SIŊ MA DE DAŊ SIŊN WO 3
3
Ndi de kiɗ je dage ɓi no
(Ma twãy no)
1Ti ngel suuli ɓi de suŋ ndi hay kiɗ je maga ɓil ɓi dan mono,
Ndi hay kiɗ ne, ama ndi hay daʼn gà.
2Ndi ur gi go ciŋ day ndi kii gi ti ɓi leege no,
Ndi maŋ ge go ti faage wo, ti ngel tayge tin wo.
Ndi kiɗ gi je maga ɓil ɓi dan mono.
Ndi hay kiɗ ne, day ndi daʼn gà.
3Jar gor ti ɓi leegen hay yiŋ wo de ɓi :
Nen ɓay bà je maga ɓil ɓi dan gà ge?
4Ndi men ra go no kay ndi raw daʼ je maga ɓil ɓi dan mono.
Ndi kal yoʼge de ɓe day ndi menn ge go gà so hase,
Hãã ndi wo go de ɓe ɓil tiŋ mani man ɓin ɗa,
Ɓil tiŋ mani wãy maga hay biŋ ndi mono.
5Ndi kem nday kamge nday mayre Jerusalem no.
Ti jag baryam wo de meene ma mbásga wo,
Pũy we dage go wa ɗa.
Pũy we ne go taŋgu maga nday ɓin bay de dage ɓe wa ɗa wa.
(Ma twãy no)
6Sen diŋ wose ga le de seege ti puuli de ɓurgi ti taʼ
Doo cug wùu maga ndar ciŋ day fõõre trusa miri,
Fíi fõõre wo de wer trusa ma honla ɓuy go de yãã ngel ma ti ɓen ɓuy mo la?
7A diŋ fen suuli mani Salomoŋ no,
Werpiiri ma de egre wo go de cir ti ɓe doo hiiraʼa,
Yoo jar Israyel maga wo diŋ bloore mono.
8A wo ɓuy de moslamre wo doo,
Diŋ jar maga wo de ko ɗeŋ durgi lay.
Wosela ɓuy go de hee moslam ɓen yoo ɓe ma dur re maga naa de suŋ mono.
9Waŋ Salomoŋ hay joŋ fen hayle de koo ma ti húulì Libaŋ no.
10A hay joŋ ɓaale ɓen wo de boo solay,
Mo ma deŋge ɓen de boo biŋni,
Ngel gisgi ɓen de õõbe ma de sẽẽ burburi.
Mayre Jerusalem hay ʼwũy wo ɓil ɓe go doo ga ɓil da nono.
11Laa we le go, nday mayre Siyoŋ no.
Ko we waŋ Salomoŋ de gawraŋ maga man ɓe hay kaŋn ne hẽn ti
Ti wur ɓoʼge wãy ɓe ti biin ti wur maga fruygi hay baa ɓil ɓe go mono.
Currently Selected:
SIŊ MA DE DAŊ SIŊN WO 3: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
