ESAY 45
45
Sirus diŋ wejõõ Baa
1Manwur wãã ne Sirus Mesi ɓe maga se baan le diŋ doo war
ɓe ma sraʼ wer jar wo go gesiŋ pel ɓe,
mapog mblaaga ma sag waŋren wo go,
ma hrag jag tiŋn wo go ne hẽn pel nen
maga jobo mo fer tẽg rage wa so has doo kay nono ga :
2Ndi see ge yaŋ pel ɓo,
ndi daʼ ge ngel ma de farge ciŋ wo yaŋ go,
ndi hrag ge jag tiŋ boo dobn wo yaŋ go day ndi
wes ge nen manyãã boo ma jag tiŋn wo yaŋ go lay.
3Ndi hã ge horog maga wo de yoŋre nen suŋgu wo yaŋ go
ne ndo de horog ma de hul doo tin wo nen maga ndo mo ko
ga ndi diŋ Manwur maga ɗe ndo de ɗúu ɓo mono,
ga ndi diŋ Baa ma Israyel no.
4Diŋ wer wejõõ ɓi Jakobe,
wer Israyel je maga ndi maŋn go ɓi mono,
ndi kal ɗe ndo de ɗúu ɓo,
ndi raw kaŋ ɗúu kluu ne ndo ni ndo bay de ko mege wa ɗa hase.
5Ndi diŋ Manwur no, ma tigriŋ bay wa so.
Baa ma tigriŋ bay go faale ɓi wa so.
Ndi hay saʼ mblaaga ne ndo sage ni
ndo bay de ko ndi wa ɗa hase.
6Sen mo nà nen maga ndo mo ko so ga tĩĩ le nen wur botoŋ
leʼ go nen wur bolaw mono,
mopo maga go nen faale ɓi diŋ mo ma nen leege no,
Manwurn diŋ ndi, ma tigriŋ bay go faale ɓi wa so.
7Ndi joŋ poɗage, ndi joŋ suŋgu.
Ndi a de jam day ndi a de re.
Ndi Manwuri, ndi joŋ fẽẽre sen wo ɓuy.
8Daga ngel ma ciŋ mo ɗig pẽẽgen le day swaare ma ciŋ
mo yuu wo keɗedn le!
Daga tamsir mo buŋ jag ɓe go nen
maga pẽẽgen mo leʼ mbèere ni day keɗedn mo tĩĩ ni lay,
wo jag taʼ boŋ ɓuy! Ndi diŋ Manwuri,
je joŋ fẽẽren wo no.
Pãy wo de je booge no
9Re ti je maga yaʼ giŋ je joŋge ɓen mono.
Ndo diŋ pãy de booge yoo pãy ma ti tamsirn wo.
Pãyn wii mbe je maga de booge yaŋ ga :
Ndo joŋ nà mayla noga joŋre ɓon bay diŋ mopo wa mbe yawla?
10Re ti je maga riŋ pããben ga ndo biŋ weere nà gahãyla mono,
ti je maga riŋ wãyn ga ndo biŋ jar nà gahãyla mono.
11Manwuri, je ma bay ɗag ma Israyel no,
je maga hay ʼwũy ne wãã ga :
À da nà wiɗ jag ɓi ti wur ma peln wo yawla?
À ni nà joŋ doole ɓi ti weere ɓin wo noga ti joŋre ma doo ɓin wo yawla?
12Diŋ ndi, ndi hay joŋ tamsiri,
day joŋ je táabay ciŋ ti ɓe nà diŋ ndi.
Diŋ ndi de doo ɓi, ndi hay cor fẽẽre ma nen
ngel ma ciŋ wo day wãã wããre ɓaara ɓuy nà diŋ ndi.
13Hay baa Sirus le ma joŋ fen ma keɗedn nà diŋ ndi day
ndi ʼwũy gi faage ɓen yaŋ go ɓuy ne hẽn pele.
Á fer ge yaŋ boo ɓi leege ɓi no,
day men ge jar ɓi maga wo wo go
ti daŋgay wo yaŋ le ferge liŋ bay wii poɗge lay,
bay wii cooge ti lay. Wããn diŋ Manwur Pantway no.
Jar dehãy tay ge wo go wer Baa
14Manwur wãã ga :
Daʼge ma Ejipten wo de fẽẽre ma kay
Etiyopin wo de jar Saba ma de gẽẽren wo
ɓuy kol ge wo yaŋ go ni ɓo,
day saara joŋ ge wo yaŋ go diŋ ma ɓo.
Jar sen seege wo yaŋ wer ɓo,
laa ge wo yaŋ pel ɓo de mbar geyam ɓaale.
Á leɗ ge wo monɗra yaŋ pel ɓo day wii gi
wo ndo yaŋ de kamkam ga :
Baan nà diŋ mani ɓon tawa tuu,
ma tigriŋ bay wa so hase baa ma lan wo diŋ fẽẽre ma nen leege wo.
15Kidolgi ndo diŋ Baa maga ndo yoŋ see ɓo,
ndo Baa ma Israyel no, je yãã jar no!
16Á wo go ɓuy de sõõre,
de wùu ti de sõõre, á raw wo ɓuy go de hee ti gesiŋ doo sõõre,
diŋ jar se ma ceɗ fodo sõõren ma hã lawge ne jarn wo no.
17Israyel daʼ pẽẽge ɓen nà doo Manwuri,
diŋ pẽẽge ma tum no.
Sõõre joŋ ge nday gà lay,
nday cog ge ti go gesiŋ gà lay hãã ma tum.
Wããre pẽẽgen bay de yoŋre wa
18Wãã doosen nono diŋ Manwur maga hay joŋ ngel ma ciŋn mono,
Baa ma boŋ maga hay joŋ tamsiri,
hay boo ne day de coɓge ɓe mono.
Á hay joŋn nà maga á mo hay ɓil koɗ gà
á hay boon nà maga á mo hay de jar ɓili.
Ndi diŋ Manwur no, ma tigriŋ bay wa so hase.
19Ndi wãã wããre nà bay de yoŋre nen ngel ma de suŋgu po ti tamsir la wa.
Ndi hay wii wer mani Jakobn wo ga á mo
kiɗ wo mbaara ndi wo hãy tuu nà gà.
Ndi Manwur ndi wãã diŋ mo ma ti ngel ɓe no,
ndi ʼwaa diŋ ɓay fen ma ti faage ɓe no.
Jar dehãy cooge wo yaŋ
20Tay we le ni nday a we le,
yaʼ we le jag taʼ boŋ ɓuy, nday maga nday gwaʼ yoo wer jar wo mono!
Á bay wo de ko re wa,
jar se maga sii wo soɗ fodo koo ɓaaran wo tiʼ i,
day yaʼ wo wiigi diŋ baa maga kãã ma yãã jobo go gà mono.
21Wããn we go ni nday kaŋ nen jar go ti ɓe ga a nono so!
Daga á mo ndal wo ti holaŋ kããra so!
Wose hay joŋ ga à mo laa fẽẽre sen wo
le hãã ti tĩĩgi were day hãã le ti wur sen se de wãɗ rage mo la?
Bay diŋ ndi Manwur wa yawla?
Baa ma tigriŋ bay go faale ɓi wa so.
Baa ma keɗed ga yãã jar go doo ndi nono bay boŋ wa so hase.
22Mbuɗ we nen ɓay ti ɓi ni nday yãã yaŋ go,
nday jar ma ti jag sir tawgen ɓuy!
Werga, ndi diŋ Baa no, ma tigriŋ bay wa so hase.
23Ndi hãʼ go de see ɓi tuu,
wããre maga kal go jag ɓi diŋ fen ma keɗed no,
diŋ wããre maga jobo ɓlagn ge gà.
Jar ɓuy laa ge wo kõyõgre yaŋ pel ɓi,
jar ɓuy haʼ wo yaŋ de jag ɓaara de ɓi.
24Wosela ɓuy wãã ge yaŋ ga :
Joŋ fẽẽre ma ti ngel ɓen wo,
day de egre lay nà diŋ Manwuri.
Jar maga hay tĩĩ wo go de ɓe fer
ge wo yaŋ le see ɓe de wuɗ ti de sõõre.
25Jar ma ti wer mani Israyeln daʼ ge wo see ɓaara day
togoɗ ge wo see ɓaara nà nen doo Manwuri.
Currently Selected:
ESAY 45: TUP
Highlight
Copy
Compare
Share
Want to have your highlights saved across all your devices? Sign up or sign in
Tupuri Bible © Bible Society of Cameroon, 2016. All rights reserved.
