MALASI 1
1
Manwur hay da jar Israyel wo
1Re põõre maga Manwur hay wããn ne Malasi maga a mo wããn ne jar Israyel wo mono.
2Manwur gano : Ndi hay da nday.
Ama nday kal gana : Ndo da wùr de mayla?
Esaw bay diŋ wegeman Jakob wa yawla?
Kay diŋ jag Manwuri.
Bà layblaʼ ndi hay da Jakobe.
3Ane ndi hay da Esaw gà.
Ndi hay kol húulì ɓe maga a hay de hayle ti ɓaara go diŋ ngel ma poɗag poɗage.
Ndi hay hã fẽẽre ɓen wo go ne wé ma ɓi puuli wo.
4Jar Edom mo wãã bà wo ga :
À hay ɓlag wùr go, ama wùr fer yaŋ mbe bor fẽẽre wùr wo ciŋ ni no.
Manwur Pantway gano :
Á mo bor wo mbaara, day ndi mbugn yaŋ mbi go pa.
À kol yaŋ ɗe sir ɓaaran ga sir jar ma debaycõõre wo,
Sir jar maga ɓil Manwur de sõõge ne hara ti ma tum mono.
5Nday kon yaŋ de nen ɓay day nday wãã ge yaŋ de jag ɓay gano :
Kluu mani Manwur cegaɗ haagu sir ma Israyel go.
Jar Israyel bay wo horge sug ti Baa wa
6Wel hoo sug ti pan ɓe, gebee hoo sug ti je maga se gebee ɓe mono.
Hayga ndi diŋ Pããbe no, hooge sug maga à nen hooge ɓe ti ɓi gen yawla?
Hayga ndi diŋ Waŋ no, hẽẽge maga à nen hẽẽ ndi mo nà gen yawla?
Manwur Pantway wii jag ɓay nday jar siɗ jag maga nday mbuɗ foo ɗúu ɓi mono.
Nday gano : Wùr hay mbuɗ foo ɗúu ɓo de mayla?
7Nday a de rege ma de ɗag ti ngel siɗ jag ɓi no,
Day nday fer ga : Wùr hay joŋ ɗag mo see de mayla?
Diŋ wer maga nday wãã gana :
Ngel rege mani Manwurn mbe nen maga à mbuɗ foo ɓe mono.
8De maga nday a sii jag ne ndi de horog ma rẽw mono,
Sen bay diŋ ɓlagge wa yawla?
De maga nday a pel ɓi de horog ma leŋ noga ma de cegè mono,
Sen bay diŋ ɓlagge wa yawla?
Wo de ɓe hãge ne waŋ ɓon ɗala?
Á yãã mbe waare ɓo yaŋ de el yawla?
Wããn diŋ Manwur Pantway.
9Patala pud we ciŋ doosen nono ma tos Baa,
Maga á mo ko decoo naa ɗa so la!
Joŋ sen nà diŋ nday tuu so mono.
Á yãã mbe jag ɓay yaŋ de el yawla?
Wããn diŋ Manwur Pantway no.
10Naa see ɗala!
Wose yoo ɓay ga tẽg jag tiŋn wo yaŋ go,
Nen maga nday mo ngal wùu de koɗkoɗ ti ngel siɗ jag ɓin wa so mo la?
Nday bay de cõõre jag ɓi meʼ wa has ɓuy.
Manwur Pantway wãã doosen nono.
Fẽẽre maga nday hã ra me mono,
Ndi bay da yãã rage go ne nday doo wa.
11Werga, de maga wur naa wer le mo hãã wo go leʼge gesiŋ mono,
Ɗúu ɓi kluu yoo wer jar wo ra.
Go ti ngel ɓuy á roɗ fen fõõre ti ɗúu ɓi,
Day à a de fẽẽre ma de fããge wo hãge ne ndi,
Werga ɗúu ɓi kluu yoo wer jar wo ra.
Manwur Pantway wãã doosen nono.
12Ama nday ma ɓayn nday ɓlagn go, werga nday gano :
Ngel rege mani Manwurn go de demge,
Day fen maga à daʼn le ni diŋ rege maga à bay nen hoo sug ti ɓe wa.
13Nday gano : Sen diŋ gayre ma ẽla!
Day nday mbuɗ foo ɓi.
Manwur Pantway wãã doosen nono.
De daŋ sen ɓuy pa, nday a pel ɓi nà diŋ de fen maga à baan le freŋ,
Diŋ maga sen leŋ noga sen de ɗarge see.
Sen mono diŋ fẽẽre maga nday hã ra me mono.
Ndi day mbi yaŋ yãã doo ɓay de ɓaara yawla?
Wããn diŋ Manwuri.
14Faɗge ti je jãɗ see maga sen mbe de fen ma twar yoo horog ɓen wo no,
Day raw baage ma hãge ne Manwur diŋ horog ma de ngogre mono.
Werga Manwur Pantway wãã gano :
Ndi diŋ waŋ ma kluu, day à joŋ hẽẽne doo ɗúu ɓi yoo jar wo ra.
Currently Selected:
MALASI 1: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
