Zaake 5

1Ɛ́ kɛ̀a sáalɛ ɛ́ mípe bòo ɓàasiè mì tɛ́ mí ɲɛkɛ̃à! Mì wírí cɛ̃̀un lè lɔ̀nbiè lɛ ɛ́ vaá-ɓen mì lɔ̀n bòo hũn! 2Mì yírɛ́ ɛ́ tie, ɛ̀ hɔ̀ mì tĩ̀ɛ ɛ́ ɓɛ́ bɛ̃̀nlɔ́ ɛ́ lɛ̀. 3Mì sɛ̃́ní àá mí màa ɛ́ hɔ́ ńcífóo ɛ́ yòó míkùi. Ɛ́ hɔ́pe ńcífóo ɛ́ temu ɓén yìrí zɛ̃́ní kɛ́ mí wɔ́ khɔn, ɛ̀ hɔ̀ ɛ́ lɛ̀ mì tɛkɛà kɛ̀a ie hɔ dṹn bòo sí. Mí wɔ́ hɔ́ yírɛ́ ɛ́ mí can mì kuò ɛ́ cɛ̀ koo ɓánlɔ̀n lè dímíɲɛ́ vénlɔ́ wihĩ́ hũn. 4Ɓɛ̀ bɔ̀mìiriè lɛ ɛ́ tɛ́ mí mɛhɛ̃ hũn sàanín ɛ́ mí pɛ̃́ ɛ́ yí lɛ́ ɓà ǹ wɛ̀. Ɛ́ mí húi bòo lɛ ɛ́ ɓɛ́ dàa ɛ́ wírí hɔ́ bɔ̀koohɔ́ lɛ ɛ́ mí wɔ́ àá ɓɛ́ bòo hũn. Ɓɛ̀pe bɔ̀mìiriè lɛ ɛ́ te mi bɔ̀díe ɛ́ mɔ̀ mì mɛhɛ̃ hũn ɛ́ lɛ́ miɛ ǹ wíɛ ɛ́ van yòó dɛ̃un Ɲunsɔ pànkɛ́ ɓàasɔ. 5Lè sṹsùnù lɔ̀n ɛ́ mí kɛrɛ hɔ̀ yírɛ́ bɔ̀bɛhɔ́ hũn, ɛ̀ mì tɛkɛ̀a bòo lɛ hɔ wɛ iè pe ɛ́ mí wɔ́. Mí dú hɔ́ dín-tĩɛ̀ ɛ́ ɓàakɛa kɛ̀a ie ɓɛ bìlaàsiè lɛ ɛ́ ɓɛ vɛ wòokɛ. 6Á nìnbírɔ lɛ lò yí yáakɛ bòo dɔ̀ ɛ́ mí nɛ a fɔ́ɓán àá hɔ́ húmú ɛ̀ mì ɓú-o; á lò yí pĩ́ dìń nɛ mi bí wé hɔ́ wɛ̀.

Hũn hĩ̀nlɔ́ àá Dɔfĩn hɛ̃nlɔ́

7Kìe zɛ̀ɓɛ̀, mì hĩ̀ mì hũn fúu nɛ á Ɲunsɔ ɛ̀ vɛ khũ̀á ɓen lɔ̀n. Mì húi bòo lɛ á vɛ̀rɔ dàa wóò hĩ̀ mí hũn à hìé lé sṹsùnù bɔ̀díe mìirɔ́. À wóò hìé hɔ́ vɔyɔ́nú àá hɔ́ máahṹ hóo. 8Ɛ́ mípe ɓiɛ̀ hĩ̀ mì hũn, ɛ̀ mì pĩ̀iní míte iè hɔ̀ lɛ á Ɲunsɔ ɓenlɔ́ ɛ́ lúwi.

9Kìe zɛ̀ɓɛ̀, mì bí wóo cãamɛkɛ ɛ̀ bie nɛ ɓɛlɛ kɛ́ ɛ́ te hɔ bɔ̀koohɔ́ ɛ́ wé àá miɛ wɛ̀. Kɛ́ dàa bòo mí ɛ́ Dɔfĩn ɛ́ ɓén lè mì lìe. Ɛ́ mí húi, àpe lìe lèrɔ́ ɛ́ ɓɛrɛ dɛ̃un lè zĩínù ɲunù. 10Kìe zɛ̀ɓɛ̀, mì síɛ liení ɓɛ́ Dɔfĩn bɔ̀háaníriè bòo, ɓɛ̀pe lɛ hàarí wóò bie ɔpe Ɲunsɔ Dɔfĩn ɲunù lɔ̀n: peɓɛ̀ lɔ̀n ɛ́ hàarí bɔn cɛ̃̀un kɛ́ ɓɛ́ den ɛ́ hɛ̃̀ ɓɛ́ hũn. Ɛ́ mí ɓiɛ̀ wóo wé kɛ̀a ɓɛpe. 11Ɛ́ ké wóo nɛ ɓɛ ɲúuhɛ̃ tĩ iè hɔ̀ lɛ ɛ́ ɓɛ́ hàarí ɛ́ fɛ́sí dɛ̃̀ sãa. Mí lò wo ɲɛ́ á Zɔɔbu bòo lɛ á dàa hɛ̀ hàarí can mí kuò, ɛ́ mí lò dũ hɔ bòo lɛ ɛ́ Ɲunsɔ ɛ́ pɛ̃̀hṹ wɔ́ lɛ́ à ǹ pehɔ̀ vɛ vénlén. Ɲunsɔ ɛ́ den wóò mi ɓɛ nìnbirìe miinɛ̀ à lò wóò wé mí sãamu àá ɓɛ́.

12Kìe zɛ̀ɓɛ̀, ɛ́ hɔ́ bòo lɛ bòo hie cɛ̃̀un ɛ́ iè hɔ̀ lɛ: mì bí wóo wĩ́ikɛ wɛ̀. Mì bí wĩ́i hɔ́ hóohũn lɔ̀n, ɛ̀ mì bí wĩ́i lé sṹsùnù lɔ̀n wɛ̀; mì temu bí wóo wĩ́i hɛ̀rí bòo dɔ̀ hũn wɛ̀. Kɛ́ hɔ́ ɓen iè «ũun» ɛ̀ mì wóo bie nɛ «ũun», ɛ̀ hɔ̀ ɓen iè «ńɓùé» ɛ̀ mì wóò bie nɛ «ńɓùé». Mì wóo khɛ́ kɛ̀amu mí dòonún bòo lɛ ɛ́ wé ɛ̀ Dɔfĩn ɛ̀ bí lè mì lìe wɛ̀.

13Ɛ́ mí tĩ́ihṹ kɛ́ nìnbírɔ dɔ̀ ɛ́ wi lɔ̀nbiè hũn, ɛ̀ nɛ ɓàasɔ ɛ̀ hɛ̃un Dɔfĩn. Àlɛ kɛ́ á wi tĩwiɛ̀ hũn, ɛ̀ ɓàasɔ ɛ̀ bé yánbéhĩ́ ɛ̀ ɓàaní Dɔfĩn. 14Ɛ̀ mì tĩ́ihṹ kɛ́ ádɔ̀ ɛ́ dɔ, ɛ̀ nɛ ɓàasɔ ɛ̀ ve ɓɛ ńdɛsĩ̀riè ńkóoɓánlɔ̀n hándíe, ɛ̀ ɓɛ̀ ɓen kóo hɔ́ yurɔ́ piè ɲún lɔ̀n Ɲunsɔ Dɔfĩn yèrè lɔ̀n, ɛ̀ ɓɛ̀ hɛ̃un Dɔfĩn ɛ̀ lɛ́ á ǹ. 15Kɛ́ ɓɛ́ hɛ̃nnɛ àá ńdɛsĩ̀nlɔ́, ɛ́ Ɲunsɔ ɛ́ wiɛní-ɛ pe dɔrɔ sɔ. Kɛ́ ápe dɔrɔ sɔ ɛ́ hṹn wɔ́ bɔ̀koohɛ̃ dɔ̀, ɛ́ Ɲunsɔ ɛ́ dé pehɔ̀ sɛ́wɛ́rí ɛ́ lɛ́ à ǹ. 16Ɛ́ mí wóo bie hɔ bɔ̀koohɛ̃ lɛ ɛ́ mí wɔ́ bòo ɛ̀ lɛ́kɛ́ ɓán, ɛ̀ mì hɛ̃un Dɔfĩn ɛ̀ lɛ́kɛ ɓán bòo lɛ ɛ́ wé ɛ̀ hɔ̀pe Dɔfĩn ɛ̀ dàá wiɛní miɛ. À nìnbírɔ lɛ ɛ́ cã̀aní Dɔfĩn híɛhɔ́, piè Dɔfĩn hɛ̃nnɛ̀ ɛ́ den pànkɛ́ wi cɛ̃̀un. 17Dɔfĩn bɔ̀háanírɔ Elii ɛ́ hàarí iè nìnbírɔ kɛ̀a kie. Á hàarí hɛ̃nnɛ Dɔfĩn àá ńdɛsĩ̀nlɔ́ bòo lɛ ɛ́ wé ɛ̀ hóo bí tè wɛ̀. Ɛ́ hɔ́pe hóo ɛ́ ɓiɛ̀ wɔ́ lɔ́líe bɔ̀nbɔ̀ tĩ àá ńpĩ́ihɛ̃ huiezĩ́ kɛ́ hɔ́ yí tè lè sṹsùnù lɔ̀n wɛ̀. 18Ɛ́ pehɔ̀ máahṹ à bĩníɛ hɛ̃nnɛ Dɔfĩn, ɛ́ hɔ́pe hóo ɛ́ ɓɛrɛ tɔ̀, ɛ́ hɔ́ bɔ̀díe ɛ́ síɛ lɔ́ lé sṹsùnù ɛ́ yòó bɔn.

19Kìe zɛ̀ɓɛ̀, kɛ́ mí tĩ́ihṹ ɛ́ nìnbírɔ dɔ̀ ɛ́ vṹnun ɛ́ viì van ni àá hɔ́ bɔ̀berà, kɛ́ ádɔ̀ ɛ́ lɛ́ á khũ̀a ɓɛrɛ hɔ̀pe bɔ̀berà hũn, 20ɛ̀ mì dũń kɛ́ ápe lɛ ɛ́ ti-e bɔ̀konwé ɛ́ khũ̀aníɛnin ɛ́ lɔ́ piè vĩ́nlɔ́ wṹn lɔ̀n, ɛ́ fueniɛ ɔ̀pe bɔ̀konwé sɔ ǹ ɛ́ lɔ́ hɔ́ húmú hũn, à lò lɛ́ ɛ́ Dɔfĩn ɛ́ ɓén dé hɔ́ bɔ̀koohɛ̃ bɔ̀kuì sɛ́wɛ́rí.

Currently Selected:

Zaake 5: bwj

Highlight

Copy

Compare