1 Korɛnte Siè 16
16
Hɔ̀ bòo lɛ ɛ́ cɛ̃ ɛ́ mii dàá vɛ sĩiní Zerizalɛɛmu lóo ńdɛsĩ̀riè bòo
1Ɛ́ hɔ́ ɓen kɛ́ hɔ́ bòo lɛ ɛ́ cɛ̃ ɛ́ mii dàá vɛ sĩiní hɔ́ Zerizalɛɛmu ńdɛsĩ̀riè, ɛ̀ hɔ̀ bòo lɛ ɛ́ ń bie ɛ́ lɛ́ hɔ́ Kalaasi pɛ̃̀hɛ̃ ńdɛsĩ̀riè ǹ iè pe ɛ́ mí ɓiɛ̀ wé. 2Ɛ́ hɛtii wurù yée hɛtii wurù, ɛ̀ hɔ́rɔ ɛ̀ wóò leń hɔ́ bòo lɛ á dɛ̀ ɛ́ lɛ́ ɛ̀ khíi bè mí dòonún mí yíe, ɛ̀ mì bí fùansí nɛ n ɓen dɛ̃ vé ɛ̀ mì dàá bie nɛ mí cɛ̃ hɔ wɛ̀. 3Ɛ́ ń ɓen ɓɛrɛ, ɛ́ ɓɛ́ nìɛ lɛ ɛ́ mí lerɛ mì tĩ́ihṹ ɛ́ ń ɓén wĩ́ hɔ́ vɛ̃hɛ̃ ɛ́ bè lɔ̀n ɛ̀ nìń tɔn ɓɛ̀ ɛ́ ɓɛ́ ɛ́ dàá hɔ́pe bòo lɛ ɛ́ mí cɛ̃un ɛ́ dàá vɛ hɔ Zerizalɛɛmu. 4Kɛ́ hɔ́ ɲún ɛ́ wi ɛ̀ ńpe kùusɔ ɛ̀ vɛ, ɛ́ ɓɛ́ ɛ́ bèɓán àá mi.
Pooli ɛ́ mí wṹn lɔ̀n viɛnù bòo ɛ̀ bie
5Ɛ́ ń ɓen khie van lɔ́ hɔ́ Maseduanɛ pɛ̃̀hɛ̃ hũn vɔ́, ɛ́ ń den ɛ́ ɓen mì viì iè hɔ̀ lɛ ɛ́ ń den fɔ́ɓán ɛ̀ ǹ zɔ cánkɛ́ hɔ́pe Maseduanɛ. 6Ɛ́ wɔ́ khɔn ɛ́ nín ɓén míì mì viì, wɔ́ khɔn ɛ́ ń yɛ̀rɛ́ ɛ́ ɓén wé lé mùn-tìɛní pɛ̃̀hṹ míkùi mì viì, ɛ́ mí wo dɛ̀ mi ɛ́ yíiní ɛ́ nín dàá bè niǹ wṹn, ɛ́ vɛ le viì lɛ ɛ́ ń vaá-vɛ hũn. 7Ń yá cɛ̀ nɛ n ɓen khí miɛ fùa fùa ɛ̀ ǹ khíi lan, kɛ́ ń den ɛ́ cɛ̀ ɛ̀ ǹ ɓen míì mí viì bìcínbóo, kɛ́ Ɲunsɔ ɛ́ dàa ɓen tɛ̀.
8Kɛ́ ń den ɛ́ cɛ̀ ɛ̀ ǹ kansí hũ̀nún hɔ̀ Efɛɛzi lóo hũn fúu ɛ̀ vɛ dɛ̃ le Pantekɔɔti sɛ́rí. 9Iè hɔ̀ lɛ ɛ́ wṹn ɛ́ hɛ́rɛ ɛ́ lɛ́ mi ǹ hũ̀nún nɛ n dàń tɔnlɔ́ bɔ̀bɛhɔ́ ɛ̀ tɛ́, hɛ̀rí kɛ́ kìe ńbíyanliè ɛ́ lò ɓiɛ̀ buò.
10Ɛ́ Timote ɛ́ ɓen ɓɛrɛ dɛ̃un mì viì, ɛ̀ mì bí lɛ́ nɛ piè kùo ɛ̀ hè bòo dɔ̀ hũn wɛ̀; iè hɔ̀ lɛ á páaniɛ ɛ́ tɛ́ àá mi ɔ̀ Ɲunsɔ tɔnlɔ́ hũn. 11Ɛ́ mí bí lɛ́ nɛ nìnbírɔ dɔ̀ ɛ̀ cíwìní-ɛ ǹ wɛ̀. Kɛ́ mí sĩiní-ɛ nɛ a khũ̀á bè mí wṹn àá hũn-wiɛ̀ ɛ̀ khũ̀á ɓen niǹ viì, iè hɔ̀ lɛ ɛ́ ńpe àá ɓɛ́pe kiè zɛ̀ɓɛ̀ lɛ kɛ́ ɛ́ ɔ̀ hìé.
12Kɛ́ hɔ́ ɓen kɛ́ á kìe zuú Apolɔɔsi, ɛ̀ ǹ bie lɛ́ à ǹ yìe cɛ̀rìɛɛ nɛ a ɓen mì viì àá ɓɛ́ kìe zɛ̀ɓɛ̀ lɛ ɛ́ kɛ́, kɛ́ á den hɛ̀ yá cɛ̀ à ɓen sáalɛ wɛ̀. Ɛ́ pɛ̃̀hṹ lɛ kɛ́ á ɓen yú wṹn á ɓén ɓen.
Víenílán tɛmu àá tìɛníkɛrɔ́
13Mì piɛní mí yìe ɛ̀ mì fɛ́sí dìń hɔ́ ńdɛsĩ̀nlɔ́ hũn, ɛ̀ mì hĩ̀iní mí tĩɛ̀, ɛ̀ mì lɛ́ nɛ cũ̀kṹ ɛ̀ wé miɛ ǹ. 14Ɛ́ hɔ́ bòo lɛ ɛ́ mí wóò wé míkùi ɛ́ mí wóo wé àá wanminu.
15Mí lò wo dũ kɛ́ hɔ́ Akayi pɛ̃̀hɛ̃ hũn, á Sitefanaasi àá mí zũnù nìɛ ɛ́ temu iè ɓɛ̀ hán nìnbirìe lɛ ɛ́ tɛ̀ à Kirisa bòo ɛ̀ ɓɛ̀ can ɓɛ́ kuò ɛ́ ɓɛ̀ ńdɛsĩ̀riè ɛ̀ sĩiní. Ɛ́ mípe kìe zɛ̀ɓɛ̀, nín mì hɛ̃nnin, 16nɛ ɓɛpe nìnbirìe sí ɓà ńmàa bòo iè pe ɛ́ mí wóo ɲí, ɛ̀ mì lò wóo ɲí ɓɛ́pe lɛ ɛ́ tɛ́ àá ɓɛ́ ɓɛ́kùi bòo.
17Ń hɛ̀ wɛ niǹte à Sitefanaase àá ɔ́ Fɔritinatiise àá ɔ́ Akayikuisi ɓenlɔ́ niǹ viì bòo hũn, iè hɔ̀ lɛ ɛ́ mí pɔnù lɛ ɛ́ hṹn niǹ ɓé ɛ́ ɓɛ́pe ɛ́ ɓɛrɛ lerɛ. 18Ɓɛ̀ ɛ́ ɓɛrɛ hĩ̀iniɛ niǹ tĩì kɛ̀a bòo lɛ ɓɛ́ dàa lò ɓiɛ̀ ɛ́ zɔn hĩ̀iníkɛ mìpe kùusɔ tĩɛ̀. Ɛ́ ɓɛ́pe nìnbirìe sí ɓà ńmàa yèrè ɛ́ mí wóo dũń wuorɔ́.
19Hɔ̀ Dɔfĩn zĩhĩ́ɛ ńkóoɓánlɔ̀n nìɛ lɛ ɛ́ wi hɔ Azii pɛ̃̀hɛ̃ hũn ɛ́ mì tìɛníkɛnin. À Akilaasi àá ɔ́ Pirisiile àá ɓɛ́ ńdɛsĩ̀riè lɛ wóò vɛ koo ɓánlɔ̀n ɓà yíe ɛ́ mì tìɛníkɛnin sãa sãa mì cɛɓánlɔ́ àá ɔ́ Ɲunsɔ bòo hũn. 20Ɛ̀ ɓɛ̀ kìe zɛ̀ɓɛ̀ lɛ wi hũ̀nún ɓɛ́kùi ɛ́ lò ɛ́ mì tìɛníkɛnin.
Mì fòoníkɛ ɓán sãa sãa àá hũn ceremú.
21Ɛ́ hɔ́pe tìɛníkɛ̀a sɔ lɛ ɛ́ ńpe Pooli kùusɔ núnú ɛ́ te ɛ́ síɛ ɛ́ wĩ́.
22Kɛ́ nìnbírɔ dɔ̀ ɛ́ wi yán kɛ́ á yí wɛ Ɲunsɔ, ɛ̀ nɛ Dɔfĩn ɛ̀ dánkɛ́ní ɓàasɔ ǹ!
Maranata — iè bòo ɛ́ ké nɛ — Kè Ɲunsɔ, ɓen!
23Nɛ Ɲunsɔ Yiezu ɛ̀ wé hiì àá mípe mìkùi.
24Ń wɛ miɛ mìkùi kè ńcɛɓánlɔ́ àá ɔ́ Kirisa Yiezu bòo hũn.
Currently Selected:
1 Korɛnte Siè 16: bwj
Highlight
Copy
Compare
Share
Want to have your highlights saved across all your devices? Sign up or sign in
© 2023 L’Association Nationale pour la Traduction de la Bible et l’Alphabétisation
