SIŊ MA DE DAŊ SIŊN WO 4
4
Nday ɓin diŋ woore gà
(Ma twar no)
1Ndo diŋ woore gà maygom ɓi no, ndo diŋ woore gà!
Nen ɓo ko le go nen õõbe ɓon doo ma kurgudu wo nono.
Riŋ ti ɓo doo kaw manfíiri ma ti húulì Galaadn wo nono.
2Saŋ ɓo wo doo sããre maga à caw fũy ɓaara go,
Day saara hay le jag daage jo bii nono.
A wo go jag jag ɓuy ma po bay go de gedge boŋ wa.
3Này jag ɓo wo doo saale ma de sẽẽ yiŋyiŋ nono,
Day jag ɓo de cõõre.
Haw ɓo ko le nen õõbe doo leʼge koo grenadiye
Maga à caa ɓil ɓe go ɓog nono.
4Soole ɓo doo tiŋ ma de gẽẽre mani Dafid
Maga à boon ma lag soode wo nono.
Gidigli ma ndarn wo de hagge ɓil ɓe,
De kroŋ mani jar ma de egre jag jawn wo ɓuy.
5Pãã ɓo ma ɓogn wo doo weere baryam ɓog gèere wo de rege yoofíi nono.
6Taŋgu maga ngel maŋ le go, day ngel tee go mono,
Ndi wo ge yaŋ ciŋ ti húulì trusa mir no,
Ciŋ ti ngel ma de maŋge ciŋ maga fíi ma fõõge fãyfãy ni mono.
7Ndo daŋ go woore, maygom ɓi no.
Cerge po bay see ɓo wa.
8Ndo nday ɓi no, raw le wer ɓi.
Le ti húulì Libaŋ hãã, raw le wer ɓi!
Ko nen le ciŋ ti pẽẽgeti Amana,
Le ti pẽẽgeti Senir wo de Hermon,
Le jag tuu mingirn wo,
Le ti húulì jwargan wo le hãã deŋ.
9Ndo fruy ɓil ɓi go, maygema, nday ɓi no.
Ndo fruy ɓil ɓi go diŋ de koge nen ɓo tawa,
Diŋ de redew ma soole ɓon mbe ne boŋ kay tuu no.
10Dage ɓon de ele, maygema, nday ɓi no!
Dage ɓon de daŋ yii.
Nday ɓi no, fõõre trusa ɓon de daŋ fẽẽre ma fõɗge de wooren wo ɓuy.
11Noo yõõre ɗig le go jag ɓo, nday ɓi no!
Noo yõõre wo de pãã yuu wo le go trum ɓo.
Fõõre õõbe ɓon wo doo fõõre fẽẽre ma ti húulì Libaŋn wo nono.
12Ndo diŋ pay sugnee maga go de laɓ ti, maygema!
Nday ɓi no, ndo diŋ gedel maga go de boo kor ti,
Diŋ gutug ma de tẽg jage.
13Jag doo ɓo woo wo ngel doo koore ma de peɗge wo ti paradis nono,
Doo koore grenadiye ma de peɗge ga leʼge ɓaara de daŋ kããra nono,
Doo fíi fõõre wo de fíi nare.
14Fíi nar wo de Safraŋ, de fíi trusa wo de Sinamom,
De wer koore ma joŋ trusan wo, trusa mir wo de alowese,
De wer fẽẽre ma fõɗge fãyfãyn de eln wo ɓuy klew wo kããra go ni ɓuy.
15Ndo diŋ gedel ma kagge ti pay sugnee wo,
Diŋ gutug maga bii ɓe de cõõre,
Diŋ bii yuuri ma ti húulì Libaŋn wo.
(Ma twãy no)
16Pũy go, leege ma nen ɓaŋ gloŋhwede no!
A le, leege ma nen ɓaŋ wãyban no!
Fid ti pay sugnee ɓi no,
Nen maga fõõre ɓen mo yãã ngel go!
Daga je dage ɓin mo kal le ɓil pay sugnee ɓe no,
Day mo re leʼge ɓe ma de daŋ kããran wo.
Currently Selected:
SIŊ MA DE DAŊ SIŊN WO 4: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
