1 Piɛre 2
2
1Ɛ́ kɛ̀amu, ɛ́ mi wo fùansí lé mɛkɛnɲiì àá hɔ́ ɓúo ɓúukɛrɔ́ àá mí ɲúuhɛ̃ ɲúuhɛ̃ míkùi, àá hɔ́ ɲɛbĩníkɛà biehĩ́ àá hɔ́ yìi ńlé bòo ǹ àá hɔ́ nìwɛrɛ̀. 2Ɛ́ kɛ̀a bòo lɛ ɛ́ ɓɛ́ zĩncãahɛ̃ lɛ tɔn sáalɛ ɛ́ iè ɓà nínɓɛ́ yɔmu mí dòonún ɛ́ peɓɛ̀ tĩɛ̀ wóò vɛ́ nin, ɛ́ mípe ɛ́ ɓiɛ̀ wóo lɛ́ nɛ mi tĩɛ̀ ɛ̀ vɛ́ lé Dɔfĩn bienù kɛ̀amu, lèpe lɛ ɛ́ iè hɔ̀ yɔmu lɛ ce lɛ ɛ́ mí ɓen ɲun ɛ̀ mì tí fúu ɛ̀ yòó vɛ fuen. 3Kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn ɛ́ nɛ: Mí lò wo díndie ɛ́ mɔn bòo lɛ á Ɲunsɔ ɛ́ dàa sãa.
Ɓɛ̀ nìɛ lɛ bòo sɛ̃̀ Dɔfĩn bòo
4Mì vɛ lúwìní Ɲunsɔ ǹ, àpe lɛ ɛ́ iè lè sɛ̃̀nlè lɛ yìe wi lɛ ɛ́ ɓɛ́ nìnbirìe ɛ́ pɛ̃́ tɛ́viɛniɛ, kɛ́ Dɔfĩn ɛ́ den munɛ lè ɛ́ dɔ́ ɲún nin cɛ̃̀un. 5Ɛ́ mípe, mì ɓiɛ̀ dìń kɛ̀a ie hɔ̀ sɛ̃̀nlɛ̀a lɛ yìe wi, ɛ́ Dɔfĩn ɛ́ mìí miɛ ɛ́ dàá te le zũnù lɛ ɛ́ pehɔ̀ Mɛkɛ̃ni ɛ́ mii kań hũn, ɛ̀ Hɔ̀ ɛ́ bìsí miɛ pelè hũn ɛ́ wé àá mí khɛ̃́ndàariè, bòo lɛ ɛ́ wé ɛ̀ mì dàá tɛ́ pehɔ̀ tɔnlɔ́ àá tĩì lɛ ɛ́ ce, kɛ̀a bòo lɛ ɛ́ pehɔ Mɛkɛ̃ni ɛ́ wɛ. Ɛ́ hɔ́pe sí ɛ́ iè bòo lɛ ɛ́ tĩ hɔpe Dɔfĩn, àpe Yiezu Kirisa bòo hũn. 6Ɛ́ lɛ iè hɔ̀ bòo lɛ ɛ́ wɛ̃́ lé Dɔfĩn bienù vɛ̃hṹ hũn hɔ̀pe sí bòo hũn:
Mì húi, nín bìsí niǹ zũnù fìi ɲìnlán sɛ̃̀nlè Siɲɔn lóo hũn,
Ń munɛ lè, ɛ́ pelè ɲún ɛ́ wi cɛ̃̀un.
Ɛ́ nìnbírɔ lɛ kɛ́ á dũmuasɛ̃̀ lè ǹ,
Ɛ́ ɓàasɔ ɛ́ lùwiè ɛ́ yá dí yá mi wɛ̀ # 2.6 Lèpe sɛ̃̀nlè sɔ lɛ ɛ́ ɓɛ́ ɛ́ bòo ɛ̀ bie ɛ́ iè Yiezu Kirisa. .
7Ɛ́ mípe lɛ ɛ́ dũmuasɛ̃̀ viì, ɛ̀ lèpe sɛ̃̀nlè sɔ ɛ́ iè dìɛ lɛ ɛ́ ɲún wi cɛ̃̀un. Kɛ́ ɓɛ́lɛ ɛ́ yí ɓɛ́ ńdɛsĩ̀riè ɛ́ hɔ́ ɛ́ wɛ̃́ bòo hũn ɛ́ nɛ làa:
Lè sɛ̃̀nlè lɛ ɛ́ ɓɛ́ zũteriè ɛ́ lerɛ tɛ́viɛniɛ,
Ɛ́ temu khũ̀a wɔ́ lé sɛ̃̀nlè lɛ̀ bòo hie,
Lɛ te lepe zũnù ɛ́ zɛ̃nkɛanin,
8 Sɛ̃̀nlè lɛ ɛ́ ɓɛ́ nìnbirìe ɛ́ wóò dàá kenkeníkɛ,
Lɛnù lɛ wóò kùeníkɛ nìnbirìe.
Ɓɛ̀ ɛ́ kenkeníkɛa iè hɔ̀ lɛ ɛ́ ɓɛ́ pɛ̃́ ɛ́ yí dɛsĩ̀ Dɔfĩn bienù wɛ̀. Ɛ́ sí lò den iè pe bòo lɛ ɛ́ hṹn fɔ́ɓán ɛ̀ hɔ̀ wé ɓà ǹ.
9Kɛ́ mípe, mí iè dàa lɛ ɛ́ Dɔfĩn ɛ́ munɛ nìɛ, mí iè hɔ̀pe Dɔfĩn lɛ iè mì bɛ́zuú khɛ̃́ndàariè, mí iè pehɔ̀ nìɛ lɛ ɛ́ Hɔ́ lerɛ ɛ́ bɔ̀ mí dòonún mí bòo hũn, nìɛ lɛ ɛ́ bòo sɛ̃̀ Hɔ̀ ǹ. Hɔ̀ ɛ́ vɔn miɛ ɛ́ mí lɔ́ hɔ́ síbínú hũn ɛ̀ khie van zɔ pehɔ̀ ńpiemu bɔ̀bɛhɔ́ hũn, bòo lɛ ɛ́ wé ɛ̀ mì lan vɛ buie pehɔ̀ bɔ̀bɛ̃hɛ̃ lɛ ɛ́ Hɔ́ wɔ́. 10Hṹn àá híɛhɔ́, ɛ̀ mì yí Dɔfĩn nìɛ wɛ̀, kɛ́ kɛ̀a sáalɛ ɛ́ mí woo iè pehɔ̀ nìɛ; hṹn àá híɛhɔ́ ɛ̀ mì bòo ɛ́ hṹn mínɛ Dɔfĩn miinɛ̀ dũnlɔ́ hũn wɛ̀, kɛ́ kɛ̀a sáalɛ ɛ́ mí bòo ɛ́ wo wi yán.
Ɓɛ̀ ńdɛsĩ̀riè te dàarɔ́ bòo
11Kìe nìɛ lɛ ɛ́ ń wɛ, mìpe lɛ ɛ́ iè ɓɛ̀ nɛ̀hãà lɛ wi hɔ kɛ̀yáamu hũn lè súsũ̀nù, nín mì hɛ̃nnin nɛ mí wóo ɓaà míte àá hɔ́ tɛkɛ̀a pɔnù lɛ wóò fĩ àá miɛ. 12Mì wóò dàa míte sãàní ɓɛ́ nìnbirìe lɛ yí dũ Dɔfĩn tĩ́ihṹ, ɛ́ kɛ̀a mú, hɛ̀rí kɛ́ ɓɛ́ ɛ́ mì yèrè ɛ̀ yáa bòo dɔ̀ bòo hũn, ɛ́ ɓɛ́ pɛ́wi ɛ́ mi mí bɔ̀werà lɛ sãa ɛ̀ ɓɛ̀ ɛ́ ɓàaní Dɔfĩn piè khũ̀á ɓenlɔ́ zɔn.
13À Ɲunsɔ bòo hũn, ɛ́ mí wóo ɲí ɓɛ́ pànkɛ́a ɓàasiè bòo, mì wóo ɲí-ɛ bɛ́zu-bɛhɔ́ bòo, àpe lɛ ɛ́ hɔ́ pànkɛ́ míkùi ɛ́ wi núnú hũn, 14ɛ̀ mì lò wóo ɲí ɓɛ́ Kuvɛrɛnɛɛreɓɛ lɛ á bɔ̀sikɛa bòo, à bɔ̀sikɛa ɓɛ̀ nɛ ɓɛ wóò vɛ́ ɓɛ́ nìwàahɛ̃ ɲɛkɛ̃̀a ɛ̀ ɓɛ̀ ɓàaní ɓɛ́lɛ ɛ́ wóò wé hɔ́ bɔ̀tente ǹ. 15Iè hɔ̀ lɛ ɛ́ hɔ́ iè Dɔfĩn tĩì bòo, lɛ ɛ̀ mì wóo wé bɔ̀tente ɛ̀ dàá lɛ́ ɛ̀ ɓɛ̀ bɛ̃́nbṹa lɛ ɛ́ yí dũ bòo dɔ̀ ɛ̀ ɲihĩ́ɛ híɛkɛ ɛ̀ bí mi bielén wɛ̀. 16Mì wóo dàá míte kɛ̀a ie ɓɛ nìnbirìe lɛ ɛ́ te ɓɛ́te, kɛ́ mí bí wé mí te tenlɔ́ sɔ àá fúrɛ́ lɛ ɛ́ mí dàa híɛ mì mɛkɛ̃nɲiì ǹ wɛ̀. Kɛ́ mí wóo dàá míte kɛ̀a ie Dɔfĩn tɔntɛ́riè. 17Mì wóo mɛ̀ndɛ̃ ɓɛ nìnbirìe ɓɛ́kùi, ɛ̀ mì wɛní mì zɛ̀ɓɛ̀, ɛ̀ mì zán Dɔfĩn, ɛ̀ mì ɓàaní-ɛ bɛ́zuú ǹ.
18Mìpe nìnbirìe tɔntɛ́riè, mì wóo zán mí ɲúuhɛ̃siè ɛ̀ mì ɲí peɓɛ̀ bòo, mì bí wóo wé hɔ́ àá ɓɛ́lɛ ɛ́ sãa ɛ̀ ɓɛ̀ wuawi àá miɛ ɓɛ́ dòonún, kɛ́ mí lò wóò wé hɔ́ àá ɓɛ́lɛ ɛ́ hiɛ̀ wi. 19Iè hɔ̀ lɛ ɛ́ pɛ̃̀hṹ lɛ kɛ́ lé lɔ̀nbiè dɔ̀ lɛ ɛ́ hṹn yí sãawi ɛ̀ lè yí miɛ ɛ́ ɓen van ɛ́ mì yí, kɛ́ mí ɛ́ hɛ̃̀ mì hũn pelè hũn iè hɔ̀ lɛ ɛ́ mí ɛ́ Dɔfĩn bòo ɛ̀ ɲí, ɛ̀ lè hiì viì. 20Ɛ́ kɛ́ mí wɔ́ bɔ̀koohɔ́ ɛ́ ɓɛ́ dàa ɛ́ mì lɔ̀n ɛ̀ biení, kɛ́ mí hɛ̃̀ hũn, ɛ̀ lè iè ńdiɛ̀ yèrè ɛ́ mí ɛ́ yí? Ɛ̀ kɛ́ mí ɓen ɛ́ bɔ̀tente ɛ̀ wé ɛ́ ɓɛ́ dàa ɛ́ mì lɔ̀n ɛ̀ biení kɛ́ mí ɛ́ hɛ̃̀ mì hũn ɛ̀ lè iè hìi Dɔfĩn híɛhɔ́. 21Ɛ́ sí den iè pehɔ̀ bòo hũn ɛ́ Dɔfĩn ɛ́ dàa vɔn miɛ, iè hɔ̀ lɛ á Kirisa míte ǹ ɛ́ lɔ̀n bɔn mìpe mì bòo hũn, ɛ́ wɔ́ àá bòo zɛ̃́nílán ɛ́ lɛ́ miɛ ǹ, bòo lɛ ɛ́ wé ɛ̀ mì bè piè laahĩ́ ǹ. 22Àpe ɛ́ yí wé bɔ̀koohɔ́ dɔ̀ ɛ́ yí mi wɛ̀, ɛ̀ ɓúo dɔ̀ ɛ́ lò yí zɔ lé àá piè ɲunù ɛ́ yí mi wɛ̀. 23Ɛ́ hɔ́ lɛ ɛ́ ɓɛ́ tòokɛa ɔ̀, á yí zɔ tòo bòo, ɛ̀ hɔ̀ lɛ ɛ́ ɓɛ́ ɔ̀ lɔ̀n ɛ̀ biení, á yí zɔ lɛ̀ hiɛ̀ dɔ̀ wɛ̀. Kɛ́ á den ɛ́ mɔ̀ mí bòo míkùi ɛ́ dɔ́ Dɔfĩn lɛ ɛ́ wóò lè hɔ̀ lìe àá mí híɛhɔ́ núnú hũn. 24Àpe míte ǹ ɛ́ khuie kè bɔ̀koohɛ̃ ɛ́ bɔ̀ mí lɔ̀n lè ɓáalén dãanù lɔ̀n, bòo lɛ ɛ́ wé ɛ̀ kè dìń kɛ̀a nìnbirìe lɛ húrun lɔ́ hɔ́ bɔ̀koohɔ́ hũn, ɛ́ khie wi le mɛkɛ̃nì lɛ ɛ́ cã̀aní hũn. Ɛ́ hɔ́ iè ɔ̀pe Kirisa tɛkɛ̀a lɛ ɛ́ wimikɛa ɛ́ temu lɛ́ ɛ́ mí dàa ɛ́ wan. 25Mí hṹn kɛ kɛ̀a ɓɛ pirìe lɛ ɛ́ vṹnun, kɛ́ laa lɛ lɔ̀n ɛ́ mí khũ̀a ɓɛrɛ mì sierɔ viì, àpe lɛ ɛ́ te mi bòo ɛ́ húi.
Currently Selected:
1 Piɛre 2: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
