1 Tesaloniike Siè 4
4
Hɔ̀ Tedàarɔ́ lɛ bòo tĩ Dɔfĩn
1Ɛ́ kɛ̀a sáalɛ kìe zɛ̀ɓɛ̀, hɔ̀ te dàarɔ́ lɛ ɛ́ mí fɔ́ɓán ɛ̀ mì dàá dàá míte ɛ̀ mì bòo dàá tĩiní Dɔfĩn ɛ́ mí lò wo kerɛnin kè viì. Hɔ̀pe wo bɔn kɛ́ sí iè hɔ̀pe ɛ́ mí ɛ́ mìte ɛ̀ dàa kɛ̀amu. Kɛ́ ké den bĩniɛ ɛ́ mì hɛ̃nnin, ké mì ɓɔ́nɓɔ́ninin ɔ̀ Ɲunsɔ Yiezu yèrè lɔ̀n nɛ mí bĩní wookɛ vɛ àá híɛhɔ́ àá pehɔ̀ wénlɔ́. 2Mí lò wo dũ hɔ bòo lɛ ɛ́ ké bie lɛ́ miɛ ǹ nɛ mí fɔ́ɓán ɛ̀ mì wóo wé, lɛ iè hɔ̀pe lɛ ɛ́ ké yú ké Ɲunsɔ Yiezu viì. 3Dɔfĩn bòo lɛ ɛ́ Hɔ́ wɛ iè bòo ɛ́ Hɔ́ nɛ mi wé nìnbirìe lɛ ɛ́ ce fúu, ɛ̀ mì ɓaà mìte ɛ̀ mì bí wóo daaníkɛ ɓán kũǹ wɛ̀. 4Nɛ mipe àá mí nì-coohɛ̃ ɛ́ hɔ́rɔ ɛ̀ wóo dũń mí sɛ̃́hṹ dàarɔ́ hɔ̀ ceremú àá hɔ́ temɛ̀ndɛ̃rɔ́ hũn, 5kɛ́ á bí fùansí míte ǹ ɛ̀ dé hɔ́ pɔhĩ́ kùahɛ̃ núnú hũn kɛ̀a ie ɓɛ́ dímíɲɛ́ nìɛ lɛ yí dũ Dɔfĩn bòo lɛ ɛ́ ɓɛ́ wóo wé wɛ̀. 6Ɛ́ mí bí nɛ àdɔ̀ ɛ̀ wé ɓá ńkɔnù khe tàá ɛ̀ fĩiní ɓá ńkɔnù hɔ̀pe bòo sɔ sí hũn wɛ̀. Ɲunsɔ ɛ́ den te hɔ yúa ɛ́ wóò dì hɔ̀pe sí míkùi hũn kɛ̀a bòo lɛ ɛ́ ké dàa sɛ̃̀nɛ́hã̀ khɛ́ hɔ́ ɛ́ lɛ́ miɛ ǹ hieniɛ vɔ́. 7Ɛ́ Dɔfĩn ɛ́ den yí ve kie nɛ ke ɓen wé ké mɛkɛ̃nì hɔ̀ bɔ̀lìɛhɛ̃ hũn, kɛ́ hɔ́ iè hɔ̀ ceremú bòo hũn ɛ́ Hɔ́ dàa ɛ́ vɔn kie. 8Ɛ́ sí dàa iè hɔ̀pe kɛ́ nìnbírɔ ɛ́ pɛ̃́ lépe ɲunù bienù sí bòo, ɛ̀ hɔ̀ yí nìnbírɔ bòo ɛ́ ɓàasɔ ɛ́ pɛ̃́, kɛ́ hɔ́ den iè Dɔfĩn lɛ ɛ́ lɛ́ mí Mɛkɛ̃ni kie ǹ ɛ́ ɓàasɔ ɛ́ pɛ̃́ bòo.
9Ɛ́ hɔ́ wo ɓen kɛ́ hɔ́ ńwɛníɓán kɛ̀a ie ɓɛ zɛ̀ɓɛ̀ bòo sí, ɛ̀ mì mɛ̀kóo ɛ́ mí nɛ ke ɛ̀ wĩ́ bòo dɔ̀ ɛ̀ lɛ́ miɛ ǹ pehɔ̀ bòo hũn iè hɔ̀ lɛ ɛ́ mípe mìte ǹ ɛ́ kerɛ hɔ̀ ǹ Dɔfĩn viì nɛ mi wóo wɛní ɓán mìpe àá mí nì-cóohɛ̃. 10Ɛ́ sí lò iè pe wanminu lɛ ɛ́ mí ɛ́ zɛ̃́ní àá ɓɛ́pe ńdɛsĩ̀riè ɓɛ́kùi lɛ wi hɔ Maseduanɛ pɛ̃̀hɛ̃ míkùi hũn. Kɛ́ ké den pɛwi ɛ́ mì hɛ̃nnin mìpe kìe zɛ̀ɓɛ̀ nɛ mi bĩní wóokɛ vɛ àá híɛhɔ́ ɛ̀ wé hɔ́ ɛ̀ pɔní. 11Mì cɛ mi kuò ɛ̀ kań lé hũn-wiɛ̀ hũn, ɛ̀ hɔ̀ bòo lɛ ɛ́ nɛ̀ miɛ iè pe ɛ́ mí wóo húi bòo, ɛ̀ mì wóo tɛ́ àá mí kùrú níhĩ́ ɛ̀ dàá yí mí ɲunù dínlɔ́ kɛ̀a bòo lɛ ɛ́ ké dàa bie hɔ̀ ɛ́ lɛ́ miɛ ǹ. 12Ɛ́ kɛ̀amu, ɛ́ ɓɛ́ nìnbirìe lɛ ɛ́ yí ɓɛ́ ńdɛsĩ̀riè ɛ́ den wo ɛ́ wóo mɛ̀ndɛ̃ miɛ mì te dàarɔ́ bòo hũn, ɛ̀ mì lò ɛ́ yá wé ɲún hũn tìerɔ́ nìnbírɔ dɔ̀ lɔ̀n wɛ̀.
Ɲunsɔ Yiezu khũ̀á ɓenlɔ́ bòo
13Kìe zɛ̀ɓɛ̀, ké den wɛ nɛ mi dũń hɔ́ bɔ̀berà ɓɛ̀ nìnbirìe lɛ ɛ́ húrun vɔ́ bòo hũn bòo lɛ ɛ́ wé ɛ̀ mì hũn ɛ̀ bí yaa kɛ̀a ɓɛpe nìnbirìe lɛ kɛ́ wɛ̀; ɓɛ̀pe lɛ ɛ́ yí dàa tĩì bènlén. 14Ɛ́ kɛ̀a bòo lɛ ɛ́ ké dàa dũmuasɛ̃̀ nɛ Yiezu ɛ́ húrun kɛ́ a vìé lɔ́ hɔ́ húmú hũn, ɛ́ ké lò ɓiɛ̀ dũmuasɛ̃̀ nɛ ɓɛpe nìnbirìe lɛ húrunkɛ kɛ́ ɓɛ́ ɛ́ dũmuasɛ̃̀ àpe Yiezu ǹ ɛ́ Dɔfĩn ɛ́ ɓiɛ̀ ɛ́ ɓén vìení ɛ́ ɓɛ́ wo páaní kań àá ɔ́ pe Yiezu.
15Ɛ́ lɛ den iè hɔ̀ bòo lɛ ɛ́ ké ɛ́ bie lɛ́ miɛ ǹ, lɛ iè ɔ̀ Ɲunsɔ bienù: pɛ̃̀hṹ lɛ kɛ́ ápe Ɲunsɔ mii khũ̀á ɓen, ɛ̀ kè pe lɛ ɛ́ wi le mɛkɛ̃nì hũn pehɔ̀ yìi hũn ɛ́ yá ɓén dí ɓɛ́pe lɛ húrun vɔ́ híɛhɔ́ wɛ̀. 16Pehɔ̀ zɔn, ɛ̀ tɛn-bɛhɔ́ dɔ̀ ɛ́ ɓén ɲínin, à mɛlɛkɛɓɛ ɲúnsɔ tɛmu àá lé Dɔfĩn bũì tɛmu ɛ́ ɓén tɛ̀; ápe Ɲunsɔ míte ǹ ɛ́ den wo ɓén yòó vɛ́ lé hɔ́ hóohũn ɛ́ ɓén síɛ. Ɛ́ ɓɛ́ nìnbirìe lɛ húrunkɛ kɛ́ ɓɛ́ dũmuasɛ̃̀ àpe Kirisa ǹ ɛ́ temu ɓén dí hɔ́ híɛhɔ́ ɛ́ vìé. 17Ɛ́ pehɔ̀ máahṹ, ɛ̀ kèpe lɛ kɛ́ lɛ wi lé mɛkɛ̃nì hũn pehɔ̀ yìi hũn ɛ́ den ɛ́ páa ɓɛ́pe lɔ̀n ɛ́ páaní mìí ɛ́ dé hɔ́ dùndùó hũn ɛ́ yòó vɛ́ sĩ́-ɛ pe Ɲunsɔ híɛhɔ́ hɔ̀ hóohũn. Ɛ́ kɛ̀amu, ɛ́ ké wo ɓén kań àá ɔ́pe Ɲunsɔ fúu. 18Ɛ́ mí wo ɛ̀ wóo hĩ̀iníkɛ ɓán tĩɛ̀ àá hɔ́pe biehĩ́ sɔ sí.
Currently Selected:
1 Tesaloniike Siè 4: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
