SAKARI 2

Mbuɗgi nen ma de ɓog no : Cõõ wo de jar tooge wo

1Ndi kal maŋ nen ɓi ciŋ, ndi kal ko mbuɗgi nen ma kay no : Ndi kal ko cõõ wo naa. 2Ndi kal wii je peele maga hay ti wããre de ɓi mono ga : Sen wo mo hãʼ diŋ may wo la? Day á kal wii mege ga : Á diŋ cõõ maga hay dus wo Juda go de Israyel wo de Jerusalem mono.

3Manwur kal kaŋ nen ɓi ti jar torge wo naa. 4Ndi day ga : Á nduu wo joŋ may la? Á kal fer wããre me doo kay nono ga : Mo hãʼ diŋ cõõ maga hay dus wo Juda go mono, hãã nen maga jobo bay go maŋ ti ciŋ wa ɓuy. Day jar torge sen nduu wo diŋ ma hãy nen ɓaara, day diŋ ma harag cõõ wer sir maga hay hoo wo cõõ ciŋ ti sir Juda mono go, nen maga saara mo dus jar ma ɓil ɓaaran wo go.

Mbuɗgi nen ma de swaʼ no : Saale ma ngaɓ fẽẽre no

5Ndi kal maŋ nen ɓi ciŋ, ndi kal ko mbuɗgi nen ma kay no : Bloo po hay de ɗaw saale ma ngaɓ fẽẽre doo kay. 6Ndi day ga : Ndo wo gen la? Á kal wii mege ga : Ndi wo ngaɓ Jerusalem ma ko diy ɓen wo de gẽẽre ɓe no. 7Ko la diŋ maga je peele Baa maga hay ti wããre de ɓi mono kal yaʼge le, day je peele Baa ma tigriŋ kal caa pel ɓe. 8Á kal wiigi ɓe ga : Ɗee fer wããre ne wel ma jõõn ma caw no, day ni ndo wãã ga : Jerusalem mo hay bay kor ti wer ngaɓa jar téebeere wo de horog maga joŋ ge wo ɓil ɓe debaŋ mono. 9Ndi de see ɓi tuu ndi joŋ ge yaŋ diŋ kor wùu maga go de cir ti ɓe Kay diŋ jag Manwuri day ndi joŋ ge yaŋ diŋ togoɗge ɓe ɓil ɓe.

Manwur fer jar ma de hooge ti daŋgayn wo le liŋ

10Naa see! Naa see! Ɗee we go see sir ma nen gloŋhwede no! Kay diŋ jag Manwuri, werga ndi hay dus nday wo go ti cõõ ngel ma ciŋ wo naa ɓuy, Kay diŋ jag Manwuri. 11Naa see! Siyoŋ ndo daŋ yaŋ mbo go, ndo maga ndo de hayle de tiŋ ni may ma Babilon wo mono. 12Werga Manwur Pantway wãã doo kay nono, blam sen mo kay no, togoɗge nduu gi yaŋ! Á ɓoʼ me see waare maga hay hoo wo nday doo fen maga à yããn jag durgi no mono. Werga je maga duʼ nday mokay no, duʼ diŋ mbèere nen ɓe. 13Ko ɗa ndi de maŋ doo ciŋ see ɓaara. Á kol ge wo yaŋ diŋ fen yããge jag durgi ma gebeere ɓaaran wo no. Day nday ko ge yaŋ ga ɓoʼ me le diŋ Manwur Pantway. 14ʼWaa war blum day ni ndo joŋ ɓo fruygi, may ma Siyoŋ. Werga ndi yaŋ la, ndi yaŋ wo, day ndi hay ge yaŋ ti holaŋ ɓay, Kay diŋ jag Manwuri. 15Sir waare wo debaŋ tay ge wo yaŋ de Manwur ti wur sen, day kol ge wo yaŋ diŋ jar ɓi. Ndi hay ge yaŋ ti holaŋ ɓay. Day nday ko ge yaŋ ga ɓoʼ me le see ɓay diŋ Manwur Pantway. 16Juda joŋ ge yaŋ diŋ ma Manwur doo ngel tabul ma horge ɓe nono. Ɓi sir ma bay ɗag no. Day á fer ge yaŋ baage diŋ Jerusalem pa. 17Daga fẽẽre ma de nàyse mo lag wo pel Manwur seɗem ɓuy! Werga á go de pũygi ti ngel ɓe ma bay ɗag no.

Currently Selected:

SAKARI 2: TUP

Highlight

Copy

Compare