SIŊ MA DE DAŊ SIŊN WO 2
2
1Ndi diŋ fuɗgi koo ma ɓil Saroŋ no,
Diŋ fuɗgi fẽẽre ma ɓil log wo.
(Ma twar no)
2Nday ɓin yoo mayre wo doo fuɗgi mopo yoo hõõre wo nono!
(Ma twãy no)
3Je ɓi ma dage yoo weere jõõre ma lan wo doo koo bõõre yoo koore ma yooway wo nono!
Ɓil ɓi de sãy hayge nencee ɓe, leʼge ɓen wo de yãã jag ɓi.
4A hay kal de ɓi ɓil tiŋ yii day drapo maga se hay ɗaw ne ndi ti diŋ dage.
5Hã we gato mbèere tlalum ne ndi maga see ɓi mo fer le see ɓi.
Ii we koŋne ɓi de leʼge bõõre werga cegè dage de baa ndi.
6Daga ti ɓi mo hay de kaŋge ti doo gur ɓe day doo war ɓe mo klew ndi.
(Ma twar no)
7Ndi kem nday kamge, nday mayre Jerusalem no.
Ti jag baryam wo de meene ma mbásga wo,
Pũy we dage go wa ɗa.
Pũy we dage go taŋgu maga nday ɓin bay de dage ɓe wa ɗa wa.
Ndi de laa gẽẽge je dage ɓi no
(Ma twãy no)
8Ndi de laa gẽẽge je dage ɓi no!
Ko we, a le de age,
A le de yorge mo caw ciŋ ti húulì wo no,
De ɗidgi ciŋ ti ngel ma de farge ciŋ wo.
9Je dage ɓin doo baryam nono, doo wel meene nono.
Ko we, a le de oole faale kor mani wùrn mo deŋ no,
De kaŋ nen ɓe ti feneder, nen ɓe sag le nee kleɓe.
10A de wãã wããre, je dage ɓi no.
A de riŋ mege gana :
Ur go ciŋ maygom ɓi no,
Maywoore ɓi no, ni ndo a le!
11Werga, yaalen raw we go, baa taw rage we go,
A raw we liŋ.
12Fẽẽre ma ti sirn fuɗ wo we go, wur ʼwad siŋ go de age,
Kurgudu wo go de ragge ɓi sir naa no.
13Koo hõõ wo go de tĩĩ leɗge,
Day tlalum ma de fuɗgi leʼ wo we fõɗge fãyfãy.
Ur go ciŋ, Maygom ɓi no, Maywoore ɓi no, day ni ndo a le!
14Mankurgudu ɓi no!
Ndo maga ndo wo de yoŋre ɓi rum húulì,
Le ɓi ngel ma de yoŋre ɓedew wo no!
Naa nen see ɓo ne ndi ɗala, wãã wããre le ne ndi.
Werga, gẽẽge ɓo desãy, day nen ɓo slag nen jare.
(Jar tigriŋ wo)
15Hoo we baygema sen wo ne wùr ɗala,
Weere baygama se ga wo go de ɓlag payre tlalum wùrn wo go mono,
Payre tlalum wùr maga wo de fuɗgi mono.
(Ma twãy no)
16Je dage ɓin diŋ ma ɓi, day ndi diŋ ma ɓe lay.
A le de koɗ horog wo le yoofíi.
17Taŋgu maga ngel maŋ le go day ngel tee go mono je dage ɓi no, fer mbo so.
Hay doo baryam nono, doo wel meene nono, wo ciŋ ti húulì ma de ɓrew tin wo.
Currently Selected:
SIŊ MA DE DAŊ SIŊN WO 2: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
