ESAY 48
48
Hã faage fẽẽren ɓuy diŋ Baa
1Laa we fen ma kay no,
nday jar ma liŋ ni Jakob no,
nday maga nday ɗe see de ɗúu Israyel mono,
nday maga nday laa le go ti kããge mani Judan mono,
nday maga nday hãʼ de ɗúu Manwur mono,
nday maga nday ɗe Baa ma Israyel no paga bay ti cwãy wa lay,
bay ti faage ɓe wa lay mono!
2Werga, á wãɗ wo ga saara
diŋ jar ma ɓi leege ma bay ɗag no,
ga saara de deŋ see saara nà diŋ see Baa ma
Israyel maga ɗúu ɓe ga Manwur Pantway mono.
3Ɓaa le hãã tuu ndi hay sii fẽẽre sen wo le go ti tĩĩgi were.
Á hay kal le go nà jag ɓi, joŋ ga jar mo laan go nà diŋ ndi.
Doo no kay tuu ndi joŋ ne, se kal bag jag go.
4De maga ndi ko so ga ti ɓo graŋ,
soole ɓo doo boo ma de kadge nono,
day pel ɓo doo boo dob no so mono,
5Ndi raw sii fẽẽre sen wo le go ne ndo hãã taŋgu ɓaa,
ndi joŋ ga ndo mo laa ra go taŋgu maga saara bay age
nen maga ndo mo yaʼ wããge ga :
Joŋ ra diŋ sõõ ɓi no,
noga hay hã faage ɓaara le nà diŋ fodo ɓi no noga diŋ
fodo ɓi ma de yorgen wa.
6Ndo yaŋ de laage ɓe! Oo ti ɓe so!
Day nday de see ɓay nday wãã ge go ti ɓe gà an yawla?
Tĩĩ patala tuu ndi sii fẽẽre se ma defayn wo go ne ndo,
diŋ fẽẽre maga hay wo de yoŋre maga
ndo hay bay de daʼ wer ne hara wa mono.
7Ndi tĩĩ wer ɓaara nà patala,
á hay bay wo le go ɓaa taŋgu wa.
Hãã le ɓaa a go wara,
ndo hay bay de laa mopo ni meʼ wa hase,
sen nà maga ndo mo riŋ ga :
Ndi hay go de koge lay wa.
8Ndo hay bay de laa mopo ni meʼ wa,
ndo hay bay de ko mopo ni meʼ wa hase,
ɓaa le tuu sug ɓo hay bay de jwaʼ ndo meʼ ti ɓe wa.
Werga, ndi hay go de koge ga ndo diŋ waŋ lag cogob no,
le hãã ɓil man ɓo tuu à go de kaŋ ɗúu ne ndo ga je id húulí.
9Wer ɗúu ɓi no, ndi raw men caa jiili go mo ti.
Wer togoɗge ɓi no,
ndi raw ɗaw see ɓi see ɓo nen maga ndi mo caa wer ɓo go wa.
10Ndi yor ndo ti wùu,
bay maga boo-solay mo god go see kẽẽ nà wa
ndi hay lam ndo de bon nà lamge.
11Wer maga ndi hoo sug ti see ɓi, ndi joŋ nono
diŋ wer maga ndi hoo sug ti see ɓi mo tawa tuu.
Ndi kãã ma ɓoʼ foo ɗúu ɓin go gà
ndi hã ge togoɗge ɓin go ne je ma tigriŋ gà lay.
Je maga bag ge jag joŋre mani Baan go mono
12Coʼ sug ɓi, Jakobe, ndo Israyel maga ndi hay ɗe ndo mono!
Diŋ ndi, ndi diŋ je ma taŋgu no,
diŋ ndi pa, ndi joŋ ge diŋ je ma blam no.
13Hay ɓoʼ wer tamsir nà diŋ ndi,
doo war ɓi hay cor fẽẽre ma nen ngel ma ciŋn wo.
Ndi ɗe ra day saara raw age jag taʼ boŋ ɓuy.
14Nday ɓuy, tay we le, ni nday coʼ we sugi!
Wose yoo ɓaara hay sii fẽẽre sen wo we go la?
Je maga Manwur dan bag ge jag ɗiggi Manwur yaŋ go ti Babilone,
doo ɓe põõ ge jar Kalde wo yaŋ.
15Diŋ ndi, hay wããn diŋ ndi,
day hay ɗen le diŋ ndi,
hay baan le diŋ ndi day joŋre ɓen sii gi ti yaŋ.
16Yaʼ we see ɓay le see ɓi ni nday coʼ sugi! Hãã le ti tĩĩgi wer tuu,
ndi bay wãã wããre de yoŋre wa,
hãã le ti tĩĩgi wer fẽẽre sen wo,
ndi hay go. Patala, Waŋkluu,
Manwur ɓoʼ ndi le day hã Nenterse ɓen ne ndi.
Ndo hay coʼ sug ɓi we no
17Wãã doo kay nono diŋ Manwuri,
je yãã ndo no, je ma bay ɗag ma Israyel no, á ga :
Ndi Manwuri, Baa ɓon ndi had ndo maga ndo mo daʼ see ɓo,
ndi see de ɓo nà ti faage maga ndo nen seege ni mono.
18O! Hayga ndo de oo we de deele ti jag liŋgi ɓin wo
no, jam ɓon de hay nà doo maarog ma de pããrege nono,
keɗed ɓon de hay nà doo kaŋngaw maarog wo nono.
19Jar ni ɓo de hay wo doo duguɗgi nono,
wer mani ɓon de hay wo doo nen beɗef nono.
Ɗúu ɓe de hay yee nen go pel ɓi gà.
Men we Babilon le go
20Laa we go, men we Babilon go,
yor we le go ti holaŋ jar Kalden wo!
Wããn we go jag ciŋ kloŋ, siin we
go, joŋ we ga jar mo laan go.
Dus we wããre sen wo go ti jag sir tawge.
Wãɗ we ga : Manwur hay fer le coo Jakob wejõõ ɓe no!
21Jwaale kaŋ ge ra wo ɓi sir ma bay bii maga se hee ge de ɓaara ni mo gà.
Á cag ge bii yaŋ le ne hara nen húulì,
á mun gi húulìn yaŋ day bii yuu gi yaŋ le go ni.
22Jar ɓlaggen joŋ wo jam gà Manwur wãã nono.
Currently Selected:
ESAY 48: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
