1 Tesaloniike Siè 5
5
1Kìe zɛ̀ɓɛ̀, kɛ́ hɔ́ ɓen kɛ́ lé pɛ̃̀hṹ àá lé yìi lɛ ɛ́ hɔ́pe bòo sɔ ɛ́ ɓén wé hũn, ɛ̀ mì mɛ̀kóo mí nɛ nìnbírɔ dɔ̀ ɛ̀ wĩ́ bòo dɔ̀ ɛ̀ lɛ́ miɛ ǹ pehɔ̀ bòo hũn wɛ̀. 2Iè hɔ̀ lɛ ɛ́ mípe mìte ǹ ɛ́ dũ sãàniɛ kɛ́ á Ɲunsɔ sí ɛ́ ɓén ɓén dɛ̃ ɛ́ yòokɛ ɓɛ nìnbirìe lɔ̀n kɛ̀a ie kɛ̃̀míi bòo sí hɔ̀ sṹnúhṹn. 3Pɛ̃̀hṹ lɛ kɛ́ ɓɛ́ nìnbirìe ɛ́ ɓen van ɛ́ bie nɛ: «Ké hɛ̀ wo wi le hũn-wiɛ̀ hũn, ɛ́ bɔ̀-sɔnù ɛ́ hɛ̀ yí dɛ̀ kie ɛ́ yá yí wɛ̀!» Ɛ́ pehɔ̀ yìi hũn, ɛ́ hɔ́ bɔ̀-sɔnù ɛ́ den wo ɛ́ pɛpɛ ɛ̀ hɔ̀ ɛ́ wua ɛ́ síɛ peɓɛ̀ lɔ̀n kɛ̀a bòo lɛ ɛ́ lé sɛ̃́ɲíi ɛ́ dàa wóò ɓen yòokɛ á hɛ̃́póosɔ lɛ tenlɔ́ dɛ̃un lɔ̀n bòo sí, ɛ́ ɓɛ́ den hɛ̀ yí dɛ̀ àá ńbíi vɛ zɔ pehɔ̀ hũn wɛ̀. 4Kɛ́ mípe kìe zɛ̀ɓɛ̀, mìpe ɛ́ mínɛ hɔ̀ síbínú hũn wɛ̀; ɛ́ lépe sí sɔ ɛ́ wo yí sãawi ɛ̀ lè ɓen yòokɛ mi lɔ̀n kɛ̀a ie kɛ̃̀míi bòo sí wɛ̀. 5Iè hɔ̀ lɛ ɛ́ mípe mìkùi ɛ́ iè ńpiemu àá lé wiɛhɔ́ nìɛ. Kè bòo ɛ́ yí sĩ̀ hɔ̀ sṹnúhṹn àá hɔ́ síbínú ǹ wɛ̀. 6Ɛ́ mí wo bí nɛ ke dɛ kɛ̀a ie ɓɛlɛ kɛ́ wɛ̀; kɛ́ mí nɛ ke piɛní ké yìe ɛ̀ kè wóo ɓaà kète. 7Iè hɔ̀ lɛ ɛ́ ɓɛ́pe ńdandɛɓúrúkɛ́ɓɛ́ ɛ́ den iè hɔ̀ sṹnúhṹn ɛ́ ɓɛ́ dàa ɛ́ wóò dɛ, ɛ̀ ɓɛ̀ ɲɛkhĩɛbɛ̃́ɓɛ́ ɛ́ lò iè hɔ̀ sṹnúhṹn ɛ́ ɓɛ́ dàa ɛ́ wóò tì. 8Kɛ́ képe lɛ ɛ́ iè hɔ̀ wiɛhɔ́ nìɛ, mì wóo nɛ ke ɓaà kète. Mì nɛ ke lɛ́ ɛ̀ hɔ̀ ńdɛsĩ̀nlɔ́ àá lé wanminu ɛ̀ temu wé ké hɛ̃nlɔ́ pɔ̀nkɔ̀rɔ́ lɛ ɛ́ ké zɔn ɛ́ dàa pan kète, ɛ̀ lè fuerɛ lɛ ɛ́ ké ɛ́ hìé ɛ̀ te mu wé ké kṹnlé lɛ ɛ́ ké ɛ́ yìe. 9Iè hɔ̀ lɛ ɛ́ Dɔfĩn ɛ́ den yí ve kie nɛ ke ɓen zɔ mí tĩcĩ̀nín hũn, kɛ́ hɔ́ vɔn kie nɛ ke ɛ̀ khíi àá ké Ɲunsɔ Yiezu Kirisa ɛ̀ dàá yí lé fuerɛ̀. 10Àpe ɛ́ temu húrun kè bòo hũn bòo lɛ ɛ́ wé ɛ̀ hɛ̀rí kɛ́ ké ɛ́ húrun tàá kɛ́ ké yìe ɛ́ wi, ɛ̀ kè páaní wé lé mɛkɛ̃nì hũn àá ɔ́. 11Ɛ́ sí iè hɔ̀pe ɛ́ mí dàa wóo hĩ̀iníkɛ ɓán tĩɛ̀, ɛ̀ mì wóo sĩiníkɛ ɓán pànkɛ́ hɔ̀ ńdɛsĩnlɔ́ hũn kɛ̀a bòo lɛ ɛ́ mí lò yɛ̀rɛ́ zɛ̃̀níkɛa ɛ́ hɔ̀ wé.
Víeníkɛlán bérɛ́ àá mí tìɛníkɛrɔ́
12Ké mì hɛ̃nnin mìpe kìe zɛ̀ɓɛ̀ nɛ mi wóò ɓàaní ɓɛ́pe lɛ ɛ́ ɔ̀ Ɲunsɔ tɔnlɔ́ ɛ̀ tɛ́ mí tĩ́ihṹ, ɓɛ̀pe lɛ ɛ́ wóò dí mí híɛhɔ́, ɛ̀ ɓɛ̀ ɛ̀ ɲì mì zeǹ lɔ̀n. 13Mì wóo mɛ̀ndɛ̃ ɓɛ cɛ̃̀un, ɛ̀ mì ɛ̀ wɛní ɓɛ́ peɓɛ̀ tɔnlɔ́ lɛ ɛ́ ɓɛ́ ɛ́ tɛ́ bòo hũn. Mì kań lé hũn-wiɛ̀ hũn mìpe ɓán hũn. 14Ɛ́ ké ɛ́ mì hɛ̃nnin mìpe kìe zɛ̀ɓɛ̀ nɛ mí wóo fi àá ɓɛ́pe ńwékɛkũn nìɛ, ɛ̀ mì wóo hĩ̀iníkɛ ɓɛlɛ bàanì tɔ̀ tĩɛ̀, ɛ̀ mì wóo sĩiní ɓɛlɛ pànkɛ́ mí, ɛ̀ mì wóo hè mì hũn àá nìnbirìe ɓɛ́kùi. 15Mì pɛ mite nɛ àdɔ̀ ɛ̀ bí wé bɔ̀koohɔ́ ɛ̀ dàá sàaní bɔ̀koohɔ́ kiè wɛ̀; kɛ́ hɔ́ bɔ̀tente iè pe ɛ́ mí wóo bè máahṹ ɛ̀ wé fúu mìpe ɓán hũn àá ɓɛ́ nìnbirìe lɛ ɛ́ kɛ́ ɓɛ́kùi.
16Mì wóo wɛní míte fúu. 17Ɛ̀ mì wóo hɛ̃un Dɔfĩn fúu, 18ɛ̀ mì wóo dé Dɔfĩn bɛrikɛ bòo míkùi hũn; sí den iè bòo lɛ ɛ́ Dɔfĩn ɛ́ cɛ̀ mì viì mì ńkań mí mɛkɛ̃nì hũn àá Yiezu Kirisa. 19Mì bí si le Mɛkɛ̃n-Sãanu wɛ̀. 20Ɛ̀ mì bí lɛ́ nɛ mi yìe ɛ̀ bí tí Dɔfĩn bɔ̀háaníriè biehĩ́ wɛ̀. 21Kɛ́ mí wóo nii hɔ́ bòo míkùi, ɛ̀ hɔ̀ lɛ sãa iè pe ɛ́ mí dàá, 22ɛ̀ mì lɛ́ nɛ mi viì ɛ̀ niìní àá hɔ́ bɔ̀koohɔ́, hɔ̀pe àá mí ɲúuhɛ̃ míkùi. 23Nɛ a hũn-wiɛ̀ ɓàasɔ Dɔfĩn míte ǹ ɛ̀ lɛ́ ɛ̀ mìpe àá míte míkùi ɛ̀ bòo ɛ̀ sĩ̀ Hɔ̀ ǹ, ɛ̀ mìte míkùi lɛ iè mì mɛkɛ̃nì àá mí bɔ́nú àá mí tɛkɛ̀a ɛ́ bɔ̀koohɔ́ dɔ̀ ɛ́ bí mi nin kè Ɲunsɔ Yiezu Kirisa khũ̀á ɓenlɔ́ zɔn wɛ̀. 24Àpe lɛ ɛ́ mì ve ɛ́ ɓén wé hɔ́pe sí iè hɔ̀ lɛ á wóo wé hɔ́ bòo lɛ á bie.
25Kìe zɛ̀ɓɛ̀, mì lò ɓiɛ̀ wóo hɛ̃un Dɔfĩn ɛ̀ lɛ́ kiè ǹ.
26Mì fòoníkɛ ɓɛ kìe zɛ̀ɓɛ̀ ɓɛ́kùi sãa sãa àá hũn ceremú.
27Nín mì ɓɔ́nɓɔ́ninin ɔ̀ Ɲunsɔ yèrè lɔ̀n nɛ lepe vɛ̃hṹ sɔ lɛ ɛ́ mí kɛ̀rán ɛ̀ lɛ́ ɓɛ́ kìe zɛ̀ɓɛ̀ ɓɛ́kùi ǹ.
28Nɛ ke Ɲunsɔ Yiezu Kirisa hiì ɛ̀ wé àá mípe mìkùi.
Currently Selected:
1 Tesaloniike Siè 5: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
