1 Korɛnte Siè 15

Yiezu Kirisa vìerɔ́ bòo

1Kìe zɛ̀ɓɛ̀, nɛ n liení miɛ àá lé Bentĩnu lɛ ɛ́ ń buie ɛ́ lɛ́ miɛ ǹ, lèpe lɛ ɛ́ mí tɛ̀ ɛ́ fɔ́, lɛ fúu ɛ̀ ɓen dɛ̃ zoòni kɛ́ mí can dɛ̃̀ lè ǹ. 2Ɛ́ lépe Bentĩnu sɔ ɛ́ temu mii lɛ́ ɛ̀ mì dàá fuen, lɛ kɛ́ mí dàa ɓen dàa lè kɛ̀a bòo lɛ ɛ́ ń dàa khɛ́ ɛ́ lɛ́ miɛ ǹ. Kɛ́ dàa bòo mí, ɛ̀ mì iè bìe lɛ ɛ́ dũmuasɛ̃̀ kũǹ.

3Ɛ́ hɔ́ bòo míkùi híɛhɔ́, ɛ́ hɔ́ kɛ̀ránlɔ́ lɛ ɛ́ ń yú iè pe ɛ́ ń kɛ̀rɛa àá miɛ nɛ a Kirisa ɛ́ húrun kè bɔ̀koohɛ̃ bòo hũn, kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn. 4Ɛ́ ɓɛ́ wũ̀nɛ-à, ɛ́ pehɔ̀ wihĩ́ bɔ̀nbɔ̀tĩlán zɔn, à vìé lɔ́ kɛ̀a bòo lɛ ɛ́ hɔ́ dàa wɛ̃́ lé Dɔfĩn bienù vɛ̃hṹ hũn. 5Á van zɛ̃́niɛ míte à Piɛre ǹ, à bĩniɛ zɛ̃́niɛ míte ɓɛ̀pe mí tɔnkɛriè pírú àá nìɛ ɓɛ̀ ɲu ǹ. 6Ɛ́ pehɔ̀ máahṹ, à bĩniɛ zɛ̃́niɛ míte àá kìe zɛ̀ɓɛ̀ lɛ ɛ́ pɔ́ nìnbirìe khĩɛ́-hɔ̀nú (500) yìn-cóoní lɔ̀n ɛ́ ɓɛ́pe ɓɛ́kùi ɛ́ mɔn. Peɓɛ̀ cɛ̀rìɛɛ ɛ́ pɛ́wi yìe wi, ɛ̀ peɓɛ̀ nìɛ ɓɛ̀ yìɛní dɔ̀ ɛ́ pe wo húrunkɛ. 7Ɛ́ pehɔ̀ máahṹ á van zɛ̃́niɛ míte à Zaake ǹ, à bĩniɛ zɛ̃́niɛ míte ɓɛ̀pe tɔnkɛriè ɓɛ́kùi ǹ.

8Ɛ́ ɓɛ́pe sí ɓɛ́kùi máahṹ, á ɓiɛ̀ ɛ́ zɛ̃́niɛ míte mi ǹ, ǹpe lɛ ɛ́ tan dɛ̃̀ kɛ̀a ie ńdìidíi lɛ ɛ́ tɔn kɛ́ á yí dɛ̃ wɛ̀. 9Iè hɔ̀ lɛ ɛ́ ńpe ɛ́ mìniɛ ɛ́ pɔ ɓɛpe tɔnkɛriè ɓɛ́kùi, ń yɛ̀rɛ́ hṹn yí fɔ́ɓán ɛ̀ ǹ wóo ve nɛ tɔnkɛrɔ, iè hɔ̀ lɛ ɛ́ ń vɛ́ lé Dɔfĩn zũnù nìɛ ɲɛkɛ̃̀a. 10Kɛ́ Dɔfĩn àá mí hiì ɛ́ lɛ́ ɛ́ ń dɛ̃̀ kɛ̀a bòo lɛ ɛ́ ń dàa dɛ̃̀, ɛ̀ lèpe hiì lɛ ɛ́ Hɔ́ wɔ́ àá mi ɛ́ den yí wé kã́amáa wɛ̀. Ń den tɛ́ tɔnlɔ́ ɛ́ pɔniɛ ɓɛ̀pe tɔnkɛriè lɛ kɛ́ ɓɛ́kùi. Kɛ́ hɔ́ lò den yí ńpe ɛ́ te hɔ tɔnlɔ́ sɔ tɛ́, kɛ́ lé iè lèpe Dɔfĩn hiì lɛ ɛ́ wi àá mi. 11Ɛ́ sí iè hɔ̀ pe, ɛ́ hɛ̀rí ɛ̀ hɔ̀ wé ńpe tàá hɛ̀rí ɛ̀ hɔ̀ wé ɓɛ́pe, ɛ̀ sí den iè lèpe Bentĩnu lɛ ɛ́ ké ɛ́ bòo ɛ̀ bie, ɛ́ sí lò iè hɔ̀pe lɛ ɛ́ mí dũmuasɛ̃̀ nin.

Ɓɛ̀ ńdɛsĩ̀riè vìerɔ́ bòo

12Ké lò wo ɛ́ wóò buie hɔ ɛ̀ bie nɛ a Kirisa ɛ́ vìé lɔ́ hɔ́ húmú hũn. Ɛ́ hɔ́ wo iè ńɓùo ɛ́ nìɛ ɓɛ̀ yìɛní dɔ̀ mì tĩ́ihṹ ɛ́ dàa wóò bie nɛ ɓɛ nìhiè ɛ́ yá ɓén vìé? 13Kɛ́ nìhiè vìerɔ́ ɛ́ ɓen mí, hɔ́rɔsí àpe Kirisa kùusɔ ɛ́ ɓiɛ̀ yí vìé lò. 14Ɛ́ kɛ́ ápe Kirisa ɛ́ hṹn yí vìé, hɔ́rɔsí ɛ̀ lè Bentĩnu lɛ ɛ́ ké ɛ́ buie ɛ́ iè kã́amáa, ɛ̀ kè ńdɛsĩ̀nlɔ́ ɛ́ lò iè kã́amáa. 15Kɛ́ nìhiè ɛ́ hṹn yáà vìé àá bɔ̀bín, hɔ́rɔsí ɛ̀ Dɔfĩn ɛ́ ɓiɛ̀ yí vìéní-ɛ pe Kirisa wɛ̀. Ɛ́ pehɔ̀ yìi hũn, hɔ́rɔsí ɛ̀ kèpe lɛ ɛ́ nɛ ké mɔn kɛ́ Dɔfĩn ɛ́ vìeniɛ ɔ̀ ɛ́ iè ɓɔ́ɓúukɛriè. 16Iè hɔ̀ lɛ kɛ́ nìhiè ɛ́ dàa ɓen yáà vìé, hɔ́rɔsí à Kirisa ɛ́ ɓiɛ̀ ɛ́ yí vìé wɛ̀. 17Ɛ̀ kɛ́ á Kirisa ɛ́ hṹn yí vìé, hɔ́rɔsí ɛ̀ mì ńdɛsĩ̀nlɔ́ ɛ́ iè kã́amáa, ɛ̀ mì pɛ́wi wi mi bɔ̀koohɛ̃ hũn. 18Ɛ̀ ɓɛ̀pe lɛ ɛ́ húrunkɛ kɛ́ ɓɛ́ dũmuasɛ̃̀ à Kirisa ɛ́ lò iè bìe lɛ vṹnun. 19Kɛ́ ké ɓen wɔ́ á Kirisa àá ké tĩì bènlén kè sṹsùnù lɔ̀n mɛkɛ̃nì mí dòonún hũn, hɔ́rɔsí ɛ̀ kè hɛ̀ miinɛ̀ ɛ́ wi ɛ́ pɔ ɓɛ nìnbirìe ɓɛ́kùi.

20Kɛ́ kɛ̀a sáalɛ, á Kirisa ɛ́ vìé lɔ́ hɔ́ húmú hũn, ápe ɛ́ wo temu wɔ́ á hán nìnbírɔ lɛ ɛ́ húrun à vìé, ɛ́ dàa ɛ́ zɛ̃́ní kɛ́ ɓɛ́ nìhiè ɛ́ ɓén vìé. 21Ɛ́ kɛ̀a bòo lɛ ɛ́ hɔ́ húmú ɛ́ bɔ̀ nìnbí-cóoní ǹ ɛ́ dàa zɔn hɔ̀ dímíɲɛ́, á lò ɓiɛ̀ iè nìnbí-cóoní ɛ́ temu ɓɛrɛ àá ɓɛ́ nìhiè vìerɔ́. 22Ɛ̀ kɛ̀a bòo lɛ ɛ́ ɓɛ́ nìnbirìe ɓɛ́kùi ɛ́ wóò hí iè hɔ̀ lɛ ɛ́ ɓɛ́ canɓán àá ɔ́ Hɛdɛmɛ, ɛ́ ɓɛ́pe ɓɛ́kùi ɛ́ ɓiɛ̀ yìe ɓén wé iè hɔ̀ lɛ ɛ́ ɓɛ́ ɓiɛ̀ canɓán ɔ́ Kirisa. 23Kɛ́ hɔ́ iè hɔ́rɔ àá mí pɛ̃̀hṹ. À Kirisa ɛ́ temu dú hɔ́ híɛhɔ́ ɛ́ vìé lɔ́ hɔ́ húmú hũn, ɛ́ ɓɛ́lɛ ɛ́ sɛ̃̀ ɛ́ iè ɓɛ̀lɛ ɛ́ dũmuasɛ̃̀ à ǹ ɛ́ ɓiɛ̀ temu ɓén vìé lé yìi lɛ á ɓén khũ̀á ɛ́ ɓen hũn. 24Ɛ́ pehɔ̀ máahṹ, à Kirisa ɛ́ ɓén yáakɛ hɔ síbínú pànkɛ́a míkùi àá pehɔ̀ ɲúuhɛ̃siè, à lò ɛ́ yáakɛ hɔ bòo míkùi pànkɛ́, à den wo ɛ́ khũ̀á ɛ́ lɛ́ lé bɛ́záanú ɔ̀ Yàá Dɔfĩn ɛ́ sí den wo ɛ́ wé hɔ́ bòo míkùi vénlén. 25Iè hɔ̀ lɛ ápe Kirisa ɛ́ fɔ́ɓán à dí mí bɛ́záanú fúu kɛ́ yí bòo ɛ́ Dɔfĩn ɛ́ fɔ́ ɓà ńbíyanliè ɛ̀ síɛ bɔ̀ piè zehĩ́ fìi hũn. 26Ápe máahṹ lɔ̀n ńbíyanle lɛ ɛ́ Dɔfĩn mii yáakɛ ɛ́ iè hɔ́ húmú. 27Ɛ́ hɔ́ den wɛ̃́ lé Dɔfĩn bienù vɛ̃hṹ hũn ɛ́ nɛ làa: Dɔfĩn ɛ́ fɔ́ hɔ́ bòo míkùi ɛ́ síɛ bɔ̀ piè zehĩ́ fìi hũn. Ɛ́ ɓɛ́ ɓen nɛ bòo míkùi ɛ́ síɛ wi piè zehĩ́ fìi hũn, ɛ̀ hɔ̀ ɛ́ ce loo kɛ́ hɔ́pe Dɔfĩn lɛ ɛ́ te hɔ́ bòo míkùi ɛ́ fɔ́ síɛ bɔ̀ piè zehĩ́ fìi hũn ɛ́ bòo mí yán wɛ̀. 28Ɛ́ kɛ́ Dɔfĩn ɛ́ ɓen dɔ́ bòo míkùi à Kirisa núnú hũn vɔ́, ápe Kirisa kùusɔ lɛ iè pehɔ̀ Zuú ɛ́ ɓiɛ̀ ɛ́ dé míte hɔ̀pe Dɔfĩn núnú hũn, Hɔ̀pe lɛ ɛ́ te hɔ bòo míkùi ɛ́ dɔ́ piè núnú hũn. Ɛ́ kɛ̀amu ɛ́ Dɔfĩn ɛ́ wo ɛ́ dí mí bɛ́záanú hɔ̀pe bòo míkùi lɔ̀n.

29Ɛ́ mí siɛ nùún ɓɛ́pe mì nìɛ dɔ̀ bòo lò, ɓɛ̀pe lɛ ɛ́ wóo lɛ́ ɓɛ́te ɛ̀ ɓɛ̀ líiníkɛ hɔ́ ɲumu hũn ɓɛ̀ nìnbirìe dɔ̀ lɛ húrunkɛ vɔ́ yèrè lɔ̀n. Ɛ́ hɔ́ iè ńɓùo ɛ́ ɓɛ́ ɛ́ lieníkɛ ɛ̀ ɓɛ̀ nɛ ɓɛ́ ɓén yí pehɔ̀ fìi hũn? Kɛ́ hɔ́ dàa hṹn bɔn kɛ́ ɓɛ́ nìhiè ɛ́ yáà vìé, ɛ̀ hɔ̀ iè ńɓùo ɛ́ ɓɛ́pe nìɛ sɔ ɛ́ dàa wóò lɛ́ ɓɛ́te ɛ̀ ɓɛ̀ líiníkɛ peɓɛ̀ yèrè lɔ̀n? 30Ɛ́ képe kùusɔ lò, ɛ́ hɔ́ iè ńɓùo ɛ́ ké dàa wi hɔ mɛ̀rɔ́ hũn fúu? 31Kìe zɛ̀ɓɛ̀, hɔ̀ húmú ɛ́ nìn khĩ̀ sítĩnlɔ́ àá sítĩnlɔ́, ɛ́ hɔ́pe wo bɔn. Hɔ̀ ɛ́ bɔn kɛ̀a bòo lɛ ɛ́ hɔ́ lò dàa ɓiɛ̀ bɔn kɛ́ ń wóò ɓàaní niǹte mì bòo hũn, iè hɔ̀ lɛ ɛ́ mí can dɛ̃̀ kè Ɲunsɔ Yiezu Kirisa ǹ. 32Ɛ́ kɛ́ hɔ́ hṹn iè nìnbí-yáamú hũn ɛ́ ń dàa hàarí sɛ̃́ɓán àá ɓɛ́ nìnbí-sũmúa dɔ̀ lɛ tan iè ɓɛ̀ mɛ-bìe hɔ̀ Efɛɛzi lóo hũn, ɛ̀ hɔ̀ iè ńɓùo ɛ́ ń yú pehɔ̀ fìi hũn? Kɛ́ ɓɛ́ nìhiè ɛ́ dàa hṹn yáà vìé, ɛ̀ kɛ̀a bòo lɛ ɛ́ ɓɛ́ nìnbirìe ɛ́ dàa wóò bie hɔ, «Ɛ̀ mì nɛ ke dí kɛ́ ké ɛ́ ɲu iè hɔ̀ lɛ ɛ́ yìrí ɛ̀ kè ɓén hí.»

33Mì bí fĩiní míte wɛ̀: Hɔ̀ ńwóo bèɓán àá ɓɛ́ nìlàahɛ̃ ɛ́ wóò yáakɛ hɔ ńdànwélán lɛ ɛ́ sãa. 34Ɛ́ mí khũ̀á yí bɔ̀dũmunù ɛ̀ wóò wé hɔ́ bòo lɛ ɛ́ te mí yìe, ɛ̀ mì bí wóo wé hɔ́ bɔ̀koohɛ̃ wɛ̀. Ɛ́ nin bie mi lùwiè bòo ɛ̀ mì ɲí: mì tĩ́ihṹ ɛ́ ɓɛ́dɔ̀ ɛ́ den yí dũ Dɔfĩn wɛ̀.

Ɓɛ̀ ńdɛsĩ̀riè lɛ ɓén vìé tɛkɛ̀a dĩ̀nlɔ́

35Ɛ́ wɔ́ khɔn ádɔ̀ ɛ́ zɔ bie nɛ làa: «Ɛ́ nìhiè ɛ́ wo dɛ̀ ɛ́ vìé kɛwiɛ? Ɛ̀ hɔ̀ iè tɛkɛ̀a lɛ ɛ́ dɛ̃̀ kɛwiɛ ɛ́ ɓɛ́ wo ɓén dàá?» 36Ɛ́ kɔ́ iè Bɛ̃́nbṹ lò! hɔ̀pe bòo lɛ ɛ́ kɔ́ ɛ́ zù ɛ́ yí dɛ̀ ɛ́ yáà lé kɛ́ hɔ́ yí tìe lò! 37Ɛ̀ hɔ̀ yí hɔ́pe bòo lɛ ɛ́ ɓén síɛ sɛ̀ ɛ́ lé kùusɔ ɛ́ kɔ́ wóò vɛ zì, kɛ́ hɔ́ den iè hɔ̀ biè kã́amáa lɛ iè hɔ̀ sìe biè tàá bɔ̀zìriè bɔ̀ɓuɛ̀ dɔ̀ ɛ́ kɔ́ wóò zì. 38Ɛ́ Dɔfĩn ɛ́ wóò lɛ́ tɛkɛ̀a lɛ ɛ́ Hɔ́ wɛ lèpe biì lɛ ɛ́ zù ǹ. Dúrɔ ńbiì lɛ zù ɛ́ wóò yí hɔ́ tɛkɛ̀a lɛ ɛ́ ɓáaɓán àá lé.

39Ɓɛ̀ bìe lɛ mɛkɛ̃nì wi ɓɛ́kùi tɛkɛ̀a ɛ́ yí dìcóoní wɛ̀. Ɓɛ̀ nìnbirìe tɛkɛ̀a ɛ́ wi mí dòonún, ɛ̀ ɓɛ̀ bìlaàsiè tɛkɛ̀a ɛ́ wi mí dòonún, ɛ̀ ɓɛ̀ bìyíeriè tɛkɛ̀a ɛ́ wi mí dòonún, ɛ̀ ɓɛ̀ ciè tɛkɛ̀a ɛ́ lò ɓiɛ̀ wi mí dòonún.

40Ɛ̀ hɔ̀ hóohũn bòo àá lé sṹsùnù lɔ̀n bòo ɛ́ lò ɓiɛ̀ wi. Hɔ̀ hóohũn bòo tɛkɛ̀a ceremú ɛ́ wi mí dòonún àá lé sṹsùnù lɔ̀n bòo tɛkɛ̀a ceremú. 41Lè wurù ceremú ɛ́ wi mí dòonún, ɛ̀ lè ńpĩ́ihṹ ceremú ɛ́ wi mí dòonún, ɛ̀ hɔ̀ ńpĩ́inàwuò ceremú ɛ́ ɓiɛ̀ wi mí dòonún. Ɛ̀ hɛ̀rí lè ńpĩ́inàwiì dɔ̀ ceremú ɛ́ den pɛ́ wi mí dòonún àá lé dɔ̀ ceremú.

42Ɛ́ sí iè pe ɛ́ hɔ́ ɓiɛ̀ ɓén dìń kɛ̀amu àá ɓɛ́ nìhiè vìerɔ́. Hɔ̀ tɛkɛ̀a ɛ́ ɓɛ́ ɓen wũ̀nɛ, ɛ̀ hɔ̀ tiè, kɛ́ hɔ́ ɓen vìé, ɛ̀ hɔ̀ yí dɛ̀ yá bĩní tiè wɛ̀. 43Ɛ̀ ɓɛ̀ ɓen ɛ́ hɔ̀pe tɛkɛ̀a wũ̀ń, ɛ̀ hɔ̀ hɛ̀ miinɛ̀ wi, ɛ̀ hɔ̀ lò cũ̀kù mí wɛ̀. Kɛ́ hɔ́ ɓen vìé, ɛ̀ hɔ̀ den ɓén kań hɔ ɓàarɔ́ hũn kɛ́ hɔ́ ɲɛ̀ àá hɔ́ pànkɛ́. 44Ɛ̀ ɓɛ̀ wóò wũ̀ń hɔ́ kɛ́ hɔ́ iè nìnbí-yáamu tɛkɛ̀a, kɛ́ hɔ́ ɓen vìé, ɛ̀ hɔ̀ ɓén wé tɛkɛ̀a lɛ ɛ́ lé Mɛkɛ̃n-Sãanu ɛ́ wi nin. Ɛ́ nìnbí-yáamu tɛkɛ̀a ɛ́ ɓen wi, ɛ̀ hɔ̀pe tɛkɛ̀a lɛ ɛ́ lé Mɛkɛ̃n-Sãanu ɛ́ wi nin ɛ́ lò ɓiɛ̀ wi. 45Ɛ́ kɛ̀amu, ɛ́ hɔ́ den wɛ̃́ lé Dɔfĩn bienù vɛ̃hṹ hũn ɛ́ nɛ làa: «À hán nìnbírɔ lɛ iè ɔ̀ Hɛdɛmɛ ɛ́ wɔ́ nìnbírɔ lɛ ɛ́ yìe wi.» Kɛ́ á máahṹ lɔ̀n Hɛdɛmɛ ɛ́ pe iè tú àá lé Mɛkɛ̃n-Sãanu lɛ wóò lɛ́ lé mɛkɛ̃nì ɓɛ̀ nìnbirìe ǹ. 46Ɛ́ hɔ́ yí hɔ́ tɛkɛa lɛ ɛ́ lé Mɛkɛ̃n-Sãanu ɛ́ wi nin ɛ́ temu wóò dí hɔ́ híɛhɔ́ ɛ̀ ɓen, kɛ́ hɔ́ iè hɔ̀ nìnbí-yáamu tɛkɛ̀a. Kɛ́ pehɔ̀ máahṹ, ɛ̀ hɔ̀pe tɛkɛ̀a lɛ ɛ́ lé Mɛkɛ̃n-Sãanu ɛ́ wi nin ɛ̀ den khíi ɓen. 47À hán nìnbírɔ lɛ ɛ́ mɛ́ àá hɔ́ tĩ́ní ɛ́ iè sṹsùnù nìnbírɔ, à ńɲuunín nìnbírɔ ɛ́ pe lɔ́ àá hóohũn. 48Ɛ́ ɓɛ́ sṹsùnù nìɛ ɛ́ dɛ̃̀ kɛ̀a ɔ̀pe nìnbírɔ lɛ ɛ́ Dɔfĩn mɛ́ àá hɔ́ tĩ́ní, ɛ̀ ɓɛ̀ hóohũn nìɛ ɛ́ ɓiɛ̀ dɛ̃̀ kɛ̀a àá ɔ́pe lɛ ɛ́ yòó lɔ́ àá hɔ́ hóohũn. 49Ɛ́ kɛ̀a bòo lɛ ɛ́ ké dàa ɛ́ dɛ̃̀ kɛ̀a ɔ́pe sṹsùnù nìnbírɔ lɛ ɛ́ mɛ́ àá hɔ́ tĩ́ní, ɛ́ ké ɓiɛ̀ ɛ́ ɓén yìrí dìń kɛ̀a ɔpe nìnbírɔ lɛ ɛ́ lɔ́ àá hɔ́ hóohũn.

50Kìe zɛ̀ɓɛ̀, ɛ́ hɔ́ bòo lɛ ɛ́ ń den ɛ́ cɛ̀ ɛ́ nín bie ɛ́ iè hɔ̀ lɛ: hɔ̀ nìnbí-yáamu tɛkɛ̀a ɛ́ yí dɛ̀ kańlén ɛ́ yá yí Dɔfĩn bɛ́záanú hũn, ɛ̀ hɔ́ bòo lɛ ɛ́ wóò tiè ɛ́ yí dɛ̀ lè mɛkɛ̃nì lɛ yá vé ɛ́ yá yí wɛ̀.

51Ɛ́ nín bie bòo dɔ̀ lɛ ɛ́ tànkɔ̀niɛ ɛ̀ lɛ́ miɛ ǹ: hɔ̀ yí képe kè kùi ɛ́ temu ɓén híkɛ, kɛ́ képe kè kùi ɛ́ pe wo ɓén zɛ̀ní. 52Hɔ̀ den ɓén wé fùa fùa, lè máahṹ lɔ̀n bũì pìɛrɔ́ hũn. Ɛ́ lépe máahṹn lɔ̀n bũì sɔ ɛ́ den ɓen ɛ́ tɛ̀, ɛ́ yìn-cóoní lɔ̀n, yìi kèɓénlɔ́ hũn, ɛ́ ɓɛ́ nìhiè ɛ́ ɓén vìé ɛ́ wo yá bĩní ɛ́ hí, ɛ̀ kèpe kè kùi ɛ́ wo ɛ́ zɛ̀ní. 53Ɛ́ hɔ́ bòo lɛ ɛ́ wóò tiè ɛ́ fɔ́ɓán ɛ̀ hɔ̀ zɛ̀ní ɛ̀ khũ̀á wé bòo lɛ ɛ́ yáà tiè, ɛ̀ hɔ̀ bòo lɛ ɛ́ wóò hí ɛ́ fɔ́ɓán ɛ̀ zɛ̀ní ɛ̀ khũ̀á wé hɔ́lɛ ɛ́ yáà hí. 54Ɛ́ pɛ̃̀hṹ lɛ kɛ́ hɔ́ tɛkɛ̀a lɛ ɛ́ wóò tiè ɛ́ khũ̀á wɔ́ hɔ́lɛ ɛ́ yáà tiè, ɛ̀ hɔ̀ tɛkɛ̀a lɛ ɛ́ wóò hí ɛ́ khũ̀á wɔ́ hɔ́lɛ ɛ́ yáà hí, ɛ́ hɔ́pe bòo lɛ ɛ́ wɛ̃́ lé Dɔfĩn bienù vɛ̃hṹ hũn ɛ́ den wo ɲunù ɛ́ tí. Hɔ̀ ɛ́ den wɛ̃́ yán ɛ́ nɛ làa:

«Hɔ̀ pànkɛ́ ɛ́ yú hɔ́ húmú lɔ̀n, ɛ́ pehɔ̀ ɲún ɛ́ wo ɓɔ́ hĩ́ɔɔn.

55 Ɛ́ kɔ́pe húmú, kɔ̀ pànkɛ́ ɛ́ wo wi àá yí?

Ɛ́ kɔ́pe húmú, kɔ̀ túurɔ́ ɛ́ wo wi àá yí?»

56Hɔ̀ húmú túurɔ́ ɛ́ iè hɔ̀ bɔ̀koohɔ́, ɛ̀ hɔ̀pe bɔ̀koohɔ́ pànkɛ́ ɛ́ iè hɔ̀ làndɛ́. 57Kɛ́ mí nɛ ke dé Dɔfĩn bɛrikɛ, Hɔ̀pe lɛ ɛ́ wóò lɛ́ hɔ̀ pànkɛ́ kie ǹ hɔ̀ bɔ̀koohɔ́ àá hɔ́pe húmú lɔ̀n, kè Ɲunsɔ Yiezu Kirisa yèrè lɔ̀n.

58Ɛ́ kɛ̀amu, mìpe kìe zɛ̀ɓɛ̀ lɛ ɛ́ ń wɛ, mì pĩ̀iní míte, ɛ̀ mì bí zɛ̀kɛ wɛ̀. Mì wookɛ cɛ mi kuò ɛ̀ vɛ àá híɛhɔ́ à Ɲunsɔ tɔnlɔ́ hũn. Mí lò wo dũ kɛ́ hɔ́pe tɔnlɔ́ lɛ ɛ́ mí ɛ́ tɛ́ ɛ̀ lɔ̀n bi-e pe Ɲunsɔ bòo hũn ɛ́ yá ɓén wé kã́amáa wɛ̀.

Currently Selected:

1 Korɛnte Siè 15: bwj

Highlight

Copy

Compare