SIŊ MA DE DAŊ SIŊN WO 5
5
(Ma twar no)
1Ndi wo de woge ɓil pay sugnee ɓi no, maygema, nday ɓi no.
Ndi brag fíi mir wo de fíi fõõren wo,
Ndi re libid yõõren go de noo yõõre ɓin ɓuy.
Ndi jo yii ɓin go de pãã ɓi no.
Re we mbay, nday bar ɓin wo no, jo we,
Daga dage mo taɗ we go!
Ndi lwaʼ de je dage ɓi no
(Ma twãy no)
2Ndi hay ti naa, ama ɗiggi ɓi hay mbe de kaŋge taʼa.
Ndi kal laa gẽẽge je dage ɓin de maʼ doo jag tiŋ gana :
(Ma twar no)
Buŋ jag tiŋ go ne ndi maygema, maygom ɓi no,
Mankurgudu ɓi no, Daŋkããra ɓi no!
Werga, meebe go de taŋ ti ɓi,
Bii ma de suŋ taŋ wo plaŋa ɓi wo go.
(Ma twãy no)
3Ndi kal ferge ne hẽn ga :
Ndi go de naa õõbe ma ti ɓi no,
Ndi fer heege ɓe see ɓi nà heege la?
Ndi go de yog ɓaale ɓi wo,
Ndi fer go dem rage demge pala?
4Je dage ɓin raw hee doo le ti ndugla no,
See ɓi raw daŋ ndi go doo ɓe.
5Ndi raw urgi wo deparday ma bul jag tiŋ go ne je dage ɓi no.
Trusa mir hay le go yuugi doo ɓi,
Hay le go yuugi ti weere doo ɓi wo,
Yog boo ma hee manyããn go yogge.
6Ndi raw bul jag tiŋ go ne je dage ɓi no.
Paga je dage ɓin mbuɗ faale we, raw we.
See ɓi daŋ ndi go doo wããre ɓe no.
Ndi hay kiɗ ne, day ndi daʼn gà.
Ndi hay ɗe ne, ama se yiŋ jag gà.
7Jar gor ngel maga wo de kii ti ɓi leegen raw wo yiŋgi de ɓi,
Mbar wo ndi, raw wo car wããge ne ndi see.
Saara kal pog slabi ɓin go, diŋ jar gor ti kor wo no.
8Ndi kem nday kamge, nday mayre Jerusalem no.
Nday daʼ je dage ɓin we no, nday wãã ge ne hẽn gahãyla?
Sii we ne hẽn ga cegè dage de baa ndi.
(Jar tigriŋ wo)
9Mayren kal wo ferge ne hẽn ga :
Mayse see je dage ɓon de daŋ werpiiri ma lan wo la?
Wããn ne wùr ɗala, ndo wãy ma de woore de daŋ kããra ɓuy no!
Mayse see je dage ɓon de daŋ werpiiri ma lan wo ga ndo kem wùr kamge doosen no la?
(Ma twãy no)
10Je dage ɓin de puy, a de sẽẽ,
A go tinoo deŋ yoo jar ndar hwale.
11Ti ɓe diŋ boo biŋni ma bay jããre nene.
Plaŋa ɓe wo de ndarge de tebere doo see gawla nono.
12Nen ɓe doo kurgudu ma ti jeŋ bii yuuri ga wo de yogge nen pãã,
Day wo de iggi doo wùri nono.
13Haw ɓe wo doo fíi ma fõɗge fãyfãy ma de paage wo nono,
Doo kerge ma de fuɗgi mopo ma fõɗge fãyfãy wo ɓil nono.
Này jag ɓe wo doo fuɗgi maga à yuɗ trusa mir de ɓe nono.
14Doo ɓe wo doo ɓeege boo biŋni maga wo de biŋ húulì Krisolid ti wo nono.
See ɓe doo fẽẽre ma de ceɗge de saŋ nàyre wo,
Day húulì Safir wo de biŋgi see ɓe nono.
15Ɓaale ɓe wo doo gefay húulì ma de puy de kaŋge
Ti fẽẽre ma de boo biŋni ma bay jããre nen wo nono.
Deŋ ɓe doo húulì Libaŋ nono,
A go tinoo deŋ doo koore seder wo nono.
16Jag ɓe de cõõre, see ɓe ɓuy de cõõre jag ɓi.
Je ma dage ɓi no, gom ɓin nà doosen no so no,
Nday mayre Jerusalem no.
Currently Selected:
SIŊ MA DE DAŊ SIŊN WO 5: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
