1 Piɛre 1
1
Tìɛníkɛrɔ́
1Hɔ̀ iè ǹpe Piɛre lɛ ɛ́ iè ɔ̀ Yiezu Kirisa tɔnkɛrɔ, ɛ́ te lepe vɛ̃hṹ lɛ ɛ́ wĩ́ ɛ́ nin lɛ́ mípe lɛ ɛ́ Dɔfĩn ɛ́ munɛ ǹ, mìpe lɛ ɛ́ saakɛa ɛ́ van wɔ́ ɓɛ́ kɛ̀yáa hɔ̀ Pɔn àá hɔ́ Kalaasi àá hɔ́ Kapadɔɔsi àá hɔ́ Azii àá hɔ́ Bitini pɛ̃̀hɛ̃ hũn. 2Yàá Dɔfĩn ɛ́ munɛ miɛ kɛ̀a bòo lɛ ɛ́ Hɔ́ sɛ̃̀nɛ́hã̀ lieníkɛa ɛ́ nɛ mii wé. Ɛ́ lé Mɛkɛ̃n-Sãanu ɛ́ lerɛ miɛ ɛ́ khie bɔ̀ mí dòonún, ɛ̀ Yiezu Kirisa cãani ɛ́ tiɛ miɛ bòo lɛ ɛ́ wé ɛ̀ mì dàá ɲí piè bòo. Nɛ Dɔfĩn ɛ̀ wé hiì àá miɛ ɛ̀ Hɔ̀ lɛ́ hun wiɛ miɛ ǹ wɔ̀sɔ̀kɔ̀.
Tĩì bènlén lɛ yìe pɛ bòo
3Nɛ Dɔfĩn lɛ ɛ́ iè kè Ɲunsɔ Yiezu ɓà Yàá yèrè ɓàaní! Pehɔ̀ sãamu bɔ̀bɛhɔ́ hũn, ɛ́ Hɔ́ lɛ́ ɛ́ ké tɔn lɔ́ wɔ́ nìnbí-fĩɛ à Yiezu Kirisa lɛ vìé lɔ́ hɔ́ húmú hũn bòo hũn. Ɛ́ ké wo dàa tĩi bènlén lɛ yìe pɛ, 4ɛ́ dàa ɛ́ hɔ̀ kĩ́ɛ lɛ ɛ́ Dɔfĩn sɛ́sɛ́a bɔ̀sí ké bòo hũn ɛ̀ hìé. Hɔ̀ iè kĩ́ɛ lɛ ɛ́ yí dɛ̀ yá yaa, ɛ̀ hɔ̀ lò yí dɛ̀ yá le wɛ̀; ɛ̀ pehɔ̀ sãarɔ́ ɛ́ lò yí dɛ̀ yá vé wɛ̀. Dɔfĩn ɛ́ bɔ̀sí hɔ́ ɛ́ dàa ɛ́ mì hìé hɔ́ hóohũn, 5mìpe lɛ ɛ́ hɔ́pe Dɔfĩn pànkɛ́ ɛ́ te dàa iè hɔ̀ lɛ ɛ́ mí dũmuasɛ̃̀ Hɔ̀ ǹ. Ɛ́ mí wo ɓén yí lé fuerɛ, lèpe fuerɛ lɛ ɛ́ ɓén zɛ̃́ní míte hɔ̀ bòo míkùi vénlɔ́ zɔn.
6Ɛ́ sí iè bòo lɛ ɛ́ wiɛniɛ mì tĩɛ̀ cɛ̃̀un, hɛ̀rí kɛ́ kɛ̀a sáalɛ, ɛ́ mí fɔ́ɓán ɛ̀ mì lɔ̀n ɛ̀ be hɔ hàanírɔ́ àá mí ɲúuhɛ̃ ɲúuhɛ̃ hũn pɛ̃̀hṹ dìkíndíɛ hũn. 7Hɔ̀pe hàanírɔ́ sɔ ɛ́ temu mii zɛ̃́ní kɛ́ mí dàa ɓen dàa ńdɛsĩ̀nlɔ́. Hɛ̀rí hɔ̀pe sɛ̃́ní lɛ lò yí bòo lɛ ɛ́ mii kań yán fúu ɛ́ ɓɛ́ wóò tĩ hɔ dṹn hũn ɛ̀ dàá mi pehɔ̀ sãarɔ́. Ɛ́ sí iè hɔ̀pe ɛ́ mí ńdɛsĩnlɔ́ lɛ ɛ́ fɛ́sí dɛ̃̀ hɔ̀ hàanírɔ́ hũn ɛ́ bòo ɛ́ ɓiɛ̀ dɛ̃̀ kɛ̀amu. Pehɔ̀ ɲún ɛ́ den wi cɛ̃̀un ɛ́ pɔ hɔ sɛ̃́ní. Ɛ́ hɔ́ wo ɓén lɛ́ ɛ́ mí ɛ́ yí hɔ́ khóonírɔ́ àá hɔ́ ɓàarɔ́ àá lé yèrè à Yiezu Kirisa khũ̀á ɓenlɔ́ zɔn.
8Àpe lɛ ɛ́ mí wɛ kɛ́ mí lò yìi ɲɛun yí bì-è lɔ̀n, ɛ̀ mì dũmuasɛ̃̀ à ǹ kɛ́ mí lò ɲɛùn yí loo ɔ wɛ̀. Ɛ́ sí iè hɔ̀pe ɛ́ mí dàa dàa le tĩwiɛ̀ dɛ̀bɛhɔ́ lɛ ɛ́ ɲún ɛ́ yí dɛ̀ yá munkɛ, 9iè hɔ̀ lɛ ɛ́ mí ɛ́ yú mí ńdɛsìnlɔ́ sàanín lɛ iè lè fuerɛ̀.
10Dɔfĩn bɔ̀háaníriè ɛ́ hàarí cànkɛa, ɛ́ dìekɛa hɔ̀ bòo cɛ̃̀un lèpe fuerɛ sɔ bòo hũn, ɛ̀ ɓɛ̀ hàarí sɛ̃̀nɛ́hã̀ bie Dɔfĩn hìi bòo, lèpe hìi lɛ ɛ́ hɔ́pe Dɔfĩn ɛ́ hàarí sɛ́sɛ́a nɛ mí ɓén lɛ́ miɛ ǹ. 11À Kirisa Mɛkɛ̃ni#1.11 Kirisa Mɛkɛ̃ni àá Mɛkɛ̃n-Sãanu ɛ́ iè pe Mɛkɛ̃ni dìcóoní ɛ́ ɓɛ́ nɛ̀. lɛ hàarí wi ɓà ǹ ɛ́ hàarí bie lɛ́ ɓà ǹ nɛ ape Kirisa ɛ́ lɔ̀n ɛ́ ɓén be ɛ́ vé ɛ́ dàá zɔ mí ɓàarɔ́ hũn. Ɓɛ̀pe bɔ̀háaníriè sɔ ɛ́ hàarí cànkɛa ɛ́ ɓɛ̀ ɛ̀ dũń lé yìi lɛ ɛ́ hɔ́pe bòo sɔ ɛ́ ɓén wé hũn àá bòo lɛ ɛ́ hɔ́ dàa ɛ́ ɓén wé. 12Dɔfĩn ɛ́ hàarí zɛ̃́niɛ lɛ́ ɓɛ́pe bɔ̀háaníriè ǹ kɛ́ lé háanín lɛ ɛ́ mí hàarí dɔ́ peɓɛ̀ núnú hũn ɛ́ hàarí bòo ɛ́ yí sĩ̀ ɓà ǹ, kɛ́ lé bòo ɛ́ sɛ̃̀ mìpe ǹ. Ɛ́ lépe bienù sɔ á Yiezu Kirisa Bentĩnu buieriè ɛ́ te ɛ́ bie kɛ̀a laà lɛ lɔ̀n, ɓɛ̀ ɛ́ lè buie àá Mɛkɛ̃n-Sãanu pànkɛ́ lɛ ɛ́ wóò yòó lé àá hɔ́ hóohũn. Ɛ́ ɓɛ́ mɛlɛkɛɓɛ kùusɔ ɛ́ yɛ̀rɛ́ ɛ́ cɛ̀ ɛ̀ ɓɛ̀ dũń lé.
Hɔ̀ te dàarɔ́ lɛ bòo tĩ Dɔfĩn ǹ bòo
13Ɛ́ sí iè hɔ̀pe ɛ́ mí dàa cɛ mí kuò, ɛ̀ mì sɛ́sɛ́ míte dĩ̀ní, ɛ̀ mì wóo ɓaà mìte, ɛ̀ mì bè mì tĩɛ̀ míkùi lè hìi lɛ ɛ́ Dɔfĩn ɛ́ mii wé àá miɛ lɔ̀n, pɛ̃̀hṹ lɛ á Yiezu Kirisa ɛ́ mii khũ̀á ɓen hũn. 14Mì wóo ɲí Dɔfĩn bòo, ɛ̀ mì bí bĩní fùansí míte ǹ nɛ hɔ́ pɔnù lɛ hàarí wi miɛ ǹ pɛ̃̀hṹ lɛ ɛ́ mí dàa hàarí ɛ́ yí dũ Dɔfĩn, ɛ̀ teń mí híɛhɔ́ ɛ̀ dí wɛ̀. 15Kɛ́ mí wé nìnbirìe lɛ ɛ́ ce mi bòo míkùi wénlɔ́ hũn, kɛ̀a bòo lɛ ɛ́ hɔ́pe Dɔfin lɛ ɛ́ te miɛ ɛ́ vɔn ɛ́ dàa ɛ́ ce. 16Hɔ̀ den wɛ̃́ lé Dɔfĩn bienù vɛ̃hṹ hũn ɛ́ nɛ Dɔfĩn ɛ́ nɛ làa: «Mì wé nìnbirìe lɛ ɛ́ ce, iè hɔ̀ lɛ ɛ́ Ńpe ɛ́ ce.»
17Mì Dɔfĩn hɛ̃nnɛ̀ hũn ɛ́ mí wóò ve hɔpe Dɔfĩn nɛ mì Yàá, Hɔ̀pe lɛ ɛ́ wóò lè ɓɛ̀ nìnbirìe ɓɛ́kùi lìe hɔ́rɔ àá bòo lɛ á wɔ́, kɛ́ Hɔ́ yá kɛ̀ yìe wɛ̀. Ɛ́ sí iè hɔ̀pe ɛ́ mí te dàarɔ́ míkùi ɛ́ dàa sãawi ɛ̀ hɔ̀ dé ɓàarɔ́ hɔ́pe Dɔfĩn, pɛ̃̀hṹ lɛ kɛ́ mí yìe ɛ́ dàa wi le súsũ̀nù lɔ̀n.
18Mí lò wo dũ hɔ yàamu lɛ ɛ́ Yiezu Kirisa ɛ́ dàa yɛ̀ mì ɲún ɛ́ lieniɛ ɓɛ̀ mì zĩnkĩ́nɓɛ̀ bòo lɛ ɲún mí hũn, hɔ̀pe lɛ ɛ́ ɓɛ́ hàarí ɛ́ ɓɛ́ mɛkɛ̃nì ɛ̀ wé hũn, lɛ ɛ́ mípe kùusɔ ɛ́ hàarí wi hun. Ɛ́ hɔ́ den yí wé bòo lɛ ɛ́ wóò yaa kɛa ie hɔ sɛ̃́ní tàá hɔ̀ màa á dàa yɛ̀ mì ɲún wɛ̀. 19Ńɓùé! à Kirisa cãani lɛ ɲún wi cɛ̃un ɛ́ te mi ɲún ɛ́ lerɛ, àpe lɛ ɛ́ ɓɛ́ ɓɔ́ ɛ́ wɔ́ àá miyiɛ́ kɛ̀a ie pi-zuú lɛ ɛ́ fɛ̃nlɔ́ àá dìinì dɔ̀ ɛ́ minɛ nin wɛ̀. 20Dɔfĩn ɛ́ sɛ̃̀nɛ́hã̀ ɛ́ munɛ à hɔ̀pe sí bòo hũn kɛ́ lé dímíɲɛ́ ɛ́ ɲɛùn yí mí wɛ̀. Ɛ́ kɛ̀a sáalɛ, ɛ́ hɔ́pe mɛ́n-wĩhĩ́ sɔ lɛ hũn, ɛ́ Dɔfĩn ɛ́ zɛ̃́niɛ ɔ̀ wìée mìpe mì sãàrɔ́ bòo hũn. 21Hɔ̀ iè piè bòo hũn ɛ́ mí dàa ɛ́ dũmuasɛ̃̀ hɔ̀pe Dɔfĩn lɛ ɛ́ ti-e ɛ́ vìeniɛ ɛ́ líeniɛ hɔ́ húmú hũn, ɛ̀ Hɔ̀ lɛ́ hɔ́ ɓàarɔ́ ɔ̀ ǹ. Ɛ́ kɛ̀amu, ɛ́ mí wo dũmuasɛ̃̀ Dɔfĩn ɛ̀ mì ɛ́ bɔ̀ mì tĩɛ̀ pehɔ̀ lɔ̀n.
22Mí ɛ́ tɛ̀ hɔ̀ bɔ̀berà bòo ɛ́ mí iè pe ɛ́ wo tiɛ mìte míkùi ɛ́ dàa mii wɛní ɓán àá hun lɛ hɛ́rɛ kɛ̀a iè zɛ̀ɓɛ̀ bòo sí. Ɛ́ mí hɛ̀ wo wɛní ɓán cɛ̃̀un mìpe àá mí nì-cóohɛ̃ àá hũn lɛ ɛ́ ce. 23Ɛ́ mí wo bĩniɛ khũ̀á tɔn ɛ́ wɔ́ nìfĩɛ̀. Ɛ́ ɓɛ́ wo bĩniɛ yí mì yàáɓɛ́ lɛ ɛ́ wóò hí ɛ́ te miɛ tɔn kɛ́ Dɔfĩn lɛ yáà hí ɛ́ te miɛ ɛ́ tɔn. Hɔ̀ wɔ́ hɔ́ àá mí bienù lɛ yìe wi ɛ̀ lè lò yáà vé wɛ̀. 24Ɛ́ hɔ́ den wɛ̃́ lé Dɔfĩn bienù vɛ̃hṹ hũn ɛ́ nɛ làa:
Ɓɛ̀ nìnbirìe ɓɛ́kùi ɛ́ dɛ̃̀ kɛ̀a ie hɔ ńɲíini,
Ɛ̀ peɓɛ̀ sãàrɔ́ míkùi ɛ́ dɛ̃̀ kɛ̀a ie hɔ mɛhɛ̃ ńmuunín,
Hɔ̀ ńɲíini ɛ́ wóò he ɛ̀ pehɔ̀ ńmuunín ɛ̀ tè ɛ̀ khíi síɛ,
25 Kɛ́ Ɲunsɔ bienù ɛ́ pe ɛ́ wi yán fúu.
Ɛ́ lépe Bienù sɔ ɛ́ iè lè Bentĩnu lɛ ɛ́ ɓɛ́ buie ɛ́ lɛ́ miɛ ǹ.
Currently Selected:
1 Piɛre 1: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
