MALASI 2
2
Manwur ruu jar siɗ jagn wo
1Mokay patala diŋ ruugi ne nday, nday jar siɗ jag no!
2Hayga nday coʼ sug we gà
Day nday kaŋ jiili ɓay we ma hã togoɗge ne ɗúu ɓi gà no,
Ndi ɓoʼ ge faɗge yaŋ le yoo ɓay, ndi faɗ ge bosaʼ ɓay wo yaŋ go.
Manwur Pantway wãã nono.
Kidolgi ndi faɗ bosaʼ ɓayn go,
Wer maga nday bay de kaŋ ti ɓay ti ɓi wa mono.
3Ko we, ndi de see ɓi ndi go maŋ ma caa wer ɓay.
Ndi ɓod ge nday yaŋ de mbiiri nene,
Diŋ mbiiri fẽẽre maga nday id ra ti wur few ɓayn wo mono,
Day à trom ge nday yaŋ wo go de ɓaara ɓuy.
4Sen á yaŋ go ne nday ti ti wur sen de el ga ndi hay ruu nday we,
Nen maga tayge jag maga ndi hay tayn de Lefi mo hay ma tum.
Manwur Pantway wãã doosen nono.
5Tayge jag maga ndi hay tayn de ɓe hay diŋ tayge jag ma tenen wo de jam.
Ndi hay hã ra nene maga á mo joŋ hẽẽne doo ɓi.
Kidolgi á hay joŋ hẽẽne doo ɓi lay,
Hay tem wer ɗúu ɓi lay.
6Jag liŋgi ma cwãyn hay jag ɓe,
Day à daʼ wããre geteʼ jag ɓe gà hase.
Á hay see wer ɓi nen jam, ti faage ɓe de deele.
Á hay far jag jar debaŋ go ti ɓlagge.
7Werga à nen daʼ kogen nà jag je siɗ jag no,
Day à wii jag liŋgin nà jag ɓe,
Wer maga a diŋ je peele mani Manwur Pantway.
8Ama nday ma ɓay nday hay cel go, nday men faagen go.
Nday kol jag liŋgin go diŋ fen maga ɓaale jar debaŋ mbar wo ti ɓe
Nday hay cegaɗ go ti tayge jag mani Lefi no.
Manwur Pantway wãã doosen nono.
9Ane ndi ɓin ndi kol ge nday yaŋ go jar feg ti.
Ndi fer ge nday yaŋ go gesiŋ pel jar wo ɓuy,
Wer maga nday bay seege ti faage ɓin wo wa,
Werga nday leʼ naa wer jag liŋgin wo mokay nday joŋn ti ɓaŋ.
Jar Israyel lag wo ti tayge jagn gà
10Naa ɓuy mono, pan naa bay boŋ wa yawla?
Joŋ naa mono bay diŋ Baa ma boŋ wa yawla?
Day wer mayse ga naa lag húulí ne kããra ti,
Hãã kol go ma mbuɗ foo tayge jag mani pããre naan wo la?
11Juda hay lag húulí.
À hay joŋ fen ma de ɓlagge ɓi sir Israyel wo de ɓi leege ma Jerusalem no.
Werga Juda hay mbuɗ foo fen maga sen hay go diŋ ma Manwur ga Manwur dan go.
Á hay da may mani baa ma waare no.
12Manwur naa ge je maga joŋ fen ma sen yaŋ go,
Je maga tenen yeʼ day de yiŋ jag mono.
Á naan ge yaŋ go yoo jar ma ti wer mani Jakobn wo,
Day á naa ge go nà diŋ je maga a hã mopo ne Manwur Pantwayn mono.
13Fen maga nday joŋ mokay pa no :
Mberbe ɓay, de roo wo de ndumgi ɓay yãã wo ngel siɗ jag mani Manwurn go,
Hãã nen ɓe bay ko fen maga à hãn nene mo wa so lay,
Se bay yãã doo ɓay de mopo wa so hase.
14Day nday fer wiigi ga : Wer mayla?
Diŋ wer maga Manwur hay diŋ je sedewa ti holaŋ ɓay
De wãy maga ndo hay dan ti jõõ ɓo mono.
Ndo hay bay seege see ɓe de deele wa,
Bà mbe de maga a diŋ wãy ɓo, diŋ wãy ɓo maga ndo hay tay jag de ɓe mono.
15 # 2.15 Ma klee 15 wo de ma 16 : wo gaali ma kolge werga ma jag Hebre bay go laa wer cemam wa. Jobo maga ɗiggi ma de el yaŋ de gwaʼge ɓil ɓe meʼ ɗa mono,
Hay joŋ fen ma kay ti boŋ gà.
Jobo boŋ hay joŋ ne, day á hay joŋn lela?
Wer maga á hay kiɗ mbarga maga Baa hay wãã ga se hãn yaŋ nene mono.
Doosen ko we see ɓay nen ɗiggi ɓay de ele :
Daga jobo mo mbuɗ foo wãy ɓe maga se dan ti jõõ ɓe mo wa.
16Werga ndi de caa hee de busgi kããra no!
Manwuri, Baa ma Israyel wãã doosen nono.
Ndi bay da je maga laa õõbe go ne waŋ ti mo wa#2.16 Je maga laa õõbe go ne waŋ ti : diŋ je huni. mo wa.
Manwur Pantway wãã doosen nono.
Doosen ko we see ɓay de el nen ɗiggi ɓay :
Hay we diŋ jar lag húulí wa.
Manwur a ge caa kiida jare
17Nday gay Manwur de wããre ɓay wo, day nday ga :
Wùr gayn de mayla?
Diŋ de maga nday wãã gana :
Wosela ɓuy joŋ ɓlagge we no,
Je ma sen de cõõre jag Manwuri.
Nday ga á joŋ fruygi nà diŋ ti jar ma doosen wo nono.
Noga nday wãã pa gana :
Baa ma car kiidan gen yawla?
Currently Selected:
MALASI 2: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
