ESAY 49
49
Wejõõ Manwur diŋ poɗag jare
1Nday kaalin wo, coʼ we sug ɓi!
Nday jar maga wo go hãã hãã mono,
lag we eŋ ma coʼ sug ɓi!
Manwur hay ɗe ndi le go hãã ɓil man ɓi,
á hay maŋ ɗúu ɓi jag de maga ndi kal le go ɓil man ɓi mo tuu no.
2Á kol jag ɓi go doo moslam ma de saŋ nono,
á hul doo ɓe me ti.
Á kol ndi go doo waa ma jag ndelem nono,
á hay yoŋ ndi ɓil hulwaa ɓe no.
3Á hay riŋ me ga : Ndo diŋ wejõõ ɓi,
Israyel maga diŋ fen heege ti ma woo ndin mono.
4Ama ma ɓi ndi kal ga : Ndi gay see ɓi nà gayge.
Ndi taw egre ɓi go ti fen ma nen leege no,
ti ngel de koɗ no.
Kidolgi re ɓin wo nà doo Manwuri,
fen sag ɓin wo nà see Baa ɓi no.
5Patala Manwur wãã wããre,
Manwur maga hay ʼwũy ndi le go ɓil man ɓi
hãã maga ndi mo hay diŋ wejõõ se,
ndi mo fer Jakob wo le see ɓe,
maga Israyel mo tay wo go see ɓe mono.
Ndi de togoɗge nen Manwuri werga egre ɓin hay diŋ Baa ɓi no.
6Á ga : Maga ndo diŋ wejõõ ma hoo ɓĩĩni mani Jakobn wo go ciŋ,
ma fer jar Israyel maga gwaʼ wo le nà diŋ fen po meʼ ɗa pa yawla?
Ndi de kaŋ ndo diŋ poɗag ma wer jar wo,
nen maga pẽẽge ɓin mo naa nen wo go hãã ti jag sir tawge.
7Manwur je yãã jar no,
je ma bay ɗag ma Israyeln wãã doo
kay nono ne je maga à bay hoo sug ti caw ɓe wa,
je maga horge see ne wer jarn wo,
gebee jar wãã re jarn wo ga :
Waŋre kon ge wo yaŋ day hoo ge wo yaŋ go ciŋ
doo ɓe weere waŋre kon ge wo yaŋ
day leɗ ge wo monɗra yaŋ pel ɓe wer Manwuri,
je ma de deele no,
wer je ma bay ɗag ma Israyel maga hay baa ndo mono.
Israyel fer ge wo yaŋ liŋ
8Manwur wãã ga :
Ti wur ma de eln ndi hay yiŋ jag mo,
ti wur pẽẽgen ndi hay caa war ɓo le.
Ndi de ɗaw ndo doo,
ndi de kaŋ ndo ma tay jag de jarn wo,
ma maŋ sirn go ciŋ,
ma ɓes sir maga wo go nen coocoo wo go ne jar tway ɓaara
9ma riŋ jar ma ti daŋgay wo ga :
Laa we le go! Ma riŋ jar ma nen suŋgu wo ga :
Naa we nen see ɓay go!
Á kãã wo yaŋ ma daʼ rege ti faage wo.
Á daʼ ge wo ngel koɗge yaŋ ti ɗiŋriŋ wo.
10Koŋne cee ge ra gà lay day jwaale kaŋ ge ra gà lay.
Duguɗgi ma de jii wùun wo de wur haɓ ge wo ra gà
werga je ma ko decoo ɓaaran joŋ ge diŋ je seege de ɓaara no.
Á wo ge kaŋ rage jag gedel wo.
11Ndi kol ge húulì ɓin wo yaŋ go ɓuy diŋ faage wo,
day blam faage ɓin joŋ ge wo go de daʼge ciŋ.
Baa yõõ ti go ti Jerusalem gà
12Ko we ra, á wo le de age hãã mo tiʼ i no!
Ko we ra, te ɓaara wo le nen ɓaŋ gloŋhwede
wo de nen nen wur bolaw, ma lan wo le nen ɓil sir Sinim.
13Ngel ma ciŋ, ʼwad ware! Tamsiri,
ɓil ɓo mo hay go fehe! Húulì wo,
ʼwad we war de fruygi!
Werga Manwur de teŋ nen jar ɓen wo,
á ko decoo jar ɓe ma nen reen wo no.
14Siyoŋ hay wãã ga : Manwur tob ndi go,
Waŋkluu yõõ ti go ti ɓi.
15Wãy yõõ ti yaŋ mbe go ti mbarga ɓe yawla?
Ɓiiri ɓen ko decoo nen ɓe gà yawla?
Hayba ga á yõõ ti go ti ɓe layblaʼ no,
ndi ma ɓin ndi yõõ ge ti go ti ɓe gà.
16Ndi go de yer ndo ɓi coo doo ɓi, nen ɓi tum ti kor ɓon wo no.
17Weere ɓon wo le de hoo ɗeere tiʼ i.
Jar maga hay kol wo ndo go diŋ tabuli,
go diŋ ngel ma poɗag poɗage laa ge wo go,
men ge wo ngeln go.
18Raŋ nen ɓo go ti ɓo kara ni ndo kaŋ nen ɓo taʼ ɗala,
á wo go de tayge ɓuy, á wo le de age see ɓo.
Ndi yaŋ tenene! Kay diŋ jag Manwuri.
Ndo hee ge ra yaŋ ɓuy ti ɓo doo fen woore nono,
ndo saɗ ge ra yaŋ see ɓo doo may maga go de yããge nono.
19Kidolgi tabul ɓon wo, sir ɓo maga hay
gwaʼ go ɓil koɗe, sir se maga hay ɓlag go mono,
sir sen pẽẽ ge jar ɓon wo yaŋ ga pẽẽ ɗa yaw.
Jar maga hay wo lor ndo, maŋ ge wo wer yaŋ wo go see ɓo hãã.
20Weere ɓo maga à hay yãã ra go doo ɓo wãã ge
wo yaŋ ne ndo sug ga :
Ngeln pẽẽ wùr klee, kiɗ ngel ne wùr nen maga wùr lag ni.
21Ndo wãã ge yaŋ le ɓil ɓo lay ga :
Wose biŋ ra ne ndi mo la?
Werga ndi hay bay weere,
ndi hay go de gedge.
À hay baa ndi wo go ti daŋgay,
ndi hay go de busgi,
wose hay gẽẽ ra go mo la?
Ndi hay gwaʼ go boŋ de see ɓi day jar sen la hay wo nà genla?
22Waŋkluu, Manwur wãã ga :
Koɗa, ndi coŋ ge doo ɓi yaŋ wo ti wer jar wo,
ndi maŋ ge drapo ɓin yaŋ ciŋ ti jar
wo day saara horge ge weere ɓon wo yaŋ le jag jiili ɓaara,
á hoo ge wo mayre ɓon wo yaŋ le jag bay ɓaara.
23Waŋre joŋ ge wo yaŋ diŋ jar hã rege mo jage,
mayre ɓaaran wo diŋ jar joŋ rege ne ndon lay.
Á leɗ ge wo monɗra yaŋ mo pel de mbuɗ nen gesiŋ
day saara seɗ ge ɓurgi ma ɓaale ɓon yaŋ.
Ndo ko ge yaŋ ga ndi diŋ Manwuri
nen maga jar maga wo de gor doo
ɓi mo joŋ wo ge nen sõõre wa.
24Fen maga blum durgin hay yããn go mono,
à fer mbe yaŋ yããge ɓe pa yawla?
Je ma keɗed maga a baan mono,
à ɓoʼn yaŋ mbe go pa yawla?
25Cwãy, Manwur wãã nono.
Fen maga blum durgi hay maŋn mono à fer ge yããge ɓe,
fen maga je joŋ bon jarn hay yããn mono, daŋ ge yaŋ go.
Ndi dur jar hee ɓon wo yaŋ day ndi yãã ge weere ɓon wo yaŋ go.
26Ndi joŋ ge yaŋ ga jar joŋ bon ɓon mo re wo này see ɓaara toge,
á taɗ ge wo yaŋ go de cíi ɓaara toge de yii ma defay nono.
Wosela ɓuy ko ge yaŋ ga ndi diŋ Manwuri,
je yãã ndo no, je coo ndo le no,
je egre mani Jakob no.
Currently Selected:
ESAY 49: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
