SAKARI 8

Jam joŋ ge yaŋ, day fẽẽre joŋ ge mbe yaŋ deŋ lay

1Diŋ wããre Manwur Pantway, maga á wãã ne go doo kay nono ga : 2Manwur Pantway wãã doo kay nono, ga : Ɓil ɓi cee me ti Siyoŋ debaŋ, ndi mo hãʼ ɗiggi go de caa mege ti ɓe de egre debaŋ.

3Wãã doo kay nono diŋ Manwuri, ga : Ndi fer Siyoŋ, day ndi hay ge yaŋ ti holaŋ Jerusalem. À ɗe ge Jerusalem yaŋ ga ɓi leege cwãy no, húulì mani Manwur Pantway no, húulì ma bay ɗag no.

4Manwur Pantway wãã doo kay nono, ga : Jar ma de tããrebe wo, werpiiri wo de naare ma kiŋgi pur pur wo, lag ge wo yaŋ ti ngel tayge ma Jerusalem wo no, wosela de graw doo, wer naw maga saara de joŋge ɓe pur pur mono. 5Ngel tayge ma ɓi leegen bag ge wo yaŋ go de weere ma twerpiiri wo de ma tenaare wo, maga wo de joŋ hragge ti ngel taygen wo mono.

6Manwur Pantway wãã doo kay nono ga : Hayga sen mo kay yaŋ koge nen jar maga gwaʼ wo wursen diŋ fen mbuɗgi no, á joŋ ge yaŋ nen ɓi diŋ fen mbuɗgi lay ge? Kay diŋ jag Manwur Pantway.

7Manwur Pantway wãã doo kay nono ga : Koɗa ndi le go de yãã jar ɓin wo ɓi sir ma nen wer wo de sir ma nen wur bolaw. 8Ndi fer ge ra yaŋ le, day á lag ge wo yaŋ ɓil Jerusalem. Á joŋ ge wo yaŋ diŋ jar ɓi, day ndi joŋ ge yaŋ diŋ Baa ɓaara ti cwãy ɓe, ti keɗed ɓe lay.

9Manwur Pantway wãã doo kay nono, ga : Woo we doo go wa, nday maga nday de laa wããre ma jag jar ndar nen wããre ma jag Baan wo, maga hay ndar wo nen ɓe ti wur maga à hay ɓoʼ wer tiŋ mani Manwur Pantwayn mono, ti wur maga à hay wããge ga boo tiŋ Baan mono. 10Werga taŋgu wursen mono, à hay bay poɗ jobo ti joŋre ɓen wa, bay poɗ faale horog wa lay. Jam hay bay see jar maga laa wo le liŋ, day laa wo go siigi mo wa, sen diŋ doo je hee no, day ndi hay lag jar téebeere wo ne kããra ti. 11Patala ndi bay diŋ ma jar maga gwaʼ wo see jar sen wo doo maga ndi hay ti ngel ma wurpo no wa so, kay diŋ jag Manwuri, Pantway. 12Werga leʼge mbèere jamn ma ti holaŋ ɓayn mokay no : Tlalum leʼ ge yaŋ, sir joŋ ge fẽẽre yaŋ, day ngel ma ciŋ hã ge meebe yaŋ le, jar maga gwaʼge wo mono ndi hã ge fẽẽre sen wo mo deŋ ɓuy yaŋ ne hara. 13De ngaɓge doo maga nday hay diŋ faɗge yoo wer sir wo nono, tiŋ mani Judan wo de tiŋ mani Israyel no, de ngaɓge doo sen no lay ndi yãã ge nday yaŋ go, day nday joŋ ge yaŋ diŋ bosaʼa. Joŋ we hẽẽne wa, coɓ we nen ɓay!

14Werga Manwur Pantway wãã doo kay nono, ga : Doo maga ndi hay wãã go ga ndi joŋ nday de ɓlagge nono, ti wur maga pããre ɓay hay wo mbuɗ jag jiili me nono, wãã doo kay nono diŋ Manwuri, Pantway, ga ama re sen fer ɗig mege ge gà. 15Doosen nono, ndi raw ferge le, day ndi raw wããge go ga ti naw sen la ndi joŋ de el yaŋ see Jerusalem wo de tiŋ mani Juda no. Joŋ we hẽẽne wa so! 16Joŋ we joŋre de wããre ma kay wo no : Wosela ɓuy mo wãã cwãy ne kan ɓe. Hay we car kiida jag tiŋ ɓayn wo ti cwãy ɓe, diŋ caage kiida jam. 17Daga jobo mo hay ɗig ɓlagge jag jiili ɓe ti kan ɓe wa. Da we haʼge ma ti geteʼ wa, werga á wo mo deŋ diŋ fẽẽre maga ndi hee de ɓaara mono, kay diŋ jag Manwuri.

Naw ma hẽẽ biin kol ge wo yaŋ diŋ naw few wora

18Manwur Pantway kal fer wããre me doo kay nono ga : 19Manwur Pantway wãã doo kay nono, ga : Hẽẽge bii ma nen few ma de naa no, hẽẽge bii ma nen few ma de dwee no, hẽẽge bii ma nen few ma de renam no, de hẽẽge bii ma nen few ma de hwaln kol ge wo yaŋ see tiŋ mani Judan diŋ wur kurwuy wo de fruygi wo, wur few ma kluuri wo. Ama da we cwãy wo de jam.

20Manwur Pantway wãã doo kay nono, ga : Ngaɓa wer jar ma tigriŋ wo de jar ma tigriŋ nduu gi wo yaŋ le pur debaŋ le ɓi leege wo ngaɓa lay. 21Jar ma ɓi leege po cegaɗge wo yaŋ go ɓi leege ma tigriŋ wããge ga : Naa see rage pel Manwuri, naa see kiɗ Manwuri, Pantway! Wosela ɓuy waa ge ga ndi wo lay, ndi wo lay! 22Day so, wer jar wo ngaɓa de sir ma de egre wo, nduu gi wo yaŋ Jerusalem kiɗ Manwur Pantway, day ra ge wo pel Manwuri.

23Manwur Pantway wãã doo kay nono, ga : Ti wur sen mono, jar hwal ma ti wer jag ma ti sirn wo ɓuy baa ge wo je Jwif yaŋ, á ɗaw ge wo jag õõbe ɓen yaŋ day wãã ge wo yaŋ ga : Wùr raw wer ɓo, werga wùr hay de laage ga Baa de ɓay.

Currently Selected:

SAKARI 8: TUP

Highlight

Copy

Compare