SAKARI 10
10
Wii we diŋ Manwuri, bay diŋ sõõre wo wa
1Wii we Manwur ga Baa mo ra ti wur ɓe ma de tob no!
Manwur ɓod ge ɓurgi yaŋ le
Day raa ge Baa yaŋ ne hara bid bidi
Á tĩĩ gi fíi yaŋ ne wosela ɓi tway ɓe.
2Werga Terafẽẽ car wo ne nday diŋ geteʼe,
Jar hadge ndar wo ne nday bay diŋ nen wããre ma ti ngel ɓe wa,
Lwaʼge maga à lwaɗ ra mo deŋ wo ɓil koɗ ɓuy
Day bay wo teŋ nen jobo wa.
Diŋ wersen ga á wo go de welge doo horog ma de car ɓil wo mo tiʼ no.
Á wo nen bone, diŋ wer maga je koɗ rage bay wa.
À budgi jar yaŋ wo go
3Sõõge ɓil ɓin doʼ wùu ne jar koɗgen wo ti
Day ndi nduu gi yaŋ yiŋ bloore togloŋren wo no,
Werga Manwur Pantway nduu kay horog ɓen wo no, tiŋ mani Juda no,
Day hã ge togoɗge yaŋ ne hẽn
Doo piir maga á wo de ɓe jag durgi nono.
4Húulì ma ti cõõ tiŋ kal ge le go diŋ see ɓe
Dog tiŋ ma de coʼge kiŋn kal ge le go diŋ see ɓe
Toŋwaa durgin kal ge le go diŋ see ɓe
Waŋren laa ge wo le go ɓuy diŋ see ɓe
5Á joŋ ge wo doo blumri maga
Dag wo pããge ma ti faage wo go jag jaw nono.
Á dur gi wo yaŋ,
Werga Manwur joŋ ge yaŋ de ɓaara.
Day jar maga sen wo de ɗiigi ti piiri mono,
Wùu gi wo ti yaŋ de sõõre
6Ndi kol ge tiŋ mani Judan yaŋ go blum
Ndi yãã ge tiŋ mani Josefn yaŋ go,
Ndi fer ge yaŋ lag rage liŋ,
Werga ndi ko decoo ɓaara,
Day á joŋ ge wo yaŋ doo maga ndi hay bay go de men rage wa nono.
Werga ndi diŋ Manwuri, Baa ɓaara no,
Day ndi yiŋ gi jag yaŋ ne hara.
7Efrayim kol ge yaŋ doo blum nono,
Jiili ɓaara daʼ ge fruygi maga yii hãn mono yaŋ ge.
Weere ɓaara kon ge wo yaŋ, day fruy gi wo yaŋ.
Jiili ɓaara joŋ ge fruygi yaŋ wer Manwuri.
8Ndi ʼwaa ge flew yaŋ ma tay ti ɓaara
Werga ndi yãã ra go,
Day á tes ge wo yaŋ doo maga á hay wo tesge nono.
9Ndi dus gi ra yaŋ go yoo wer jar wo,
á mo hay bà wo wo go hãã draʼ, á ɗig gi wo yaŋ ti ɓi.
Á joŋ ge wo yaŋ sug sug de weere ɓaara wo, day fer ge wo yaŋ le.
10Ndi fer ge ra yaŋ le ɓi sir ni jar Ejipte wo le
Day ndi tayge ti ɓaara yaŋ le ɓi sir ni jar Asiri wo le
Ndi fer ge yaŋ le de ɓaara ɓi sir Galaad wo de Libaŋ,
Day ngeln kãã ge ra gà.
11Á caa ge nen maarog bonn yaŋe
Á mbar ge kaŋngaw maarog yaŋ
De kuɗum bii Nil wo ɓuy hig gi wo yaŋ go.
Maŋ ge ti ciŋ mani jar Asirin wo taw ge yaŋ go
Day graw waŋ mani jar Ejipten wo yaʼ ge yaŋ go.
12Egre ɓaaran joŋ ge yaŋ diŋ Manwuri,
Day á see ge wo yaŋ diŋ ti ɗúu ɓe,
Kay diŋ jag Manwuri.
Currently Selected:
SAKARI 10: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
