SAKARI 1

FẼẼRE MBUƊGI NEN MAGA MBUƊ WO NEN SAKARI MONO

Manwur ti ɗúu ne jar Israyel wo

1Nen few ma de nenmaʼ no, nen kiŋgi ma de ɓog maga Dariyus ti waŋ mono, Manwur kal fer wããre ne Sakari je ni Berekiya no, je ni Iddon doo kay nono ga : 2Manwur hay car jiili le go ne pããre ɓay wo ti debaŋ. 3Ndo wãã ge ne hara ga : Manwur Pantway wãã doo kay nono : Ga fer we le see ɓi, kay diŋ jag Manwur Pantway, day ni ndi fer yaŋ le see ɓay, Manwur Pantway wãã doosen nono. 4Hay we doo pããre ɓay wo no wa so, maga jar ndar nen wããre ma jag Baa ma taŋgun hay wo wii rage ga : Manwur Pantway wãã doo kay nono : Ga fer we le de faage ɓay ma de ɓlaggen wo no, de joŋre ɓay ma de ɓlaggen wo no. Ama á laa wo dayge kaŋ ɗiggi ti ɓi gà kay diŋ jag Manwuri. 5Pããre ɓayn wo ɓa! Á wo nà gen so la ga page? Day jar ndar nen wããre ma jag Baan de hay joŋ wo ma tum sug yawla? 6Ti ngel sen wããre ɓin wo de yerge ɓi maga ndi hay hã ra go ne weere jõõre ɓi jar ndar nen wããre ma jag Baan wo mono, sen joŋ wo mbaara we nen dayge see pããre ɓay wo an ga yawla? Á fer wo le, day saara kal wããge ga : Manwur Pantway joŋ naa doo maga á hay go de wããge ga se koɗ ge naa yaŋ diŋ see seele naan wo de joŋre naan wo mo so no.

Mbuɗgi nen ma taŋgu no : Wããre piiri wora

7Wur naw ma de doo ɓog ti naan ɓil few ma de hwal ti boŋ maga diŋ few Sebad de maga kiŋgi Dariyus ti waŋ ɓog mono, Manwur kal fer wããre ne Sakari je ni Berekiya no, je ni Iddon doo kay nono :

8Ndi kal ko mbuɗgi nen ma kay de suŋ. Bloo po hay de ɗiigi ti piir ma de sẽẽ day de oole ti holaŋ koore mirte wo deŋ, ti ngel ma busumbusum. Le nen faale ɓe mono, piiri ma de sẽẽre wo, ma cugwuu wo de ma de piiri wo. 9Ndi day ga : Á diŋ may wo la Waŋkluu ɓi no. Day je peele Baa maga hay ti wããre de ɓi mono kal wii mege ga : Ndi kaŋ ge nen ɓo yaŋ ti maga á wo nà no kay mono. 10Bloo maga hay de oole ti holaŋ koore mirte wo la kal maŋ wããre day ga : Á diŋ jar maga Manwur laa ra le ma raŋ tamsiri. 11Day á kal wo fer wããre ne je peele Manwur maga hay de oole yoo koore mirten wo mono kal wo ga : Wùr hay raŋ tamsir le, day wùr daʼ mokay tamsir ɓuy de iggi, day mbe eŋ tiʼ i. 12Doo kay nono, je peele Manwurn kal maŋ wããre day ga : Manwur Pantway, diŋ hãã hun ga ndo ko ge decoo ti Jerusalem wo de ɓi leege ma Judan wo mo so la, ti ngel maga jiili ɓo hay caa go ne hara ti nen kiŋgi doo renam mo ɓa? 13Manwur kal fer wããre le de gẽẽge ma de ele, de wããre ma coɓ nene, ne je peele maga hay ti wããre de ɓi mono.

Manwur fer ge yaŋ go maŋ Jerusalem defay tigriŋ pa

14Day je peele maga hay ti wããre de ɓi mono, kal wii mege ga : Manwur Pantway wãã doo kay nono, ga : Ɓil ɓi de baa wùu de hun da Jerusalem wo de Siyoŋ debaŋ, 15ama jiili ɓi go de carge ne wer sir maga wãɗ wo ga saara diŋ sen gà mono ti. Koɗa de maga jiili ɓi hay go de caage ne Israyel ti meʼ ɗa mono, saara kal kayge ni maga bon sen mo kol ma ɓlagge ɓe go. 16Diŋ werseno, wãã doo kay nono diŋ Manwuri, ga : Ndi fer ge le ko decoo ti Jerusalem, à fer ge yaŋ boo tiŋ ɓin ni, kay diŋ jag Manwur Pantway, day à fer ge yaŋ ɓoʼ saale ti Jerusalem ma booge ɓe. 17Wãã wããre ma kay go pa, ga : Manwur Pantway wãã doo kay nono, ga : Ɓi leege ɓin fer ge wo yaŋ go bagge de fẽẽre, Manwur coɓ ge nen Siyoŋ yaŋ tigriŋ, á fer ge yaŋ kaŋ ɗiggi ɓe maŋge diŋ Jerusalem pa.

Currently Selected:

SAKARI 1: TUP

Highlight

Copy

Compare