2 Tesaloniike Siè 1
1
Tìɛníkɛrɔ́
1Ǹpe Pooli àá Silivɛn#1.1 Silivɛn ɛ́ iè ɔ̀ Pooli ɓà ńbènɓán nùún lɛ ɛ́ ɓɛ́ lò ɛ́ wóò bĩní ve nɛ Silaasi. Vɛ húi Bɔw 15.22 àá Timote ɛ́ te lepe vɛ̃hṹ sɔ lɛ ɛ́ wĩ́ ɛ́ ke ɛ̀ lɛ́ mípe Tesaloniike lóo Dɔfĩn zũnù nìɛ ǹ, mìpe lɛ ɛ́ bòo sɛ̃̀ kìe Yàá Dɔfĩn àá ɔ̀ Ɲunsɔ Yiezu Kirisa ǹ: Nɛ Dɔfĩn hiì àá pehɔ̀ hũn-wiɛ̀ ɛ̀ wé àá miɛ. 2Nɛ kìe Yàá Dɔfĩn àá ɔ́ Ɲunsɔ Yiezu Kirisa ɛ̀ wé miɛ àá hiì ɛ̀ ɓɛ̀ lɛ́ lé hũn-wiɛ̀ miɛ ǹ.
Hɔ̀ lìe lènlɔ́ bòo à Kirisa khũ̀á ɓenlɔ́ zɔn
3Kìe zɛ̀ɓɛ̀, ké den sãawi ɛ̀ kè wóo dé Dɔfĩn bɛrikɛ fúu mì bòo hũn. Hɔ̀ ɛ́ te mí yìe ɛ̀ kè wóo wé hɔ́ iè hɔ̀ lɛ ɛ́ mí ńdɛsĩ̀nlɔ́ ɛ́ hɛ̀ ɛ́ ɓàaní ɓàarɔ́ ɛ̀ lè wanminu lɛ ɛ́ mí dàa ɓán hũn ɛ́ lò ɛ́ sĩiní sĩinírɔ́. 4Ɛ́ sí iè hɔ̀pe ɛ́ ké dàa wóò bie mi bòo kɛ́ ké fɔnù ɛ́ tɛ́rɛ hɔ̀ Dɔfĩn zĩhĩ́ɛ hũn iè hɔ̀ lɛ ɛ́ mí hɛ̀ can mi kuò hɔ̀ ńdɛsĩ̀nlɔ́ hũn, hɛ̀rí àá hɔ́pe lɛ ɛ́ ɓɛ́ ɛ́ mì ɲɛkɛ̃̀a ɛ̀ vɛ́, àá lépe tĩyaarè lɛ ɛ́ mì yí míkùi.
5Ɛ́ hɔ́pe sí míkùi ɛ́ den iè bòo lɛ ɛ́ zɛ̃́ní kɛ́ Dɔfĩn lìe lènlɔ́ ɛ́ iè bòo lɛ ɛ́ cã̀aní, iè hɔ̀ lɛ ɛ́ kɛ̀a bòo lɛ ɛ́ mí dàa ɛ́ hɛ̃̀ mì hũn lè lɔ̀nbiè hũn, ɛ́ Dɔfĩn ɛ́ ɓiɛ̀ ɓén lɛ́ ɛ́ mí ɛ́ zɔ mí bɛ́záanú hũn; lèpe bɛ́záanú lɛ bòo hũn ɛ́ mí dàa lɔ̀n ɛ́ be. 6Dɔfĩn ɛ́ den ɛ́ cã̀aní: ɛ́ Hɔ́ ɓén lɛ́ ɛ́ ɓɛ́pe lɛ ɛ́ mì lɔ̀n ɛ̀ biení ɛ́ ɓiɛ̀ lɔ̀n ɛ́ ɓén be, 7ɛ̀ Hɔ̀ ɛ́ lɛ́ hɔ́ ńvũùnín mìpe lɛ lɔ̀n ɛ́ be ǹ, ɛ̀ Hɔ̀ lò ɓiɛ̀ ɛ́ lɛ́ hɔ́ kèpe ǹ, pɛ̃̀hṹ lɛ kɛ́ á Ɲunsɔ Yiezu ɛ́ ɓen yòó lɔ́ hɔ́ hóohũn ɛ́ ɓen àá mí mɛlɛkɛɓɛ lɛ pànkɛ́ wi. 8À ɓén ɓen hɔ̀ miikɛ dũń bɛhɔ́ hũn, ɛ́ ɓén vɛ́ ɓɛ́pe lɛ ɛ́ yí dũ Dɔfĩn àá ɓɛ́pe lɛ ɛ́ yí tɛ̀ à kè Ɲunsɔ Yiezu Kirisa Bentĩnu bòo ɲɛkɛ̃̀a. 9Ɓàasiè sɔ lɔ̀nbiè lɛ ɛ́ ɓɛ́ ɓén yí ɛ́ iè lè yaarè lɛ yá vé yá mi, lɛ iè bòo lɛ ɛ́ peɓɛ̀ viì ɛ́ ɓén niìní àá Dɔfĩn, ɛ̀ peɓɛ̀ viì ɛ́ lò ɛ́ niìní àá pehɔ̀ pànkɛ́ ɓàarɔ́. 10Hɔ̀pe sí ɛ́ ɓén wi-e pe Ɲunsɔ khũ̀á ɓenlɔ́ zɔn. Ɛ́ pehɔ̀ zɔn, á wo ɓén ɓen ɛ́ piè nìnbirìe ɓɛ́kùi àá ɓɛ́lɛ dũmuasɛ̃̀ à ǹ ɓɛ́kùi ɛ́ wo ɛ́ ɓén ɓàaní-ɛ̀ ǹ ɛ̀ ɓɛ̀ ɛ́ sénkɛ a. Ɛ́ mípe ɛ́ ɓiɛ̀ ɓén kań peɓɛ̀ hũn iè hɔ̀ lɛ ɛ́ mí dũmuasɛ̃̀ lè bienù lɛ ɛ́ ké bie ɛ́ lɛ́ miɛ ǹ.
11Ɛ́ sí iè hɔ̀pe ɛ́ ké dàa ɛ́ wóò hɛ̃un Dɔfĩn ɛ̀ lɛ́ miɛ ǹ fúu. Ké wóò hɛ̃un nɛ Dɔfĩn ɛ̀ líi miɛ àá nìɛ lɛ ɛ́ fɔ́ɓán àá lé mɛkɛ̃nì lɛ ɛ́ Hɔ́ vɔn miɛ bòo hũn, ɛ̀ Hɔ̀ ɛ̀ yíiní miɛ àá mí pànkɛ́ ɛ̀ hɔ̀ bɔ̀tente lɛ ɛ́ mí ɛ́ cɛ̀ ɛ̀ mì wé ɛ́ mí dàń wé, ɛ̀ mì lò dàń mí ńdɛsĩ̀nlɔ́ tɔnlɔ́ ɛ̀ tɛ́ tíiní ɲunù, 12bòo lɛ ɛ́ wé ɛ̀ kè Ɲunsɔ Yiezu yèrè ɛ̀ dàá yí ɓàanínin mìpe mì bòo hũn, ɛ̀ mìpe ɛ̀ lò ɓiɛ̀ ɛ̀ yí ɓàanínin àpe piè bòo hũn, ɛ̀ ɓáaníɓán àá ké Dɔfĩn àá ɔ̀ Ɲunsɔ Yiezu Kirisa hiì.
Currently Selected:
2 Tesaloniike Siè 1: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation