ESAY Kalge ɓil kefder seno
Kalge ɓil kefder seno
Ɗúu Esay de jag Hebre ga Yesayahu, wer ɓe ga Manwur yãã jar go noga Pẽẽgen nen doo Manwuri. Á hay ɗe pan ɓe ga Amots (1.1). Wããre maga a le ɓaa jag jar Jwif wo ga Amots hay diŋ hẽn Amatsiya waŋ Juda. Esay hay de wãy (8.3), weere ɓe maga naa de ko sen wo wo ɓoge (7.1; 8.1-3,18). Esay joŋ joŋre ɓen nen Osiyas, nen Yotam, nen Akas wo de Esekiyas waŋre ma Judan wo, kaŋ nen ga á tĩĩn le de ngar kiŋgi 739 go Taŋgu Biŋgi Yeso hãã wo go ti kiŋgi 680 go taŋgu biŋgi Yeso. Esay hay de ko yerge (2 Kro 6.22; 32.32). Á hay diŋ je bag yaŋ ne waŋre wo (2 Waŋ 19.1-17). Ɗiggi ɓe hay de el ti sir ɓe day se hay bay de dage ga jar Juda wo de jar Israyel mo glub wo see ɓaara go de jar dehãy wo wa lay, bay dage ga re po mo leʼ yoo ɓaara wa lay (1.4,17; 3.9,14,15; 5.8-23; 7.4-7; 30.15; 37.6,7). Ciŋ ti joŋre ɓe maga á hay ndar nen wããre Baa go mono, Esay hay de jar wer taʼ ma hadge (8.16-18). Wããre maga a le ɓaa jag jar jwif wo ga á huu mono ni kiŋgi ɓe doo kaawaʼa; à cler ɓil ɓe go ɓoge, tĩĩ le glog ɓe hãã leʼ go ti ɓe.
Ti kal mani Esay mono, sir Israyel hay go de caa ɓil ɓoge : Sir ma nen ɓaŋ gloŋhweden diŋ Israyel noga Efrayim, meene ɓe hay diŋ Samari sir ma nen ɓaŋ wãyban diŋ Juda, meene ɓe hay diŋ Jerusalem noga Siyoŋ. Esay hay de tiŋ nà Jerusalem (7.3; 37.2; 38.1), Ose wo de Amos hay wo ti kal sen ni ndar nen wããre Baa go ti sir ma nen ɓaŋ gloŋhweden lay (Ose 1.1; Amos 1.1). De kal sen ni mono, koŋne ɓil wo de joŋge nen kããra yãã wo ngeln go (1.20-23). Jar Jwif hay mbaara joŋ peele ne Baa, ane jiili ɓaara hay go hãã see ɓe, seele ɓaara hay bay de tabge de wããre Baan wa (29.13). Wãy dewur no, wel holgen wo de je coon hay wo ti gayre doo jar egren wo de jar horogn wo (1.23). Wããre maga Baa ndar nen ɓaara ne Esay tĩĩ ti fẽẽre maga hay joŋ wo nen ɓe hãã raw wo go ti fẽẽre maga joŋ wo go blam húulí ɓe mono. Ti ma kluu 1 wo go ti ma 6 mono, Baa ruu jar Juda wo ti maga á joŋ wo ti graŋ go see se day glub wo see ɓaara go mono. Se riŋ ra pa ga wer ti graŋ ɓaara no, se a ge de re ne hara ti day jar gwaʼge wo ɓil sir ni mbag tuu (4.2-5). Baa ga se hay da jar Juda wo debaŋ day á tob wo se go (5.1-30). Bà mbe de maga á hay bay wo laa jag Baa wa mo ɓuy se ɓoʼ mbe Esay wo see ɓaara (6.1-13). Ma kluu 7 wo go 12 diŋ wããre maga Baa ndar nen ɓaara ne Esay ti kal mani waŋ Akas mono. Sir Asiri hay ti kal sen ni diŋ sir ma de egre debaŋ. Waŋ Siri wo de waŋ Israyel raw wo wii Akas ga á mo tay de saara ma woge dur waŋ Asiri. Á kas day gà mokay waŋ Israyel wo de waŋ Siri raw wo hooge le ma dur Akas maga saara mo kol jobo go ti ngel ɓe. Hẽẽne raw caa Akas wo go de jar Juda wo (7.1,2). Esay ga á mo kaŋ wo ɗiggi ɓaara ti Baa ni mopo joŋ ra gà (7.3-9). De sen ɓuy Akas raw mbe see waŋ Asiri (2 Waŋ 16.5-9), Esay wiin go geɗer tuu ga á kaŋ nà diŋ taw see ɓe (7.18-25) werga jar Asiri a ge wo go wurpo frum rage (8.5-8). Á ne, blam maga a frum gi wo jar Juda wo go mono, Baa joŋ ge bon ɓaara lay werga á raw ge wo wùu fen maga Baa hay hã faage ɓe ne hara mono (10.5-35). Esay fer ne jar Juda wo ni pa ga Mesin a ge yaŋ ma hã jam ne hara (9.1-7; 11.1-12). Ti ma kluu 13 wo go 23 mono, Baa ruu wer jar wo ɓuy : Babilone (13.1—14.23; 21.1-10); Asiri (14.24-32); Mohabe (15.1—16.13); Siri (Damase 17.1-14); Etiyopi (18.1-7); Ejipte (19.1—20.6); Arabi (21.11-17); Juda (Jerusalem 22.1-25); Fenisi (Tir wo de Sidoŋ 23.1-18). Ma kluu 24 wo go 27 wãã ti re maga Baa a ge de ɓe wurpo ne jar ma ti tamsir wo ɓuy ti mono. Ti wur sen mono, Baa joŋ ge reen ti ɓaŋ gà jar ma de hã ɓiln wo tawa daʼ ge wo pẽẽge day saara fruy yaŋ wer pẽẽge seno (24.1—25.12). Je ma keɗed maga hay jo bon wer cwãy naa ge blum yaŋ ti wur seno (26.1-21). Jar mani Baa maga hay wel wo go tay ge wo yaŋ go wur sen see kããra boŋ (27.1-13). Ti ma kluuri 28 wo go 35 mono, Baa ruu jar Israyel ma nen ɓaŋ gloŋhweden wo ti farge ti ciŋ ɓaara no (28.1-29), ruu jar Juda wo ti de bay hãge ɓil ɓaara no (29.1-24). Á joŋ dekwãy ne hara ti tayge jag ɓaara de sir Ejipte no (30.1—32.20), ruu sir Asiri ti debaycõõre ɓe no (33.1-24), ruu sir Edom ti hun ɓe no day riŋn ga se yee ge nen ɓe go (34.1—35.10). Ti ma kluu 36 wo go 39 mono, sen diŋ fẽẽre maga joŋ wo ti kal mani waŋ Esekiyas mono. Ma kluu 40 wo go 66 wãã ti fẽẽre maga joŋ wo go blam húulí Esay. Diŋ wersen jar debaŋ ɗig wo ga Baa bay de ndar nen wããre sen wo ne Esay tuu wa, á ndar nen ɓaara ne je tigriŋ go blam maga jar Israyel joŋ wo daŋgay ma Babilon le go mono day à raw jagge ɓe jag mani Esay ni maga á mo hay de põõre. Á doosen nono noga bay wa, naa de koge ga á ɓil kefder mani Esay no day Baa naa nen ɓe ne jar ɓen wo ma teŋ nen ɓaara. Baa riŋ ra ga egren ɓuy doo se. Á wo ge wo ti daŋgay day se fer ge ra yaŋ le liŋ (40.1-35). Je maga se baan ge ma yãã rage le go jag daŋgayn diŋ Sirus (41.1-29). Jar maga fer ge wo le, joŋ ge wo yaŋ diŋ jar ma joŋ sedewa Baa see jar dehãy wo (42.1-25). Sen joŋ ge diŋ fen ma naa nen egre Baa go (43.1-28), ma ɓoʼ foo sõõre wo go (44.1-28). Baa ga baa ge Sirus nà diŋ se de see se tuu (45.1-19). Sõõre mani jar Babilon joŋ ge wo wur sen de egre gà so (45.20—46.13); sir Babilon yee ge nen go lay (47.1-15). Manwur ga jar jwif mo teŋ wo nen see ɓaara de re seno (48.1-22). Baa ga se hay hoo jar Jwif wo nà maga á mo hay wo diŋ jar sedewa se, day saara joŋn gà hãy wo see ɓaara go ane se fer yaŋ le tay jar sedewa se ma de deelen wo (49.1—50.3). Wejõõ Manwur ma laa jag ɓen naa ge nen yaŋ (50.4-11), day ti wur sen mono, mopo ma ɓlag jar mani Baan wo joŋ ge gà so werga á oo ge ti ɓaara (51.1-23), Jerusalem fer ge go ti ngel ɓe de el lay (52.1-12). Esay wãã ti Yeso wejõõ Baa maga a ge ma joŋ bon ti bol jar ɓuy mono (52.13—53.12), wãã ti Jerusalem maga joŋ ge go wurpo de woore mo lay (54.1-17). Esay ga ti wurpo mono, pẽẽgen joŋ ge go de koɗe, daʼn ge nà diŋ je maga kaŋ ɗiggi ɓe ti Manwur mono (55.1-13). Baa riŋ jar Israyel wo pa ga á mo joŋ wo fen ma ti ngel ɓe keɗed no (56.1-8), ruu waŋren wo ti maga a mbaara go de yõõ ti tiʼ mono (56.9-12), ruu jar sir Juda wo ti maga á hã wo see ɓaara go ne goŋge sõõre wo de daŋ se mono diŋ wersen á mo ko wo so ga jamn bay ma jar hãyhãyn wo wa (57.1-21). Baa ruu ra ti maga á hẽẽ wo bii ti faage ɓe gà mono 58.1-14 day wii ra ga se bay laa jag ɓaara wa nà wer ɓlagge ɓaaran wo bay ga se ndiŋ go noga egre se hoo go bay ma kay rage wa so nà wa (59.1-21). Baa ga ti wur maga se fer le de jar Jwif wo liŋ mono, jar dehãy tay ge wo yaŋ le wer ɓaara ma age goŋ se ɓi leege Jerusalem (60.1-22); je frum rage joŋ ge gà so hase (61.1—63.6). Esay raw tos Baa ma wii fuggi ɓil doo ɓe ti ɓlagge jar Israyel wo (63.7—64.12). Jar Jwif maga gwaʼ ge wo day fer ge wo le, sen joŋ ge wo diŋ jar mani Baa ma cwãyn wo, diŋ jar ma ti tway mani Mesin wo no (65.1-25). Baa da nà ga je tabayn mo see seele ma de deelen wo de ma de el no (66.1-6), werga wur maga Baa á ge de ɓe a ge de seele ma defay wo de keɗedn were (66.7-24).
Kefder mbe nen car ɓil doo kay nono :
1. Wããre ti sir Juda (1—12).
2. Wããre ti wer jar wo (13—27).
3. Baa ruu sir Israyel wo de Juda (28—35).
4. Re maga joŋ wo nen Esekiyas mono (36—39).
5. Kluu mani Baan wo de egre ɓe no (40—48).
6. Wejõõ Manwur no (49—57).
7. Wããre ma tigriŋ wo sar sar pa (58—66).
Currently Selected:
ESAY Kalge ɓil kefder seno: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.