1 Piɛre 4

Hɔ̀ te dàarɔ́ lɛ bòo tĩ Dɔfĩn bòo

1Ɛ́ hɔ́ lɛ á Kirisa ɛ́ lɔ̀n bɔn mí sɛ̃́hṹ hũn, ɛ́ mípe ɓiɛ̀, mì cɛ mí kuò ɛ̀ mì dàá lépe nùnlé dìcóoní sɔ, iè hɔ̀ lɛ álɛ ɛ́ lɔ̀n bɔn mí sɛ̃́hṹ hũn ɛ́ fùɛrɛ̀sí hɔ́ bɔ̀koohɔ́ ǹ. 2Ɛ́ kɛ̀a sáalɛ, ɛ́ mí wo wé mí mɛkɛ̃nì lɛ ɛ́ kɛ́ lé súsũ̀nù lɔ̀n ɛ̀ ɓáaníɓán àá Dɔfĩn tĩì bòo kɛ́ ɓɛ́ nìnbirìe bòo lɛ ɛ́ peɓɛ̀ tĩɛ̀ ɛ́ wóo vɛnin ɛ́ bòo mí wɛ̀. 3Hṹn àá híɛhɔ́, ɛ́ ɓɛ́ nìnbirìe lɛ yí dũ Dɔfĩn tĩɛ̀ bòo iè pe ɛ́ mí hṹn wóo cɛ̃̀un ɛ́ hɛ̀ míɛ, ɛ́ hɔ́ hɛ̀ wo ɓaa kiɛ́. Mí den hṹn wóò daaníkɛ ɓán kũǹ, ɛ̀ yìe ɛ́ hṹn wóò lé bòo ǹ, ɛ̀ mì hṹn iè ɓɛ̀ ɲɛkĩɛbɛ̃́ɓɛ́, ɛ̀ mì hṹn wóò dí dí ɛ̀ mì ɲu ɲu ɛ̀ vɛ dɛ̀kĩ́i, ɛ̀ mì hṹn wóò ɓàaní hɔ́ wɛ̃̀hɛ̃ ǹ, lɛ lò iè bòo lɛ ɛ́ Dɔfĩn ɛ́ yí wɛ hùúu. 4Ɛ́ ɓɛ́pe nìɛ lɛ ɛ́ yí dũ Dɔfĩn ɛ́ wo ɓɛ ɛ̀ húi ɛ̀ mì yáà bĩní zè vɛ páa peɓɛ̀ lɔ̀n ɛ́ dàá wé hɔ́pe ńwékɛkũn bòo, ɛ́ hɔ́ hɛ̀ yòokɛa peɓɛ̀ lɔ̀n ɛ́ ɓɛ́ dàa wóò tòokɛ miɛ. 5Ɛ́ ɓɛ́ wo ɓén bɛ̃́nkí munkɛ hɔpe bòo lɛ ɛ́ ɓɛ́ wɔ́ Dɔfĩn híɛhɔ́, Hɔ̀pe lɛ ɛ́ sɛ́sɛ́a míte vɔ́ ɛ́ mii lè ɓɛ̀pe nìnbirìe lɛ yìe wi àá ɓɛ́pe lɛ húrunkɛ lìe. 6Ɛ́ sí iè hɔ̀pe ɛ́ lé Bentĩnu ɛ́ dàa ɓiɛ̀ ɛ́ buie ɛ́ lɛ́ ɓɛ́ nìhiè ǹ, bòo lɛ ɛ́ wé ɛ̀ hɛ̀rí àá hɔ́ lɛ ɛ́ Dɔfĩn ɛ́ lɔ̀ peɓɛ̀ lìe nɛ peɓɛ̀ tɛkɛ̀a ɛ́ mii ɛ̀ híi kɛ̀a iè ɓɛ nìnbirìe ɓɛ́kùi, ɛ̀ ɓɛ̀ ɛ̀ yí lé mɛkɛ̃nì lɛ ɛ́ lépé Mɛkɛ̃n-Sãanu ɛ́ te wóo lɛ́.

7Bòo míkùi vénlɔ́ ɛ́ wo lúwi, ɛ́ mí wookɛ mite dàá sãàní ɛ̀ mì wóo ɓaà mìte bòo lɛ ɛ́ wé ɛ̀ mì wóo dàń Dɔfĩn ɛ̀ hɛ̃nnin. 8Ɛ́ hɔ́ bòo míkùi híɛhɔ́, ɛ́ mí wɛní ɓán cɛ̃̀un mìpe àá mí nì-coohɛ̃, iè hɔ̀ lɛ ɛ́ lé wanminu ɛ́ wóò lɛ́ ɛ̀ hɔ̀ bɔ̀koohɛ̃ bɔ̀kùi ɛ̀ yí lé sɛ́wɛ́rí dénlɔ́. 9Mì wóo pen ɓán sãàní mí zĩhĩɛ́ hũn, ɛ̀ mí bí wóo wé hɔ́ kɛ́ mí ɛ́ khùuní wɛ̀. 10Nɛ hɔ hɛ̃mù bòo lɛ ɛ́ hɔ́rɔ ɛ́ yu Dɔfĩn viì á wóo mìí ɛ̀ dàá sĩiní ɓá ńkɔhĩ́. Ɛ́ kɛ̀amu, ɛ́ mí den ɛ́ wé Dɔfĩn hɛ̃mù bòo ɲúuhɛ̃ bɔ̀kùi dàariè lɛ ɛ́ sãa. 11Ɛ́ kɛ́ nìnbírɔ dɔ̀ ɛ́ yú Dɔfĩn bienù bielán pànkɛ́, ɛ̀ ɓàasɔ ɛ̀ wóo bie le ɛ̀ lɛ́ ɓɛ́lɛ kɛ́ ǹ. Àlɛ ɛ́ dàa ɓɛ nìnbiriè sĩinílán pànkɛ́ ɛ̀ wóò sĩiní ɓɛ́ àá hɔ́pe pànkɛ́ lɛ ɛ́ Dɔfĩn ɛ́ lɛ́ à ǹ, bòo lɛ ɛ́ wé ɛ̀ bòo míkùi hũn, ɛ̀ Dɔfĩn ɛ̀ wóo yí ɓàarɔ́, Yiezu Kirisa yèrè lɔ̀n, àpe lɛ ɛ́ hɔ́ ɓàarɔ́ àá hɔ́ pànkɛ́ ɛ́ bòo sɛ̃̀nin pɛ̃̀hṹ lɛ yáa vé hũn! Amiina.

12Kiè nìɛ lɛ ń wɛ, mì bí nɛ hɔ hàanírɔ́ lɛ ɛ́ mì yí, hɔ̀pe lɛ ɛ́ dɛ̃̀ kɛ̀a ie hɔ dṹn bɔ̀bɛhɔ́ dɔ̀ lɛ ɛ́ mí wi hũn, ɛ̀ yòokɛ mi lɔ̀n kɛ̀a bòo ɛ́ hɔ́ iè bòo dɔ̀ lɛ ɛ́ yí te mí yìe wɛ̀. 13Kɛ́ mí den yɛ̀rɛ́ wɛní míte iè hɔ̀ lɛ ɛ́ mí yú ó Kirisa lɔ̀nbiè ɛ́ sankɛ àá ɔ́, bòo lɛ ɛ́ wé ɛ̀ mì ɓiɛ̀ tí àá lé miikɛ tĩwiɛ̀ dɛ̀bɛhɔ́ pɛ̃̀hṹ lɛ á ɓén zɛ̃́ní mí ɓàarɔ́ ɓɛ́ nìnbirìe ɓɛ́kùi ǹ hũn. 14Ɛ́ kɛ́ ɓɛ́ ɓen ɛ́ mì tòokɛ hɔ lɛ ɛ́ mí iè Kirisa kɛ̀ránzɛ̀ɓɛ̀ bòo hũn, ɛ̀ mì ɲúuhɛ̃ ɛ́ tĩ iè hɔ̀ lɛ ɛ́ Dɔfĩn Mɛkɛ̃ni àá mí ɓàarɔ́ ɛ́ wi mi lɔ̀n. 15Ɛ́ kɛ́ ádɔ̀ mì tĩ́ihṹ ɛ́ ɓɛ́ ɓen ɛ́ lɔ̀n ɛ̀ biení, ɛ̀ hɔ̀ bí wé bòo ɛ́ á iè nìɓé tàá kɛ̃̀míi tàá bɔ̀lànwé, tàá bòo ɛ́ ɓɛ́ nɛ a van dɔ́ mí ɲunù àdɔ̀ bòo hũn wɛ̀. 16Kɛ́ á lɔ̀n ɛ́ ɓen ɛ́ be iè hɔ̀ lɛ á iè kèrètĩ́ɛ, à bí lùwi, kɛ́ á den ɓàaní Dɔfĩn iè hɔ̀ lɛ á yú lépe yèrè sɔ sí. 17Lè pɛ̃̀hṹ wo ɓɛrɛ dɛ̃un lɛ ɛ́ Dɔfĩn ɛ́ wo mii lè ɓɛ̀ nìnbirìe lìe, ɛ́ pehɔ̀ fìi ɛ́ mii ɓɛ́ àá képe Dɔfĩn zũnù nìɛ. Ɛ́ kɛ́ hɔ́ ɓen iè kèpe ɛ́ hɔ́pe lìe lènlɔ́ fìi ɛ́ mii dàá ɓɛ́, ɛ̀ ɓɛ̀pe nìɛ lɛ ɛ́ pɛ̃́ ɛ́ yí dɛsĩ̀ lè Dɔfĩn Bentĩnu ǹ ɛ́ wo bòo ɛ́ ɓén vɛ víení kɛwiɛ? 18Kɛ̀a bòo lɛ ɛ́ lé Dɔfĩn bienù ɛ́ dàa ɛ́ bie hɔ̀ ɛ́ nɛ Kɛ́ á nìcã̀anírɔ fuerɛ ɛ́ ɓen ɓén hièní, àlɛ ɛ́ yí bè lè Dɔfĩn wṹn àá ɔ́ bɔ̀konwé ɛ́ bòo wo ɓén dĩń kɛwiɛ? 19Ɛ́ kɛ̀amu, ɛ́ nɛ ɓɛpe lɛ lɔ̀n ɛ́ be iè hɔ̀ lɛ ɛ́ ɓɛ́ ɛ́ Dɔfĩn tìi-bòo ɛ̀ wé ɛ̀ pĩ̀iní ɓɛ́te ɛ̀ ɓɛ̀ wóo wé hɔ́ bɔ̀tente ɛ̀ ɓɛ̀ mìí ɓɛ́te ɛ̀ dé hɔ́pe Dɔfĩn lɛ ɛ́ te ɓɛ mɛ́ núnú hũn, Hɔ̀pe lɛ ɛ́ wóò wé hɔ́ bòo lɛ ɛ́ Hɔ́ lɛ́ mí ɲunù nɛ mí ɓén wé.

Currently Selected:

1 Piɛre 4: bwj

Highlight

Copy

Compare