ESAY 1
1
WÃÃRE TI JAR ISRAYEL WO
1Re maga à naa nen ɓe ne Esay je ni Amotsn ti Juda wo de Jerusalem ti kal mani Osiyas, Yotam, Akas, Esekiyas waŋre ma Judan wo mono.
Sir Juda fãy go
2Ngel ma ciŋ mo laa!
Tamsir mo coʼ sugi! Werga
Manwur de wãã wããre ga :
Ndi had weere wo day ndi gẽẽ ra go,
Ama saara joŋ ti graŋ go see ɓi.
3Bloodày de ko je ɓe no,
gerhẽẽ de ko ngel maga jar wãã wããre ɓen lag wo hõõ ne hẽn ni mono,
Ama Israyel bay de ko mopo wa hase jar ɓin bay wo laa wer mopo wa.
De el meʼ draʼ bay ti sir Juda wa
4Re ti wer jar ma de ɓlaggen wo,
Ti jar ma debaycõõren wo,
Ti wer jar ma joŋ ɓlaggen wo, ti weere ma de glubgin wo!
Á tob wo Manwur go, á mbuɗ wo foo je ma bay ɗag ma Israyeln go,
Day mbuɗ wo faale go ne hẽne.
5De maga nday yaɗ wer ti graŋ ɓayn ciŋ mono,
A maʼ nday nà ti ngel ma hon mo pa so la?
Tin go ɓuy de cegè lay,
Jiilin go ɓuy nen lawge lay.
6Tĩĩ le faale ɓaale hãã leʼ go ti,
Ngel ma de el yweg taʼ bay wa.
Á go ɓuy diŋ wããge,
Diŋ wuɗgi see wo de gwẽẽ maga à saɗ ra ti boŋ gà lay,
À kuɗ ra gà lay hayba noo draʼ à kaa ni ma taŋ jag ɓaara gà lay.
7Sir ɓayn go nen lawge so!
Ɓi leege ɓayn wo go de roɗge de wùu,
Waare wo go de re sir ɓayn nen ɓay.
Á diŋ coocoo de baa weege doo ga waare a go frum nday nono.
8May ma Siyoŋ gwaʼ go
Doo duuli ma ɓil pay tlalum nono,
Doo mburyug ma ɓi pay ngurgudu nono,
Doo ɓi leege po maga jar hee wo go de cir ti ɓe mono!
9Hayga Manwur Pantway de men jar po we ne naa yemeg gà no,
Naa de hay go doo Sodom nono,
Naa de hay go de maŋ Gomore!
Goŋge Baa ma bay blam no
10Laa we wããre Manwuri,
Nday waŋre Sodom no!
Coʼ we sug jag liŋgi mani Baa naa no,
Nday jar Gomor no!
11Ndi joŋ mayse de siigi jag ɓay ma ngaɓan wo la?
Manwur wãã nono.
Ndi go de wùri de siɗgi jag de gamlaare ɓay wo no,
Gamlaare maga nday roɗ ra go ɓuy ɓuy de noo weere deere ɓayn wo.
Ɓil ɓi bay go feh ti cíi bloore deeren wo,
De weere sããren wo de togloŋren wo wa.
12De maga nday a pel ɓi mono,
Wose wii nday le ga nday mo laa le dreɓ feele ɓin wo la?
13Men we age de fẽẽre hãge ɓay ma bay blamn wo :
Trusan joŋ yeɗe me, fruygi kol ge few ciŋn wo,
Saban wo de tayge ɓayn joŋ wo see ne ndi,
Werga ndi kãã ma ko kurwuy ma de tay nen de debaycõõren gà.
14Ndi de caa hee de fruygi kolge few ciŋn wo de wur few ɓayn wo,
Á wo see ɓi diŋ põõre, ndi gay we doo soɗ rage.
15De maga nday horge doo ɓay ciŋ mono,
Ndi mbuɗ nen ɓi go.
Hayba de maga nday yaʼ wer tosge ɓayn wo debaŋ mo yaw,
Ndi laa ra gà werga doo ɓay wo de id húulí.
16Yog we go, fãã we see ɓay go,
Caa we wer hun ma nen joŋre ɓayn wo go pel ɓi,
Men we joŋ ɓlagge go.
17Had we joŋ de el no,
Kiɗ we diŋ fen ma ti faage ɓe no.
Fer we je joŋ bon jarn le ti faage ma de el no,
Fer we nen mo mani wel holgen nene, kay we ti wãy dewur no.
Tigraŋ ɓayn taw ge nday go
18A we le naa lag cag reen ɗa,
Manwur wãã nono.
Ɓlagge ɓayn mo hay bà wo de sẽẽ yiŋyiŋ yaw,
Á kol wo yaŋ go de puy doo húulì-baa nono.
Á mo hay bà wo de sẽẽ doo gir no yaw,
Á kol ge wo yaŋ go de puy doo mbaaraw no.
19Hayga nday ɗig we ga nday yãã jag yaŋ no,
Nday re ge fẽẽre ma de el maga joŋ wo ɓil sirn la yaŋ.
20Ama hayga nday day we gà hayga nday joŋ ti graŋ we go no,
Moslam baa ge jag yaŋ ne nday see werga jag Manwur hay wããn go.
À hee ge wùu go ne Jerusalem
21Sen nà diŋ re mayse no la,
Ga ɓi leege ma de deelen kol go diŋ mangawlaŋ la!
À hay joŋ ge ɓil ɓe diŋ fen ma de deele,
keɗedn hay de laa tiŋ ni.
Ama patala se bag ɓil go de jar id húulí wo!
22Solay ɓon kol go diŋ kudi,
Yii ɓon caa bii go.
23Waŋre ɓon wo diŋ jar ma ti graŋ wo,
Wo diŋ bar jar freŋ wo.
Á wo ɓuy da wo diŋ mandekoɗ no,
Á wo ɓuy ɗee wo diŋ wer daʼ ge no.
Á bay wo fer nen mo ma wel holgen ne hẽn wa,
Re wãy dewurn bay de maŋ see ɓaara wa.
24Diŋ wersen so, kay diŋ jag Waŋkluu,
Manwur Pantway, je egre ma Israyeln wãã so ga :
Kidolgi ndi sam ge pũũri yaŋ go de jar giŋ megen wo,
Ndi saʼge hee ge yaŋ go de jar hee ɓin wo.
25Ndi maŋ ge doo ɓi yaŋ ciŋ see ɓo pa,
Ndi laa ge kud#1.25 Kud : Á diŋ sir maga à daʼ boo le nen ɓe mono. ɓon wo yaŋ go ti wùu,
Doo ga à joŋ cuu heege nono,
Day ndi ray ge sir ma nen ɓon wo yaŋ go ɓuy de wùu.
26Ndi fer ge jar car kiida ɓon wo yaŋ ti ngel ɓaara doo ma ɓaa nono,
Fer jar bag yaŋ ɓon wo yaŋ le doo maga á hay wo taŋgu nono.
Blam sen à ɗe ge ndo yaŋ ga ɓi leege ma keɗed no, ɓi leege ma de deele no.
27Joŋge mo ma ti faage ɓen yãã ge Siyoŋ yaŋ go,
Day jar maga coo ge wo seele ɓaaran yãã ge wo yaŋ go wer keɗed no.
28Ama re caa ge jar ma ti graŋ wo de jar ɓlaggen wo yaŋ go jag taʼ boŋ.
Jar maga tob wo Manwur go taw ge wo go.
29Mo so no sõõre joŋ ge nday yaŋ wer koore terebente
Maga ɗiggi ɓay de kaŋge ti ɓaara mono.
Ti ɓay wuɗ gi yaŋ de sõõre doo corge jag sir ɓay
Maga nday hay gaɗ ra de see ɓay mono.
30Werga nday joŋ ge go doo koo terebente
Maga sug ɓe lwaɗ go nono,
Doo pay sug nee ma bay bii ti nono.
31Je ma de egren joŋ ge doo blalaw nono,
Joŋre ɓen joŋ ge go doo felge wùu nono.
Á roɗ ge wo go ɓog ɓuy jag taʼ boŋ,
Day jobo ma ii jag wùu ɓaara joŋ ge gà hase.
Currently Selected:
ESAY 1: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
