SAKARI 9
9
Caage kiida wo de pẽẽge jar leege Israyel wo
1Põõre wããre mani Manwurn ti sir mani Hadrag no.
Á de oole ti Damase,
Werga je tabay diŋ ma Manwuri
Doo ɓĩĩni mani Israyeln wo ɓuy no lay no.
2Á oo ti Hamad lay,
Ti haagu ma Damase
Ti Tir wo de Sidon
De koge re ɓaaran ɓuy.
3Tir ɓoʼ kor ɓe ma de egre go ti
Á Cor ɗugul solay ti kẽẽ doo buɗuf nono,
Boo biŋni wo doo pããge ma ti faage wo no.
4Koɗa Waŋkluu men ge ra go de koɗe
Á srog ge kor ɓen go nen maaroge,
Wùu roɗn ge go.
5Askalon kon ge yaŋ,
Day hẽẽne joŋ ne ge yaŋ,
Gasa doosen no lay,
Á daɗ ge yaŋ kemay kemay,
Ekron doosen no lay,
Werga ɗiggi ɓe maga á hay go de kaŋge
Ɓe mo taʼ mbuɗgi sõõre ɓe yaŋ.
Waŋ yee ge nen yaŋ go ɓi sir Gasa,
Day jobo joŋ ge de tiŋ Askalon gà so,
6Wel de nday hay ge yaŋ de tiŋ Asdode,
Fen maga jar Filistẽẽ maŋ wo ti see ɓaara
Ciŋ de ɓe mono, ndi naan ge yaŋ go.
7Ama ndi naa ge cíi yaŋ go ne hẽn jage,
Naa ge fẽẽre horgesen wo yaŋ go ne hẽn saŋ.
Á de see ɓe gwaʼ ge yaŋ diŋ ma Baa naan lay.
Á joŋ ge yaŋ doo waŋ Juda nono,
Ekron joŋ ge yaŋ doo jar Yebus wo nono.
8Ndi yiŋ gi ti tiŋ ɓin yaŋ go,
Maga á mo hay diŋ tiŋ maga soode po mo duʼn wa,
See je maga hee ge ni mono, see je maga fer le mono,
Day je joŋ coo jarn hee ge ti ɓaara gà so.
Werga patalam no, nen ɓi de kaŋge ne hẽn ti.
Waŋ maga kaŋ ge jam ti ngel mono
9Hay mbo go de baa ɓil de fruygi so
May ma Siyoŋ no!
ʼWad mbo yegre hãy so
May ma Jerusalem no!
Koɗa, waŋ ɓon day mo caw no, á le de age ni ɓo,
Á diŋ je ma keɗede, diŋ je ndar blum lay,
Á desãy day de ɗiigi ti gerhẽẽ,
Ti wel gerhẽẽ, mbarga mangerhẽẽ.
10Ndi caa ge wer pus durgi ma Efrayimn wo yaŋ go,
Caa wer piiri ma Jerusalem wo yaŋ go lay,
Toŋwaa ma durgin taw ge wo yaŋ go
Á fer ge wããre jam yaŋ ne wer sir wo
Day ngel maga se wãã wããre ɓe mbeɗ ge doo
Yaŋ wo go ti maarog po, ma kaŋge wo go see
Maarog ma tigriŋ.
Tĩĩ le jag bii kaʼa,
Hãã go ti jag sir tawge.
Budgi jar ma ti daŋgay wo go
11Day ma ɓo no, wer tayge jag maga ndi tay de ɓo de cíi
Mono, ndi hay men jar ɓo ma ti daŋgay ma ɓi tuun wo le go,
Ti ngel maga bii bay ni wa mono.
12Fer we ɓil kor no,
Jar ma ti daŋgay maga wo de kaŋ diggi taʼ mono!
Ndi fer dogge ɓe wara,
Ndi fern ge yaŋ ne ndo de rabge ɓoge.
13Werga ndi ɓoʼ ti toŋwaa ɓi no : Sen diŋ Juda
Ndi kaŋ waa go ti toŋ ni : Sen diŋ Efrayim lay,
Day ndi jãɗ ge nen jar ni ɓo wo yaŋ, O Siyoŋ
Ne weere ɓon wo ti, O Yafane.
Ndi kol ge ndo yaŋ de ngaɓge doo moslam ma doo blum nono.
14Manwur naa ge nen yaŋ le go ciŋ ti ɓaara,
Day waa ɓen raw ge yaŋ doo sagge Baa nono.
Waŋkluu Manwur ʼwaa ge cõõ yaŋ ge,
Á yaʼ ge yaŋ le nen degurleege ma nen ɓaŋ ni wãybane.
15Manwur Pantway koɗ ge ra yaŋ
Á re ge wo yaŋ, day ndreɗ ge wo húulì garfũydan wo yaŋ go.
Á jo ge wo yaŋ, day ngar ge wo jag yaŋ doo ga saara de yii ti nono.
Day bag ge wo yaŋ go fẽẽfẽẽ doo kalis#9.15 Kalis : Á diŋ gosoŋge ma yãɗ cíi noga wehãn boo ma meɗ yii ti ngel siɗ jage (ko ɓil LAA. 25.29; 1 Waŋ 12. 14; 2 Kro 4.8; Amo. 6.6 etc.) nono,
Doo cõõ ngel siɗ jag nono.
16Manwuri, Baa ɓaaran yãã ge ra yaŋ go ti wur seno,
Yãã jar ɓen wo go doo horog ɓe wo nono.
Werga á wo doo húulì ma ti klaŋ nono,
Á sag ge wo yaŋ ɓi sir mani ɓe no.
17O! Á de ele, á de woore!
Coore ble jaw ge weere jõõre wo yaŋ
Yii ma defay jaw ge mayre ma tigliiri wo yaŋ lay.
Currently Selected:
SAKARI 9: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
