ké wo iè biè ɛ́ sũǹ ɛ́ cɛ̀ ɛ̀ kè bie ke kúrú yèn-tente bòo kète ǹ yée? Tàá kɛ́ ké iè biè ɛ́ wɛ ɛ́ ke ɛ̀ lɛ́ hɔ́ vɛ̃hɛ̃ dɔ̀ miɛ ǹ, hɔ̀pe lɛ ɛ́ kè yèn-tente bòo ɛ̀ bie kɛ̀a bòo lɛ ɛ́ ɓɛ́dɔ̀ dàa wóò wé hɔ́? Tàá ke biè ɛ́ sũǹ ɛ́ cɛ̀ ɛ̀ mì lɛ́ hɔ́pe vɛ̃hɛ̃ sɔ ɓà ńmàa kiè ǹ yée? 2Ɛ́ mípe ɛ́ temu iè kè vɛ̃hṹ lɛ zɔn wɛ̃́ wi ke tĩɛ̀ hũn, lɛ ɛ́ ɓɛ́ nìnbirìe ɓɛ́kùi ɛ́ loo ɛ́ dɛ̀ ɛ́ kɛ̀rán. 3Ɛ́ hɔ́ wo ɛ́ ce loo kɛ́ mípe ɛ́ iè lè vɛ̃hṹ lɛ ápe Kirisa míte ǹ ɛ́ wɛ̃́ képe, ɛ̀ kèpe ɛ́ te le ɛ́ dàa dàa ɓɛrɛ. Ɛ́ lé yí wĩ́ àá kɛ̀rɛ́ ɲumu, kɛ́ lé ɛ́ wɛ̃́ àá Dɔfĩn lɛ yìe wi Mɛkɛ̃ni. Ɛ̀ lè yí wĩ́ lé sɛ̃̀nlè lɛ tan lɔ̀n, kɛ́ lé wɛ̃́ hɔ́ bòo wĩ́nlén lɛ iè hɔ̀ tɛkɛ̀a lɔ̀n, lɛ iè mìpe mì tĩɛ̀.

4Ɛ́ sí iè bòo lɛ ɛ́ ké dũmuasɛ̃̀ nin Dɔfĩn viì, kè ńcɛɓánlɔ́ àá Kirisa bòo hũn. 5Hɔ̀ yí bòo ɛ́ ké nɛ kepe kète ǹ ɛ́ dɛ̀ hɔ̀pe sí ɛ́ wé àá ké kùrú pànkɛ́ wɛ̀. Kɛ́ hɔ́ bòo lɛ ɛ́ ké dɛ̀ ɛ́ wóò wé ɛ́ lé àá Dɔfĩn viì. 6Hɔpe Dɔfĩn ɛ́ temu lɛ́ ɛ́ ké dàa dɛ̀rɛ wɔ́ lé ɲɛbíi dɛ̀fĩì tɔntɛ́riè, lèpe ɲɛbíi lɛ ɛ́ yá lé àá hɔ́ làndɛ́ lɛ ɛ́ wɛ̃́ wɛ̃́nlɔ́ hũn, kɛ́ lé ɛ́ lé àá Mɛkɛ̃n-Sãanu viì. Hɔ̀ làndɛ́ lɛ wɛ̃́ ɛ́ pe wóò ɓen àá hɔ́ húmú, kɛ́ lé Mɛkɛ̃n-Sãanu ɛ́ pe wóò ɓen àá lé mɛkɛ̃nì.

7À Moyiize làndɛ́ ɛ́ hàarí wɛ̃́ àá hɔ́ wĩ́ncɛ̃́a hɔ̀ sɛ̃̀nlɛ̀a lɛ tan lɔ̀n, ɛ́ ɓɛ́ nìnbiriè ɛ́ wo hàarí mɔn Dɔfĩn ɓàarɔ́ pehɔ̀ yìi hũn. Ápe Moyiize híɛhɔ́ ɛ́ hɛ̀ hàarí ɛ́ ɲiiníkɛ cɛ̃̀un, ɛ́ ɓɛ́pe Yizarayɛɛle nìɛ ɛ́ hɛ̀ hàarí ɛ́ yí dɛ̀-a ɛ́ yá húi wɛ̀. Hɔ́rɔsí kɛ́ piè ɲiiníkɛrɔ́ sɔ ɛ́ lò iè bòo lɛ ɛ́ ɓén khíi. Ɛ́ kɛ́ hɔ́pe làndɛ́ lɛ lò temu wóò ɓen àá hɔ́ húmú ɛ́ ɓen mɔn àá hɔ́pe ɲiiníkɛrɔ́ sɔ sí ɓà ńmàa, 8ɛ́ hɔ́ iè ńɓùo ɛ́ temu mii lɛ́ ɛ̀ hɔ̀ tɔnlɔ́ lɛ ɛ́ lé Mɛkɛ̃n-Sãanu ɛ́ tɛ́ ɛ̀ dàa bí yí hɔ́ ɓàarɔ́ ɛ́ wookɛ pɔní? 9Kɛ́ hɔ́ làndɛ́ lɛ tɔnlɔ́ ɛ́ temu wóò zɛ̃́ní kɛ́ ɓɛ́ ɓén lè kè lìe ɛ́ vɛ́ ɲɛkɛ̃̀a ɛ́ ɓen yú hɔ́ ɓàarɔ́, ɛ̀ hɔ̀ tɔnlɔ́ lɛ wóò lɛ́ ɛ̀ ɓɛ̀ nìnbirìe ɛ̀ cã̀aní Dɔfĩn híɛhɔ́ ɛ́ pe ɓàarɔ́ ɛ́ pɔ́ hɔ́ sí cɛ̃̀un lò! 10Ɛ́ ké yɛ̀rɛ́ dɛ̀ ɛ́ bie nɛ hɔpe ɓàarɔ́ lɛ ɛ́ khie ɛ́ yɛ̀rɛ́ yí bòo dɔ̀ hɔ̀pe zoòní lɛ ɓàarɔ́ híɛhɔ́, iè hɔ̀ lɛ ɛ́ hɔ́pe zoòní ɓàarɔ́ ɛ́ temu pɔ hɔpe lɛ khie cɛ̃̀un. 11Ɛ́ kɛ́ hɔ́ bòo lɛ ɛ́ wóò khíi ɛ́ ɓen yú hɔ́ ɓàarɔ́, ɛ̀ hɔ̀pe bòo lɛ ɛ́ mii wé yán fúu ɛ́ pe ɓàarɔ́ ɛ́ wookɛ pɔní hɔ́pe sí lò!

12Ɛ́ sí iè pe tĩì bènlén lɛ ɛ́ wi ke viì ɛ́ ké dàa ɛ́ hɔ̀ khɛ́ ɛ̀ ciení kɛ́ ké fɔnù ɛ́ tɛ́rɛ. 13Kèpe ɛ́ yá wé kɛ̀a ie Moyiize lɛ hàarí wóò híɛ mí híɛhɔ́ ǹ àá lé pɔnkɔ̀-núnú, ɛ̀ ɓɛ̀ Yizarayɛɛle nìɛ ɛ̀ dàá bí mi piè híɛhɔ́ sɔ ɲiiníkɛrɔ́ kɛ́ hɔ́ ɛ́ vé cɔ́ wɛ̀. 14Kɛ́ ɓɛ́pe Yizarayɛɛle nìɛ ɛ́ den hàarí yí dɛ̀ hɔ̀pe bòo sɔ sí ɲún ɛ́ yáà dũń wɛ̀. Ɛ́ hɛ̀rí kɛ̀a zoòni kɛ́ ɓɛ́ den ɓen ɛ́ lè ɲɛbíi dɛ̀kĩ́i vɛ̃hṹ ɛ̀ kɛ̀rán, ɛ̀ hɔ̀ tan dɛ̃̀ kɛ̀a bòo ɛ́ peɓɛ̀ bɔ̀dũmunù ɛ́ den pɛwi híɛnin àá lépe pɔnkɔ̀-núnú sɔ. Ɛ́ lépe pɔnkɔ̀-núnú sɔ á Kirisa ńpiemu mí dòonún ɛ́ temu dɛ̀ ɛ́ lɛ́ ɛ́ lé ɛ́ vĩ́ ɛ́ lé yán. 15Ɛ́ hɛ̀rí kɛ̀a zoòni pɛ́wi, kɛ́ ɓɛ́ ɓen ɛ́ ɔ̀ Moyiize vɛ̃hɛ̃ ɛ̀ kɛ̀rán, ɛ̀ lè pɔnkɔ̀-núnú ɛ́ wóò híɛ peɓɛ̀ bɔ̀dũmunù ǹ. 16Kɛ́ á nìnbírɔ ɛ́ den khũ̀a ɛ́ khie ɛ́ húi àá Ɲunsɔ viì, ɛ̀ lè pɔnkɔ̀-núnú sɔ ɛ́ wóò khíi lé yán. 17Kɛ́ ɓɛ́ lò den ɓen nɛ Ɲunsɔ, iè bòo ɛ́ ɓɛ́ nɛ Mɛkɛ̃ni; ɛ̀ lè viì lɛ á Ɲunsɔ Mɛkɛ̃ni ɛ́ wi hũn ɛ́ hɔ́ ńteń míte ɛ́ ɓiɛ̀ wóò kań hũn. 18Ɛ́ képe kè kùi lɛ híɛhɛ̃ ɛ́ hánkɛanin ɛ́ iè Ɲunsɔ ɓàarɔ́ ɛ́ ké ɛ́ zɛ̃́ní kɛ̀a ie lé dùɓɛ̀ré bòo sí, ɛ́ ké wo ɛ́ khũ̀a zɛ̀niɛ ɛ́ lɔ́ɓán àá ɔ́ Ɲunsɔ, ɛ́ ké ɓàarɔ́ ɛ́ wo wóokɛa ɛ́ yùó yùórɔ́. Ɛ́ sí iè bòo lɛ á Ɲunsɔ ɛ́ wóò wé, àpe lɛ ɛ́ iè lè Mɛkɛ̃ni.

Currently Selected:

2 Korɛnte Siè 3: bwj

Highlight

Copy

Compare