SAKARI 7

Hẽẽge bii ma ferge ɗig ti ti Jerusalem

1Nen kiŋgi ma de naa maga Dariyus ti waŋ mono, Manwur kal fer wããre ne Sakari wur naw ma de naan ɓil few ma de kaawaʼ no, maga diŋ few Kislefe. 2Jar Betel hay laa Saretser wo wo de Regem-Meleg de jar ɓen wo ma rage pel Manwuri. 3Day ma wããge ne jar siɗ jag maga wo de saʼge de tiŋ mani Manwurn Pantwayn wo de jar ndar nen wããre ma jag Baan wo wii rage ga : Ndi mbi nà nen rage nen few ma de dwee no, day mbi nen hẽẽ bii doo maga ndi hay joŋn go kiŋgi pur nono?

4Manwur Pantway kal fer wããre me doo kay nono ga : 5Wii jar ma ɓi sirn wo ɓuy, de jar siɗ jagn wo ga : De maga nday hay hẽẽ bii day hay lawge nen few ma de dween wo de ma de renamn mono, nday hay joŋ sen doosen hãã kiŋgi wara doo renam mono, nday hay mbay hẽẽ bii sen nà diŋ ne ndi cwãy ge? 6De maga nday re, nday jo, re fẽẽre sen wo day jo ra nà bay diŋ nday wa ge? 7Á mo hãʼ bay diŋ wããre maga Manwur hay wãɗ ra go ne jar ndar nen wããre ma jag ɓe ma taŋgun wo jag mo wa ge, ti wur maga Jerusalem hay de jar ɓil eŋ tiʼ i, de ɓi leege ma ti jeŋ ɓen wo ni ɓuy, day ngel ma Negef wo de Sefela hay wo de jar ɓil lay mo wa ge?

8Manwur kal fer wããre ne Sakari doo kay nono ga : 9Manwur Pantway wãã doo kay nono ga : Caa we kiidan ti faage ɓe de deele, hay we joŋ ɓil de el see kããra de koge decoo kããra. 10Joŋ we coo wãy dewur wo de je holgen wa, waaren wo de je maga nen coocoo mo wa, day ni nday ɗig we ɓlagge ti kããra jiili ɓay wa. 11Ama á laa wo dayge kaŋ ɗiggi ɓaara ni gà gas wo bay ɓaara, poʼ wo sug ɓaara go maga saara mo laan wa. 12Á ɗee wo boo jiili ɓaara go maga saara mo laa jag liŋgin wo de wããre maga Manwur Pantwayn hay hã ra le de Nenterse ɓen ne jar ndar nen wããre ma jag ɓe ma taŋgun wo mono ga saara mo laan wa. Sen diŋ fen maga srog wer Manwur Pantway go car jag jiili debaŋ mono. 13De maga á hay ti ɗúu mono, saara laa dayge coʼ sug gà. Doosen nono ndi coʼ ge sug gà lay, de maga á ɗee ge wo ndi we lay no, Manwur Pantway wãã doosen nono. 14Ndi joŋ nen nen dus rage wo go yoo wer sir maga á hay bay wo de ko rage wa. Sirn gwaʼ go nen lawge blam ɓaara, jobo hay bay heege ni wa so, hay bay le ferge de tiŋ ni wa lay. Sir maga á hay wo de lagge ni de woore, day saara koln go diŋ sir lawge.

Currently Selected:

SAKARI 7: TUP

Highlight

Copy

Compare