ESAY 50
50
Manwur bay go de tob Israyel wa
1Manwur wãã ga :
Leeder busgi maga ndi bus man ɓay go de ɓe genla?
Je ma hon ga ɓèere ɓe ti ɓi day ndi hay yee
nday go doo ɓe diŋ wose mo so la?
Ko we ga hay yee nday
go nà diŋ seele ɓay ma bay blam wo,
à hay bus man ɓay go nà diŋ wer debaycõõre ɓayn wo no.
2Ndi hay a so day wer mayse ga jobo hay bay wa has la?
Ndi hay ɗe ɗúu day wer mayse ga jobo yiŋ jag gà has la?
Doo ɓi nà go de godogray has maga yãã jobo go gà so yawla?
Egre ɓi nà bay wa has maga yãã jobo go gà so yawla?
Wer carge põõ ɓi ndi, ndi õg maarog go, ndi kol
maarog ma de pããrege wo go diŋ puuli.
Cẽẽ ma nen ɓaaran buu wo go doo bay bii,
á laɓ wo go doo jwaale.
3Ndi ɓoʼ suŋgu go ne ngel ma ciŋ nene
day ndi laa bugu go ne hara nene.
Wejõõ Manwur diŋ je ma coʼ sugi
4Waŋkluu, Manwur hay hã jag mani
weere lakoln wo ne ndi nen maga ndi
mo ko kay je maga go de gayre de wããre.
Á buŋ sug ɓi go,
á buŋ sug ɓi go tum de jag toŋ nen
maga ndi mo coʼ sug doo weere lakol wo nono.
5Waŋkluu Manwur hay bul sug ɓi go,
day ndi ɓin ndi joŋ ti graŋ go gà lay,
ndi naa see ɓi go nen blam gà lay.
6Ndi hay hã faale ɓi go ne jar maga hay wo mbar ndi mono,
hã haw ɓi go ne jar maga hay wo prud piŋ ma jag ɓin go mono.
Ndi yoŋ nen ɓi go doo lasgen wo de sããre maga à tuf me nen mo gà.
7Waŋkluu, Manwur raw caa war ɓi le,
diŋ wersen ga à hay las me gà mono,
diŋ wersen ga ndi deŋ pel ɓi go doo húulì no mono.
Ndi hay go de koge ga sõõre baa ge ndi gà.
8Je maga blaw wããre ɓin go le go mbaŋ ma age, wose da
yaŋ ga wùr mo yiŋ pel kiida de kããra la?
Wùr mo yiŋ kããra so!
Wose da wãã re nen mo mani ɓin la?
Á mo yaʼ le see ɓi so!
9Ko we ga Waŋkluu, Manwur caa ge war ɓi yaŋ le,
day wose baw ge ndi yaŋ de wããre la?
Ko we ga á laa ge wo yaŋ go gesiŋ ɓuy doo õõbe ma de ngarge nono,
põõre laa ge ra go.
Coʼ we sug wejõõ Manwur no
10Wose yoo ɓay de ma joŋ hẽẽne Manwur
ga day de laa jag wejõõ ɓen la?
Je maga yaŋ seege nen suŋgu ga
day ngel bay go de lerge ne hẽn ti wa no,
á mo kaŋ ɗiggi ɓe ti ɗúu mani Manwur no,
mo deŋ see ɓe see Baa ɓe no!
11Ko we, nday ɓuy maga nday ngal wùu
day nday hoo waa ma car wùu jagn wo wo bay ɓay mono.
See we wo nen wùun wo de wùu ma de ngalge hiɓ no,
yoo waa ma car wùu jag maga nday jiɗ ra go mo so no.
Joŋ ga re sen mo daʼ we nà diŋ doo ɓi,
nday suɗ ge nà ma joŋ bone.
Currently Selected:
ESAY 50: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
