SAKARI 5

Mbuɗgi nen ma de hiiraʼ no : Kefder faɗge no

1Ndi kal ferge maŋ nen ɓi ciŋ tigriŋ, ndi kal ko mbuɗgi nen ma kay no : Ndi kal ko kefder de kaage urgi caw. 2Je peele Baan kal wii mege ga : Ndo ko nà diŋ mayla? Ndi kal fer wããre ne hẽn ga : Ndi de ko kefder de kaage urgi caw, pããge ɓe nen ngaɓ meeder hwale, diy ɓe nen ngaɓ meeder dwee lay. 3Day á kal wii mege ga : Á diŋ faɗge maga go de dusgi ciŋ ti sirn ɓuy mono. Doo ga ti wããre ma ɓil ɓen mono, à nii gi je freŋ ma honla ɓuy yaŋ go ti ngel mo taʼ la no, day diŋ wer wããre ma ɓil ɓen pa, à nii gi jar haʼ haʼge ma bay faage yaŋ wo go ti ngel mo taʼ la ɓuy pa. 4Ndi dus gi faɗge sen go kay diŋ jag Manwur Pantway nen maga re sen mo wo kalge tiŋma ni je freŋ no, day mo wo kalge tiŋma ni je maga haʼ haʼge ma bay faage ti ɗúu ɓi mono, nen maga á mo wo sugi ni day mo roɗ tiŋn go de koore ɓen wo ɓuy, de húulì ɓen wo ɓuy lay.

Mbuɗgi nen ma de renam no : Wãy maga kaŋ nen ti ɓlagge mono

5Je peele Baa maga hay ti wããre de ɓi mono, kal yaʼge le, day wii me ga : Maŋ nen ɓo ciŋ day ni ndo ko fen maga le go de kalge mo hãʼ ɗa. 6Ndi kal fer wããre ne hẽn ga á diŋ mayla? Á day ga : Á diŋ kerge maga le de seege. Á day tigriŋ pa ga : Mo so no diŋ fen maga à kon see ɓaara ɓi sirn lam ɓuy so no. 7Day pa, ko nà diŋ maga fen hul jag fẽẽre maga de joŋge de boo dalma maga hay jag kergen mono kal bulgi go, day wãy po hay wo de hayle ɓil kergen ni yeʼe. 8Á day ga : á diŋ debaycõõre. Day á kal srogge ɓe wo ɓil kergenn, day kal ɓoʼ boo dalma ma glumtumn wo ne hẽn jag ni.

9Ndi kal maŋ nen ɓi ciŋ, ndi kal ko mbuɗgi nen ma kay no : Naare po wo ɓoge. Leege hay fidgi graŋ ɓaara. Á hay wo de graŋ ti, day graŋ ɓaaran de maŋ graŋ saasiya. Á kal wo maŋ kergenn wo go ti holaŋ ngel ma ciŋ wo de ngel ma gesiŋ. 10Ndi kal wii je peele Baa maga hay ti wããre de ɓi ga : Á wo wo de kergen mo tiʼ genla? 11Á kal fer wããre me ga : Á wo wo boo tiŋ ne hẽn ɓi sir Sineyare. De maga á kos ge we go no, á kaŋn ge wo wo ni, ti ngel kaŋge ɓe.

Currently Selected:

SAKARI 5: TUP

Highlight

Copy

Compare