SAKARI 6

Mbuɗgi nen ma de nenmaʼ no : Pus durgi ma naa wo no

1Ndi kal ferge maŋ nen ɓi ciŋ pa, ndi kal ko mbuɗgi nen ma kay no : Pus laa wo le go ti holaŋ húulì ma ɓogn wo naa. Húulì se ma ɓogn hay wo diŋ húulì boo dobe. 2De seege de pus durgi ma taŋgun diŋ piiri ma de sẽẽre wo, de seege de pus durgi ma de ɓogn piiri diŋ ma de tebere wo. 3De seege de pus durgi ma de swaʼn diŋ piiri ma de piiri wo, de seege de pus durgi ma de naan diŋ piiri ma de sẽẽre de carge kob kob wo. 4Ndi kal maŋ wããre, day ndi wii je peele Baa maga hay ti wããre de ɓi ga : Ma sen wo mo hãʼ diŋ may wo la waŋ ɓi no? 5Je peele Baan kal fer wããre me ga : Á diŋ leege ma ti cõõ ngel ma ciŋ ma naa wo no, maga laa wo le go ti ngel maga á hay wo de lagge pel Waŋkluu ma ti tamsir ɓuyn ni mono. 6Piiri ma de tebere de jag pus durgi po wer boŋ laa wo wo go diŋ ti sir ma nen ɓaŋ gloŋhwede no, day ma de piirin kal wo rawge wer ɓaara. Maga see ɓaara de carge kob kob kal wo rawge wo go ɓi sir ma nen ɓaŋ ni wãyban no. 7Ma de sẽẽren laa wo le go mokay kal wo wiigi ga saara wo raŋ tamsiri. Je peele Baan kal wii rage ga : See we, ni nday raŋ we tamsiri! Day pus durgin kal wo rawge raŋ tamsiri. 8Á kal ɗe mege, day wii me ga : Ko nen ɓo, jar maga laa wo wo go nen ɓi sir ma ɓaŋ gloŋhwede mono sen ham wo jag sõõge ɓil ɓin yaŋ gesiŋ see sir ma nen ɓaŋ gloŋhwede no.

Manwur naa nen kaŋge jugu waŋ ne Josuwe ti

9Manwur kal fer wããre me doo kay nono ga : 10Hoo fẽẽre hãge mani jar ma de hooge daŋgay wo no, mani Helday no, mani Tobiyan wo de Yedayeya no ndo raw ge de see ɓo wara, ndo wo ge liŋ ni Josiyas je ni Sofoni no, ti ngel maga jar sen wo de lagge ni ɓe de maga á nduu wo le Babilon mono. 11Ndo hoo ge boo solayn wo de boo biŋni no, ndo joŋ ge klaŋ wo de ɓaara, day ndo kaŋ ge ra ne Josuwe je moobe ma kluun ti, je ni Yehosadog no. 12Ndo wãã ge ne hẽn ga : Manwur Pantway wãã doo kay nono. Bloo maga à ɗen ga tĩĩgi waa mono, á tĩĩ gi waa yaŋ ti ngel maga á ni mono, day boo ge tiŋ mani Manwurn yaŋ ge. 13Boo ge tiŋ mani Manwurn diŋ se. Fẽẽre togoɗgen joŋ ge wo yaŋ de kaŋge ne hẽn see, á hay ge yaŋ ti paale waŋ no, day wãã ge wããre ɓe yaŋ. Je siɗ jagn hay ge yaŋ ti paale waŋ ɓen lay, day tayge jag joŋ ge yaŋ ti holaŋ ɓaara de woore debaŋ. 14Klaŋn joŋ ge wo diŋ ma Helem, Tobiya wo de Yedayeya, ma Hẽn je ni Sofoni no, ma fer ge ɗig ti ɓil tiŋ mani Manwur no. 15Jar maga wo wo go hãã nduu gi wo yaŋ, day joŋ ge wo joŋre yaŋ ma boo tiŋ mani Manwur no. Day nday ko ge yaŋ ga ɓoʼ me le see ɓay diŋ Manwur Pantway. Sen kãã ge ma joŋge, hayga nday yaŋ laa gẽẽge Manwuri, Baa ɓayn kidolgi no.

Currently Selected:

SAKARI 6: TUP

Highlight

Copy

Compare