1 Piɛre 5
5
Ɓɛ́ ńdɛsĩ̀rìe ńdàáɓánlɔ́ bòo
1Ɛ́ kɛ̀a sáalɛ, ɛ́ ɓɛ́ iè ɓɛ̀pe Dɔfĩn zũnù nìkĩ́ɛ lɛ wi mi tĩ́ihṹ ɛ́ ń nɛ̀. Ńpe kùusɔ iè pe nìkĩ́i kɛ̀a ɓɛ, ɛ́ ń mɔn ɔ̀ Kirisa bòo lɛ á dàa lɔ̀n bɔn ɛ́ bòo ɛ̀ bie, ɛ́ niǹ bòo ɛ́ wi hɔ pe ɓàarɔ́ lɛ vaá-ɓen hũn, hɔ̀pe lɛ ɛ́ ɓɛ́ nìnbirìe ɛ́ ɓén mi. 2Mì ɓɛ́ɓɛ́ Dɔfĩn nìɛ lɛ ɛ́ Hɔ́ dɔ́ mí núnú hũn ɛ̀ huí bòo sãàní kɛ̀a bòo lɛ á pisierɔ dàa wóò húi mí pirìe bòo sãàní bòo sí. Mí bí wóo wé hɔ́ kɛ̀a bòo ɛ́ ɓɛ́ ɛ́ mì mɛmɛ́kɛ, kɛ́ mí wóo wé hɔ́ àá mí tĩɛ̀ míkùi kɛ̀a bòo lɛ ɛ́ Dɔfĩn ɛ́ wɛ. Mì bí wóo wé hɔ́ kɛ̀a ie màa ɛ́ mí ɛ́ cɛ̀, kɛ́ mí wóo hán mí hũn ɛ̀ dàá wé hɔ́. 3Mì bí wóo dí pànkɛ́ àá ɓɛ́pe nìnbirìe lɛ ɛ́ Dɔfĩn dɔ́ hɔ́ núnú hũn nɛ mi húi bòo wɛ̀; kɛ́ mí den wóo lɛ́ nɛ mi te dàarɔ́ ɛ̀ zɛ̃́ní lé wṹn lɛ sãa ɓà ǹ. 4Ɛ́ pɛ̃̀hṹ lɛ kɛ́ á Kirisa lɛ iè ɓɛ̀ pisieriè Ɲunsɔ ɛ́ ɓen khũ̀a ɓɛrɛ, ɛ́ mí ɓén yí hɔ́ sàanín lɛ ɛ́ ɓàń pɔ bòo míkùi lɛ ɛ́ yá yaa yá mi wɛ̀.
5Ɛ̀ mìpe zɛ̀fùa, mì wóo ɲí ɓɛ́ mì nìkĩ́ɛ bòo, ɛ̀ mìpe mìkùi ɛ̀ wóo síɛníkɛ míte ɓán híɛhɛ̃, iè hɔ̀ lɛ ɛ́ hɔ́ den bie lè Dɔfĩn bienù vɛ̃hṹ hũn ɛ́ nɛ Dɔfĩn ɛ́ yáà tɛ̀ ɓɛ̀ nìnbirìe lɛ wóò ɓàaní míte ǹ bòo, kɛ́ Hɔ́ den wóò wé mí hiì àá ɓɛ́lɛ ɛ́ wóò síɛní ɓɛ́te ǹ. 6Ɛ́ mí wóo síɛní míte ǹ hɔ̀ pànkɛ́ ɓàasɔ Dɔfĩn híɛhɔ́, bòo lɛ ɛ́ wé ɛ̀ Hɔ̀ den hóoní miɛ yòoní pɛ̃̀hṹ lɛ Hɔ́ wɛ hũn. 7Ɛ́ mí hũn-yenkɛà bòo míkùi ɛ́ mí huen ɛ̀ bè piè lɔ̀n iè hɔ̀ lɛ á ɛ́ mì bòo ɛ̀ húi. 8Mì piɛ̀ní mí yìe ɛ̀ mì wóo ɓaà mìte iè hɔ̀ lɛ ɛ́ mí ńbíyanle lɛ ɛ́ iè ɔ̀ Sitũanɛ ɛ́ bɛ́khíi kɛ̀a ie zànkɛ́wòohṹn lɛ ɛ́ wũamɛkɛ, ɛ́ ɔ̀ nìnbírɔ lɛ á mii ɛ̀ khã̀akɛ lɛ̀ ɛ̀ cɛ̀. 9Ɛ́ mí fɛ́sí dìń sãàní hɔ́ ńdɛsĩ̀nlɔ́ hũn ɛ̀ dàá pĩ́ piè bòo. Ɛ̀ mì dũń kɛ́ mì zɛ̀ɓɛ̀ lɛ ɛ́ wi le dímíɲɛ́ míkùi hũn ɛ́ ɓiɛ̀ lɔ̀n ɛ́ be kɛ̀amu. 10Mì lɔ̀n ɛ́ ɓén bĩní be pɛ̃̀hṹ dìkíndíɛ hũn. Kɛ́ Dɔfĩn lɛ iè lè hiì míkùi ɓàasɔ ɛ́ den vɔn miɛ nɛ mi ɓen páaní kań mí ɓàarɔ́ lɛ ɛ́ yáa vé hũn mì ńcɛɓánlɔ́ àá Yiezu Kirisa bòo hũn. Ɛ́ Hɔ́pe míte ǹ ɛ́ ɓén hóoní miɛ ɛ́ yòó dĩ̀ní, ɛ̀ Hɔ̀ ɛ́ lɛ́ hɔ́ pànkɛ́ miɛ ǹ, ɛ̀ Hɔ̀ ɛ́ fɛ́sí miɛ ɛ́ dĩ̀ní ɛ́ sãàní, ɛ́ hɛ̀rí bòo dɔ̀ ɛ́ wo yá dàń miɛ ɛ́ yá zɛ̀kɛ̀níkɛ wɛ̀. 11Hɔ̀ pànkɛ́ ɛ́ bòo ɛ́ sɛ̃̀ Hɔ̀ ǹ fúu pɛ̃̀hṹ lɛ yá vé hũn! Amiina.
Vienikɛlán tìɛnikɛrɔ́
12À iè ɔ̀ Silivɛ̃n ɛ́ te nin sĩiniɛ ɛ̀ dàa wɛ̃́ lépe vɛ̃hṹ dìkíndíɛ sɔ lɛ. À iè kìe zuú lɛ ɲún ɛ́ cã̀aní. Ɛ́ ń wɛ̃́ lé ɛ́ nin dàá hĩ̀iníkɛ mi tĩɛ̀, ɛ̀ ǹ lò zɛ̃́ní lɛ́ miɛ ǹ nɛ le iè pe Dɔfĩn hiì àá bɔ̀bín ɛ́ mi can dɛ̃̀ nin. 13Ɓɛ̀ ńdɛsĩ̀rìe ńkóoɓánlɔ̀n nìɛ lɛ ɛ́ wi hɔ Babilɔɔnɛ hũn hũ̀nún, ɓɛ̀pe lɛ ɛ́ Dɔfĩn ɛ́ munɛ kɛ̀a iè mipe ɛ́ mì tìɛníkɛnin, à nìn yɛ̀nù Marike ɛ́ lò ɓiɛ̀ ɛ́ mì tìɛníkɛnin. 14Mì fòonikɛ ɓán sãa sãa àá wanminu.
Nɛ hũn-wiɛ̀ ɛ̀ wé àá mípe mìkùi, mìpe lɛ bòo ɛ́ sɛ̃̀ à Kirisa.
Currently Selected:
1 Piɛre 5: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
