MALASI 3
3
1Ko we, ndi ɓoʼ ge je peele ɓin yaŋ wo :
Á ɓoʼ ge faage yaŋ wo go me pele.
Mo so no, kola diŋ maga Waŋkluu maga nday de kiɗgi ɓe á we la yaw.
Ko we, je peele tayge jag maga nday de dage ɓe yaŋ le age.
Manwur Pantway wãã doosen nono.
2Wose kãã yaŋ ma ooge pel naw wur age ɓen la?
Wose oo ge yaŋ deele ti wur maga á naa ge nen mo la?
Werga a doo wùu mani je yor boo nono,
Doo cuu mani je ywil faage nono.
3Á hay ge yaŋ gesiŋ doo je ma ɗee boo solay day ray sir ma nen ɓen go nono.
Á fããge weere mani Lefi wo yaŋ go,
Fãã ge ra yaŋ go doo ga à yor boo biŋni wo de boo solay nono,
Day saara joŋ ge yaŋ go diŋ ma Manwuri ma hã fẽẽre nene ti faage ɓe keɗede.
4Doosen fẽẽre maga Juda wo de Jerusalem hã ge wo ra,
Kol ge wo yaŋ de cõõre jag Manwur doo ma ti wurpo nen kiŋgi ma ɓaan wo nono.
5Ndi yaʼ yaŋ le see ɓay ma caa kiida no.
Ndi joŋ ge sedewa yaŋ deparday
Ti jar kaŋ halgen wo de jar figliw wo no,
Ti jar maga haɗ wo ti geteʼ mono,
Ti jar maga bay wo poɗ jar joŋre ɓaaran wo ti faage ɓe wa,
Bay wo hoo sug ti wãy dewurn wo de wel holgen wa,
Joŋ wo bon waare no, day bay wo joŋ hẽẽne doo ɓi wa mono.
Manwur Pantway wãã doosen nono.
6Werga ndi diŋ Manwuri, ndi coo gà.
Day nday ma ɓay weere mani Jakobn mono,
À caa ge wer ɓay go gà.
Wããre ti dim wo
7Tĩĩ wer le ti kal mani pããre ɓay wo hãã mono,
Nday hay cel go nday men jag liŋgi ɓin wo go.
Nday hay ɗaw ra gà.
Fer we le see ɓi, ni ndi fer yaŋ wo see ɓay lay.
Manwur Pantway wãã doosen nono.
Day nday gano : Wùr mo fer le nà ferge la?
8Je tabay kãã mbe we ma jãã Baa yawla?
Werga nday jãɗ ndi day nday fer gana :
Wùr hay jãɗ mo ti mayla?
Diŋ ti dim wo de fẽẽre maga nday hã ra mono.
9Faɗge leʼ ne nday ti day nday krub ɓuy nday jãɗ ndi.
10A we le de dim ɓayn wo ɓuy ɓi tiŋ horog no,
Nen maga rege mo hay ɓi tiŋ ɓi no.
Lam we mbay ndi doosen no ɗala, ni nday ko ge yaŋ :
Ndi buŋ gi jag ngel ma ciŋ yaŋ go ma cwaa bosaʼ ma kluu ne nday ti.
Manwur Pantway wãã doosen nono.
11Je ma re fẽẽren ur we le no, ndi niin yaŋ go ne nday ti,
Day se ɓlag ge mbeere fẽẽre ma ti sir ɓay go gà.
Koo tlalum po gwaʼ ge bay leʼge ɓil pay ɓay wo boŋ gà.
Manwur Pantway wãã doosen nono.
12Wer jar wo ɓuy wãã wo yaŋ ti ɓay ga nday diŋ jar ma de fruygi,
Werga sir ɓayn kol ge yaŋ diŋ sir ma de fẽẽre ma de wooren wo ɓili.
Manwur Pantway wãã doosen nono.
Bosaʼ ti jar joŋ peele ne Baan wo
13Manwur gano : Nday wãã wããre ma de tuu me see.
Day nday gano : Wùr hay wãã re may ti holaŋ wùr ti ɓo la?
14Nday hay wãã gano :
À joŋ mbe joŋre ne Baa la koɗkoɗe.
Naa hay daʼ bà mayse ti hooge sug ti jag liŋgi ɓe no,
Ti seele nen lawge wer Manwur Pantwayn la?
15Patala naa ko ga jar ma ti graŋ wo jag de fruygi.
Kidolgi jar maga joŋ wo ɓlagge sen wo go de ngesge yaw.
Kidolgi á jãɗ wo Baa, day saara daŋ mbaara go.
16Day jar maga joŋ wo hẽẽne doo Manwur raw wo wãã wããre ti holaŋ ɓaara :
Manwur raw hayge eŋ coʼ sugi, kal laa wããre ɓaara no.
À raw yer kefder ma ɗig ti pel ɓe ti jar maga joŋ wo hẽẽne doo Manwuri,
Day hẽẽ wo ɗúu ɓe mono.
17Á kol wo yaŋ diŋ jar ɓi,
Manwur Pantway wãã doosen nono.
Á joŋ wo yaŋ diŋ jar ma ɓi ti see ɓi nen wur maga ndi de ʼwũygi ɓe mono.
Ndi gel ra yaŋ go doo maga jobo gel wel ɓe maga de joŋ joŋre nene go nono.
18De sen ni mo pa no, nday ko ge fen maga ɓrew ɓil je ma keɗedn
Wo go de je ma de ɓlaggen yaŋ,
Je maga joŋ joŋre ne Baa wo de je maga bay joŋ joŋre nene wa wo yaŋ go.
19Werga, wur yaŋ le age,
Wur ma sen go de jii wùu doo tuu maga à hay ngal wùu ni hiɓ nono.
Jar ma ti graŋ wo ɓuy de jar maga joŋ wo ɓlaggen
Kol wo yaŋ doo dramgi nono wur se maga le de age doɗ ra yaŋ go.
Manwur Pantway wãã doosen nono.
Á men ge kããge noga jag doo po ne ra meʼ gà hase.
20Ama nday ɓay jar maga nday de joŋ hẽẽne doo ɗúu ɓi mono,
Wur ma keɗed naa wer yaŋ le ne nday ti de pẽẽgen wer ɓe.
Wur sen mono, nday laa yaŋ go siigi,
Day nday yor yaŋ doo weere deere maga laa wo le go ɓi kaw wo nono.
21Nday see yaŋ go ne jar ma de ɓlaggen wo ti,
Werga á kol ge wo yaŋ ɓaale ɓay doo sããge nono.
Sen nà ti wur maga ndi de ʼwũygi ɓe mono.
Manwur Pantway wãã doosen nono.
22Ɗig we ti ti jag liŋgi mani je joŋre ɓi Moyis.
Ndi hay hã wããre ɓi ma de yergen wo le ne hẽn
De jag liŋgi ma ɓod faage wããre ɓin ti húulì Horeb
Maga á mo kaŋ nen jar Israyel wo ɓuy ti ɓaara mono.
23Ko we, ndi de see ɓi ndi ɓoʼ ge Eli je ndar nen wããre Baan yaŋ le ne nday,
Taŋgu maga naw mani Manwur a mono, naw se ma kluu ga joŋ hẽẽne lay mono.
24Á fer ge jiili pããreben wo yaŋ le ti weere ɓaara wo,
Fer ge jiili weeren wo yaŋ le ti pããre ɓaaran wo lay,
Doo hẽẽne maga ndi day la ndi á go frum sir no.
Currently Selected:
MALASI 3: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
