SIŊ MA DE DAŊ SIŊN WO 8
8
1O! Ndo de hay diŋ wegeman ɓi maga hay jo pãã man ɓi muy la?
Ndi de hay caa pel ɓo wo go siigi,
Ndi de hay klew ndo, day jobo de mbuɗ fuy ɓi gà.
2Ndi de hay wo de ɓo kalge tiŋma ni man ɓi,
Ndo de hay had ndi yaŋ,
Day ndi de hay hã yii ma de el yaŋ ne ndo de bii leʼge grenadiye wo.
3Daga ti ɓi mo hay de kaŋge ti doo gur ɓe day doo war ɓe mo klew ndi!
4Ndi kam nday kamge, nday mayre Jerusalem no,
Pũy we dage go wa ɗa.
Pũy we dagen go taŋgu maga nday ɓin bay de dage wa ɗa wa!
(Jar tigriŋ wo)
5Sen diŋ may hon ga ur ɓi puuli de kaŋ doo see je dage ɓen taʼ mo la?
Ndi hay pũy ndo le go wer koo bõõre ti ngel maga à hay maŋ ɓiili ɓo ni mono,
Ti ngel maga wãy ma biŋ ndon hay maŋ ɓiili ɓo le ni mono.
Dage de egre doo húulí nono
(Ma twãy no)
6Kaŋ me jiili ɓo doo kase nono, doo kase ti maymay doo ɓo nono.
Werga, dage de egre doo húulí nono,
Hun joŋ naw pur doo sir jar húulí no lay no.
Dage baa wùu doo wùu ma yããge jiliw jiliw nono,
Doo wùu mani Manwur ma yããge jiliw jiliw nono.
7Farge bii ma kluuri kãã wo ma ii dage go gà
Maarog ma de pããrege kãã wo ma maŋge go ne hẽn ti gà.
De maga jobo hã horog ma liŋ ni ɓen wo we go ɓuy ma yee dage no,
À feg ti ɓe nà fegge yaw.
(Hẽẽre may Sunamidn wãã wo ti ɓe)
8Maygeman wùr yaŋ boŋ, day pãã ɓe bay de duɗgi wa ɗa hase
Wùr joŋ ge joŋge de maygeman wùrn ti wur maga a kol we go nen dage so mo la?
9Hayga a yaŋ diŋ kor no, wùr boo ge ti ɓen go de boo solay.
A yaŋ diŋ jag tiŋ no, wùr her ge ti ɓe diŋ koo sedere.
(Ma twãy no)
10Ndi diŋ kore, day pãã ɓi wo doo tiŋ ma de gẽẽre wo nono.
Diŋ wersen so ga ndi ko nen ɓe doo je maga de daʼ jam no mono.
(Ma twar no)
11Pay tlalum mani Salomoŋ hay yaŋ wo Baal-Hamone.
Se kal hã pay tlalum ne jar gorge ɓe wo doo,
Wosela ɓuy hay age de solay boo maga se yeɗ leʼge ɓen go ne hẽn ndar ndare.
12Pay tlalum ma ɓin de gor ti ɓe diŋ ndi.
Salomoŋ, ɗaw mbo solay boo ɓo ma ndar ndarn wo,
Hã go kiskis ɓog ne jar gor ti leʼge tlalum ɓon wo lay!
13Ndo may maga le de tiŋ ɓil pay sugnee wo mono,
Kããre ɓi wo de sãy laa gẽẽge ɓo ti,
Wãã mbo wããre le ne ndi ɗala!
14Daŋ de ɗee, je dage ɓi no!
Hay doo baryam noga wel meene wo ciŋ ti húulì
Maga fíi ma fõɗge fãyfãy wo wo ti ɓe mono!
Currently Selected:
SIŊ MA DE DAŊ SIŊN WO 8: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
