ESAY 51
51
Pẽẽge mani Baa no
1Coʼ we sug ɓi,
nday maga nday de maŋ blam keɗed no
day nday de kaŋ nen ɓay ti Manwur mono!
Kaŋ we nen ɓay ti húulì maga à hay ceɗ
nday le see ɓe mono, ti jag tuu maga à hay laa nday le go ni mono.
2Kaŋ we nen ɓay ti Abraham pan ɓay no,
ti Sara maga hay biŋ nday mono.
De maga Abraham hay boŋ de see ɓe mono,
ndi raw ɗege ɓe day ndi raw kaŋ bosaʼ ne hẽn ti,
ndi raw tesge ɓe.
3Doo kay nono, Manwur teŋ ge nen Siyoŋ yaŋ,
á ko ge decoo tabul ɓen wo yaŋ,
kol ge puuli ɓen yaŋ go doo Eden nono,
kol ge laale ɓen yaŋ go doo pay sugnee mani Manwurn nono.
Feg wo de fruygi joŋ ge wo yaŋ ɓil ɓe,
à laa ge gẽẽge jõõ wo yaŋ de siŋ wo ni.
4Kaŋ we ɗiggi ɓay ti ɓi,
nday jar mani ɓi no!
Nday wer jar mani ɓi no,
coʼ we sug ɓi!
Werga, jag liŋgin kal ge wo go nà see ɓi
day ndi naa ge nen mo ɓi ma keɗedn yaŋ go
maga á mo hay diŋ poɗag ti jar wo.
5Keɗed ɓin go mbaŋ ma naa nene,
pẽẽge ɓin naa ge nen yaŋ go lay
day ndi caa ge kiida wer jar wo yaŋ de doo ɓi.
Jar ma ti kaalin gor ge wo doo ɓi yaŋ,
day saara kaŋ ge ɗiggi yaŋ ti doo ɓi no.
6Hoo we nen ɓay ciŋ,
blam ɓe ni nday fer we nen ɓay le gesiŋ ti tamsiri!
Fẽẽre ma nen ngel ma ciŋ dwas ge wo yaŋ go doo cug nono,
tamsir laa yaŋ go cegab doo õõbe ma de ngragge nono.
Jar ma ɓil ɓen huɗ gi wo yaŋ go doo kwãyre wo nono,
ama pẽẽge ɓin joŋ ge yaŋ wo tum sagsage,
day keɗed ɓin caa ge wer go gà lay.
7Coʼ we sug ɓi, nday maga nday de ko mo ma keɗedn mono,
nday jar maga jag liŋgi ɓin le jiili ɓay mono!
Joŋ we sõõre mo maga jar téebeere kaŋn wo ne nday ti mo wa,
daɗ we doo lasge maga á las wo nday de ɓe mo wa.
8Põõre laa ge ra yaŋ go doo õõbe nono,
gogo re ge wo ra yaŋ go doo saale mbaaraw nono.
Ama, keɗed ɓin joŋ ge mbe yaŋ wo tum sagsage,
pẽẽge ɓin ɗee ge mbe doo yaŋ wo de kiŋgi de kiŋgi.
Ɓoʼ faage pẽẽgen diŋ Baa
9Pũy go, Manwuri, pũy go!
Pũy go doo ma ti wur ma ɓaan wo le nono,
doo ma nen kiŋgi ma blam wo le nono!
Ɓa hay ham jag Ejipte go gesiŋ noga
ʼwar manmbuyuurin go nà bay diŋ ndo wa yawla?
10Hay õg maarogn go kaŋkraŋ wo go de bii ma ɓi tuu ma kuɗum no,
hay soo faage ma heege wo ne jar ma de yããgen wo go
nen kuɗum maarogn nà bay diŋ ndo wa yawla?
11Doosen no sono, jar maga Manwur yãã ra le
go fer ge wo yaŋ le,
day a ge wo yaŋ Siyoŋ de siŋ blum jage,
fruygi ma tum joŋ ge yaŋ ti ɓaara doo gawraŋ nono.
Feg wo de fruygi yaʼ ge wo yaŋ le,
lawge wo de ndumgi maŋ wo wer yaŋ wo go de ɗeere.
Jar mani ɓin wo, joŋ we hẽẽne wa
12Diŋ ndi, ndi diŋ je teŋ nen ɓay no.
Joŋge joŋge ga ndo fer joŋ hẽẽne doo je táabay maga huu go,
noga doo je ni Adam maga wo de ngaɓge boŋ de fíi mo la?
13Ndo yõõ ti go ti Manwur maga hay joŋ ndo,
ga hay cor fẽẽre ma nen ngel ma ciŋ wo day ɓoʼ wer tamsir so ge!
Ndo mbo tum nen daɗge doo sõõge ɓil mani je joŋ bon jarn
doo ga a le go de gragge ma taw ndo mo so ge!
Sõõge ɓil mani je joŋ bon jar sen bà gen so la?
14Ge la mbaŋ mono,
je maga hay de baa ti gesiŋ ti paglam hay ge yaŋ go flãy,
á huu gi wo ti ngel bon ni gà
hoole ɓen pẽẽge jag ɓe gà lay.
15Ndi diŋ Manwur maga fĩɗ maarog no,
day joŋ ga kaŋngaw ɓen mo car wo põõ mono.
Ɗúu ɓi ga Manwur Pantway.
16Ndi hã wããre ɓin wo mo jage,
day ndi raw hul doo ɓi ne ndo ti, ndi maga ndi
hay cor fẽẽre wo nen ngel ma ciŋ,
ndi hay ɓoʼ wer tamsiri day wii jar Siyoŋ wo ga :
Nday diŋ jar mani ɓin wo mono.
Jerusalem nen coɓge mbe so
17Pũy go, Jerusalem pũy go! Ur go ciŋ,
ndo maga ndo hay jo ɓi wehãn bagge põõ mani Manwur mono,
ndo maga hay jo ɓi wehãn ma mbar nen ti jarn mono!
18Yoo weere maga Jerusalem biŋ ra mo ɓuy no,
ma seege pel ɓe bay boŋ wa.
Yoo weere maga se hay gẽẽ ra mo ɓuy,
maga maŋ doo ɓe go ciŋ bay boŋ wa hase.
19Re se ɓogn hay daɗ wo ndo,
wose day lawge ndo la?
À hay frum mo go, à ɓlag mo go,
koŋne hay baa ndo,
day à kaŋ moslam mo ti.
Ndi baa diŋ wose ma teŋ nen ɓo la?
20Fẽẽre maga gay wo go hay mbaara wo
go tiɗ tiɗ ti jeŋ faage wo doo baryam maga de bagge ti bay nono.
Á hay wo de bagge põõ Manwur ti,
de re mani Baa ɓon ti.
21Diŋ werseno, coʼ sug fen ma kay no,
ndo Jerusalem ma nen coocoo no,
ndo maga go de taage bay de yii wa mono!
22Waŋkluu ɓo no, Manwuri,
Baa ɓo maga kay ti jar ɓen wo wãã ga :
Ko ga ndi yãã wehãn ma mbar nen ti jarn yaŋ go mo doo,
ndi yãã wer wehãn bagge põõ ɓin yaŋ go ne ndo doo,
ndo jon ge gà so hase.
23Ndi hãn ge yaŋ go ne jar maga hay wo gay coo ɓo doo,
ne jar maga hay wo riŋ ndo ga :
Jel ti ɓo gesiŋ wùr de heege wo mono.
Ndo hay kol faale ɓo go doo sir nono,
koln go doo blam faage ma see jar nono.
Currently Selected:
ESAY 51: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
