1 Piɛre 3

Ɓɛ̀ báa àá ɓá hã́a bòo

1Ɛ́ kɛ̀amu ɛ́ mípe hã́a ɓiɛ̀, mì wóo ɲí mì báa bòo, bòo lɛ ɛ́ wé ɛ̀ hɛ̀rí kɛ́ ɓɛ́dɔ̀ peɓɛ̀ tĩ́ihṹ ɛ́ yí tɛ̀ lè Dɔfĩn bienù bòo, ɛ̀ mì ńdànwénlán ɛ́ lɛ́ ɛ̀ ɓɛ̀ tɛ̀ pelè bòo hɛ̀rí kɛ́ mí yí yɛ̀rɛ́ bie bòo, 2iè hɔ̀ lɛ ɛ́ ɓɛ́ wo ɓén mi mi ńdànwénlán lɛ ɛ́ ce àá bòo lɛ ɛ́ mí dàa ɛ́ ɓɛ̀ mɛndɛ̃. 3Mì bí wé hɔ́ te cánlɔ́ lɛ ɛ́ wóò mi àá yìe ɛ̀ mì wóo bè bòo hièní, lɛ iè hɔ̀ ɲún pánlɔ́, àá hɔ́ sɛ̃́ní líɛrɔ́ kóorɔ́, àá hɔ́ tĩ̀ɛ lɛ ɓɔ̀nbuò wi zɔnlɔ́. 4Kɛ́ mí den wé lé tĩì hũn te cánlɔ́ ɛ̀ mì wóo bè bòo ɛ̀ hièní, lɛ iè hɔ̀ te cánlɔ́ lɛ ɛ́ yáà yaa, lɛ iè lè hɛciri lɛ sãa ɛ̀ lè lò wuawi. Ɛ́ sí den iè te cánlɔ́ lɛ ɛ́ bòo hie cɛ̃̀un Dɔfĩn viì. 5Ɛ́ sí iè pe ɛ́ ɓɛ́ hã́a lɛ hàarí wɛ Dɔfĩn ɛ̀ ɓɛ̀ lò hàarí bɔ̀ ɓɛ́ tĩɛ̀ Hɔ̀ lɔ̀n ɛ́ hàarí wóò cɛ ɓɛte kɛ̀a mù, ɛ̀ ɓɛ̀ hàarí wóò ɲí ɓá báa bòo, 6kɛ̀a ie Sara lɛ hàarí wóò ɲí ɓá bɛ́rɔ Abarahaamu bòo, à hàarí ɛ́ wóò vi-e nɛ mí ɲunsɔ. Ɛ́ mí hɛ̀ iè pe Sara hĩ́ini àá bɔ̀bín lɛ kɛ́ mí dàa ɛ́ hɔ̀ bɔ̀tente ɛ̀ wé kɛ́ mí yáà fùansí ɛ̀ záahĩ́ dɔ̀ ɛ̀ zɔ yaakɛ mi tĩɛ̀ wɛ̀.

7Ɛ́ kɛ̀amu ɛ́ mípe báa ɓiɛ̀, mì dàá bɔ̀dũmunù ɛ̀ dàá kansí ɓánlɔ̀n àá mì hã́a, ɛ̀ mì dũń kɛ́ peɓɛ̀ niì ɛ́ mí kɛ̀a mipe wɛ̀. Mì wóo mɛndɛ̃ ɓɛ iè hɔ̀ lɛ ɛ́ ɓɛ́ ɓén páa mí lɔ̀n ɛ́ dàá yí lé mɛkɛ̃n-tente lɛ ɛ́ Dɔfĩn àá mí hiì ɛ́ wóò lɛ́. Kɛ́ mí ɛ́ wé kɛ̀amu, ɛ́ bòo dɔ̀ ɛ́ yá si mi hɛ̃nnɛ wɛ̀.

Mì tɛ̀ ɛ̀ wóo wé hɔ́ bɔ̀tente lè lɔ̀nbie hũn

8Ɛ́ pehɔ̀ ǹ vɛ vénlén, ɛ́ ń nɛ mipe mìkùi ɛ̀ wé mí ɲunù àá dìcóoní, ɛ̀ mì wóo mi ɓán miinɛ̀, ɛ̀ mì wóo wɛní ɓán kɛ̀a ie ɓɛ zɛ̀ɓɛ̀ bòo sí, ɛ̀ mì wóo wé bɔ̀tente àá ɓɛ́lɛ kɛ́, ɛ̀ mì wóo siɛní míte ɓán híɛhɛ̃. 9Mì bí wóo wé bɔ̀koohɔ́ ɛ̀ dàá sàaní bɔ̀koohɔ́ kiè, ɛ̀ mì bí wóo tookɛ bòo ɛ̀ dàá sàaní tòo kiè wɛ̀. Kɛ́ mí den wóo kɔ̃́ní àá dúɓɛ́rɔ́ bienù, iè hɔ̀ lɛ ɛ́ sí den ie pe bòo lɛ ɛ́ Dɔfĩn vɔn miɛ nɛ mí wé, bòo lɛ ɛ́ wé ɛ̀ mì dàá yí hɔ́ dúɓɛ́rɔ́ pehɔ̀ viì. 10Ɛ́ hɔ́ den wɛ̃́ lé Dɔfĩn bienù vɛ̃hṹ hũn ɛ́ nɛ làa:

Kɛ́ nìnbírɔ dɔ̀ ɛ́ wɛ nɛ mí mɛkɛ̃nì ɛ̀ sãaní,

Ɛ̀ mí kań lé hũn-wiɛ̀ hũn,

Ɛ̀ ɓàasɔ bí wóo bie ben-làahɛ̃,

À lò bí wóo ɓúukɛ hɔ lɛ́khɛ́a wɛ̀.

11 Ɛ̀ ɓàasɔ ɛ̀ fùansí hɔ́ bɔ̀koohɛ̃ wénlɔ́ ǹ, à wóo wé hɔ́ bɔ̀tente,

À cɛ mí kuò ɛ̀ cɛ̀ lè hũn-wiɛ̀ ɛ̀ bè máahṹ,

12 Iè hɔ̀ lɛ ɛ́ Ɲunsɔ wóo húi àá ɓɛlɛ ɛ́ cã̀anín viì,

À wóò tɛ́ mí ɲɛkɛ̃̀a à ɲí peɓɛ̀ hɛ̃nɛ̀.

Kɛ́ Ɲunsɔ ɛ́ yá tɛ̀ ɓɛ̀lɛ ɛ́ wóo wé hɔ́ bɔ̀koohɛ̃ bòo wɛ̀.

13Kɛ́ mí wo ɓen can mì kuò ɛ́ hɔ̀ bɔ̀tente ɛ̀ wé, ɛ́ wieni ɛ́ te hɔ bɔ̀koohɔ́ ɛ́ ɓén wé àá miɛ? 14Ɛ́ hɛ̀rí kɛ́ mí sãawi ɛ̀ mì lɔ̀n ɛ́ be iè hɔ̀ lɛ ɛ́ mí ɛ́ hɔ̀ bɔ̀tente ɛ̀ wé, ɛ̀ mì ɲúuhɛ̃ ɛ́ pɛ́wi tĩ. Ɛ̀ mì bí Zãn ɓɛ́ nìnbirìe, ɛ̀ mì bí nɛ mi hũn ɛ̀ yen wɛ̀. 15Kɛ́ mí den wóo ɓàaní-ɛ Kirisa mì tĩɛ̀ hũn kɛ̀a ie mi Ɲunsɔ. Mì wóo sɛ́sɛ́ míte sãaní fúu ɛ̀ dàá hìé ɔ́ nìnbírɔ lɛ mii ɓen dìe miɛ ǹ àá lé tĩì bènlén lɛ ɛ́ mí dàa bòo. 16Kɛ́ mí wóo wé hɔ́ àá te wuawinírɔ́ àá mɛndɛ̃rɔ́, ɛ̀ mì dàá hũn nùnlé lɛ sãa, bòo lɛ ɛ́ wé ɛ̀ hɔ̀ bòo lɛ ɛ́ ɓɛ́ ɛ́ mì yèrè ɛ̀ yaa hũn míkùi, ɛ̀ ɓɛ̀pe lɛ ɛ́ mì tòokɛ iè hɔ̀ lɛ ɛ́ mí te dàarɔ́ ɛ́ sãa ɔ̀ Kirisa hũn, ɛ̀ dí lùwiè. 17Ɛ́ kɛ́ hɔ́ dàa ɓen iè Dɔfĩn tĩì bòo, ɛ̀ hɔ̀ bòo ɛ́ tṹ ɛ̀ kɔ̀ lɔ̀n ɛ̀ be hɔ bɔ̀tente wénlɔ́ hũn, ɛ́ pɔ hɔ lɛ ɛ́ kɔ́ lɔ̀n ɛ́ be hɔ bɔ̀koohɛ̃ wénlɔ́. 18Àpe Kirisa kùusɔ ɛ́ den lɔ̀n ɛ́ bɔn yìn-cóonín ɛ́ hɔ́ wo vɔ́, ɓɛ̀ nìnbirìe bɔ̀koohɛ̃ bòo hũn. Àpe lɛ ɛ́ cã̀anín ɛ́ wo lɔ̀n bɔn ɓɛ̀lɛ ɛ́ yá cã̀aní bòo hũn, bòo lɛ ɛ́ wé à dàá miɛ ɛ̀ ɓen lɛ́ Dɔfĩn. Ɓɛ̀ ɛ́ ɓú-ó piè nìnbí-yáamu tɛkɛ̀a hũn, kɛ́ lé Mɛkɛ̃n-Sãanu ɛ́ lɛ́ ɛ́ piè yìe ɛ́ khũ̀a wi. 19Á wo van buie le Bentĩnu ɛ́ lɛ́ hɔ́ bɔhĩ́ lɛ ɛ́ wi le kɛ̀sí hũn. 20Hɔ̀pe bɔ́hĩ́ sɔ ɛ́ iè ɓɛ̀pe nìnbirìe lɛ hàarí pɛ̃́ Dɔfĩn bòo à Nowe pɛ̃̀hṹ hũn. Dɔfĩn ɛ́ hàarí hɛ̃̀ mí hũn àá ɓɛ́ cɛ̃un pɛ̃̀hṹ lɛ á Nowe ɛ́ dàá ɛ́ lè ɲumu wiè dɛ̀bɛhɔ́ ɛ̀ ɓáa, lèpe wiè lɛ ɛ́ ɓɛ́ nìɛ ɓɛ̀ yiɛní dɔ̀ lɛ ɛ́ iè nìɛ hùutĩ ɛ́ hàarí yú fuerɛ hũn hɔ̀ ɲumu núnú hũn. 21Ɛ́ hɔ́ pesí ɛ́ iè ɔ̀ ńlíiníɲumu bòo ɛ́ hɔ́ ɛ́ zɛ̃́ní, hɔ̀pe ńlíiníɲumu lɛ ɛ́ zɛ̃́ní kɛ̀a sáalɛ kɛ́ Dɔfĩn ɛ́ fueniɛ miɛ ǹ. Ɛ́ hɔ́pe ńlíiníɲumu sɔ ɛ́ yí hɔ́ tɛkɛ̀a dìinì ɛ́ hɔ́ wóò tiɛ, kɛ́ hɔ́ iè bòo ɛ́ ɓɛ́ nɛ ke hɛũn Dɔfĩn nɛ Hɔ́ lɛ́ tĩì lɛ ce kie ǹ, à Yiezu Kirisa lɛ vìé bòo hũn, 22àpe lɛ ɛ́ yòó van hɔ̀ hóohũn ɛ́ yòó van kɛsí Dɔfĩn ńdóonín, ápe ɛ́ temu wi ɓɛ mɛlɛkɛɓɛ ɲún hũn àá hɔ́ hóohũn bɛ́záahĩ́ àá hɔ́ pànkɛ́a míkùi ɲún hũn.

Currently Selected:

1 Piɛre 3: bwj

Highlight

Copy

Compare