SIŊ MA DE DAŊ SIŊN WO 6
6
(Jar tigriŋ wo)
1Je dage ɓon raw nà genla,
Ndo wãy ma de daŋ kããra woore ɓuy no?
Je dage ɓon fer ti nà nen gen maga naa kiɗn de kããra ɓuy mo la?
(Ma twãy no)
2Je dage ɓin hay wo ɓil pay sugnee ɓe
Maga fíi ma fõɗge fãyfãy wo go de peɗge jag ɓe mono,
Ma koɗ horog ɓen wo ɓil pay sugnee ɓe no,
Ma brag fuɗgi fẽẽre wo.
3Ndi diŋ ma je dage ɓi no, day je dage ɓin diŋ ma ɓi lay.
A le de koɗ horog ɓen wo yoo fuɗgi fẽẽre wo.
Woore may ma de daŋ kããra no
(Ma twar no)
4Ndo de woore doo Tirsa nono, maygom ɓi no!
Ndo sag see pleɗpleɗ doo Jerusalem nono.
Ane, ndo joŋ hẽẽne ne jar doo soode maga wo de seege wer drapo ɓaara wo nono.
5Kaŋ nen ne ndi ti wa, a maʼ nen ti ɓi go.
Riŋ ti ɓo doo kaw fǐiri ma ciŋ ti húulì Galaadn wo no.
6Saŋ ɓo doo kaw sããre maga hay wo le jag bii nono
A wo go jag jag ɓuy ma po bay go de gedge boŋ wa.
7Haw ɓo ko le nen õõbe doo leʼge koo grenadiye ma de caa ɓil ɓog nono.
8Naare waŋ wo doo hiiraʼa, ndeere ɓe wo ni doo nenmaʼa,
Mayre tigliiri wo ni ngaɓa lay.
9Ama mankurgudu ɓi no, Daŋkããra ɓin mbe go sara deŋ.
A go doo man ɓe ni no boŋ no.
A diŋ senaʼne mani wãy maga biŋn mono.
Mayre tigliiri kon wo, day kee wo ne.
Naare mani waŋn wo de ndeere ɓe kon wo lay,
Day saara togoɗ ne.
10Sen diŋ wãy hon no ga naa le doo waa ma ti ngel teege mono,
De woore doo few, sag doo wur nono day joŋ hẽẽne ne jar doo soode
Maga wo de seege wer drapo ɓaara wo no la?
11Ndi hay wo ɓil koore nowaye ɓin wo, ma ko weere koore ma ɓil logn wo,
Ma koge ga tlalum leʼ we jorge yawla,
Ga koore grenadiyen leʼ wo we fuɗgi yawla.
12Ndi ko gà ane ɗiggi ɓi raw go de ɓi ɓil pus durgi jar twore mani jar ɓin wo.
Currently Selected:
SIŊ MA DE DAŊ SIŊN WO 6: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
