SIŊ MA DE DAŊ SIŊN WO 1
1
Siŋ ma de daŋ kããra no
1Siŋ mani Salomoŋ ma de daŋ siŋn wo no!
Wããre jar da kããra wo
(Ma twãy no)
2Daga a mo soɓ jag ɓi!
Dage ɓon de daŋ yii.
3Fõõre trusa ɓon raw de ele.
Ɗúu ɓon doo trusa maga yãã ngel go nono.
Diŋ wersen so ga mayre tigliiri da wo ndo mono.
4Kog ndi wer ɓo, naa ɗee de kããra!
Waŋ hay kal wo de ɓi ɓil tiŋ ɓen wo.
Wùr fruy, wùr joŋ ɓil go feh nà wer ɓo.
Wùr senaʼ dagen de daŋ yii.
Jar da wo ndo nà diŋ ti ngel ɓe mbe.
5Nday mayre Jerusalem no,
Ndi mbi diŋ may ma de corge,
Ane ndi mbi de woore doo tiŋ õõbe ma ti sir Kedarn wo nono,
Doo rido ma de woore mani Salomoŋ wo nono.
6Ko we diŋ corge ɓin wa, ceg cor ndi go.
Weregeman ɓin sõõ wo ɓil ne ndi ti,
Day saara kal kaŋ ndi gor payre tlalum wo.
Pay tlalum ma ɓin de see ɓi gor ti doo ɓi gà so.
7Ndo maga ɓil ɓi da mo mono,
Kaŋ nen ɓi ti ngel maga ndo le de koɗ horog wo ni mono,
Ti ngel maga ndo lag ra iggi de wur ɗeger ni mono,
Nen maga ndi mo hay go de welge doo wãy po
Maga go caw kiigi ti jeŋ horog maga kããra ɓon wo de koɗ rage no wa.
(Jar tigriŋ wo)
8O, ndo wãy ma de daŋ kãã woore no,
Hayga ndo kon gà ɗa no,
Ni ndo kal go maŋ blam fǐiri wo,
Day ni ndo wo koɗ weere fǐiri ɓon wo ti jeŋ ngel
Maga jar koɗ horogn wo wo de tiŋ ni mono.
(Ma twar no)
9O, ndo may gom ɓi no, ndi ngaɓ ndo nà de manpir
Maga pus durgi mani Farawoŋ de jagge wer ɓe mono.
10Haw ɓo ndar wo le kaʼ kaʼ yoo fẽẽre ma de woore ma de herge see ɓon wo.
Soole ɓo ko de woore wer redewn wo.
(Ma twãy no)
11Wùr joŋ ge fẽẽre woore ma de joŋge de boo biŋni
Wo yaŋ ne ndo de neɗ fẽẽre ma de joŋge de boo solay wo see.
12De maga waŋ hay de hayle de jar ma ti ɓen wo mo yeʼno,
Fõõre trusa ɓin hay yãã ngeln go.
13Je dage ɓin nen ɓi doo fíi fõõre ma de saʼge see kẽẽ kese,
Day de ɓoʼge ti holaŋ pãã ɓi wo nono.
14Je dage ɓin doo fíi fõõre ma tiyir ma ɓil pay tlalum ma En-Gedin wo nono.
(Ma twar no)
15Ndo de woore ɗala, maygom ɓi no, ndo de woore ɗala!
Nen ɓo wo doo nen glur wo nono.
(Ma twãy no)
16Ndo de woore ɗala je dage ɓi no, ndo nen dage mbo!
Fen suuli naan diŋ fíi depãy.
17Gefay tiŋ naan wo diŋ koore seder wo.
Tiŋ ma ti ɓen diŋ koore Sipres wo.
Currently Selected:
SIŊ MA DE DAŊ SIŊN WO 1: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
